Paka-so 34
34
Ye Kẹẹ Aḍụḅarị Ma ḅẹ Maaịn Karama Ọrụ Mẹ
1KỊNỊNYANAḄỌ ḅe nwẹnị Mozizi ḅẹẹ, “Tarị aị ma kịka maa ye kẹẹ aḍụḅarị pẹlẹ pakama-ḅoo; anịsakị arị ẹkwẹn-aḅịḅị ma tẹ à kẹ tarị ye kẹẹ aị ma ọgọnọ ḅụ kẹẹ tẹ ị́ ḅaa aị ma kẹ arị ọgọnọ ḅụ kẹẹ ḅa. 2Dede-ḅio, dede-ḅio ḅụụ tẹlẹmaa, tẹ dede mẹ ḅio Sayịnayị Tụndụ kpọlị iwo ḅo tẹ tụndụ mẹ sịḅị ọgọnọ ḅụ ị́ ḅụụ ḍie-pakama ị̀ pịrịị. 3Gbọrụ tomḅọ sọ ị́ ḅụụ so tẹ ị́ na iwo ḅo ma, anịsakị yee tụndụ mẹmgba ikelema-koro ḅụ ịn gbọrụ tomḅọ sọ ẹrị ma; yee anana ogbo ma, anịanịa opu anama ogbo ma sọ anị tụndụ mẹ tọrọkọ ye-kọn-fị ma.” 4Mie ḅụ Mozizi tarị aị ma kịkaye kẹẹ maa aḍụḅarị pẹlẹm; tẹ ọ̀ nwẹnị KỊNỊNYANAḄỌ ḅe tọn ọ̀ pịrị tẹ ḅara ḅụ dede-funfun ḅụ saakị, tẹ ọ̀ ḅara-ḅio maa ye kẹẹ aḍụḅarị ma ọkị, tẹ Sayịnayị Tụndụ mẹ kpọlị iwo.
5KỊNỊNYANAḄỌ ḅe nwẹnị oḅuto kpo ḅio tuuideri-ḅo anịanga ori na sịẹsime, tẹ KỊNỊNYANAḄỌ ḅe ẹrẹ mẹ ḍuko pakama. 6#Pks 20.5,6; Kịẹ 14.18; Dit 5.9,10; 7.9,10KỊNỊNYANAḄỌ ḅe ọ̀ tọrọkọ ḅụ mẹnjị-ḅọrọm, tẹ ḍuko pakamam, “KỊNỊNYANAḄỌ ḅe, Yẹrị anie KỊNỊNYANAḄỌ ḅee, sịḅị-kụrụkụrụ na ḍiki-ḅụụjịrị na nyana Tamụnọ, kpekele ịganị ịganị-a tẹ jike jike-a ḅẹlẹma nyana ḅọ, pịkị ḅioḅẹngbọ-kẹ-sịrẹrẹ-niḅi ḅọ. 7À jike-a ḅẹlẹma nyana tomi pịrịarị mu ḅụọ-fa-ḅụọ-paka la. Àrị iri-amịẹaị na, oloko kan na, si na wẹrịsoarị; kụma gbala-gbala à ḅẹrẹ-ḅarasii-ḅọ mẹ wẹrịso ḅịa, tẹ ḍapụ-na-iyingiapụ-na mịẹ asi ma gotẹ fomu-ḅara kẹ ịna awọmẹ na, taa-awọmẹ na, ile-awọmẹ na ọgọnọ gbanarị.” 8Mozizi nwẹnị fọnya ḅara kẹ ọ̀ sịḅị-tuu kiri pịrị tẹ sunsin KỊNỊNYANAḄỌ ḅe pịrị 9tẹ ọ̀ nwẹnị ḅẹẹ, “Yei KỊNỊNYANAḄỌ à nwẹnị mịọkụ í ḍiki-tọrụ ḅụ ị́ ḅụụ-ḅẹlẹarị ḅẹḅẹ, yee KỊNỊNYANAḄỌ ḅe wamịna ogbo ḅio sọ-mu, arị ị́ tẹkẹm, wamịnị kọngọ-kụrọtẹ atomi ḅẹsọ; tẹ wamịna mịẹ-irima na, wamịna si na wẹrịsoo, tẹ wa ọkị ị́yẹrị nyana apụ sọmaa.”
Ini Ọḅọkụ Mẹ Mịẹ Ịwọmam
(Pks 23.14-19; Dit 7.1-5; 16.1-17)
10KỊNỊNYANAḄỌ ḅe nwẹnị Mozizi ḅẹẹ, “Ị́ atomi mamgba tọrọkọ ḅụ àrị ị́nịna ọḅọkụ fịarị. Jene-jene bebe tomikiri mamgba, anịanịa ḅẹ opu sịẹ, opu sịẹ ḅụ amụ kọrị-a ḅụụ-gbiripuma-aị à nwẹn kọrị ḅa; anịsakị inima tẹ ogbo-ḅio ḅụ ọmịnị emi atomi mamgba ị̀ kọrịnama mẹ ẹrị ḅa; kẹ gotẹ ọkọ ḅẹẹarị, tẹmẹ-naịn-naịnmaye mie à mịẹ ọ́ pịrị ḅarịye. 11Ọ́ mịmgba à tọn ọ́ pịrịarị aị ma kẹ elekima sụa. Ḍikii àrị ọmịna tọrọkọ Amọrayịtị apụ ma na, Kenanị ḅẹ apụ ma na, Itayịti apụ ma na, Pẹrịzayịtị apụ ma na, Hivayịtị apụ ma na, Jebusayịtị apụ ma na dee-pakama ḅa. 12Ọmịnị ọmịna aḅụụ ẹbị, anieofori ó ḅofa ó muarị ama mẹ ḅio angarị apụ ma na ḅịḅị-kẹ-ogbosọ nyana; anieofori anị ḅofa ḅo ḍiein sọ ọ́ pịrị. 13#Dit 16.21Ọmịnị ịna ebeka ma kan-sara, tẹ ịna ịḅalị ma anyịma sara, tẹ ịna ere-oru Asirimu ma pẹlẹ-gbin ḅa. 14Ó sunsin jen oru-tamụnọ pịrị ma, gbala yẹrị tẹ Afana kẹ ẹrẹ sọma fị ḅọ ḅe anie afana Tamụnọ. 15Anieofori ó ḅofa ama mẹ ḅio angarị apụ ma na ḅịḅị-kẹ-ogbosọ nyana, tẹ ini ịna oru-atamụnọ ma ḍukamẹnjị sẹfị amịẹaị ma mịẹ tẹ agba mịẹ ịna oru-atamụnọ ma pịrị tẹ kịnị ọ́ sịn sakị ó mu ori agbamịẹ fịye mẹ fị, 16tẹ ịna eremịna-awọmẹ ḅụ kịnị ọkị sime ọmịna owiapụ-awọmẹ pịrị, tẹ ịna eremịna-awọmẹ ma ịna oru-atamụnọ sẹfị amịẹaị ma mie tẹ ọmịna owiapụ-awọmẹ ma mịẹ tẹ ini ịna oru-atamụnọ ḍukamẹnjị sẹfị amịẹaị ma mịẹ.
17 #
Pks 20.4; Lẹv 19.4; Dit 5.8; 27.15 “Ọ́ ḅara kẹ gbọrụ oru-tamụnọ sọ tẹmẹ ọmịna aḅụụ pịrị ḅịa.
18 #
Pks 12.14-20; Lẹv 23.6-8; Kịẹ 28.16-25 “Ó sunmaye sọ-a fịturu alalị mẹ fị ḅa à wẹrịtẹ tọn ọ́ pịrị ḅara, sọnọma aḍin ọ́ nwẹn kẹ sunmaye sọ-a fịturu fị ḅa ịn kẹ Abibu sịn akalụ mẹ ḅụ, à pẹlẹ ọ́ pịrị sakị mẹ ḅụ; kẹ gotẹ ọkọ ḅẹẹarị, Abibu nwẹn-sịn akalụ mẹ ḅụ mie ọmịnị Ijiputi ama mẹ ḅio paka-ḅo ye.
19 #
Pks 13.2
“Awọ tẹ furo mẹ finji aị mamgba ì nye opu anama ḅẹ owi, pịkị tarị iyi nambulo na anana na. 20#Pks 13.13Tarị iyi yedogi-nama ọmịnị anana tụḅọ kẹ ḅo ọ̀ pakịrị ọkị ḅa, anịanịa ọmịnị ọ̀ kọngọ anyịma ḅa ọmịnị ọ̀ pakịrị ọkị ḅịa ḅẹḅẹ. Ọmịna owiapụ-awọmẹ ma ḅụ ó tarị iyi apụ mamgba ọ́ pakịrị ọkị fama ḅa.
“Gbọrụḅọ-sọ ḅara-ḅio gberie-sọ ofori ḅara kẹ ị̀ tọrọkọ ḅụụ ḍie-pakama ma.”
21 #
Pks 20.9,10; 23.12; 31.15; 35.2; Lẹv 23.3; Dit 5.13,14 “Sonio aḍin mie ọ́ kẹ kọrịnama kọrị ḅarịye, kụma sọnọma ḍin karama ene mẹ ḅụ ọmịnị ịnyọsara ḅa: fịye ḍiḅi ḅẹ kiri soku sakị na, fịye soku sakị na ḅụ ọmịnị ịnyọsaraa.”
22 #
Lẹv 23.15-21; Kịẹ 28.26-31;
Lẹv 23.39-43
“Ọ́ fẹnị-anga-anga ḅụ fị-fị kopini afịaị alalị mẹ fịị, ịn kẹ witi sịn mbịaka mẹ ḅẹ tarị pẹlẹ aị ma fịye soku sakị ḅụ, na kụra mẹ kunoma ḅụ fịaị kobiri warị suu alalị mẹ na.”
23“Kụra ḅụ tẹra asakị tẹra asakị ọmịna owiapụ mamgba nwẹn kẹ ḅo yẹrị KỊNỊNYANA-TAMỤNỌ, Izirẹlịapụ tẹkẹarị Tamụnọ ḅe tọrọkọ sunsin ḅa. 24Kẹ gotẹ ọkọ ḅẹẹarị, àrị ọmịna tọrọkọ opu asịẹ wakị-wakị nguma ḅa, tẹ ọmịna agara ma mịẹ-mịẹ ḍụḅama ḅa; kụra mẹ ḅụ ọ́ tẹra asakị tẹra asakị kẹ iwo-iwo ị̀ tọrọkọ tolu pakarị sakị, gbọrụ tomḅọ sọ ọmịna ama ọkị ḅẹ ḅii ḅịa.”
25 #
Pks 12.10
“Ị̀ agba ḅẹ ọmbie mẹ ḅụ ó ye-sunmaye kẹ sụa mịẹ ma, anịanịa Saḅaḅọrọ-Alalị mẹ ḅẹ afịaị ma ḅẹ kirikọn-ye kẹ wẹrị nwenii ḅo dede-ḅio la.”
26 #
Dit 26.2;
Dit 14.21
“Ọmịna kiri mẹ ḅụ ọ́ tarị soku ḅarị sịnmgbọlụ ma ḅẹ tarị aị ma ọ́ kẹ yẹrị ọmịna Tamụnọ ḅe warị ḅoo.”
“Ọmịnị asambịrịma oḅori iyi iyingiḅọ ndo-minji kẹ asambịrịma oḅori ḅe sọ ma.”
27KỊNỊNYANAḄỌ ḅe nwẹnị Mozizi ḅẹẹ, “Mịna ẹkwẹn-aḅịḅị ma kẹẹ; à kẹ ị́yẹrị na, Izirẹlị na fị tẹ ọḅọkụ mẹ, mịna ẹkwẹn-aḅịḅị ma wẹrịtẹ kọọn ḅara.” 28Tẹ ori anịjụ ḅụ KỊNỊNYANAḄỌ ḅe na ḍin amesi na, eneḅaka amesi na simem; fịye sọ ọ̀ fị-a, ọ̀ pịkị minji sọ ḅuu-a, tẹ ò ye kẹẹ aị ma ọgọnọ ọḅọkụ mẹ ḅẹ ẹkwẹn-aḅịḅị ma kẹẹm, Oyi Oloko Ma.
Mozizi Sayịnayị Tụndụ Mẹ Ọgọnọ Koro-ḅom
29 #
2 Kọr 3.7-16
Mozizi Sayịnayị Tụndụ ọgọnọ ḅụụ ḍie-pakama maa ye kẹẹ aị ma ọ̀ ḅara-ḅio emi tẹ ori arị na tụndụ mẹ ọgọnọ ideri-ḅo sakị, Mozizi nimi-a mịnẹ ọ̀ tọrụkuḅu mẹ ḅẹ oju-kiri mẹ ḅịyarị, gbala ọ̀ Tamụnọ na ẹkwẹn simem ẹrẹsị. 30Tẹ Erọnị na, Izirẹlịapụ mamgba na ori ẹrị sakị, ḍikii ọ̀ tọrụkuḅu mẹ ḅẹ oju-kiri mẹ ḅịyarị tẹ sọma ò kpeki nwẹnị ịna ḅalafama. 31Kụma Mozizi ịn sịnm, tẹ Erọnị na, tomi ogbo mẹ ḅẹ tọrọkọ tarị apụ mamgba na nwẹnị pịkịma ọ̀ ḍọkụma-mu, tẹ Mozizi ini na ẹkwẹnm. 32Anị sakị mẹ ḅọrọ tẹso, Izirẹlịapụ mamgba kpeki ḅom tẹ ọ̀ Sayịnayị Tụndụ ḅụ KỊNỊNYANAḄỌ ḅe ori na kọn ẹkwẹn ma kẹ Oloko ḅụ ịn pịrịm. 33Tẹ Mozizi ini na ẹkwẹn fama tẹso, ọ̀ nwẹnị ḅịtẹ kẹ ọ̀ tọrụkuḅu gbaịn. 34Kụma Mozizi sọ-mu KỊNỊNYANAḄỌ ḅe tọrọkọ ori na ẹkwẹn-arị sakị goyegoye, ori anị sin-arị, nwenii ọ̀ paka-ḅoarị; tẹ ọ̀ paka-ḅo sakị, ọ̀ nwẹnị KỊNỊNYANAḄỌ ḅe tọn ọ̀ pịrị ye ḍuko Izirẹlịapụ ma pịrị. 35Izirẹlịapụ ma Mozizi tọrụkuḅu mẹ ẹrịm mịnẹ Mozizi tọrụkuḅu mẹ ḅẹ oju-kiri mẹ ḅịyarị; tẹ Mozizi nwẹnị tọrụ gbaịn ḅịtẹ mẹ kẹ siin ọ̀ tọrụkuḅu gbaịn ḅa, nwenii ò mu KỊNỊNYANAḄỌ ḅe na ẹkwẹn sakị la ḅa.
Attualmente Selezionati:
Paka-so 34: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
