Ageini 8
8
Ajikini me Alele
1Do Rubanga oko bedo kede iyutun i kom Nua karacel kede leini me obar kede leini me paco kame en oudo etie kede gi i yi yee. Rubanga oko mino yamo obuko i wi lobo di pii oko dwono. 2Di oko cecego wen pie kame tie piny i lobo kede dirisan kame cwei kot ki malo. Kot oko cok, 3di pii oko donyo matere donyo piny momot pi ceng 150. 4I ceng me tomon kiwie kanyaare me duwe me kanyaare mere, yee oko galakin i wi moru me Ararat. 5Pii oko meede ameda matere donyo piny, di i ceng me agege me duwe me tomon mere, wi mori oko cako neno.
6Ingei ceng ot ongwon (40) Nua oko yabo dirisa me yee kame oudo eguro, 7di eko cwano agak. Likame agak oko dwogo, do eko dong por di ewire awira paka tuno pii odwono paka tiek ki wi lobo. 8Di en eko cwano awele pi neno kame pii oudo otieko dwono ki wi lobo, 9do pi kite kame pii oudo pwodi opongo kede wi lobo omio awele likame oko sobolo udo kakame etwero cibo iye tiene, omio eko por edok. Aso, Nua oko cwano cinge di eko make eko rwake i yi yee. 10En eko daro pi ceng kanyaare eko bobo cwano awele. 11Awele oko dwogo otieno kede pote apwodi numu me olibeti i doge. Aso, Nua oko ngeno be oudo pii otieko dwono. 12En eko bobo daro pi ceng kanyaare eko cwano awele, do awele likame oko dwogo bute atwal.
13Kakame Nua oromo kede mwakini 601, i ceng me agege me duwe me acel, oudo pii do otieko dwono ki wi lobo; Nua oko tako wi yee di eko neno be oudo pii do tie tuo ki wi lobo. 14I duwe me are, i ceng me ot are kiwie kanyaare me duwe, wi lobo oudo otieko tuo. 15Di Rubanga oko waco ne Nua be, 16“Wok piny ki yee, in kede dako ni, karacel kede awobe ni kede mon me awobe ni. 17Wot piny gi akuo me egere dedede kame tie kedi, winy kede leini kede gi dedede kame liao alia i wi lobo, tetekeny kinywal di kiko pongo wi lobo.” 18Aso, Nua oko wok piny ki yee, en karacel kede awobe mege kede dako mere kede mon me awobe mege. 19Di do leini dedede, gi dedede kame liao alia, winy dedede, kede gi dedede kame twero ot oko wok piny ki yee di lubere kede egere gi.
Nua Omio Giayala
20Nua oko gero ne Rwot alutari, eko kwanyo egere dedede me leini kede winy kalikame obedo me kwer, di eko wango gi i wi alutari pi bedo giayala awanga. 21Kakame Rwot ongweo kede ngwece me giayala oko yomo cunye, en eko waco be, “Likame bobo abino lamo lobo pi tim me dano, pien tam kame tie i cuny dano reco cako di pwodi etitidi; doko likame abino muducaro gi akuo bala kame atieko timo. 22Tek di piny pwodi tie meede bedo tie, kare bino bedo tie nakanaka me cuno kodi kede me kac. Kare bino bedo tie me ngico kede me lieto, me oro kede me iporo, iceng kede iwor.”
Attualmente Selezionati:
Ageini 8: BILKDC13
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Baibuli I Leb Kumam © Bible Society of Uganda, 2013.
