लूका 20

यीशुये रे अधिकारा रा स्वाल

(मत्ती 21:23-27; मरकुस 11:27-33)

1इक दिन येढ़ा हुया भई ताहली जे यीशु मन्दरा च लोकां जो उपदेश देईरा था कने खुशखबरी सुणाई कराँ था, तां तिस बगत मुखियायाजक कने शास्त्री, बजुर्गां सौगी तिन्हाले आईने खड़ीगे; 2कने यीशुये ते पुच्छया, भई अहांजो दस्स तू इन्हां कम्मां जो किस अधिकारा ने कराँ, कने सै कुण आ, तिने जे तिज्जो ये अधिकार दितिरा? 3तिने तिन्हांजो जबाब दित्या, “हऊँ बी तुहांते इक स्वाल पुछां, पैहले तिसरा जबाब देआ! 4माहणुआं जो बपतिस्मा देणे रा अधिकार यूहन्ने जो परमेशरा ते मिलया था या माहणुआं ते।” 5फेरी तिन्हें अप्पूँ बाटियें बिचार कित्या, “जे अहें इसने येढ़ा गलांगे भई परमेशरे दित्या था, तां तिस बोलणा भई फेरी तुहें तिस पर काँह नीं विश्वास कित्या। 6कने जे अहें इसने गलांगे भई सै सिर्फ माहणुयें दितिरा, तां तिन्हां लोकां अहां पर पत्थर मारने, काँह्भई ये सचमुच जाणाँ ये भई यूहन्ना इक भविष्यवक्ता था।” 7इस खातर तिन्हे जबाब दित्या, “अहें नीं जाणदे।” 8तिन्हां रिया इसा गल्ला पर यीशुये गलाया, “तां तुहांजो हऊँ बी नीं दस्सी सकदा, भई इस कम्मां जो हऊँ किस अधिकारा ने कराँ।”

दुष्ट करसाणां रा उदाहरण

(मत्ती 21:33-46; मरकुस 12:1-12)

9फेरी यीशुये लोकां जो ये उदाहरण दित्या : “भई किसी माहणुये अंगूरां रा बगीचा लगाया, कने करसाणां जो तिसरा ठेका देईने कईयां दिनां खातर अप्पूँ दुज्जे मुलखा चलिग्या। 10ताहली जे अंगूर चुगणे रा बगत आया, तां तिने अपणे इक्की नोकरा जो अंगूरां चाते अपणा हिस्सा लेणे खातर भेज्या। पर तिन्हे करसाणें तिस्सो मारी कुट्टी ने खाली हत्थ भेजित्या। 11फेरी तिने मालके इक होर दास भेज्या, कने तिस सौगी बी तिन्हे येढ़ा इ बरताव कित्या, तिसजो बी मारया कुट्टया कने बेज्जत करीने खाली हत्थ वापस भेजित्या। 12बाद बिच तिने मालके अपणा तिज्जा नोकर भेज्या, पर तिन्हे करसाणें तिसजो बी घायल करीने खाली हत्थ बाहर कड्डित्या। 13बगीचे रे मालके गलाया, हुण हऊँ क्या करूँ? हऊँ अपणे पुत्रा जो तिन्हाले भेजगा, हुई सक्कां भई सै तिसरा आदर करगे। 14पर जिस मौके करसाणें तिसरे मुण्डुये जो देख्या, तां सै अप्पूँ चियें गलाणे लगे, देक्खा, इस बगीचे रा वारस आई कराँ। जे अहें इस्सो मारी देईये तां इसरी सारी जायदात अहांरी हुई जाणी! 15कने तिन्हे सै बगीचे ते रगड़ीने बाहर कड्डया कने मारीत्या।” फेरी यीशुये तिन्हाते पुच्छया, “तुहांजो क्या लगां? तिस बगीचे रा मालक तिन्हां करसाणां ने केढ़ा बरताव करगा? 16हऊँ दस्सां, तिस आईने तिन्हां करसाणां जो मारीने खत्म करी देणा, कने अंगूरां रा बगीचा किसी होरी करसाणां ले सम्भाल़ी देणा।” येढ़ा सुणीने तिन्हे गलाया, “परमेशर येढ़ा कदीं नीं करो।” 17यीशुये तिन्हां खा देख्या कने गलाया, “तां फेरी पवित्रशास्त्रा च ये क्या लिखिरा? तिस पत्थरा जो जे राजमिस्त्रियें बेकार समझीने कण्डे करी तरा था, सैई पत्थर हुण कुणे रा खास पत्थर हुईगरा। 18सै जे कोई तिस पत्थरा पर रुढ़गा तिस चकनाचूर हुई जाणा, कने तिसरे गास जे सै पत्थर पौंहगा, सै तिस जिगल़ी देणा।”

कैसरा जो कर देणा

(मत्ती 22:15-22; मरकुस 12:13-17)

19शास्त्रियें कने मुखियायाजकां तिस बेले जे ये उदाहरण दित्या, तां सै इकदम तिस्सो पकड़ना चाँह थे, काँह्भई सै जाणीगे भई यीशु अहांरी तरफ ईशारा करी रां भई इस कहाणिया रे करसाण अहें लोक ये, पर सै लोकां ते डराँ थे। 20सै सही मौके रिया तलाशा च थे, इस खातर तिन्हे अगुवेयां किछ जासूसां जो धर्मी माहणुआं रे भेषा च भेज्या भई यीशुये री कोई येढ़ि गल्ल पकड़ा तिसरी शिकायत जे अहें अधिकारियां ने करी सक्को ताकि सै तिसजो गिरफ्तार करी लो। 21तिन्हे जासूसें गलाया, “गुरू जी, अहें जाणाँ ये भई तू ठीक बोलां कने सखां बी आ, कने न त किसी ने कोई भेदभाव रक्खां, पर तुहें सच्चाईया ने परमेशरा रा रस्ता दस्सां ये। 22अहांजो येढ़ा दस्सा: भई क्या कैसरा जो कर देणा ठीक आ कि नीं?” 23यीशु तिन्हां रिया चलाकिया जो जाणिग्या कने तिन्हाजो गलाया, 24“तुहें मिन्जो इक दिनार दस्सा।” फेरी तिन्हाते पुच्छया, “इस पर किसरा नौं कने फोटू आ?” तिन्हे गलाया, “कैसरा रा।” 25यीशुये गलाया, तां ठीक आ, “सै जे कैसरा रा, सै कैसरा जो दवा। पर सै जे परमेशरा रा तिस्सो परमेशरा जोई दवा।” 26सै लोकां रे सामणे इसा गल्ला च तिस्सो पकड़ी नीं सक्के, पर सै जासूस यीशुये रे जबाबां ते हैरान रेईने, चुप हुईगे।

जिऊंदा हूणा कने ब्याह

(मत्ती 22:23-33; मरकुस 12:18-27)

27फेरी सदूकी सै जे बोल्लां ये भई मरीरयां रा जिऊंदा हूणा त हाया इ निआं। तिन्हां चा ते कितणेयां तिसले आईने पुच्छया। 28भई “गुरू जी, मूसे अहां जो ये व्यवस्था दित्तिरी भई जे किसी रा भाई अपणिया जनाना रे जिऊंदा हुन्दे हुये बिणा सन्ताने मरी जाओ, तां तिसरा भाई तिसरिया विधवा जो ब्याई ने अपणे भाईये खातर, तिसाते बच्चा पैदा करी सक्कां। 29तां येढ़े इ सात्त भाई थे, सब्बीं ते बड्डे भाईये रा ब्याह हुया कने सै बगैर बच्चयां तेई मरीग्या। 30तिसरे दुज्जे भाईये तिसा विधवा ने ब्याह कित्या, पर सै बी बिणा वच्चयां तेई मरीग्या। 31फेरी तिज्जे भाईये बी तिसा विधवा ने ब्याह कित्या कने सै बी बिणा संतान इ मरया इसा रितिया ने सत्तां रे सत्त भाईयें तिसा जनाना ने ब्याह कित्या पर सै सब बिणा किसी बच्चे तेई मरी मुकीये। 32बाद च सै विधवा जनाना बी मरीगी। 33हुण अहांरे पुछणे रा मतलब येआ भई जिऊंदा हुणे पर तिन्हां सत्तां चते सै किसरी जनाना हूणी? काँह्भई सै सत्तां भाईयां री जनाना रैई चुक्कीरी थी।” 34यीशुये तिन्हांते गलाया, “ब्याह त इस संसारा च लोकां रे खातर आ। 35पर औणे औल़े जुगा च येढ़ा किछ नीं हूणा, काँह्भई सै जे मरी मुकीगरे तिन्हां चा ते जिऊंदा हुणे रे लायक लोक, ताहली जे ज्यून्दे हुणे, तिस जुगा च लोकां नांत ब्याह करने, कने नां जनानां ब्याह च दित्तियां जाणियां। 36कने तिन्हां फेरी कदीं नीं मरना, काँह्भई येढ़िया हालता च सै स्वर्गदूतां रे बराबर हुणे, कने नौंये जीवना च भीं ते जिऊंदा किति रे परमेशरा रे पुत्र हुणे। 37पर इसा गल्ला जो भई मूईरे ज्यून्दे हुई जायें : मूसे बी बल़दे हुये बुटड़यां री कहाणिया च प्रगट कित्या भई सै प्रभुये जो अब्राहम, इसहाक कने याकूब रा परमेशर बोल्लां। 38परमेशर त मुड़दयां राँ नीं पर ज्यून्दया रा परमेशर आ: काँह्भई तिसरिया नज़राँ च सारे ज्यून्दे इ हाये।” 39फेरी ये सुणीने यहूदी शास्त्रियां चा ते कितणेयां गलाया, भई “गुरू जी, तुहें ठीक गलाया।” 40इसते बाद दुज्जी दफा किसी जो प्रभुये ते किछ बी पुछणे री हिम्मत नीं पैई।

मसीह किसरा पुत्र आ

(मत्ती 22:41-46; मरकुस 12:35-37)

41फेरी यीशुये तिन्हांते पुच्छया, “मसीह जो दाऊद रा पुत्र कांह् करीने बोल्लां यें? 42काँह्भई राजा दाऊद खुद भजन संहिता रिया कताबा च बोल्लां : भई परमेशरे मेरे प्रभुये जो गलाया, 43तू मेरे सज्जे पासे बैठ, तदुआं तक जे हऊँ तेरे दुश्मणां जो पूरी तरह हराई नीं दूँ। 44जबकि दाऊद मसीह जो अपणा प्रभु बोलां; इस खातर सै इक्की वगता च तिसरा पुत्र कियां हुई सक्कां।”

शास्त्रियां ते खबरदार

(मत्ती 23:1-36; मरकुस 12:38-40)

45ताहली जे सारे लोक ये गल्लां सुणीराँ थे, तां यीशुये अपणे चेलयां ने गलाया। 46“शास्त्रियां ते बचीने रौआ, इन्हौं लम्मे-लम्मे चोल़े पैहनीने घुमणा खरा लगां, कने इन्हौं बज़ाराँ च नमस्कार, कने यहूदी सभा घराँ च खास आसण, कने धाम्मां च खास जगह प्यारे लगां ये। 47सै विधवां रा घर बार खाई जांये, कने दसणे खातर बड़िया देरा तक प्राथना करदे रैं, इस खातर इन्हौं बौहत भयानक सजा भुगतणे पौणी।”

Attualmente Selezionati:

लूका 20: KFSNT

Evidenziazioni

Copia