यूहन्ना 7

यीशु कने तिसरे भाई

1इन्हां गल्लां ते बाद यीशु गलील प्रदेशा च घुमदा रैया; काँह्भई यहूदी अगुवे तिस्सो मारने रा जतन करीराँ थे, इस खातर सै यहूदिया प्रदेशा च घुमणा नीं चाहन्दा था। 2यहूदियां रा झोंपड़ियां रा त्योहार नेड़े आईरा था। 3इस खातर यीशुये रे भाईयें तिसजो गलाया, “तुहांजो ये जगह छड्डिने यहूदिया प्रदेशा च चली जाणा चाहिन्दा, ताकि तेरे चेले तेरे चमत्काराँ जो ऊत्थी बी देक्खी सक्को तिन्हांजे तू कराँ। 4काँह्भई येढ़ा कोई नीं हूणा सै जे मशहूर हूणा चाओ, कने लुक्खीने काम्म करो। जे तू चमत्कारा रे काम्म कराँ, तां अप्पूँजो सारे संसारा रे सामणे परगट कर।” 5काँह्भई यीशुये रे भाई बी तिस पर विश्वास नीं करदे थे। 6फेरी तिने तिन्हांने गलाया, “तुहांरे खातर सारा बगत आ, पर हल्तियें तक मेरा सही बगत नीं आईरा। 7संसारा रे लोक तुहांजो बैर नीं करी सकदे, पर सै माहने बैर रक्खां काँह्भई हऊँ तिन्हांरे बरोधा च ये गवाही देआं भई तिन्हांरे काम्म बुरे। 8तुहें त्योहारा च जावा; हऊँ हल्तियें इस त्योहारा च नीं जाई सकदा, काँह्भई हल्तियां तक मेरा बगत पूरा नीं हुईरा।” 9सै येढ़ा गलाणे ते बाद गलील च रुकिग्या।

झोंपड़ियां रे त्योहारा च यीशु

10पर ताहली जे तिसरे भाई त्योहारा च चलिये तां सै अप्पूँ बी गया, पर सै सामणे नीं, छुपीने गया था। 11यहूदी अगुवे त्योहारा च तिस्सो ये बोलीने टोल़णे लगे, भई “यीशु किति आ?” 12कने लोकां च तिसरे बारे गुप-चुप कई सारी गल्लां हुईयां मते जणे बोलीराँ थे, “सै बड़ा खरा माहणु आ।” कने कई बोल्लां थे, “नां, सै लोकां जो भटकां।” 13तां बी यहूदी अगुवेयां रे डरा रे मारे कोई बी माहणु तिसरे बारे च खुल्ही ने नीं बोल्ली पां था।

त्योहारा च यीशुये रा उपदेश

14ताहली जे त्योहारा रे अधे दिन बितिगे; तां यीशु मन्दरा च जाईने उपदेश देणे लगया। 15फेरी यहूदी अगुवे चम्भा करीने गलाणे लगे, “ये माहणु सै जे कदीं स्कूला नीं गया फेरी भीं इतणा किछ कियां जाणाँ?” 16यीशुये तिन्हांजो जबाब दित्या, “सै उपदेश जे हऊँ देआं सै मेरा अपणा निआं, पर ये परमेशरा रिया तरफा ते आ, तिने जे हऊँ भेज्जिरा। 17जे कोई परमेशरा रिया मर्जिया पर चलना चाओ, तां सै इस उपदेशा रे बारे च समझी जांगा भई जो उपदेश हऊँ देआं सै परमेशरा रिया तरफा ते आया या हऊँ अपणिया तरफा ते देई कराँ। 18सै जे अपणिया तरफा ते बोलां, सै अपणी बडयाई करवाणा चाँह; पर सै जे अपणे भेजणे औल़े री बडयाई चांह सैई सच्चा माहणु आ, कने तिसच कोई खोट निआं। 19मूसे त तुहांजो व्यवस्था दित्तिरी, पर तुहां चाते कोई बी तिस पर अमल नीं करदा। तुहें मिन्जो कजो मारना चांये?” 20लोकें जबाब दित्या, “तू बुरीआत्मा रे वशा चा! तिज्जो कुण मारना चांह?” 21यीशुये तिन्हांजो जबाब दित्या, “मैं इक काम्म कित्या कने तुहां सब्बीं जो हैरानी हुईगी। 22इसा वजह ने मूसे तुहांजो खतने रा हुक्म दित्या (ये नियम मूसे रा नीं था बल्कि तुहांरे पूर्वजां ते चलदा आईराँ), कने तुहें विस्राम रे दिन माहणुये रा खतना कराँ ये। 23विस्राम दिना च माहणुये रा खतना इस खातर कित्या जां ताकि मूसे री व्यवस्था नीं टुट्टो, तां तुहें माह पर कजो इस खातर गुस्सा कराँ ये भई मैं विस्राम रे दिन इक्की माहणुये जो बिल्कुल ठीक कित्या? 24मुँह देखीने न्याय नीं करा, पर सच्चाईया रे मुतावक ठीक न्याय करा।”

क्या यीशु इ मसीह आ?

25फेरी यरूशलेम च रैहणे औल़े किछ लोक बोलणे लगे, “क्या ये सैई माहणु निआं, तिस्सो जे यहूदी अगुवे मारने रा जतन करी रायें? 26मगर देक्खा, सै त सारयां लोकां ने निधड़क गलाई बोलीराँ कने कोई तिसजो किछ नीं गलाईरां। क्या यहूदी अगुवेयां सच्चीजो जाणील्या भई येई मसीह आ? 27खैर अहें त इसजो जाणाँ ये भई ये माहणु किति ते आईरा; पर ताहली जे सच्चे मसीह औंणा, तां किसी जो बी पता नीं चलना भई सै कितिते आया।” 28फेरी यीशुये मन्दरा रे अंगणा च उपदेश देन्दे हुये जोरा ने गलाया, “तुहें मिन्जो जाणाँ ये, कने ये बी जाणाँ ये भई हऊँ कित्तिरा। हऊँ त अपणिया मर्जिया ते नीं आईरा, पर मिन्जो भेजणे औल़ा सच्चा, तिस्सो तुहें नीं जाणदे। 29पर हऊँ तिस्सो जाणाँ काँह्भई हऊँ तिसरिया तरफा ते आ कने तिने इ हऊँ भेज्जिरा।” 30तिसरिया इसा गल्ला पर सै यीशुये जो गिरफ्तार करना चाहया, पर कोई बी तिसजो हात्थ नीं पाई सक्कया, काँह्भई तिसरा बगत हल्तियें नीं आईरा था। 31फेरी भीं भीड़ा चते बौहत लोकें तिस पर विश्वास कित्या कने बोलणे लगे, “मसीहे ताहली जे औणा तां तिस क्या इसते बी जादा चमत्कारी नशाण दसणे सै जे इने दस्से?”

यीशुये जो पकड़ने री कोशिश

32फरीसियें लोकां जो यीशुये रे बारे च हौल़यां-हौल़यां ये गल्लां गलान्दे हुए सुणया; कने मुखियायाजकें कने फरीसियें तिस्सो पकड़ने जो मन्दरा रे पैहरेदार भेज्जे। 33इस पर यीशुये गलाया, “हऊँ होर थोड़िया देरा तक तुहां सौगी आ, तिसते बाद माह तिसलौ बापस चली जाणा तिने जे हऊँ भेज्जिरा। 34तुहां हऊँ टोल़णा, पर माह तुहांजो नीं मिलणा; कने तित्थी जे हऊँ आ, तित्थी तुहें नीं आई सकदे।” 35फेरी यहूदी अगुवे अप्पूँ बाटियें गलाणे लगे, “इस किति जो जाणा भई तित्थी जे अहें इस्सो टोल़ी नीं पांगे? शायद इस यूनानी नगरा च तितर-बितर हुईने बसीरे यहूदियां ले जाणा, कने यूनानियां जो बी उपदेश देणा? 36ये क्या गल्ल हुई सक्कां इ सै जे तिने गलाई, भई तुहां हऊँ टोल़णा, पर माह तुहांजो नीं मिलणा; कने तित्थी जे माह हूणा, तित्थी तुहें नीं आई सकदे?”

जीवना रे पाणिये री नदियां

37फेरी त्योहारा रे खत्म हुणे औल़े दिन, सै जे खास दिन आ, यीशु उट्ठया कने जोरा ने गलाया, “जे कोई प्यासा ओ तां मेरले आईने पीओ। 38सै जे माह पर विश्वास करगा, तियां जे पवित्रशास्त्र बोलां तिसरे दिला ते जीवना रे पाणिये री नदियां बैहणे लगी जाणियां।” 39तिने ये बचन पवित्र आत्मा रे बारे च गलाया, तिस्सो जे तिस पर विश्वास करने औल़े पाणे औल़े इ थे; सै आत्मा हल्तियें किसी पर बी उतरी रा नीं था, काँह्भई यीशु हल्तियें अपणिया महिमा च नीं आईरा था। 40फेरी भीड़ा चते किछ लोकें ये गल्लां सुणीने गलाया, “सच्चीजो येई सै भविष्यवक्ता तिसरे औणे री जे अहें उम्मीद करी रांये।” 41होरसी गलाया, “ये मसीह आ।” पर किन्हिये गलाया, “कां? क्या मसीहे गलील प्रदेशा ते औणा? 42क्या पवित्रशास्त्रा च ये नीं लिखिरा भई मसीहा दाऊद रे कुल़ा ते हूणा कने तिस बैतलहम गाँवां ते औणा, तित्थी जे दाऊद रैयां था?” 43इस खातर तिसरिया वजह ने लोकां च फूट पैईगी। 44तिन्हां चते कितणे तिस्सो पकड़ना चांह थे, पर किन्हिये तिसजो हात्थ नीं लाया।

यहूदी अगुवेयां रा अविश्वास

45इस खातर मन्दरा रे पैहरेदार मुखियायाजकां कने फरीसियां ले बापस आये; तिन्हें पुच्छया, “तुहें तिस्सो काँह नीं ल्याये?” 46पैहरेदारें जबाब दित्या, भई “किन्हिये माहणुये कदीं येढ़ियां गल्लां नीं कित्तियां तियां जे सै माहणु बोल्लां।” 47फरीसियें तिन्हाजो जबाब दित्या, “क्या तुहें बी तिसरे जाल़ा च त नीं फसीगे? 48क्या यहूदी अगुवेयां या फरीसियां चते किन्हिये तिस पर विश्वास कित्या? 49पर ये लोक सै जे मूसा री व्यवस्था नीं जाणदे, सै परमेशरा खा ते स्रापित ये।” 50निकुदेमुसे (सै जे पैहले राति जो यीशुये ले आया था कने तिन्हां फरीसियां चते इक था) तिन्हाने गलाया, 51“क्या अहांरी व्यवस्था, किसी माहणुये जो सुणे बगैर भई सै क्या कराँ, गुनहगार समझां इ?” 52तिन्हे तिसजो जबाब दित्या, “क्या तू बी गलीली आ? पवित्रशास्त्रा जो पढ़, तां तिज्जो पता चलना भई गलील प्रदेशा ते कदीं कोई भविष्यवक्ता नीं औणा।” 53फेरी सारे अपणे-अपणे घरा जो चलिये।

Attualmente Selezionati:

यूहन्ना 7: KFSNT

Evidenziazioni

Copia