Suku-saakị 29
29
Jekọbụ Ḅo Lebanị Warị Lam
1Anịtẹso Jekọbụ ò muarị igoni mum, tẹ ḅo ịrụa-saakịarị-anga mẹ ḅẹ atomi ma ama mẹ lam. 2Ọ̀ paa tọrụ saakị ḍiki ḅara mie ò piri mẹ ḅio gbọrụ suḅe ẹrị ye, tẹ ḍikii, anana tẹra ogbo anị akaka mono sime wararị; gbala anị suḅe mẹ ḅio mie ịn minji ḍuu, ḍuu anana ma pịrị ḅuuarị ye. Suḅe mẹ ḅịḅị gbaịn ḍụḅarị mẹ ḍụḅa wararị, 3tẹ anana ogbo mamgba ḅo anịanga kobiri tẹso, ọkụma, anana ḍikiḍikiapụ ma nwẹnị suḅe mẹ ḅịḅị ḅụ ḍụḅarị mẹ mbelembele sin ḅa, tẹ minji kẹ anana ma pịrị ḅuu ḅa, tẹ pịkị anị mbelembele suḅe mẹ ḅịḅị ḅụ anị ḅẹ kiri ḅụ koroma ḅa.
4Jekọbụ nwẹnị ịn gbela, “Ị̀ amịna apụ, ọ́ tọ-anga ḅụ sime tẹ ḅo?”
Ịn nwẹnị pakịrị, “Wa Eranị ḅụ sime tẹ ḅom.”
5Ọ̀ nwẹnị ịn gbela, “Nahọ taa-owiḅọtụḅọ Lebanị ḅe ọmịnị ò nimi?”
Ịn nwẹnị pakịrị, “Wa ò nimim.”
6Ò nwẹnị pịkị ịn gbela, “Ye gbeke ori na iḅi wararị?”
Ịn nwẹnị pakịrị, “Ye ori na iḅi wararị anịsakị ḍikii ori ẹrẹḅọtụḅọ Resẹlị anana ma kẹ ḅoarị.”
7Ọ̀ nwẹnị ḅẹẹ, “Ḍikii ene amụ mẹnị-a, nama ma kobiri gboloma ḅẹ sakị amụ la-a; minji kẹ anana ma pịrị ḅuu, tẹ ịn kẹ muu ini osuka fị.”
8Kụma ini nwẹnị pakịrị, “Wa inetẹ ḅịa nwenii anana ogbo mamgba kobiri gboloma tẹ wa suḅe mẹ ḅịḅị ḅụ ḍụḅarị mẹ mbelembele sin ḅa anịtẹrẹmẹ wa minji kẹ anana ma pịrị ḅuu ḅa.”
9Jekọbụ paa ini na ẹkwẹn-arị ogbo, Resẹlị á ḍa anana na ḅo lam; gbala arị mie ịn ḍikiḍikiarị ye ẹrẹsị. 10Jekọbụ mị sakị mẹ ḅụ ò iyingi iyimbere Lebanị ẹrẹḅọtụḅọ Resẹlị ẹrị tẹso, ọ̀ nwẹnị mẹnjị mu tẹ suḅe ḅịḅị ḅụ ḍụḅarị mẹ mbelembele sin tẹ minji kẹ ò iyingi iyimbere Lebanị anana ogbo mẹ pịrị ḅuu. 11Anịtẹso Jekọbụ nwẹnị Resẹlị ḅịḅị nọnjị tẹ tẹmẹ-la ḅara kẹ owu pakama. 12Jekọbụ nwẹnị ḍuko Resẹlị pịrị mịnẹ ori anie á ḍa mịnaḅọ, anịsakị ori anie Ribeka owiḅọtụḅọ; tẹ á nwẹnị mangị mu ḍuko á ḍa pịrị.
13Lebanị ori mbịra owiḅọtụḅọ Jekọbụ oku mẹ naa tẹso, ọ̀ nwẹnị ori na bịama ḅẹ mangị mu tẹ ekpe kẹ ọ̀ lama, tẹ ọ̀ ḅịḅị nọnjị, tẹ ori ọkị-ḅo ọ̀ warị suum. Jekọbụ mịna aị mamgba ḍuko Lebanị pịrịm, 14tẹ Lebanị nwẹnị ọ̀ ḅẹẹ, “Tụkụma ḅara ḅụ ị́yẹrị anie ị̀ mgbe, pịkị ì oju meni!” Tẹ Jekọbụ ori na gbọrụ akalụ simem.
Jekọbụ Liya Na Resẹlị Na Simem
15Anịtẹso Lebanị nwẹnị Jekọbụ ḅẹẹ, “Ị́yẹrị ị̀ mịnaḅọ ẹrẹsị ị́ ḅọrọ anị gotẹ ḅọrọ papaa fịrịmẹnjị ị̀ pịrị na-iḅi? Kẹ ị́ gbẹẹ ḅarịye ḍuko ị̀ pịrịị.” 16Mị sakị mẹ, Lebanị ori iyi maa eremịna-awọmẹ nyana wararị, omongiḅọ ma ẹrẹ Liya, kalatụḅọ ma ẹrẹ Resẹlị. 17Liya tọrụ-pụnẹẹ ḅara sime wararị, kụma Resẹlị iḅi lama tẹ tọrụ ọfịrị ḅara sime wararị.
18Jekọbụ Resẹlị ḅelemam; tẹ ọ̀ nwẹnị ḅẹẹ, “Àrị ị́ ẹrẹḅọtụḅọ Resẹlị kalatụḅọ ma gotẹ sọnọma akụra kẹ fịrịmẹnjị ị́ pịrị ḅa.”
19Lebanị nwẹnị pakịrị, “Àrị á kẹ jen owiḅọ pịrị ḅẹ nakara, arị á kẹ ị́ pịrị iḅitẹịnm.” 20Mie ḅụ Jekọbụ Resẹlị gotẹ sọnọma akụra kẹ fịrịmẹnjịm, kụma ọ̀ ḅụụ boowa aḍin sime-ḅara anị nwẹn simem ọ̀ nyana á pịrị ḅẹlẹma mẹ ẹrẹsị.
21Anịtẹso Jekọbụ nwẹnị Lebanị ḅẹẹ, “Ị̀ ta kẹ ị̀ pịrịị, mịẹtẹ arị á sime ḅẹ ḅara, kẹ gotẹ ọkọ ḅẹẹarị, ị̀ sakị kara tẹ ẹrẹsị.” 22Mie ḅụ Lebanị ama mẹ ḅẹ owiapụ mamgba sịn kobiri tẹ kopini afịaị sọ ịn pịrịm. 23Kụma ḅoḅiri-so ḅụ ori ẹrẹḅọtụḅọ Liya mie ori ọkị tẹ á kẹ mu Jekọbụ pịrị ye; tẹ ọ̀ sọ-mu arị na simem. 24Lebanị ọ̀ fịrịmẹnjị-ẹrẹḅọtụḅọ Zilipa kẹ ori ẹrẹḅọtụḅọ Liya pịrịm á fịrịmẹnjị-ẹrẹḅọtụḅọ ḅara ḅụ. 25Tẹ ene ḅaa ḅẹ dede-ḅio ḅụ, ori ẹrịm ẹrẹḅọ ma Liya; tẹ Jekọbụ nwẹnị Lebanị ḅẹẹ, “Resẹlị mie à gotẹ fịrịmẹnjị ị́ pịrị ḅọ, ọkọ-a? Ị́ tiegotẹ anịtẹrẹmẹ oḅori kẹ ị̀ sịn?”
26Lebanị nwẹnị pakịrị, “Kalatụḅọ kẹ ịya pịrị tẹrẹmẹ, tarị iyi ḅọ kẹ ịya pịrị mẹ wamịna ama ḅụ anị ọkọ mịẹ Mịẹ-a. 27Ma ẹrẹḅọtụḅọ ma fẹnị-anga mẹ karamaa, anịsakị ị́ pịkị osi-ḅọ ma gotẹ jen sọnọma akụra kẹ fịrịmẹnjị ị̀ pịrị ḅa, anịtẹrẹmẹ wa osi-ḅọ ma sọ kẹ ị́ pịrị ḅa.”
28Jekọbụ ọkọ mịẹm, tẹ Liya na á fẹnị-anga mẹ karamam; anịtẹrẹmẹ Lebanị ori ẹrẹḅọtụḅọ Resẹlị kẹ ọ̀ pịrị simem. 29Lebanị ọ̀ fịrịmẹnjị-ẹrẹḅọtụḅọ Biliya kẹ ori ẹrẹḅọtụḅọ Resẹlị pịrịm á fịrịmẹnjị-ẹrẹḅọtụḅọ ḅara ḅụ. 30Mie ḅụ Jekọbụ sọ-mu Resẹlị sọ na simem tẹ ọ̀ nwẹnị Resẹlị ḅẹlẹma Liya nẹngị, tẹ jen sọnọma akụra kẹ fịrịmẹnjị Lebanị pịrịm.
In Awọmẹ Iyi Jekọbụ Pịrịm
31KỊNỊNYANAḄỌ ḅe ẹrịm mịnẹ ịn Liya ḍiki-ḅioḅuarị, tẹso, ọ̀ nwẹnị á furo finji kụma Resẹlị furo pụnm. 32Tẹ Liya sime kọn tẹ nwẹnị gbọrụ owiḅọtụḅọ iyi tẹ ẹrẹ kẹ ọ̀ sịn Rubẹnị#29.32 Rubẹnị fiearị ye, Ḍikii! Gbọrụ Owiḅọtụḅọ; gbala árị mẹẹ, “KỊNỊNYANAḄỌ ḅe ị̀ ḅụụ-fụka mẹ ẹrị tẹ ẹrẹsị tụkụma ḅara ḅụ mịọkụ ì di ị̀ ḅẹlẹma ḅa.” 33Á pịkị sime kọn tẹ gbọrụ owiḅọtụḅọ iyim, tẹ nwẹnị ḅẹẹ, Gbala KỊNỊNYANAḄỌ ḅe naa tẹ mịnẹ ini ì ḍiki-ḅioḅuarị ẹrẹsị ọ̀ ḅị owiḅọtụḅọ ḅe sọ kẹ ị̀ pịrị tẹ, tẹ á nwẹnị ẹrẹ kẹ ọ̀ sịn Simiyọnị#29.33 Simiyọnị fiearị ye, Naa!. 34Á pịkị sime kọn, tẹ gbọrụ owiḅọtụḅọ iyim, tẹ nwẹnị ḅẹẹ, “Gbala mịọkụ à tẹra owiapụ-awọmẹ iyi ọ̀ pịrị tẹ ẹrẹsị mị sakị mẹ ì di ḅe gbọrsịḅị ị̀ ḅụụ oḅolo ḅa.” Anịẹrẹsị ịn kẹ ọ̀ sịn ẹrẹ Livayị#29.34 Livayị fiearị ye, Fịna-oḅolo. 35Tẹ á nwẹnị pịkị sime kọn tẹ gbọrụ owiḅọtụḅọ iyi, tẹ ḅẹẹ, “Mị sakị mẹ à KỊNỊNYANAḄỌ ḅe tokini ḅa.” Anịẹrẹsị árị ẹrẹ kẹ ọ̀ sịnm Juda#29.35 Juda fiearị ye, Tokini. Anịtẹso iyi á ḅụụ daasịẹm.
Attualmente Selezionati:
Suku-saakị 29: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
