मत्ती 7

किसी पर इल्जाम नीं लाणा

(लूका 6:37,38,41,42)

1“किसी पर इल्जाम नीं लगावा, नईतां तुहां पर बी इल्जाम लगणा। 2काँह्भई जिस तरिके ने तुहें इल्जाम लगां ये, तियां इ परमेशरा तुहांरा बी न्याय करना; कने तियां जे तुहें दुज्जेयां रा न्याय कराँ ये, तियां इ तुहांरा बी न्याय हूणा।”

3“किसी रियां छोट्टी-छोट्टी भूलां पर ध्यान मता देन्दे, तियां जे भई किसी रिया आक्खीं च पैईरे तिनके जो देखणा; पर तिज्जो अपणे अन्दरा री बुराई नीं सुझदी सै जे लट्ठे साई बौहत बड्डी? 4तां जे तेरे इ अन्दर बुराई समाईरी, तां तू अपणे भाईये जो कियां बोल्ली सक्कां, भई ‘ल्या भाई हऊँ तेरिया कमियां जो दूर करी दूँ?’ 5अरे कपटी! पैहले तू अपणिया बुराईया जो अपणे अन्दरा ते निकाल़, फेरी तांई तू ठीक ढंगा ने देक्खी पांगा कने अपणे भाईये रिया कमियां जो दूर करी सकगा। 6सै लोक जे परमेशरा रे सन्देशा जो सुणना नीं चाहन्दे तिस्सो मता सुणादे। जे तुहें येढ़ा करगे, तां ये पवित्र चीज़ कुत्तयां जो कने मोती सूराँ रे अग्गे सटणे साई हुणे भई सै सिर्फ तिन्हौं पैराँ हेठ रौंदणा कने पलटी ने तिन्हां तुहांरा नुक्शान करना।”

मंगगे तां मिलणा

(लूका 11:9-13)

7सै जे तुहांरियां जरूरतां इयां तिसजो परमेशरा ते मंगा, तिस सै तुहांजो देणा; टोल़गे तां तुहां पाणा, खटखटाणा जारी रखा कने दरवाजा खोल्या जाणा। 8काँह्भई सै जे कोई मंगां, तिस्सो मिलां; कने सै जे टोल़ां, सै पां; कने सै जे खड़कां, तिस खातर दरवाजा खोल्या जाणा। 9तुहां चते येढ़ा कुण माहणु आ, भई जे तिसरा पुत्र तिसते रोटी मंग्गो, तां सै तिस्सो पत्थर देओ? 10या मच्छी मंग्गो, तां सै अपणे बच्चे जो जहरिला सर्प देओ? 11इस खातर तां जे तुहें बुरे हुईने, अपणयां बच्चयां जो खरियां चिज़ां देणा जाणाँ ये, तां तुहांरा स्वर्गीय पिता अपणे मंगणे औल़यां जो खरियां चिज़ां काँह नीं देंगा? 12इस खातर हरेक माहौल्ला च लोकां ने तुहांरा बर्ताव ठीक तियां इ हो जिस तरिके रे बर्तावा री आशा जे तुहें अपणे खातर करां ये, काँह्भई व्यवस्था कने भविष्यवक्तयां री शिक्षा बी येई हाई।

स्वर्ग कने नरका रा रस्ता

(लूका 13:24)

13परमेशरा रे राज्जा च जाणे रा रस्ता तंग दरवाजे ते हुईने जां। काँह्भई चौड़ा सै दरवाजा कने सान आ सै रस्ता सै जे नरका तक लेई जां; इस खातर बौहत सारे लोक ये सै जे तिसच दाखल हुआं ये। 14काँह्भई तंग आ सै दरवाजा कने मुश्कल आ सै रस्ता सै जे अनन्त जीवना रिया तरफा जां; इस खातर बौहत इ थोड़े लोक ये सै जे तिसच दाखल हुआं ये।

कर्म इ दस्सां ये भई कुण केढ़ा

(लूका 6:43,44,46; 13:25-27)

15“झूट्ठे भविष्यवक्तयां ते बचीने रौआ! सै तुहांले आमतौर पर भेड्डां रे रुपा च औआं यें, पर हकीकत च सै खूँखार भेड़िये सै जे लोकां पर हमला करां ये। 16तिन्हांरे कम्मां ते तुहां तिन्हांजो पछयाणी लेणा। क्या कोई बराड़ियां ते अँगूर, कने ऊँटकटाराँ ते अंजीर तोड़ां ये? 17इस तरिके ने सारे खरे पेड़ खरा फल़ दें कने सारे बुरे पेड़ बुरा फल़ दें। 18खरे पेड़ा पर बुरे फल़ नीं लगी सकदे, कने नां बुरे पेड़ा पर खरा फल़ लगी सक्कां। 19माहणु तिन्हां सारयां पेड़ां जो बड्डी टुक्की ने अग्गी च फुकी देआं, तियां इ झूट्ठे भविष्यवक्तयां सजा पाणी। 20इयां तिन्हांरे कम्मां ते तुहां तिन्हांजो पछयाणी लेणा।”

21सै जे मेरने, हे प्रभु, हे प्रभु, बोल्लां, तिन्हां चते हरेक स्वर्ग राज्जा च नीं जाणा, पर सै जे स्वर्गा च रैहणे औल़े मेरे पिता रिया इच्छा जो पूरी कराँ, सैई तिसच प्रवेश पाई सक्कां। 22न्याय रे दिन मतयां सारयां मेरने बोलणा; हे प्रभु, हे प्रभु, क्या अहें तेरे नौआं ते भविष्यवाणी नीं किति? कने तेरे नौआं ते बुरीआत्मां जो नीं कड्डया, कने तेरे नौआं ते बौहत सारे सामर्था रे काम्म नीं कित्ते? 23फेरी मांह तिन्हांने खुल्लेआम गलाई देणा, भई मैं कदीं नीं स्वीकार कित्या भई तुहें मेरे अपणे :

“हे कुकर्म करने औल़यो,

मेरे लाते दफा हुई जवा।”

इक समझदार कने इक मूर्ख

(लूका 6:47-49)

24इस खातर हुण सै जे कोई मेरियां गल्लां सुणीने तिन्हां पर अमल कराँ, तिसरी तुलना तिस समझदार माहणुये ने हूणी तिने जे अपणे मकाना री निऊँ चट्टाना पर बणाई। 25कने बरखा हुई, बाढ़ां आईयां, कने आँधियां चलियां, कने ये सब तिस मकाना ने टकराये, पर सै रुढ़या निआं, काँह्भई तिसरी निऊँ मजबूत चट्टाना पर रखीरी थी। 26“पर सै जे मेरियां गल्लां सुणां पर तिन्हां पर नीं चलदा, सै तिस मूर्ख माहणुये साई हूणा तिने जे अपणा मकान रेता पर बणाया। 27बरखा हुई, कने बाढ़ां आईयां, कने आँधियां चली, कने तिस मकाना ने टकराईयां कने सै मकान पूरा इ रुढ़िग्या।”

28यीशु ताहली जे ये गल्लां बोल्ली बैट्ठया, तां येढ़ा हुया भई काफी लोक तिसरे उपदेशा ते हैरान हुये, 29काँह्भई सै तिन्हांरे शास्त्रियां साई नीं, पर अधिकारियां साई तिन्हौ उपदेश देआं था।

Attualmente Selezionati:

मत्ती 7: KFSNT

Evidenziazioni

Copia