Mwa 19

Ũthũku wa Andũ ma Sondomu

1Yĩla ala alaĩka elĩ mavikie Sondomu ĩa mawĩoo, Loto ailyĩ mũvĩanĩ wa ndũa ĩsu. Yĩla wamonie, nĩwookĩlile amathaũa, na akumana atina nthĩ na ũthyũ amanenge ndaĩa. 2Nĩwameie atĩĩ, “Anene makwa nĩngũmwĩsũva mũke mũsyĩ kwakwa nyie mũthũkũmi wenyu. Nĩmũtonya kũthambĩa maũũ vo na mũikomela o vo, na ĩndĩ kwakya mũiamũka tene na kũendeea na kyalo kyenyu.”

Ĩndĩ mamũsũngĩa mamwĩa, “Aiee, ithyĩ twĩkomela kũũ nzĩanĩ sya ndũa.”

3Loto nĩwamesũvie mũno nginya maendany'a nake mũsyĩ kwake. Nĩwamauĩie lĩu mũseo, vamwe na mĩkate ĩte mbota na maya.

4Aeni asu matanamba kũkoma, aũme onthe ma ndũa ĩsu ya Sondomu, ma mũika na ala akũũ nĩmathyũlũlũkile nyũmba ya Loto. 5#Asi 19.22-24 Nĩmeetie Loto mamũkũlya atĩĩ, “Maĩva aũme ala mokie kwaku wĩoo ũũ? Maumaalye vaa nza tũĩ nĩ kana tũmanyane kĩ-mwĩĩ namo!”

6Loto nĩwaumaalile na atia avinga mũomo. Nĩwaendie vala maĩ, 7na amea, “Nĩngũmwĩsũva anyanyawa mũikeke ũndũ ũthũkĩte ta ũũ! 8Sisyai, nĩ na eĩtu elĩ matanamba kũmanyana kĩ-mwĩĩ na mũndũ-ũme. Ekai nĩmũetee eĩtu asu vaa nza na mũimeka ũndũ mũkwenda, ĩndĩ mũikeke aũme aa ũndũ, nũndũ nĩ aeni makwa na no nginya nĩmasũvĩe.”

9Ĩndĩ andũ asu mamwĩa, “Twathũkĩe.” Nĩmasyokie masya, “Mũndũ ũũ ookie kũũ kwitũ ta mũeni, nayu eenda kwĩtw'a mũsili. Yu twĩkwĩka naĩ mbee wa ũndũ tũkwĩkana na andũ asu.” Nĩvo ĩndĩ mamũluutile Loto mũno na mathengeea nĩ kana matũle mũomo. 10Ĩndĩ ala aũme elĩ maĩ nyũmba nthĩnĩ nĩmatambũũkisye moko, makwata Loto mamũlikya nyũmba na mavinga mũomo. 11#2Asu 6.18 O ta ũu aũme asu elĩ nĩmatumie aũme asu ma Sondomu, ma mũika na ala akũũ matw'ĩka ilalinda weethĩa maitonya kwona vala mũomo ũĩ.

Loto Ayuma Sondomu na Kũthi Nzoali.

12Aũme asu elĩ nĩmakũlilye Loto atĩĩ, “Ve mũndũ ũngĩ mwĩkalanasya kũũ: Athoni maku, ana maku, eĩtu maku, kana mũndũ waku o na wĩva ũtonya kwĩthĩwa e ndũanĩ ĩno? Maumye vaa, 13nũndũ nĩtũkwananga Sondomu. Mwĩai Ngai nĩwĩw'ĩte maũndũ mathũku ala mekwĩkwa nĩ andũ aa na nũtũtũmĩte tũke kwananga ndũa ĩno ya Sondomu.”

14Kwoou Loto nĩwaendie na eea athoni make ala mendaa kũtwaa eĩtu make atĩĩ, “Umai vaa nĩkwĩthĩwa Mwĩai Ngai akilĩlye kwananga ndũa ĩno.” Ĩndĩ athoni asu make moonaa Loto ta ũkũvũa ngũĩ.

15Kĩoko tene alaĩka asu nĩmakalaatile Loto maimwĩa atĩĩ, “Ũkĩla, na ũyosa mũka waku na eĩtu maku ala me vaa mume vo mũikese kũminwa yĩla ndũa ĩno ĩkwĩthĩwa ĩyanangwa.” 16#2Vet 2.7 Yĩla Loto wekalangie, aũme asu elĩ nĩmamũkwatie kw'oko vamwe na mũka na eĩtu make elĩ. Nĩmamatongoeisye mamaumya ndũanĩ ĩsu, nĩkwĩthĩwa Mwĩai Ngai nĩwamew'ĩie tei. 17Nĩvo ĩndĩ ũmwe wa alaĩka asu waisye atĩĩ, “Kĩai mũvonokye mathayũ menyu! Mũikasisye ĩtina kana kũũngama ũiĩnĩ. Kĩai mũthi iĩmanĩ nĩ kana mũikaminwe.”

18Ĩndĩ Loto amwĩa, “Aiee mũnene wakwa, nditonya kũvika iĩmanĩ. 19Nĩwambĩka nesa mũno, na watangĩĩa thayũ wakwa, ĩndĩ iĩma isu syĩ vaasa mũno kuma vaa nĩĩ. Ũthũku ũsu mũnene nũũmbĩthĩa ndavikĩte vo na ngĩkw'a. 20Sisya ndũa ĩĩya nini yĩ vakuvĩ ũndũ ndonya kũkĩa ngathi vo. Kwoou mbĩtĩkĩlye ngevithe vo nũndũ nĩ ndũa nini, na thayũ wakwa ũkatangĩĩwa.”

21Mũlaĩka amũsũngĩa amwĩa atĩĩ, “Ĩĩ, nĩneetĩkĩla ũu wangũlya, kwoou ndiananga ndũa ĩsu waneena ĩũlũ wayo.” 22Ĩndĩ ĩkalaate ũkĩe ũthi vo nĩkwĩthĩwa ndiĩka ũndũ o na ũmwe ũtavikĩte vo.

Nũndũ Loto nĩwamĩtie ndũa nini, nĩkyo kyatũmie yĩtwa Nzoali.#19.22 Nzoali: Ĩsyĩtwa yĩĩ kwa Kĩevelania yĩtamũkĩkaa ta Nini.

Kwanangwa kwa Sondomu na Ngomola

23Loto aivika Nzoali syũa yaĩ yĩnauma. 24#Mat 10.15; 11.23-24; Lk 10.12; 17.29; 2Vet 2.6; Yuta 7 Nĩvo ĩndĩ Mwĩai Ngai waetie mwaki wa lavuti ndũanĩ ya Sondomu na Ngomola. 25Nĩwaanangie ndũa isu vamwe na ũiĩ na andũ onthe ala matũaa ndũanĩ isu, na kyonthe kĩla kyameete ĩũlũ wa nthĩ. 26#Lk 17.32 Ĩndĩ mũka wa Loto nĩwavĩndũkie asisya ĩtina na atw'ĩka ĩvia ya mũnyũ.

27Ũnĩ ũsu kĩoko tene, Avalaamu nĩwasyokie vala vandũ waũngyĩ mbee wa Mwĩai Ngai. 28Nĩwasyaisye ĩtheo kwelekela Sondomu na Ngomola, na ũiĩ w'onthe na oona syũki yingĩ yũkĩlĩte kuma nthĩ ĩsu yĩilyĩ ta syũki yumĩte ĩikonĩ ĩnene. 29Kwoou yĩla Ngai waanangie ndũa ila syaĩ ũiĩnĩ, nĩwalilikanile Avalaamu na aumya Loto thĩnanĩ ũsu mũnene, atanananga ndũa ĩsu vala Loto watwĩe.

Wumo wa Amoavi na Aamimoni

30Loto nĩwambatie auma Nzoali na athi kũtũa iĩmanĩ e na eĩtu make elĩ. Eekie ũu nũndũ nĩwakĩaa kwĩkala Nzoali; ekalile ngunganĩ e na eĩtu make. 31Mwĩĩtu ũla mũkũũ nĩweeie mũinae atĩĩ, “Nau yu nũendee na kũkũa na vai aũme kũũ ĩũlũ wa nthĩ matonya kũtũtwaa nĩ kana twĩthĩwe na syana. 32Kwoou tũnenge ĩthe waitũ ndivai anyw'e amilwe na ĩndĩ tũimanyana kĩ-mwĩĩ nake nĩ kana twĩthĩwe na syana kuma kwake.” 33Ũtukũ ũsu, eĩtu asu nĩmanengie ĩthe woo ndivai amilwa na mwĩĩtu wake ũla mũkũũ amanyana kĩ-mwĩĩ nake. Loto ndaamanya kana mwĩĩtu wake nĩwĩkie ũu nũndũ aĩ mũmile mũno.

34Mũthenya ũla waatĩĩe, mwĩĩtu ũla mũkũũ nĩwatavisye mũinae amwĩa atĩĩ, “Nĩnĩmanyanie kĩ-mwĩĩ na nau ũtukũ wa ĩyoo. Nĩtũmũnenge ndivai ĩngĩ ũmũnthĩ wĩoo amilwe naku ũimanyana kĩ-mwĩĩ nake. Nĩvo ĩndĩ ithyĩ twĩ elĩ twĩĩthĩwa na syana kuma kwa ĩthe waitũ.” 35Ũtukũ ũsu eĩtu asu nĩmanengie ĩthe woo ndivai ĩngĩ amilwa na mwĩĩtu wake ũla wa ĩtina amanyana kĩ-mwĩĩ nake. Loto ndaamanya kana mwĩĩtu wake nĩwĩkie ũu nũndũ aĩ mũmile mũno. 36Kwa nzĩa ĩsu eĩtu asu ma Loto elĩ nĩmaitavie kwa kũmanyana kĩ-mwĩĩ na ĩthe woo. 37Mwĩĩtu ũla mũkũũ nĩwasyaie kavĩsĩ na aketa Moavi. Ũsu nĩwe ĩthe wa andũ ala o na ũmũnthĩ metawa Amoavi. 38Mwĩĩtu ũla wa ĩtina nĩwasyaie kavĩsĩ na aketa Mbeni-ami. Ũsu nĩwe ĩthe wa andũ ala o na ũmũnthĩ metawa Aamimoni.

Attualmente Selezionati:

Mwa 19: KAMBA

Evidenziazioni

Copia