Yoano 6

Yesu yalisa atu tununu atano

(Tala nawa Mat 14:13-21; Mar 6:30-44; Luk 9:10-17)

1Mwabwamuze Yesu yazauka#6:1 yazauka: ku sali lia chivumbuko. chitende cha Galilea#6:1 chitende cha GILILEA: kusuhwa chacho kilometro 21, unene wacho 13. Chili ni meya abema. (Chenacho cha Tiberiade).

2Mbunga yinene yaamukaula, mumu te haamona yilayi yize alingile yakuwuka mieji. 3Yesu yakanduka ha mulundu, yatwama ho hamwe ni tumbaji twenyi. 4Kubalika, chiwanyino cha Ayuda, te hichabwa hakamwihi. 5Yesu yahetuka, yamona mbunga yinene kaaneza kuli iye, yahula Filipe ngwenyi; “Kulihi mutuhasa kulanda yakulia yinazuku ni kulisa atu wano eswe?” 6(Yachamba ha kweseka Filipe, mumu iye mwene te kananyingika chize malinga.) 7Filipe ngwenyi: “Chibwe kulakaji jaali ja mbongo kutwahashile kulanda najo mbolo jinazuku hanga mutu ni mutu atambule kachihanda.” 8Umwe mukwo wa kuli tumbaji twenyi, Andre, kanuke ka Simone Petulu, yamwamba ngwenyi: 9“Mwana lunga uli hano ni mbolo jitano ja tiriku ni yishi aali. Alioze ngwe kuchi mujikwasa atu abwa haha?” 10Yesu yamwamba ngwenyi: “Twamisenu atu eswe.” (Mwambu unji wabwile kuma kuze.) Mba yaatwama. Kwoka cha malunga te tununu atano. 11Yesu yanda mbolo, yasakwila Zambi, yajanyina waze te anatwama ko, yaaha nawa yishi chizechene. No eswe yaakuta. 12Muze eswe haakuta, Yesu yambila tumbaji twenyi ngwenyi: “Tongonenu yibalubalu yize yasala, hanga nichimwe kuchichi katoka.” 13Kashika yaatongona yibalubalu ya mbolo jitano, yaazalisa tupaya kumi ni aali.

14Muze atu amwene chilayi chize alingile Yesu, yaamba ngwo: “Mutu yono kali mukwa munanyi wa Zambi yoze chatamba kwiza hano hashi.” 15Yesu yanyingika ngwenyi, kanazange kwiza ni kumukwata ni tachi hanga akamupwise mwanangana. Kashika yakatuka ko, yaya ukawenyi ha mulundu.

Yesu yenda ha chitende

(Tala nawa Mat 14:22-33; Mar 6:45-52)

16Muze tangwa hiliendala chikolo, tumbaji twenyi yaapalumuka ku chitende, 17yaanjila mu wato, yaabutuka kuzauka chitende ni kuya ku limbo lia Kafarnaume.#6:17 KAFARNAUME: tala 2:11. Te tangwa hilianjila kulu, alioze Yesu te kanda achiheta. 18Meya ha chitende te kaanafuzu, yiikubwa fuji ya tachi. 19Muze tumbaji haabulula kilometro jisambano, yaamona Yesu te kanende ha meya ni kukundama ku wato. No yeevwa woma. 20Alioze Yesu yaamba ngwenyi: “Yami mwene, kanda nwivwa woma!” 21Yeevwa kuwaha ha kumunjisa mu wato, mba susumuku wato hiwaheta ku mubumbulu, kuze te anatalikisa.

Atu yaafupa Yesu

22Muze hikwacha mbunga yize asalile musali#6:22 musali: ku chivumbuko. lia chitende, yaamona ngwo, shina wato umuwika uliko. Yaanyingika ngwo, Yesu kanjilile ko mu wato hamwe ni tumbaji twenyi, alioze tumbaji wika anakaya. 23Ha shimbu lize, mato akwo, waze akatukile ku limbo lia Tiberiade,#6:23 tiberiade: limwe limbo ku mbumbulu ya chitende cha Galilea, ku chitokelo. yaaheta homa haze alilile mbolo, muze te Mwene Yesu hasakwila Zambi. 24Muze mbunga haamona ngwo, Yesu chibwe tumbaji twenyi keeshiko, yaanjila mu wato, yaahiluka ku limbo lia Kafarnaume#6:24 Kafarnaume: tala 2:11. nikumufupa.

Yesu ye mbolo ya mwono

25Atu waze yaawana Yesu musali,#6:25 musali: ku chitokelo. yaamuhula ngwo: “Longeshi, shimbu lika wahetanga kuno?” 26Yesu ngwenyi: “Chamwenemwene ngunanwambe ngwami, nunangufupu mumu nwalile mbolo ni nwakuchile, hi mumu ko nwamwene yilayi yami. 27Kanda nulingila mbolo yize yakubola, alioze lingilenu mbolo yize yakunyongonona, yize yakupwisa atu ni mwono wa miaka yeswe. Mbolo yino Mwana Mutu#6:27 mwana mutu: tala 1:51. makanwaha yo, mumu Tata Zambi hanamuse chinyingi chakulweza ngwenyi, iye mwene hanamutongola.” 28No yaamuhula ngwo: “Kuchi chatutamba kulinga mba tulinge yitanga yize akuzanga Zambi?” 29Yesu ngwenyi: “Yuma yize akuzanga Zambi yenayi ayi, kufuliela yami yoze hanatumu.” 30Ayo ngwo: “Chilayi chika muulinga, mba hanga tukufuliele? Chika wakulinga? 31Tushakulu twetu alile mbolo yize mana, mu puya, ngwe hichinasonewa mu Mukanda wa Zambi ngwo: ‘Yaaha yakulia yo, mbolo yize yahulumukine mwilu.’ ” 32Yesu ngwenyi: “Chamwenemwene ngunanwabulwila ngwami, hi Mose ko wanuhele mbolo ya mwilu, alioze Tata wakunwaha ye mbolo yamwenemwene ya mwilu. 33Mumu mbolo yize Zambi akuhana yili yoze hanahulumuka mwilu. Kakupwisa akwa hashi ni mwono.” 34Ayo ngwo: “Mwata, twehe kama matangwa eswe mbolo yize.” 35Yesu ngwenyi: “Yami nguli ye mbolo yize yakupwisa atu ni mwono. Yoze meza kuli yami, kechi kevwa zala chibwe hakepe. Yoze mangufuliela kechi kevwa nawa pwila nichimwe. 36Alioze ngunanwambe ngwami, hinunangumono, hindu kunushi kufuliela. 37Mweswawo Tata anangwehe kumeza kuli yami; mweswawo meza kuli yami chichi kulituna ye, 38mumu hingunahulumuka mwilu ha kulinga yize anapale yoze wangutumine, hi yize ngunapale yami mwene ko. 39Uno we upale wa yoze wangutumine ngwo, hanga chichi katokesa niumwe wa kuli waze hanangwehe, alioze mungukaahindwisa ha tangwa liakusula, 40Mumu Tata kakuzanga ngwenyi, eswe waze haanamono Mwana, ni akumufuliela, abwe ni mwono wa miaka yeswe. Ni yami mungukaahindwisa ha tangwa liakusula.”

41Ayuda yaabutuka kulinyenyeta hakutwala kuli Yesu, mumu wambile ngwenyi: “Yami nguli ye mbolo yize yahulumukine mwilu.” 42No yaamba ngwo: “Awu hi Yesu ko mwana wa Josefe, nyi? Tato ni naye tunaanyingika. Mba kuchi anambe ngwenyi: ‘Hingunahulumuka mwilu’?” 43Yesu ngwenyi: “Litwaminenu kulinyenyeta hakachi kenu. 44Niumwe mahasa kwiza kuli yami, shina Tata yoze wangutumine mamukoka. Ni yami mungukamuhindwisa ha tangwa liakusula. 45Akwa munanyi a Zambi haanasoneka liji lino ngwo: ‘Zambi makalongesa atu eswe.’ Mutu mweswe mevwa liji lia Tata, ni matambula longeso lienyi kumeza kuli yami. 46Chino kuchambile ngwo, umwe hanamono Tata. Shina yoze hanahulumuka mwilu mwe hanamono Tata.

47“Chamwenemwene ngunanwambulwila ngwami, yoze wakufuliela, mwono wa miaka yeswe ali nawo. 48Yami nguli mbolo yize yakupwisa atu ni mwono. 49Tushakulu twenu alile mbolo yize mana, mu puya, alioze haanafu. 50Alioze mbolo yize yakuhulumuka mwilu, mweswe mayilia kechi kafwa. 51Yami nguli mbolo yize yakupwisa atu ni mwono, hingunahulumuka mwilu. Nyi mutu malia mbolo yino, kumabwa ni mwono wa miaka yeswe. Mbolo yize mungumwaha, musunya wami, nakuuhana hanga akwa hashi abwe ni mwono.”

52Ha chino, Ayuda yaalihamika kuhiana ngwo: “Ngwe kuchi mutu yono mahasa kutwaha musunya wenyi mu kuulia?” 53Yesu ngwenyi: “Chamwenemwene ngunanwambulwila ngwami, nyi kunwalile musunya wa Mwana Mutu, nawa nyi kunwanwine manyinga jenyi, kunuchi kubwa ni mwono. 54Yoze malia musunya wami ni manwa manyinga jami, mwono wa miaka yeswe ali nawo. Ni yami mungukamuhindwisa ha tangwa liakusula. 55Mumu musunya wami che kulia chamwenemwene, nyi manyinga jami che kunwa chamwenemwene. 56Yoze wakulia musunya wami ni wakunwa manyinga jami, kakulinunga ni yami, ni yami ni iye. 57Tata yoze wangutumine mwono akwete, ni yami nguli ni mwono mumu hali iye. Chimuwika nawa, yoze mangulia kumabwa ni mwono mumu hali yami. 58Yino ye mbolo yize yahulumukine mwilu, hi yize ko alile tushakulu twenu waze afwile. Yoze wakulia mbolo yino makabwa ni mwono wa miaka yeswe.” 59Yesu yahanjika maliji wano muze alongesele mu zuwo lia kuwayila lia Ayuda mu limbo lia Kafarnaume.#6:59 KAFARNAUME: tala 2:11.

Maliji a mwono wa miaka yeswe

60Muze evwile maliji wano, anji a kuli tumbaji twenyi yaamba ngwo: “Maliji wano akalu. Iya mahasa kweevwa?” 61Yesu yanyingika ngwenyi, tumbaji twenyi kaanalinyenyeta ha chikuma chino. Kashika yaahula ngwenyi: “Chino chinanutalingisa, nyi? 62Mba kuchi munukanyonga muze munukamona Mwana Mutu#6:62 mwana mutu: tala 1:51. ni kuzezuka kuze abwile hatangu? 63Mwiku wakupwisa atu ni mwono, alioze musunya kuushi kufumbula nichimwe. Maliji waze hinahanjika kuli yenu kaakuhana mwiku ni kupwisa atu ni mwono. 64Alioze amwe mukachi kenu kunushi kungufuliela.” (Yamba chino, mumu chize ku Ubutukilo yanyingika waze keechi kumufuliela, ni yoze makamukunjika kuli akwa kole jenyi.) 65Yamba nawa ngwenyi: “Kashika nanwambanga ngwami, niumwe mahasa kwiza kuli yami, shina Tata mamwaha cho.”

66Ha chino, anji a kuli tumbaji twenyi yaakatuka. Kaaliendelele ko nawa nenyi. 67Mba Yesu yambila tumbaji kumi ni aali ngwenyi: “Ni yenu nawa nunazange kuya, nyi?” 68Simone Petulu yamukumbulula ngwenyi: “Mwene, kuli iya mutuya? Yena uli ni maliji waze akupwisa atu ni mwono wa miaka yeswe. 69Haliabwila hitwafuliela ni hitwanyingika ngwetu, yena mwe Munangi wakatukile kuli Zambi.” 70Yesu ngwenyi: “Nanutongwele kumi ni aali, nyi? Alioze umuwika mukachi kenu kali wa Sakwonga!” 71Yesu yamba maliji wano hakutwala kuli Yudase, mwana wa Simone Kakeriote. Mumu Yudase, chibwe wabwile wa ku mbunga ya tumbaji kumi ni aali, hindu te makakunjika Yesu kuli akwa kole jenyi.

Attualmente Selezionati:

Yoano 6: CHK1970

Evidenziazioni

Copia