Paka-so 8
8
Ngụ Ijiputi Sẹ Gbaịnm
1Anịtẹso KỊNỊNYANAḄỌ ḅe nwẹnị Mozizi ḅẹẹ, “Sọ Fero dama-mu tẹ ọ̀ ḅẹẹ, ‘Mie KỊNỊNYANAḄỌ ḅe ḍuko yee, “Ị̀ atomi wẹrịso in so, mịẹtẹ ịn fịrịmẹnjị ị̀ pịrị ḅarị ḅara. 2Kụma ị́ ḍụkụ tẹ ịn wẹrịso tẹ in so-a ḅẹḅẹ, ḍikii, arị ngụ kẹ fomu-ḅara sọma í opu sịẹ mẹmgba fomu ḅa. 3Nayịlị nwẹn-sịn tọrụ mẹ ḅio ngụ ogbo-ogbo ḅin ḅa arị aị ma tẹ iwo-iwo ḅo ọmịna awarị na, ọmịna mono-ḅio na sọ-mu, ọmịna monoye kpọlị, ọmịna afịrịmẹnjịapụ na, ọmịna atomi na awarị na, ọmịna ọpọ ḅio, fịturu kpo tẹlẹma apanị na ḅio sọ ḅa; 4ngụ ma ḍosi, ḍosi ị́yẹrị na, ị́ atomi na, ị́ afịrịmẹnjịapụ mamgba na kpọlị ḅa.” ’ ”
5KỊNỊNYANAḄỌ ḅe nwẹnị Mozizi ḅẹẹ, “Erọnị ḅẹẹ, ‘Mkpara mẹ ọlọ tẹ anị sụn-pakama tọrụ ma na, ḅarapuuaị ma na, ḍaḅa ma na daa, tẹ mịẹ ngụ ḅo Ijiputi ama mẹ gbaịn.’ ” 6Mie ḅụ Erọnị ọ̀ ḅara sụn-pakama Ijiputi ḅẹ aminji ma dam; tẹ ngụ ma paka-ḅo Ijiputi ama mẹ gbaịnm. 7Kụma majịkị-mịẹapụ ma sọ ịn ḍawọ tẹ ḍịịn ḅọị aị ḅụ mị gbọrụ ye mẹ mịẹm, tẹ ngụ mịẹ pakama-ḅo Ijiputi ama mẹ kpọlịm.
8Anịtẹso Fero nwẹnị Mozizi na Erọnị na sịn, tẹ ḅẹẹ, “Ọ́ KỊNỊNYANAḄỌ ḅe tẹkẹ tẹ ị̀ ḅụụ na, ị̀ atomi na ḅụụ ḅụ ngụ ma saakị siin, anịsakị à wẹrịso tẹ tomi ma sọ-mu agba mịẹ KỊNỊNYANAḄỌ ḅe pịrị ḅa.”
9Mozizi nwẹnị Fero pakịrị, “À tẹkẹ ị́yẹrị na, ị́ afịrịmẹnjịapụ na, ị́ atomi na pịrị ḅarị sakị mẹ ị́ ḅụụ-ḅẹlẹ tẹ ị́ tọn sakị ḅụ anị mịẹ, mịẹtẹ ngụ ma, ị́yẹrị na ọmịna awarị ma na ḅụ fịị fama tẹ Nayịlị nwẹn-sịn tọrụ mẹ ngẹrị ḅio kọn ḅẹ ḅara.”
10Fero nwẹnị pakịrị, “Ḅaa.”
Mozizi nwẹnị ḅẹẹ, “Anị ị́ ḅara simee, mịẹtẹ í nimi ḅarị ḅara mịnẹ KỊNỊNYANAḄỌ wamịna Tamụnọ ḅe kịka kpọkpọ gbọrụḅọ-sọ ofori. 11Ngụ ma ị́yẹrị na, ọmịna awarị na, ị́ afịrịmẹnjịapụ na, ị́ atomi na ḅụ so fama ḅa. Nayịlị nwẹn-sịn tọrụ mẹ ḅio kịngẹ mie ịn kọọn ḅarịye.” 12Mie ḅụ Mozizi na, Erọnị na Fero ḅụ paka-som; tẹ Mozizi ngụ ma gbolomaye kẹ owu KỊNỊNYANAḄỌ ḅe pịrịm ọ̀ wẹrịtẹ Fero na ḅịḅị-kẹ-ogbosọ ḅara ḅụ. 13Tẹ KỊNỊNYANAḄỌ ḅe Mozizi wẹrịtẹ ẹkwẹn ḅara mẹ mịẹm; ngụ ma, warị, warị ma ḅio na, nụngọ ma na ḍụọ ma na ḅio fịị famam. 14Ịn nwẹnị ịn kobiri kiri, kiri ḅụ kpolima, kpolima koroma, tẹ ama mẹ nwẹnị fụrụ. 15Kụma Fero ẹrịm mịnẹ mị sakị mẹ ḅọrọ-so tẹ, tẹso ọ̀ nwẹnị ò ḅioḅẹngbọ kụrọma, tẹ ḅarị ịn poki ḍụkụ-a; KỊNỊNYANAḄỌ ḅe ḅẹẹ tẹ ḅara mẹ.
Iku Ijiputi Sẹ Gbaịnm
16Anịtẹso KỊNỊNYANAḄỌ ḅe nwẹnị Mozizi ḅẹẹ, “Erọnị ḅẹẹ, ‘Ị́ mkpara mẹ sụn-pakama tẹ kẹ kiri-ḅio ḅẹ fọọn ma fomuu, mịẹtẹ anị iku ḍi ḅarị ḅara Ijiputi ama mẹmgba ikelema-koro ḅụ.’ ” 17Ini ọkọ mịẹm; Erọnị ọ̀ ḅara na, ori mkpara mẹ na sụn-pakama tẹ kẹ kiri-ḅio ḅẹ fọọn mẹ fomum tẹ iku nwẹnị tomi na nama na ọgọnọ sara ḅin kiri-ḅio ḅẹ fọọn mẹmgba nwẹnị pịkị iku ḍi Ijiputi mẹmgba ikelema-koro ḅụ. 18Majịkị-mịẹapụ ma ḅụụkụrọma tẹ ịn ḍawọ ḍin ḅọị aị ḅụ iku mịẹ pakama-ḅo ḅẹm, kụma ini ine-a. Mie ḅụ iku tomi na, nama na ọgọnọ sara ḅinm. 19#Luk 11.20Majịkị-mịẹapụ ma nwẹnị Fero ḅẹẹ, “Mie mẹ anie Tamụnọ ḅara-tụngbalị.” Kụma Fero ḅioḅẹngbọ kụrọ-kịkị wararị, tẹ ori ịn poki ḍụkụ-a, KỊNỊNYANAḄỌ ḅe ḅẹẹ tẹ ḅara mẹ.
Ọmọmọ Ijiputi Sẹ Gbaịnm
20Anịtẹso KỊNỊNYANAḄỌ ḅe nwẹnị Mozizi ḅẹẹ, “Dede-funfun saakị tẹ minji-suku mu sime Fero koruu, ọ̀ paka minji-suku mẹ muarị ogbo, tẹ ọ̀ ḅẹẹ, ‘ị̀ atomi wẹrịsoo ịn so, mịẹtẹ ịn fịrịmẹnjị ị̀ pịrị ḅẹ ḅara. 21Anie ofori ị́ ḍụkụ tẹ ị̀ atomi wẹrịso tẹ in so ḅịa ḅẹḅẹ, ḍikii, arị ọmọmọ ogbo-ogbo kẹ ị́yẹrị na, ị́ afịrịmẹnjịapụ na, ị́ atomi na fịrịma ḅa anịsakị ini ọmịna awarị ḅio sọ-mu ḅa, tẹ Ijiputi-ḅẹ-apụ ma awarị ma ḅio ọmọmọ ogbo-ogbo sọ, sọ ḅin ḅa, pịkị kiri mẹ tẹ ịn sịẹsime anga mẹ ḅụ sọ. 22Kụma anị ene mẹ ḅụ, à Gosẹnị ama mẹ sikima ḅa, ị̀ atomi angarị anga mẹ, anie mịẹtẹ ọmọmọ gbọrụ ogbo sọ anịanga la ḅịa; mịẹtẹ ó nimi ḅa mịnẹ yẹrị anie KỊNỊNYANAḄỌ ḅee, à mị ama mẹ ḅio emi. 23Mị-ḅara mie à kẹ ị̀ atomi na ị́ atomi na ogboku kịrị pakama ḅarị ḅara. Ḅaa ḅụ mie mị elekima mẹ mịẹ ḅarịye.’ ” 24Tẹ KỊNỊNYANAḄỌ ḅe ọkọ mịẹm; gburo-gburotẹ opu ọmọmọ ogbo-ogbo nwẹnị fiin-fiin Fero na ori afịrịmẹnjịapụ na awarị ma ḅio sọ ḅin, tẹ Ijiputi ama mẹmgba ḅụ ọmọmọ ma ḅo ye sima guluguluma lamam.
25Anịtẹso Fero nwẹnị Mozizi na Erọnị na sịn tẹ ḅẹẹ, “Ó soo, ó mu agba mịẹ ọmịna Tamụnọ pịrịị ama mẹ ḅio.”
26Kụma Mozizi nwẹnị pakịrị, “Anị ḅara mịẹ mẹ kura-a; kẹ gotẹ ọkọ ḅẹẹarị, Ijiputi-ḅẹ-apụ ma tọn-tọn agba mie wa mịẹ KỊNỊNYANAḄỌ wamịna Tamụnọ ḅe pịrị ḅarịye. Wa nwẹnị Ijiputi-ḅẹ-apụ ma tọrụ-ogbo ḅụ ịn tọn-tọn agba mịẹ kụma, ịn ḍụḅarị kẹ wa gbin ḅịa? 27Wa KỊNỊNYANAḄỌ wamịna Tamụnọ ḅẹ tọn wa pịrị ḅarị ḅara ḅụ tẹra aḍin kẹ mẹnjị ịkpa mẹ ḅio sọ-mu tẹ agba mịẹ kẹ ọ̀ pịrị nyanam.”
28Anie ḅụ Fero nwẹnị ḅẹẹ, “Mu ịkpa mẹ ḅio agba mịẹ KỊNỊNYANAḄỌ ọmịna Tamụnọ ḅe pịrị gotẹ arị ọ́ wẹrịso tẹ ó mu ḅa; kụma ó so ala-jụ mu ma. Ọ́ KỊNỊNYANAḄỌ ḅe tẹkẹ ị̀ pịrịị.”
29Anịtẹso Mozizi nwẹnị pakịrị, “Ḍikii, àrị ị́ ḅụụ ḅụ paka-soarị, anịsakị à KỊNỊNYANAḄỌ ḅe tẹkẹ ḅa mịẹtẹ ḅaa ḅụ ọmọmọ ogbo-ogbo ma Fero na, ori afịrịmẹnjịapụ na, ori atomi na ḅụ so ḅarị ḅara; yee Fero paa ḅarị ọ̀ mịẹ-mịẹ oḅori-kẹ-kịnịsịn ḅara mẹ mịẹ tẹ siin tomi ma kiki ma, mu agba mịẹ KỊNỊNYANAḄỌ ḅe pịrị mẹ ḅụ.”
30Mie ḅụ Mozizi Fero ḅụ mẹnjị paka tẹ KỊNỊNYANAḄỌ ḅe tẹkẹm. 31Tẹ KỊNỊNYANAḄỌ ḅe Mozizi ḅii ḅara mịẹm, tẹ Fero na, ori afịrịmẹnjịapụ na, ori atomi na ḅụ ọmọmọ ogbo-ogbo ma siinm, gbọrụmgbọ-sọ kọn-a. 32Kụma mị sakị mẹ sọ Fero amịna ḅioḅẹngbọ kụrọmam, tẹ ḍụkụ tẹ tomi ma wẹrịso tẹ ịn so-a.
Attualmente Selezionati:
Paka-so 8: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
