Yoano 2

Umbachiso mu Kana

1Muze matangwa aali haabalika yikubwa umbachiso mu limbo lia Kana#2:1 Kana, limwe limbo kilometro 6 ku norde ya Nazare. mu chifuchi cha Galilea.#2:1 Galilea: chimwe chifuchi ku norde mu Israele. Naye ya Yesu te kwe ali. 2Mukwa ulungi yalakenya nawa Yesu ni tumbaji twenyi ku umbachiso uze. 3Muze vinyu hiyahwa, naye yamwamba ngwenyi: “Vinyu keeshi nayo.” 4Alioze Yesu ngwenyi: “Mama, kuwahashile kungulweza. Ola yami#2:4 ola yami: mu mukanda uno wa Yoano, ola yize uzambi wa Yesu muusoloka pundu. kanda yiheta.” 5Naye ya Yesu yambila tuvumbi ngwenyi: “Cheswacho manwamba, Chilingenu.”

6Yikubwa milondo yisambano ya mawe. Yenayo te Ayuda akulikwasa nayo ha kusana meya, nikulita ni ndako jo ja kulibemesa ha kuwayila Zambi. Mulondo ni mulondo te mwakunjila makumi nake ndoo kulakaji ni makumi aali a litro. 7Yesu yaamba ngwenyi: “Zalisenu milondo ayi ni meya.” No yaayizalisa. 8Mba Yesu ngwenyi: “Haliabwila switenu, mutwalilenu mukwa lutwe wa umbachiso.” No yaamutwalilo. 9Mukwa lutwe wa umbachiso yapaka meya waze haalumuka vinyu. Kanyingikine ko kuze yakatukile. (Alioze tuvumbi waze aswichile meya yaanyingika kanawa.) Mwe mukwa lutwe wa umbachiso yatambika sandungi. 10Mba yamwamba ngwenyi: “Atu eswe kaakuhana vinyu yibema hatangu. Muze atu haanwa chinji, mba maahana yize hi yibema ko. Alioze yena hiwafunga vinyu yibema ndoo haliabwila!”

11Chino che chilayi chitangu chize alingile Yesu. Yachilinga mu Kana mu chifuchi cha Galilea ni kulweza uhenya#2:11 uhenya: tala 1:14. wenyi. Mba tumbaji twenyi yaamufuliela.

12Mwabwamuze Yesu yaya ku limbo lia Kafamaume#2:12 Kafarnaume: ku mbumbulu ya chitende cha Galilea, ku norde ku chitokelo. hamwe ni naye, ni anakwo, ni tumbaji twenyi; yatwama ko amwe matangwa.

Yesu yabemesa zuwo lia Zambi

(Tala nawa Mat 21:12-13; Mar 11:15-17; Luk 19:45-46)

13Yesu yaya ku Yerusaleme mumu chiwanyino cha Ayuda cha kwiwuluka Kubalika te hichabwa hakamwihi. 14Mu zuwo lia Zambi lia Ayuda yawana mo atu waze abwile ni kulanjisa ngombe, ni mapanga, ni membe. Yawana mo nawa akwa kusumbakenya mbongo, kaanatwama ku mesa jo. 15Mba yahosa fimbo (shikote) ya ngoji, yatuhwisa tushitu eswe, mapanga ni ngombe, yalimbula mesa ja akwa kusumbakenya mbongo, yamwanga mbongo jo hashi, 16yambila waze te analanjisa membe ngwenyi: “Twalenu yuma yino haze. Kanda nupwisa zuwo lia Tata ngwe chitanda!” 17Tumbaji twenyi yeewuluka chize chasonewene mu Mukanda wa Zambi ngwo: “Aa Zambi, nakwivwa kahia chaa mu mbunge mumu ha zuwo lie.”

18Ayuda yaamuhula ngwo: “Chilayi chika muuhasa kulinga ha kutulweza ngwe uli ni chiyulo cha kulinga yuma yino?” 19Yesu yaakumbulula ngwenyi: “Ononenu zuwo lino lia Zambi, mba ha matangwa atatu mungukalimika nawa.” 20Ayuda yaamwamba ngwo: “Miaka makumi awana ni yisambano#2:20 miaka makumi awana ni yisambano: mwanangana Herode Munene abutwile kutungulula zuwo lia Zambi ha mwaka 19 muze te Yesu Kristu kanda achisemuka. Kashika sango jino jabwile ha mwaka ngwe 28 muze Yesu hasemuka kulu. atungile zuwo lino, alioze yena muukalimika ha matangwa atatu, nyi?”

21Alioze zuwo lize ambile Yesu te mujimba wenyi. 22Muze Yesu hahinduka ku kufwa, tumbaji twenyi yeewuluka chize ambile, mba yaafuliela Mukanda wa Zambi ni maliji waze ahanjekele Yesu.

Yesu kananyingika mbunge ja atu eswe

23Shimbu lize te Yesu ali mu Yerusaleme ku chiwanyino cha Kubalika, anji amufulielele mumu ha yilayi yize alingilelingile. 24Alioze Yesu kalihanyine ko kuli ayo, mumu yanyingika atu eswe kanawa. 25Te kafupile niumwe kumulweza ndako ja atu, mumu yanyingika kanawa yize yili mu mbunge ja atu.

Attualmente Selezionati:

Yoano 2: CHK1970

Evidenziazioni

Copia