Paka-so 21
21
Kẹ Omoniapụ Mịẹ Ḅẹ Ḅara
(Dit 15.12-18)
1Mịọkụ mịna aị ma anie oloko ma tẹ kụrọ ḅara-ḅio sime ḅọ sụa oloko ma: 2#Lẹv 25.39-46“Ọmịnị Hiburu ḅẹ omoniḅọ fẹẹ, fẹẹ, sonio akụra mḅọ nwẹn kẹ fịrịmẹnjị ọ́ pịrị ḅa, sọnọma akụra karama kụra mẹ ḅụ mḅọ gbọrụ ye sọ gbẹẹ-a ḅara ḅụ amịna sịḅị nyana ḅa. 3Ò ḅo í omoniḅọ sọ sakị ori ngẹrị ḅo-ḅoo, ori ngẹrị pịkị paka-so ḅa, ọ̀ nwẹnị ẹrẹḅọ sime tẹ kẹ ḅo-ḅoo, anịrẹ ọ̀ ta ọ̀ ḅụụ sọ tẹ ori na paka-so ḅa. 4Ọ̀ sịḅịdaḅọ nwẹnị ẹrẹḅọ kẹ ọ̀ pịrị sime tẹ arị owiapụ-awọmẹ anịanịa eremịna-awọmẹ iyi ọ̀ pịrị, pịrị taḅọ ma na, awọmẹ ma na sime sịḅịdaḅọ ḅe pịrịm, ori kịngẹ mie paka-so ḅarịye. 5Kụma omoniḅọ ḅe giregirema ḅẹẹm, ‘Àrị ị̀ sịḅịdaḅọ ḅe na, ị̀ ta ma na, ị̀ awọmẹ ma na ḅẹlẹmam, àrị ị̀ sịḅị nyana tẹ paka-so ḅịa’ nwẹn ḅẹẹ ḅẹẹ, 6anịrẹ ọ̀ sịḅịdaḅọ ḅe ọ̀ kẹ Tamụnọ tọrọkọ ḅo, tẹ ori ọkị-ḅo ḅọkọ mẹ, anịanịa warị-ḅọkọ amasịn ma ḅụ sịẹma ḅa; anịsakị ọ̀ sịḅịdaḅọ ḅe ḅịḅị pịọ-pịọtẹ laga kẹ ò ḅeri tolu ḅa; tẹ ori ò ḍumo mẹmgba ḅụ fịrịmẹnjị ọ̀ pịrị ḅa.”
7“Gbọrụ owiḅọ ori ẹrẹḅọtụḅọ kẹ omoniḅọ ḅara dẹrị-dẹrị, árị omoni owiapụ ma so ḅara so ḅịa. 8Á nwẹnị ḅarị ori ḅe tẹ á nyana amịna ḅụụ pịrị sịḅịdaḅọ ḅe ḅụụ-ḅẹlẹ-a ḅẹḅẹ, anịrẹ ọ̀ wẹrịso tẹ ini á pakịrị ọkị ḅa; ọ̀ kụrọ nyana ḅịa á kẹ igoniapụ dẹrị, ori á ḅụụ minini nyana-a ḅara kẹ arị na mịẹ tẹ nwẹn ḅẹẹ sakị. 9Ọ̀ nwẹnị á nyana tẹ kẹ ori owiḅọtụḅọ pịrị, pịrị, ori ẹrẹḅọtụḅọ mịẹ ḅara mie ọ̀ kẹ arị na mịẹ ḅarịye. 10Ọ̀ nwẹnị jen ẹrẹḅọ sime amịna ḅụụ pịrị, pịrị, tarị ẹrẹḅọ ma kiri fa ḅịa, anị fịye-o, kapa na ḅịtẹ na-o, pịkị mịẹ-aị na kẹ ye mịẹ-mịẹ aị na ḅụ sọ. 11Ọ̀ nwẹnị mịna ye ḅụ ḅẹ tẹrẹị ma mịẹ á pịrị-a ḅẹḅẹ, arị igbigi gbẹẹ-a ḅara kẹ papaa mẹnjị paka-so ḅa.”
Ye Kẹ Kịnị Lama Amịẹaị Gboloma Oloko
12 #
Lẹv 24.17
“Tomḅọ nwẹn-sịn tomḅọ tẹ kịnị fomu tẹ mịẹtẹ mḅọ fịị ḅọ, fịị ḅọ, ini mḅọ ḅaa ḅa. 13#Kịẹ 35.10-34; Dit 19.1-13; Jọs 20.1-9Kụma ọ̀ nwẹnị ori ẹnyẹ-a tẹ yẹrị minini tẹ ori ọ̀ ḅara-ḅio sọ sọọ, anịrẹ à gbọrụ anga tẹ ò ḍumo-mangị kọn mu ḅarị anga tọn ḅa. 14Kụma tomḅọ nwẹnị ḅaa kẹ ḅiotọn kịnị pịrị, tẹ nwẹnị oḅori kẹ mḅọ sịn ḅara kẹ owu kẹ mḅọ paka tẹ mḅọ ḅaa, ḅaa, ị̀ agbamịẹ-anga ḅụ sọ ọmịnị inetẹ mḅọ ọkị ḅa, mịẹtẹ mḅọ fịị ḅarị ḅara.”
15“Ḅẹḅọ-ḅẹḅọ tẹ amịna ḍaḅọ, anịanịa amịna iyingiḅọ fomu ḅọ, fomu ḅọ, ini mḅọ ḅaa ḅa.”
16 #
Dit 24.7
“Ḅẹḅọ-ḅẹḅọ tẹ tomḅọ furu ḅọ, furu ḅọ mḅọ, mḅọ dẹrị-o, mḅọ anị ḅọ mẹ kẹ mḅọ nyana tomḅọ sọma tẹ kẹ wẹrị sọ, ini mḅọ ḅaa ḅa.”
17 #
Lẹv 20.9; Mat 15.4; Mak 7.10 “Ḅẹḅọ-ḅẹḅọ tẹ ye karị amịna ḍaḅọ, anịanịa amịna iyingiḅọ pịrị ḅọ, pịrị ḅọ, ini mḅọ ḅaa ḅa.”
18“Tomi kamụ-sọ tẹso, gbọrụḅọ ḍụḅarị kẹ osi-ḅọ gbinm, anịanịa mgbụlụḅa sụa tẹ kẹ mḅọ ḅakụm, tẹ tomḅọ mẹ fịị-a, kụma iḅila ḅọlọlọ obi kọnm, 19anịtẹso mḅọ pịkị sin saakị mẹnjị jen anga muarị tẹ amịna mkpara kẹ ḅụụ ḍa da, ye ḅarị mḅọ ḅakụ ḅọ mẹ ọlọ-a, ọ̀ sakị tẹ fa ye mẹ ḅẹ igbigi kịngẹ mie ọ̀ kẹ gbẹẹ ḅarịye, tẹ iḅiọkụ ọ̀ gwọ kụrọma ḅa.”
20“Tomḅọ fomuye kẹ amịna omoni owiḅọ, anịanịa ẹrẹḅọ fomu tẹ mḅọ anị tomḅọ mẹ ḅara ḅio sime tẹ fịịm ḅẹḅẹ, ịn fomu-ḅara kẹ mḅọ pịrị ḅa. 21Kụma omoniḅọ mẹ fịị-a tẹ gbọrụ ene, anịanịa maa ene ḅọrọm ḅẹḅẹ, ini mḅọ fomu ḅịa, kẹ gotẹ ọkọ ḅẹẹarị, omoniḅọ mẹ anie mḅọ nyana ye.”
22“Kịnị ịgbanịya nyana tẹ owu sọ tẹ ye kẹ furatẹ-ẹrẹḅọ lama tẹ mịẹtẹ fura mẹ gbisinim, tẹ anịsọ jen siye anị ḍuka ma-ḅo á ḅụụ paka-a ḅẹḅẹ, anị ḅọ mẹ tẹ ye mẹ kẹ á lama ḅo mẹ, á di kẹ mḅọ ọgọnọ gbana ḅarị igbigi fomu-ḅara gbẹẹ ḅa anịsakị ḅẹrẹkọn-apụ ma pẹlẹ mḅọ ọgọnọ gbana ye, gbana ye mḅọ nwẹn gbẹẹ ḅa. 23Kụma ye ẹrẹḅọ ma lam ḅẹḅẹ, anịrẹ ḍumo na, ḍumo na ḅụra ḅa, 24#Lẹv 24.19,20; Dit 19.21; Mat 5.38tọrụngbọ na, tọrụngbọ na; aka na, aka na; ḅara na, ḅara na; ḅụọ na, ḅụọ na; 25dọkị ye na, dọkị ye na; ịnọ na ịnọ na; fomuye ḅara na, fomuye ḅara na.”
26“Tomḅọ amịna omoni owiḅọ, anịanịa ẹrẹḅọ gbọrụ tọrụngbọ fomu pụnma-pụnma, anị pụụntẹ tọrụngbọ mẹ sịḅị ẹrẹsị mḅọ omoniḅọ mẹ wẹrịso tẹ mḅọ amịna sịḅị tomḅọ sọ ḅa. 27Mḅọ amịna omoni owiḅọ anịanịa, ẹrẹḅọ aka gbọrụmgbọ ḅakụ sin-sin, anị aka gbọrụmgbọ mẹ sịḅị ẹrẹsị mḅọ omoniḅọ mẹ wẹrịso tẹ mḅọ amịna sịḅị tomḅọ sọ ḅa.”
Nama Nyana Apụ Sẹịn Onyo Mẹ
28“Pootẹ-nambulo amịna ịfalị kẹ owiḅọ anịanịa ẹrẹḅọ temi ḅaa-ḅaa, pootẹ-nambulo ḅe ịn ḍụḅarị kẹ ò gbin ḅaa ḅa; anịsakị anị ḅẹ meni mẹ kịnị pẹị ma; kụma pootẹ-nambulo ḅe nyana ḅọ ḅe ịn ye kẹ ọ̀ mịẹ ḅịa. 29Kụma pootẹ-nambulo ḅe anị ḅara mịẹ mịẹm, tẹ ḅọrọtẹ sakị ḅụ ịfalị kẹ kịnị temi tẹ ini ọ̀ nyanaḅọ ḅe ḅeri nụnụ tẹ, tẹ ori ọ̀ kẹ warị ḅio wẹrị-a, tẹ ori amịna ịfalị kẹ owiḅọ, anịanịa ẹrẹḅọ temi ḅaa-ḅaa, ịn ḍụḅarị kẹẹ pootẹ-nambulo ḅe gbin ḅaa ḅa, anịsakị ịn pịkị ọ̀ nyanaḅọ ḅe sọ ḅaa ḅa. 30Ịn nwẹnị ọ̀ ḅaa-a tẹ ọ̀ wẹrịsom ḅẹḅẹ, kẹ ò ḍumo pakịrị ḅụ ori ịn kẹ ori ọgọnọ gbana ye, gbana ye gbẹẹ ḅa. 31Anị ịfalị kẹ gbọrụ owiḅọ iyi owiḅọtụḅọ, anịanịa ẹrẹḅọtụḅọ temi ḅaa-ḅaa, anị wẹrịtẹ tọọn wararị ḅara mẹ kẹ ini anị mịẹ ḅa. 32Pootẹ-nambulo ḅe ịfalị kẹ omoniḅọ temi ḅaa-ḅaa, ḅọrọ owiḅọ-o, ẹrẹḅọ-o, ọ̀ nyanaḅọ ḅe seleḅa pakịrị suei kẹ omoniḅọ mẹ sịḅịdaḅọ gbẹẹ ḅa, tẹ ịn ḍụḅarị kẹ pootẹ-nambulo ḅe gbin ḅaa ḅa.”
33“Tomḅọ olulu ḅịḅị finji koroma tẹ anị wẹrịsom, anịanịa olulu soku tẹ anị ḅịḅị gbaịn-a, tẹ pootẹ-nambulo anịanịa, yedogi-nama anị ḅio siin-koro sọ, 34olulu anịanịa suḅe mẹ nyanaḅọ ḅe anị mịẹ na-iḅi ḅara kẹ anị mịẹ ḅa; mḅọ igbigi kẹ nama mẹ nyanaḅọ mẹ pịrị ḅa tẹ fịtẹ nama mẹ mḅọ nye sọ ḅa.”
35“Gbọrụḅọ pootẹ-nambulo ye kẹ jụmọ nye lama tẹ anị fịị ḅẹḅẹ, ini maa pootẹ-anambulo ma nyana maa apụ ma ḍumo wararị pootẹ-nambulo ḅe dẹrị tẹ anị la igbigi mẹ ḍiya ḅa; anịsakị ịn pịkị fịtẹ ye mẹ ḍiya ḅa. 36Anịanịa, ịn nimim mịnẹ pootẹ-nambulo ḅe anị ḅara mịẹ mịẹm, tẹ ḅọrọtẹ sakị ḅụ ịfalị kẹ jaị sọ temi tẹ, tẹ ọ̀ nyanaḅọ ọ̀ kẹ warị ḅio wẹrị-a ḅẹḅẹ, ò pootẹ-nambulo kẹ fịtẹ pootẹ-nambulo mẹ gbẹẹ ḅa, tẹ fịtẹ pootẹ-nambulo mẹ ò nye sọ ḅa.”
Attualmente Selezionati:
Paka-so 21: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
