Suku-saakị 20
20
Ebira-amụ Na Abimẹlẹkị Na Bịamam
1Mamụrẹ ḅụ Ebira-amụ saakị tẹ igoni mẹ dọkụma Samụnọ tẹ Ọfịrịarị Suku-jụ ḅẹ Opu Sịẹ mẹ da-mu tẹ Kadẹsị na, Surị na ogboku sime tẹ Gira ḅụ angam. 2#Suk 12.13; 26.7Ebira-amụ nwẹnị ọ̀ ta Sera ḅẹẹ, “Árị anie ị̀ ịyịmbara.” Tẹ Abimẹlẹkị Gira ḅẹ amadaḅọ ḅe nwẹnị Sera fịrịma ḅo tẹ arị ọkị. 3Kụma Tamụnọ nwẹnị ḍin ḍawọ-jụ ḅụ Abimẹlẹkị ḍọkụma-ḅo tẹ ḅẹẹ, “Ḍikii ị́ ọkị tẹ ẹrẹḅọ ma gotẹ ị́yẹrị anie fịtẹ tomḅọ, kẹ gotẹ ọkọ ḅẹẹarị, árị anie jen owiḅọ taḅọ.”
4Mịọkụ Abimẹlẹkị amụ árị na gboloma-a; anie ḅụ ọ̀ nwẹnị ḅẹẹ, “KỊNỊNYANAḄỌ, ị́ ḅọrọ mịẹye-ofori atomi ḅaa ḅẹ? 5Ori ḅarana ị̀ ḅẹẹ-a, ‘árị anie ị̀ ịyịmbara?’ Árịma ḅioju pịkị ḅẹẹm, ‘Ori anie ì iyimbere.’ Ì ḅioḅẹngbọ ḅụ à kẹ ye nimi karakara ḅara na, ị̀ aḅara ma mịẹye-ofori ḅara ḅụ à miemẹ mịẹm.”
6Anịtẹso Tamụnọ nwẹnị ḍawọ-jụ mẹ ḅụ ọ̀ ḅẹẹ, “Inn, À nimim mịnẹ í ḅioḅẹngbọ ḅụ ị́ kẹ ye nimi karakara ḅara mie ị́ kẹ miemẹ mịẹ ye, anịsakị yẹrị mie ị́ mị si mẹ kẹ ị̀ mịẹ mẹ ḅụ í ḅelema ye; anịẹrẹsị à ḍụkụ tẹ ị́ ḅara kẹ á lama-a. 7Anịẹrẹsị mịọkụ owiḅọ ḅe ta ma pịkịma ọ̀ pịrịị; kẹ gotẹ ọkọ ḅẹẹarị, ori anie ịkịankoroḅọ, anịsakị ọ̀ tẹkẹ ị́ pịrị tẹ í ḍumo ḅa. Kụma ị́ á pịkịma ọ̀ pịrị-a ḅẹḅẹ, nimii, mịnẹ tụkụma ḅara ḅụ ị́yẹrị na, sime ị́ pịrị aị mamgba na fịị ḅa.”
8Mie ḅụ Abimẹlẹkị nwẹnị dede-funfun saakị tẹ ori afịrịmẹnjịapụ mamgba sịn tẹ mịna aị mamgba ḍuko ịn pịrị; tẹ owiapụ ma nwẹnị kpọma ḅalafa lama. 9Anịtẹso Abimẹlẹkị nwẹnị Ebira-amụ sịn tẹ ò gbela, “Ị́ nwẹn kẹ wa mịẹ ye mẹ ḅọrọ tiye? Anịsakị à tọ-ḅara sime si kẹ ị́ mịẹ, tẹ ị́ nwẹn sime opu si ọkị-ḅo yẹrị na, ị̀ amakiri na ọgọnọ gbana? Mịẹ na-iḅi-a aị mie ị́ kẹ ị̀ mịẹ tẹ yee.” 10Tẹ Abimẹlẹkị nwẹnị Ebira-amụ ḅẹẹ, “Ị́ tiye kẹ ḅiokoromarị tẹ mu miemẹ mịẹ?”
11Ebira-amụ nwẹnị pakịrị, “Àrị anị mịẹm, à sịnm, gbala-gbala mịanga Tamụnọ mangịma ofori tẹ ị̀ ta sịḅị gotẹ ị̀ ḅaa ḅa. 12Anie mẹ sikima, piki-pikiye-ofori ḅara ḅụ árị anie ị̀ ịyịmbara, kụma ị̀ ḍa mie árị iyi ḅọ, ì iyingi árị iyi-a; tẹ á ḅo ị̀ ta sọm. 13Mie ḅụ Tamụnọ mịẹtẹ àrị ị̀ ḍa warị ḅụ paka-ḅo ikelekelearị sakị àrị á ḅẹẹm, ‘Miemẹ anie iḅi tẹ ị́ kẹ ị̀ mịẹ nyana ye; ye-yọ tẹ wa ḅo la anga goyegoye, ì gboloma ye ḅụ ḅẹẹ, ori anie ì iyimbere.’ ”
14Anịtẹso Abimẹlẹkị nwẹnị anana amẹẹ na, pootẹ-anambulo na, omoni-owiapụ na, ereme na ọkị tẹ ịn kẹ Ebira-amụ pịrị, tẹ ọ̀ ta Sera pịkịma ọ̀ pịrị 15Tẹ Abimẹlẹkị nwẹnị ḅẹẹ, “Ḍikii, ị̀ ama mẹ ị́ tọrọkọ emi, anị ị́ ḅụụ ḅẹlẹ anga, ḅẹlẹ anga ḅụ mu angaa.”
16Ọ̀ nwẹnị Sera ḅẹẹ, “Ḍikii, à seleḅa pakịrị maa ẹndẹ oyia asi finji kẹ í iyimbere pịrị tẹẹ, kẹ ị́ karakara ḍie-pakama inweni-mgba tẹ ịna simearị apụ ma tọrụkuḅu ḅụ; anịsakị ḅẹḅọ-ḅẹḅọ tọrọkọ ḅụ amụ ị́ iri-ye mịẹ-a.”
17Anịtẹso Ebira-amụ Tamụnọ tẹkẹm, tẹ Tamụnọ nwẹnị Abimẹlẹkị gwọ, pịkị ọ̀ ta na, omoni-ereme ma na sọ gwọ mịẹtẹ ini awọmẹ iyi ḅẹ ḅara. 18Gbala Ebira-amụ ta Sera sịḅị gotẹ KỊNỊNYANAḄỌ ḅe Abimẹlẹkị warị mẹ ḅẹ ereme mamgba afuro pụnma fama tẹ ẹrẹsị.
Attualmente Selezionati:
Suku-saakị 20: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
