Suku-saakị 16
16
Ega Isimẹlị Iyi Ebiramụ Pịrịm
1Mịọkụ Sẹrayị, Ebiramụ ta ma gbọrụ tụḅọ sọ iyi ọ̀ pịrị-a. Á nwẹnị Ijiputi ḅẹ gbọrụ ẹrẹḅọtụḅọ nyana, árị ẹrẹ Ega, 2tẹ Sẹrayị nwẹnị Ebiramụ ḅẹẹ, “Ḍikii, KỊNỊNYANAḄỌ ḅe mịọkụ awọ iyi ḅụ ì kiki tẹ ḅẹ sakị, mu ị̀ ẹrẹḅọtụḅọ ma na gbolomaa ẹbịsịya arị á ḅụụ ḅụ ḅọrọ tẹ awọ nyana ḅa.” Tẹ Ebiramụ nwẹnị Sẹrayị ḅịḅịpoki tẹ ọkọ mịẹ. 3Mie ḅụ Ebiramụ oyi akụra kẹ Kenanị ama mẹ ḅio anga tẹso, Ebiramụ ta Sẹrayị nwẹnị Ega Ijiputi ḅẹ ẹrẹḅọtụḅọ á fịrịmẹnjị-ẹrẹḅọtụḅọ ma saakị á di Ebiramụ pịrị, taḅọ ḅara ḅụ. 4Tẹ Ebiramụ Ega na gbolomam, tẹ á furam; á ḅo á ḅụụ ẹrị tẹso, mịnẹ á fura tẹ, á nwẹnị ḍiki-sima tọrụ kẹ á sịḅịda-ẹrẹḅọ ma ḍiki.
5Anịtẹso Sẹrayị nwẹnị Ebiramụ ḅẹẹ, “Yee ị̀ laarị kura-a mịẹye mẹ ị́ ọgọnọ gbana! Àrị ị̀ fịrịmẹnjị-ẹrẹḅọtụḅọ saakị ị́ pịrị ị́ ekpe kẹ á lamam, tẹ á ḅo ẹrị tẹso, mịnẹ á fura tẹ, á nwẹnị ḍiki-sima tọrụ kẹ ì ḍiki. Yee KỊNỊNYANAḄỌ ḅe kọọn ị́yẹrị na, yẹrị na pịrị!”
6Kụma Ebiramụ nwẹnị Sẹrayị pakịrị, “Ḍikii ị́ fịrịmẹnjị-ẹrẹḅọtụḅọ ma ị́ kụrọ mẹ suku-ḅio arị emi; ị́ ḅụụ ḅẹlẹ ḅara, ḅẹlẹ ḅara kẹ á mịẹ.” Anịtẹso Sẹrayị guda-guda ḅara kẹ arị na mịẹm, tẹ arị á ḅụụ ḅụ ḍumo-mangị kọnm.
7KỊNỊNYANAḄỌ ḅe enjẹlị ḅe nwẹnị ịkpa mẹ ḅio simearị gbọrụ ngụngụḅa minji akaka á ḍọkị-ẹrị, Sọọ muarị etela mẹ ḅụ simearị ngụngụḅa minji mẹ, 8tẹ ọ̀ nwẹnị ḅẹẹ, “Ega, Sẹrayị fịrịmẹnjị-ẹrẹḅọtụḅọ ị́ tọ-anga sime tẹ ḅo, anịsakị ị́ tọ-anga muarị?”
Á nwẹnị pakịrị, “Àrị ị̀ sịḅịda ẹrẹḅọ Sẹrayị ḅụ ì ḍumo-mangị kọn-arị.”
9KỊNỊNYANAḄỌ ḅe enjẹlị ḅe nwẹnị á ḅẹẹ, “Pịkịma-so ị́ sịḅịda ẹrẹḅọ ma ḍọkụma-mu tẹ sịḅị-tuu á pịrịị.” 10KỊNỊNYANAḄỌ ḅe enjẹlị pịkị á ḅẹẹm, “À mịẹtẹ í furo-ḅẹ-apụ gburo-gburoma kama ḅa, tẹ kịnị inetẹ ịn kịẹn ḅịa.” 11Tẹ KỊNỊNYANAḄỌ ḅe enjẹlị ḅẹ nwẹnị á ḅẹẹ, “Ḍikii, í fura wararị, anịsakị ị́ gbọrụ owiḅọtụḅọ iyi ḅa, tẹ ị́ kẹ ọ̀ sịn ḅarị ẹrẹ Isimẹlị; gbala KỊNỊNYANAḄỌ ḅe ị́ ḅụụ-ḅalaḅala tẹ tọrụsiẹrị ḅụ kọn owu mẹ naa tẹ ẹrẹsị. 12Ò piri-ḅio-ḅẹ yedogi-nama sime-ḅara sime tomḅọ sọ ḅa; ọ̀ ḅara tomḅọ nwẹn-sịn tomḅọ da-paka ḅa, anịsakị tomḅọ nwẹn-sịn tomḅọ ḅara pịkị ọ̀ da-paka ḅa; tẹ ori ori amịnapụ mamgba ḅụ ḅele tẹ anga tẹ ini na tụḅụrụ ḅa.”
13Mie ḅụ á nwẹnị ẹrẹ kẹ KỊNỊNYANAḄỌ ḅe tẹ ẹkwẹn á pịrị ḅọ ḅe sịn, “Ị́yẹrị anie Ẹlị-rọhị#16.13 Ẹlị-rọhị fiearị ye anie, Ye Ẹrịarị Tamụnọ” gbala árị á ḅụụ gbelam, “Karakara-ḅara-ḅụ à Tamụnọ ẹrị tẹ, tẹ àrị ori ẹrị ye mẹ ḅụ paa ḍumo-sime wararị mọ?” 14Anịẹrẹsị tomi nwẹnị suḅe mẹ sịn, Biya-lahayi-royi#16.14 Biya-lahayi-royi fiearị ye anie, Ị̀ Ẹrịarị Ḍumo Wararị Tamụnọ Ḅe Suḅe suḅe — anị Kadẹsị na Bẹrẹdị na ogboku ḅụ emii. 15#Gal 4.22Tẹ Ega gbọrụ owiḅọtụḅọ iyi Ebiramụ pịrịm, tẹ Ebiramụ nwẹnị ẹrẹ kẹ owiḅọtụḅọ ḅe tẹ Ega iyi ḅọ ḅe koro Isimẹlị. 16Ega Isimẹlị iyi Ebiramụ pịrị sakị Ebiramụ sịḅị ini akụra ofori kụra inia si oyi finji (86) ḅọrọ tẹ.
Attualmente Selezionati:
Suku-saakị 16: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
