Suku-saakị 49
49
Jekọbụ Kunoma Ẹkwẹn Kọn Ori Awọmẹ Pịrịm
1Anịtẹso Jekọbụ nwẹnị ori owiapụ-awọmẹ sịn tẹ ḅẹẹ, “Ọmịnị ọmịna aḅụụ kobiri gboloma mịẹtẹ à tọrọkọ-jụ ḅo ḅarị ene ma ḅụ ọmịna aḅụụ paka ḅẹ ye ḍuko ọ́ pịrị ḅarị ḅara.”
2Ó kobiri tẹ pokii, yei Jekọbụ owiapụ-awọmẹ,
tẹ ọmịna ḍaḅọ Izirẹlị naa.
3Rubẹnị, ị́yẹrị anie ị̀ tarị tụḅọ,
ị̀ ịnyọ, pịkị ị̀ ịnyọ mẹ ḅẹ tarị sịnmgbọlụ,
ḅụụ-tọn tẹịn ḅọ, pịkị kụrọ-tẹịn ḅọ.
4Minji gbọrụ ḅara sime-a ḅara ị́ nwẹn sime ḅa,
ị́ mịẹye ḅụ sọ tẹịn ḅọ sọ ḅịa,
gbala ị́ ị́ ḍa monoye kpọlịm ẹrẹsị,
anịtẹso ị́ anị pilemam, ị́ anị mangịma-a!
5Simiyọnị na Livayị na anie owiapụ-amịnapụ;
ịna okologie ma anie kụrọ amịẹaị mịẹ owuaị.
6Ịn ḅọị anga kọn-arị ẹkwẹn ma ḅụ à ḅịḅị suu ḅịa,
Ịna kobiri sọ à mu ḅịa,
Ịna ịganị ḅụ ịn kịnị ḅaam ẹrẹsị,
Tẹ ịna tii tọrụ-ḅẹlẹ ḅụ nambulo aḅụọ pẹlẹ-siinm.
7Wori-nume sime ịna ịganị pịrịị, anị ḅalafama ḅakam ẹrẹsị
Pịkị ịna owi ịganị sọ, anị guda-guda ḅakam ẹrẹsị,
Àrị ịn gala-gala Izirẹlị mẹ ikelema ḅa,
Anị ḅẹ atomi ma ogbo-ḅio ḅụ arị ịn wasama ḅa.
8Juda, ị́ owiapụ-amịnapụ í tokini ḅa;
Ị́ ḅara kẹ ị́ na fịya-a apụ kọngọ ọlọ ḅa
Ị́ ḍa owiapụ-awọmẹ ị́ tọrọkọ sịḅị-tuu ḅa
9 #
Kịẹ 24.9; Mịẹ 5.5 Juda anie asambịrịma ọkụkụ;
Ị́ ị́ pẹị ḅẹ nama mẹ ḅaa, tẹ pịkị-so tẹ, ì owiḅọtụḅọ
Ọkụkụ sụụntẹ ḅọlọlọ ḅara kẹ ọ̀ ḅọlọlọm
Ịyọrọ ọkụkụ sime-ḅara ḅụ, tụḅọ ḅiokpọ tẹ ò jikema ḅẹ?
10Ama-da mkpara mẹ Juda ḅụ sikima ḅịa,
anịanịa ḅẹrẹtọnḅọ ḅụụ da mkpara mẹ ò furo-ḅẹ-apụ ḅụ so,
nwenii sịẹ, sịẹ igbigi oso-oso ọ̀ pịrị ḅa;
anịsakị tomi-kụlọkụlọ ma ọ̀ ḅịḅị poki ḅa.
11Ori ori asambịrịma yedogi-nama kẹ kụrọ suku kpọm,
Iḅitẹịn kụrọ mẹ suku ori ori owi asambịrịma yedogi-nama kpọm;
Iru ḅio ori ori opu akapa sịkịrịm,
Ọmbie awụ tọrụ ḅịya iru ḅio ori ọ̀ kapa sịkịrịm.
12Iru ori atọrụngbọ kẹ agụnkwọ ḅịyama ḅa,
tẹ ndo-minji mịẹtẹ ori aka pịna-pịna ḅa.
13Zẹbulọnị opu tọrụ mẹ akaka ḅụ anga ḅa;
Ori opu onwi-arụ ḅo-ḅo agba-pọkụ sọ ḅa,
anịsakị ò kiri sara pakama mu Sayịdọnị la ḅa.
14Ịsaka anie kụrọtẹ yedogi-nama,
tẹ anana ogbo ma ogbo ḅio ikiriarị
15Ori ẹrịm mịnẹ ịnyọsara yọ iḅim
anịsakị kiri mẹ ḅụụ-ḅẹlẹmam
mie ḅụ ori ori apana iderima yedogi pịrịm
tẹ ḅo kụrọ kọrịnama ḅụ omoniḅọ sọm.
16Danị ḅẹrẹkọnḅọ sọ ori atomi pịrị ḅa,
Izirẹlị ḅẹ afuro ma ḅẹ gbọrụ furo ḅara ḅụ.
17Danị etela akaka ḅẹ ododo sọ ḅa,
kpakụrụtẹ etela mẹ ḅẹ si ododo,
tẹ asụ ḅe ḅụọ-tongu gbọn ye ḅe,
anie ḅụ ọ̀ dọkụarị ḅọ ḅe ḅịkị ọḅụ dam
18Ị́ ḅọrọma mẹ mie à koruarị ye, yei KỊNỊNYANAḄỌ.
19Ama gbaịntẹ fọịn kụrọ atomi Gadi gbaịn-koro ḅa,
kụma ori pịkị ịn ḍuka tẹ ịn mangị ḅa.
20Asa kiri iḅi afịaị pakama-ḅo ḅa,
anịsakị ori amadapụ fị na-iḅi afịaị ḅara pakama-ḅo ḅa.
21Nafutali anie sịḅị nyana ḅara kẹ mangịarị tụḅụra tẹ ḅụụ-ḅẹlẹma awọmẹ iyiarị ḅọ.
22Josẹfụ anie sịnmgbọlụ sụa — opu sịn ịkpangị,
ngụngụḅa akaka ḅẹ sịnmgbọlụ sụa opu sịn ịkpangị,
ori ịkpangị sụa pakama onu mẹ saḅamam.
23Iboli tẹịn ḍin apụ ma ḅalafama ḅara kẹ owu kẹ ọ̀ pakam,
ịn ḅẹlẹma ọ̀ tẹịn, tẹ ọ̀ ḅụụ-fụkama lamam;
24Anịsọ ori iboli jike-a,
Jekọbụ Kụrọ-nyana Gbọrụḅọ ḅe aḅara,
ọ̀ ḅara-kọngọ mịẹ kụrọmam,
Anana ḍikiḍikiḅọ ḅe, Izirẹlị Ịkụ ḅe ẹrẹ ḅụ.
25Ị́ ḍa Tamụnọ ḅe tẹ ḅarasụa ị́ pịrị ḅarị ḅọ ḅe ḅụ,
Kụrọmamgba Nyana Tamụnọ ḅe tẹ í boma ḅarị ḅọ ḅe ḅụ,
ị́ ọgọnọ-jụ ḅụ simearị so mẹ ḅẹ aboma na,
pokolo yọ mẹ ḅẹ aboma tẹ suku-ḅio dẹẹ wararị aị ma na, ndo ma na, furo ma na ḅẹ aboma ma na nyana ḅarị ye
26Sịnmgbọlị na fịlawa na aboma,
Elemu sakị ḅẹ tụndụ ma ḅẹ aboma,
Sime-gbamaso atụndụ ma ọgọnọ ideri-ḅo ḅụụ-ḅẹlẹma aị. Yee mịna aboma ma Josẹfụ sịḅị ọgọnọ gbana, Ori owiapụ-amịnapụ ma ḅụ kịrị ḅele ḅọ ḅe anjị ḅụ.
27Benijamịnị anie opu fịye fị kụrọ nama,
Dede-ḅio pẹị anama ma ḅaa, ḅaa sararị,
tẹ ḅoḅiri ḅụ arị ḍiearị.
28Mịna apụ mamgba anie Izirẹlị ḅẹ oyi maa afuro finji ma; anịsakị miemẹ anie ịna ḍaḅọ kọn ịn pịrị ẹkwẹn ori ịn boma sakị ḅụ, ori ọrụḅọ-ọrụḅọ gbẹẹ boma kẹ mḅọ bomam.
Jekọbụ Fịịm Tẹ Ori Awọmẹ Ò Ḍiḅim
29Anịtẹso ọ̀ nwẹnị tọn ịn pịrị tẹ ịn ḅẹẹ, “Ala-a à fịị ḅa, tẹ ị̀ atẹngịapụ ma sime anga mu ḅa. Ọmịnị ị̀ kẹ ị̀ aḍapụ ma ḅụụ sụa tẹ Ịfụrọnị Itayịti ḅọ ḅe piri mẹ ḅio simearị fukuru mẹ ḅio ì ḍiḅii. 30#Suk 23.3-20Anị fukuru mẹ anie Makịpẹla ḅụ Mamụrẹ ḅẹ ịrụa-saakịarị-anga ḅụ simearị ye mẹ, Kenanị sịẹ mẹ ḅio. Ebira-amụ anị kẹ piri mẹ na sụa tẹ ḍụẹịn ḍiḅi gotẹ Ịfụrọnị Itayịti ḅọ ḅe ḅara anị fẹẹm. 31#Suk 25.9,10; Suk 35.29Anịanga mie ini Ebira-amụ na ọ̀ ta Sera na ḍiḅi yee, anịanga mie ini Ayịzịkị na ọ̀ ta Ribeka na ḍiḅi yee, anịsakị anịanga mie à pịkị Liya ḍiḅi yee. 32Piri mẹ na fukuru mẹ tẹ anị ḅio simearị ye mẹ na Itayịti apụ ma ḅara Ebira-amụ anị fẹẹm.” 33#Fịr 7.15Jekọbụ ọ̀ tọn ori owiapụ-awọmẹ ma pịrị ḅẹ aị tọn fama tẹso, ori ori aḅụọ saakị monoye mẹ ọgọnọ gbanam, tẹ ọ̀ fịịm.
Attualmente Selezionati:
Suku-saakị 49: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
