Paka-so 32
32
Tomi Ma Sunsin Golu Nambulo Pịrịm
(Dit 9.6-29)
1 #
Fịr 7.40
Tomi ma ẹrịm mịnẹ Mozizi tụndụ mẹ ọgọnọ ḅụ ḅarị kpekele ideri-ḅoa tẹso, ịn nwẹnị ịna aḅụụ kobiri gboloma tẹ Erọnị ḍọkụma-ḅo tẹ ọ̀ ḅẹẹ, “Saakịị, oru-atamụnọ tẹmẹ wa pịrịị, wa kẹ tọrọkọ sụn ḅẹ aị; ḅie Mozizi ḅe tẹ Ijiputi ama ḅụ wa pakama-ḅo ḅọ ḅe, ọ̀ ḅụụ paka tẹ ye wa nimi-a.”
2Erọnị nwẹnị ịn ḅẹẹ, “Ó golu ḅerisụa-aị ma tẹ ọmịna sime-ereme na, ọmịna owiapụ-awọmẹ na, ọmịna eremịna-awọmẹ na aḅeri simearị aị ma sin tẹ arị ọkị-ḅo ị̀ pịrịị.”
3Mie ḅụ tomi mamgba golu ḅerisụa-aị tẹ ịna aḅeri sime aị ma sin tẹ arị ọkị-ḅo Erọnị pịrịm. 4#1 Ama 12.28; Fịr 7.41Tẹ ori ịna ḅara ḅụ golu mẹ ọkị, tẹ anị sanị, tẹ kẹ gbọrụ kala nambulo tẹmẹm, tẹ ịn nwẹnị ḅẹẹ, “yei Izirẹlị, mịna oru-atamụnọ ma anie ọmịna oru-atamụnọ ma tẹ Ijiputi ama mẹ ḅio ọ́ pakama-ḅo aị ma.”
5Erọnị miemẹ ẹrị tẹso, ori anị tọrọkọ gbọrụ ebeka namam; tẹ Erọnị nwẹnị kpo-kpo gbolo tẹ ḅẹẹ, “Ḅaa alalị fị KỊNỊNYANAḄỌ ḅe pịrị emi.” 6#1 Kọr 10.7Ene ḅaa ḅẹ dede-funfun ḅụ ịn nwẹnị saakị tẹ dọkịma-agba mịẹ, tẹ dein-pịrị-agba mịẹ-aị ọkị-ḅo, tẹ tomi ma nwẹnị Lẹgị-sime tẹ fịye fị pịkị iru ḅuu tẹ saakị tẹ tiim.
7KỊNỊNYANAḄỌ ḅe nwẹnị Mozizi ḅẹẹ, “Ideri-muu, kẹ gotẹ ọkọ ḅẹẹarị, ị́ atomi inima tẹ ị́ Ijiputi ama ḅụ pakama-ḅo apụ ma ịna aḅụụ sima tẹ. 8Ịn fọnya ḅara kẹ etela mẹ tẹ à tọn ịn pịrị ye mẹ ḅụ tọrụ pịkị akaka da tẹ, ịn ḅara kẹ kala nambulo tẹmẹ, tẹ sunsin anị pịrị, pịkị agba mịẹ anị pịrị tẹ ḅẹẹm, ‘yei Izirẹlị, mịna oru-atamụnọ ma anie ọmịna oru-tamụnọ ma tẹ Ijiputi ama ḅụ ọ́ pakama-ḅo aị ma!’ ”
9KỊNỊNYANAḄỌ ḅe nwẹnị Mozizi ḅẹẹ, “Ḍikii, mịna atomi ma arị ini ẹrị tẹ, inima anie kọngọ kụrọtẹ atomi. 10Ọkọẹrẹsị mịọkụ mẹ kẹ ị̀ wẹrịsoo, mịẹtẹ ị̀ kụrọ ịganị mẹ ịn da-paka tẹ ọfịrị ịn dọkịma tẹ arị in dọkịma sin ḅarị ḅara; kụma ị́ ḅụụ ḅụ à gburo-gburotẹ opu sịẹ pakama ḅa.”
11 #
Kịẹ 14.13-19
Kụma Mozizi KỊNỊNYANAḄỌ ọ̀ Tamụnọ ḅe tẹkẹm, “Yei KỊNỊNYANAḄỌ ị́ kụrọ ịganị mẹ tiegotẹ Ị́ atomi ma tẹ Ijiputi ama mẹ ḅio ị́ opu kụrọ na, kụrọtẹ opu ḅara na kẹ pakama-ḅo apụ ma da-paka tẹ ọfịrị ịn dọkịma ḅẹ? 12Ijiputi-ḅẹ-apụ ma tiegotẹ ḅẹẹ ḅẹ, ‘Siye kẹ ịn mịẹ ḅẹ kuroma mie ọ̀ kẹ ini ọkị-ḅo ye, tụndụ ma ḅio ịn ḅaa ḅẹm, tẹ tomikiri tọrụ mẹ ḅụ ịn fama? Ị́ ḅalafama kụrọ ịganị mẹ ḅụ pịkịị, tẹ mie ị́ atomi da-paka ḅẹ siye mẹ wẹrịsoo. 13#Suk 22.16,17; 17.8Ị́ afịrịmẹnjịapụ Ebira-amụ na, Ayịzịkị na, Izirẹlị na kẹ ḅiokoromaa, inima tẹ ị́yẹrị ḅioju ḅarana ye karị ḅara kẹ ịn ḅẹẹm, À mịẹtẹ ọmịna furo-ḅẹ-apụ lolo-kama tẹ So-tọrụ ḅẹ alolia sime ḅara sime ḅa, anịsakị mị ama mẹ tẹ à minini ye mẹ, à kẹ ọmịna furo-ḅẹ-apụ pịrị ḅa, tẹ ini anị nyana gbamaso ḅa.’ ” 14Mie ḅụ KỊNỊNYANAḄỌ ḅe siye tẹ ọ̀ kẹ ori atomi mịẹ ḅẹ kuroma ye mẹ wẹrịsom.
15Mozizi nwẹnị tụndụ mẹ ọgọnọ vuunma pịkị tẹ ọ̀ ḅara ḅụ simearị Oyia Oloko ma kẹẹ wararị maa ḍụḅarị apakịrị ma tẹ maa anga mamgba ḅụ ye kẹẹ wararị aị ma kẹ ideri-ḅo. 16Anịsakị ye kẹẹ aị ma anie Tamụnọ kọrịnama, kẹẹ wararị aị ma Tamụnọ mie pịkị arị kẹẹ ye, ye kẹẹ aị ma ọgọnọ ini arị sọkị sụa wararị.
17Jọsụwa tomi ma oloku ye-yọ mẹ fiema ḅara mẹ naa tẹso ọ̀ nwẹnị Mozizi ḅẹẹ, “Kobiri-ogbo mẹ ḅio ye-yọ mẹ fiearị ḅara ọmụ emi.” 18Kụma Mozizi nwẹnị pakịrị, “Mie owu-ḅara-iḅi oloku-pokọ-a, anịanịa owu-ḅara-sii owu-pọkọ, kụma nume-su pọkọ mie à naarị.”
19Mozizi ḅo kobiri-ogbo mẹ sime anga mẹ kpeki tẹ kala nambulo ḅe na, sẹkị ḅara mẹ na ẹrị gbọrụ sakị, ịganị ọ̀ ḅụụ serim, tẹ ọ̀ nwẹnị ori aḅara-ḅio sime ye kẹẹ wararị aḍụḅarị ma kẹ gbin, tẹ arị nwẹnị tụndụ mẹ suku fịị gẹrẹ-gẹrẹ. 20Ọ̀ nwẹnị kala nambulo ḅe tẹ ịn tẹmẹ ye mẹ ọkị tẹ fịnị kẹ anị dọkịma, tẹ anị gbẹẹ fọọn mịẹ, tẹ anị kẹ minji ḅio sara, tẹ nwẹnị Izirẹlị ḅẹ apụ ma mịẹ tẹ ini anị ḅuu. 21Mozizi nwẹnị Erọnị ḅẹẹ, “Mịna atomi ma tiye kẹ ị́ mịẹ, tẹ ị́ nwẹn sime gburo-gburotẹ opu si ọkị-ḅo ini ọgọnọ gbana?”
22Erọnị nwẹnị pakịrị, “Yee ị̀ nyanaḅọ ḅe ịganị fịnị sọ tẹ ọfịrịma, tomi ma ị́ in nimi wararị, siye mịẹ ḅụ ịn tẹlẹma wararị. 23Kẹ gotẹ ọkọ ḅẹẹarị, ini ị̀ ḅẹẹm, ‘Oru-atamụnọ tẹmẹ wa pịrịị, tọrọkọ tarị wa pịrị ḅarị apụ; ḅie Mozizi ḅe tẹ Ijiputi ama mẹ ḅio wa pakama-ḅo ḅọ ḅe ọkụma ọ̀ ḅụụ paka tẹ ye wa nimi-a.’ 24Tẹ àrị ịn ḅẹẹm, ‘Yee ḅẹḅọ-ḅẹḅọ tẹ golu nyana ḅọ, nyana ḅọ anị kẹ ḅo; mie ḅụ ini arị kẹ ị̀ pịrịm tẹ àrị anị kẹ gbin fịnị ḅio suum, tẹ ḅị kala nambulo ḅe paka-ḅom.’ ”
25Mozizi ẹrịm mịnẹ tomi ma ḅarị ḅụụ ọlọ-a tẹ kaan-sara tẹ (gbala Erọnị ịn wẹrịso tẹ ini na fịya-a apụ tọrọkọ ḅụ ịn ḅụụ-jịrịma ḅara kẹ ḅụụ ọlọ-a tẹ kaan-sara tẹ ẹrẹsị), 26anịtẹso Mozizi mu mẹnjị kobiri-ogbo mẹ sọ-muarị onu ḅọkọ mẹ ḅụ sịẹsimem, tẹ nwẹnị ḅẹẹ, “Tụḅọ KỊNỊNYANAḄỌ ḅe jụ emi? Mḅọ ị̀ ḍọkụma-ḅoo.” Tẹ Livayị owiapụ-awọmẹ mamgba amịna ḅụụ kobiri gboloma tẹ ọ̀ ḍọkụma-mum. 27Tẹ ọ̀ nwẹnị ịn ḅẹẹ, “Mị-ḅara mie KỊNỊNYANAḄỌ, Izirẹlịapụ tẹkẹarị Tamụnọ ḅe ḅẹẹ ḅara, ‘Owiḅọ nwẹn-sịn owiḅọ amịna angagbasa ḅụ amịna okologie sin tẹ kobiri-ogbo mẹ ḅio mẹnjị-iwo-na-ideri-na gbọrụ onu ḅọkọ ḅụ so mu jen la ikelema-koro tẹ ọrụḅọ-ọrụḅọ iyimbere-mịnaḅọ pẹlẹ-ḅaa, ikiaḅọ mḅọ ikiaḅọ pẹlẹ-ḅaa, mịnaḅọ mḅọ na kpeki tẹ angarị mịnaḅọ pẹlẹ-ḅaa.’ ” 28Livayị owiapụ-awọmẹ ma Mozizi ẹkwẹn-ḅịḅị mẹ wẹrịtẹ ḅẹẹ ḅara mịẹm tẹ anị ene mẹ ḅụ, tomi ma ḅụ kịnị sọnọma ẹndẹ oyia asi finji (3,000) ḅaam. 29Mozizi nwẹnị ḅẹẹ, “Mịmgba ọmịnị ọmịna aḅụụ wẹrị ḅelema KỊNỊNYANAḄỌ ḅe fịrị mẹ mẹnjị pịrị tẹ, ọrụḅọ-ọrụḅọ amịna owiḅọtụḅọ na, mḅọ iyimbere mịnaḅọ na ḅaa ḅụ, mịẹtẹ mịmgba mẹ ḅụ ò boma kẹ ọmịna ọgọnọ sara ḅẹ ḅara.”
30Anị ḅẹ ene-ḅaa ḅụ, Mozizi nwẹnị tomi ma ḅẹẹ, “Ọmịnị opu si mịẹ tẹẹ. Mịọkụ àrị iwo KỊNỊNYANAḄỌ ḅe ḍọkụma-mu ḅa, ẹbịsịya àrị inetẹ si-wẹrịso nyana ọmịna si mẹ pịrị ḅa.” 31Mie ḅụ Mozizi pịkịma-so KỊNỊNYANAḄỌ ḅe dama-mu tẹ owu na, owu na ḅụ ḅẹẹm, “Mịna atomi ma gburo-gburotẹ opu si mịẹ tẹ; ịn golu kẹ oru-atamụnọ tẹmẹ ịna aḅụụ pịrị tẹ. 32#Dev 69.28; Mịẹ 3.5Kụma mịọkụ í minini ḅẹ namịna, mimgbe ị́ ịna si-wẹrịso ịn pịrị tẹ nwẹnị ọkọ-a ḅẹḅẹ, arị ị́ tẹkẹm ḍiri mẹ tẹ ị́ kẹẹ tẹ ye mẹ ḅio ị̀ ẹrẹ kọrọrọ-siin.”
33Kụma KỊNỊNYANAḄỌ ḅe nwẹnị Mozizi ḅẹẹ, “Ḅẹḅọ-ḅẹḅọ tẹ si kẹ ị̀ mịẹ ḅọ, mịẹ ḅọ ẹrẹ mie àrị ì ḍiri ḅio kọrọrọ-siin ḅarịye. 34Kụma mịọkụ soo, mu etela kẹ tomi ma ḍie anịanga mẹ tẹ à ḍuko ị́ pịrị anga mẹ muu ḍikii ị̀ enjẹlị tọrọkọ ḅụ ị́ na mu ḅa. Anịsọ, à ḅo toluma ịn ḍiki ḅarị ene la sakị, arị ịn mịẹ si mẹ kẹ ịna ọgọnọ gbana ḅa.”
35KỊNỊNYANAḄỌ ḅe nwẹnị fomu-ḅara kẹ tomi ma pịrị, gbala ini mie anị kala nambulo ḅe tẹ Erọnị tẹmẹ ye mẹ tẹmẹ ye ẹrẹsị.
Attualmente Selezionati:
Paka-so 32: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
