Mwa 15

Ngai Aiseũvya Ũtianĩo na Avalamu

1Ĩtina wa maũndũ asu Mwĩai Ngai nĩwaneenie na Avalamu woninĩ na amwĩa atĩĩ, “Ndũkakĩe Avalamu. Ngakũsũvĩa kuma mĩisyonĩ na ũkũnenga mũthĩnzĩo mũnene mũno.” 2Ĩndĩ Avalamu amwĩa, “Ame Mwĩai Ngai Mũsumbĩ, mũthĩnzĩo waku ũkeethĩwa wĩ wa ũtethyo mwaũ kwakwa nakwa ndi syana na Elieseli kuma Ndamasikũ nĩwe ũkethĩwa mũtiĩwa wa syĩndũ syakwa? 3We ndwaanenga syana na ũmwe wa ngombo syakwa nĩwe wĩtiĩwa syĩndũ syakwa.”

4Nĩvo ĩndĩ Mwĩai Ngai waneenie na Avalamu ĩngĩ amwĩa atĩĩ, “Elieseli ngombo yaku ndakatiĩwa syĩndũ syaku. Mwana waku mwene nĩwe ũkatiĩwa syĩndũ isu.” 5#Alo 4.18; Aevl 11.12 Mwĩai Ngai nĩwaumaalilye Avalamu nza na amwĩa, “Sisya matunĩ na ethĩwa nũtonya ũitala ndata syonthe ila syĩ vo; nzyawa syaku ikeethĩwa singĩvĩte ta ndata isu.”

6 # Alo 4.3; Aka 3.6; Yak 2.23 Avalamu nĩwaĩkĩĩie ũndũ Mwĩai Ngai wamwĩa na kwondũ wa ũu Mwĩai Ngai amũtw'ĩĩa kwĩthĩwa mũlũngalu. 7Mwĩai Ngai nĩwasyokie amwĩa atĩĩ, “Ninyie Mwĩai Ngai ũla wakumisye Ulu nthĩ ya Mbavilonĩ nĩ kana ngũnenge nthĩ ĩno ũmesye.”

8Ĩndĩ Avalamu amũkũlya, “Ame Mwĩai Ngai Mũsumbĩ, ngamanya ata kana nthĩ ĩno ĩkeethĩwa yĩ yakwa?”

9Mwĩai Ngai amũsũngĩa amwĩa, “Ndetee moi ya myaka ĩtatũ, mbũi nga ya myaka ĩtatũ, ndũũme ya myaka ĩtatũ, ĩvũĩ na ndumbũ.” 10Avalamu nĩwaeteie Ngai syĩndũ isu syonthe, asyatũanĩlya katĩ na aia nyusu ĩmwe yasyo yelekele ĩla ĩngĩ; ĩndĩ ndaa atũany'a i nyũnyi. 11Ndei nĩsyookie syavũĩla nyamanĩ isu ĩndĩ Avalamu ailũngya.

12 # Yovu 4.13,14 Syũa yĩithũa, Avalamu nĩwakwatiwe nĩ too mũnene. Nĩvo ĩndĩ kweethĩiwe na kĩvindu kingĩ kyamũtelemya. 13#Kuma 1.1-14; Meko 7.6 Mwĩai Ngai nĩweeie Avalamu atĩĩ, “Manya kwa w'o kana nzyawa syaku ikekala ũeninĩ nthĩ ĩte yoo. Ikeethĩwa syĩ ngombo na kũthĩnĩw'a kw'o vandũ va myaka maana ana. 14#Kuma 12.40-41; Meko 7.7 Ĩndĩ nakwa ngasilĩla nthĩ ĩsu yĩmakwata ũkombo, na ĩtina mayuma kw'o me na ũthwii mwingĩ mũno. 15We naku ũkakw'a na mũuo na ũithikwa wĩ na ũkũũ wa myaka mingĩ. 16Ĩtina wa mosyaanĩo ana, nzyawa syaku ikasyoka nthĩ ĩno ya Kanaani, nĩkwĩthĩwa ndikalũngya Aamoli nginya ũthũku woo wingĩve wĩthĩe no nginya nĩmakany'e.”

17Yĩla syũa yathũie na kwatuka, ĩiko ya mwaki yĩtoete na kĩsinga kyakene nĩsyaumĩlile mĩtũkĩ na syavĩtĩla katĩ wa ilungu isu sya nyama. 18#Meko 7.5 Mũthenyanĩ o ũsu Mwĩai Ngai nĩwaseũvisye ũtianĩo na Avalamu na amwĩa atĩĩ, “Nĩngwathana kũnenga nzyawa syaku nthĩ ĩno, kuma mũvakanĩ wa Misili kũthi kũvika ũsĩnĩ wa Euvalati, 19nthĩ ya Akeni, Akenisi, Akatimoni, 20Aititi, Avelisi, Alevai, 21Aamoli, Akanaani, Angilikasi na Ayevusi.”

Attualmente Selezionati:

Mwa 15: KAMBA

Evidenziazioni

Copia