Paka-so 15
15
Mozizi Nume Mẹ
1 #
Mịẹ 15.3
KỊNỊNYANAḄỌ ḅe tọrụ mẹ ḅio Ijiputi-ḅẹ-apụ ma fama tẹso, Mozizi na Izirẹlịapụ ma na mị nume mẹ su KỊNỊNYANAḄỌ ḅe boma tẹ ḅẹẹm, À mị nume mẹ su KỊNỊNYANAḄỌ ḅe boma ḅa,
ori ebube nyana owu-ḅara-iḅi nyana tẹ;
ori asụ ma na arị dọkụapụ na kẹ
opu tọrụ mẹ ḅio gbin suu tẹ ẹrẹsị.
2 #
Dev 118.14; Ayị 12.2 KỊNỊNYANAḄỌ ḅe anie ị̀ ịnyọ na, ì nume na.
Ò ḅo ị̀ ḅọrọmaḅọ sọ tẹẹ;
Ḅieḅe anie ị̀ Tamụnọ, àrị ò tokini ḅa;
ị̀ ḍa Tamụnọ, tẹ àrị ọ̀ saakị gelema ḅa.
3KỊNỊNYANAḄỌ ḅe anie ọmụḅọ;
KỊNỊNYANAḄỌ ḅe anie ori ẹrẹ.
4Fero kirimẹnjị-ọmụarụ na, ori ọmụ-ogbo na,
ọ̀ kẹ tọrụ-minji gbin ngumam;
anịsakị ọ̀ sẹlẹ-ọkị iḅitẹịn ọmụ-alapụ ma.
Awụ Tọrụ mẹ ḅio sombi fịịm.
5Opu minji mẹ ịn gbaịnm;
ḍụḅarị ḅile owolo ḅio sọ ḅara in nwẹn ḅilem.
6Yei KỊNỊNYANAḄỌ, ị́ opu kụrọ mẹ
ebube nyanam:
Yei KỊNỊNYANAḄỌ, ị́ opu kụrọ mẹ
kịnị-na-fịya-a ḅọ ḅe gbẹẹ kọsịmam.
7Ị́ ama-da opu mẹ ḍụḅa ḅụ,
ị́ ị́ na sọarị apụ ma nẹngịmam;
ị́ í owi ịganị fịrịma pakamam,
tẹ anị orumo samụnọtẹ asịra
dọkịma ḅara kẹ ịn dọkịmam.
8Í nini ḅụ sara paka-ḅo kụrọ ọwụ mẹ,
minji ma kpolimam;
opu aminji ma gbọrụ kpo ḅụ sịẹsimem,
tọrụ mẹ ogboku ḅụ, owolo ma oḅoku tẹ kpoom.
9Kịnị na fịya-a ḅọ ḅẹẹm,
àrị in ḍuka tẹ mu ịn la ḅa,
à fọịn ngọ ma ḍiya ḅa,
àrị à ḅii ḅara kẹ arị nyana ḅa,
àrị ì okologie sin ḅa,
à ḅarana ịn ḅaa-guluguluma ḅa.
10Ị́ ị́ fẹrụ mẹ kẹ ofurom,
tẹ opu tọrụ mẹ ịn gbaịnm;
ḍụḅatẹ aminji ma ḅio,
ịn lẹjị ḅile ḅara ḅilem.
11Yei KỊNỊNYANAḄỌ, oru-atamụnọ ma ḅụ,
ị́ kịkaḅọ tụḅọ?
Ama-da opu ḅụ fịafịa, ị́ kịkaḅọ tụḅọ?
Ebube nyana amịẹaị ḅụ ḅalafama,
tẹ ḅụụ-gbiripuma-aị kọrịarịḅọ tụḅọ?
12Ị́ ị́ opu kụrọ ḍiem,
tẹ kiri mẹ ịn sịẹma mẹnịm
13Í jike-a ḅẹlẹma ḅụ,
tomi ma tẹ ị́ pakịrị-ọkị tẹ apụ ma,
í etela kẹ in ḍie tẹ;
ị́ ịnyọ ḅụ ị́ in ḍikiḍiki mu,
ị́ fịafịa sime yọ mẹ la tẹ.
14Tomi-kụlọkụlọ ma naa tẹ, ini oju sẹkịarị,
sịḅịḅio fụkama bẹkẹ akụ
ḅo Filisiteniapụ ma kun tẹ.
15Mịọkụ Idọmụ ḅẹ sịḅịdapụ ma ekpe tukutukuarị
Mohabụ ḅẹ tọrọkọ-tarịapụ ma
oju sẹkị ịn kun-arị;
Kenanị ḅẹ apụ mamgba gbọrsịḅị sanị fa tẹẹ.
16Tẹmẹ-naịn-naịn na opu ḅalafa na ịn gbaịnm;
ị́ ḅara-kọngọ ḅẹ gburo-gburo mẹ gotẹ,
ịn paa ḍụḅarị sime-ḅara simem,
nwenii ị́ atomi ma mẹnjị-ḅọrọm, Yei KỊNỊNYANAḄỌ
nwenii ị́ atomi ma tẹ ị́ fẹẹ ọkị tẹ apụ ma mẹnjị-ḅọrọm.
17Ị́yẹrị ini ọkị-ḅo suu ḅa,
tẹ í soku-ḅẹ tụndụ mẹ ọgọnọ ịn ḍiḅi ḅa,
Yei KỊNỊNYANAḄỌ, ye-yọ mẹ tẹ ị́ tẹlẹma tẹ kẹ
í sime-yọ mịẹ tẹ anga mẹ ḅụ,
Yei KỊNỊNYANAḄỌ, fịafịa yọ mẹ tẹ ị́ aḅara
mịẹ-pakama tẹ yọ mẹ.
18KỊNỊNYANAḄỌ ḅe ama-da mu ḅẹẹ-sakị ḅẹẹ-sakị la ḅa. 19Kẹ gotẹ ọkọ ḅẹẹarị, Fero asụ ma na, ò kirimẹnjị-ọmụarụ ma na, ori asụ-dọkụapụ ma na, mẹnjị opu tọrụ mẹ ḅio sọ-mu tẹso, KỊNỊNYANAḄỌ ḅe opu tọrụ mẹ ḅẹ minji mẹ pịkịma-ḅo ịn gbaịnm kụma Izirẹlịapụ ma samụnọtẹ kpongbo-kiri ọgọnọ ḅụ mẹnjị-ḅọrọm opu tọrụ mẹ ogboku ḅụ.
Mirihamụ Pakama Nume Mẹ
20Anịtẹso Mirihamụ, ịkịankoro ẹrẹḅọ ma, Erọnị ịyịmbara ma, á ḅara-ḅio ịn kẹ tamborini nwẹn sin gbọrụ akwa ọkịm; tẹ ereme mamgba ịna tamborini ọkị tẹ sẹkị-sẹkị á ḍukamẹnjịarị. 21Tẹ Mirihamụ nwẹnị nume pakama tẹ saakị-saakị ịn pịrị:
“Ó nume-su KỊNỊNYANAḄỌ ḅe bomaa,
ori ebube nyana ḅara kẹ owu-ḅara-iḅi nyanam ẹrẹsị
asụ ḅe na ọ̀ dọkụḅọ ḅe na ori ịn kẹ
opu tọrụ mẹ ḅio gbin suu tẹ.”
Akụarị Minji
22Anịtẹso Awụ Tọrụ mẹ ḅụ Mozizi saakị Izirẹlịapụ ma tọrọkọ tarị tẹ mẹnjị tọrọkọ-tọrọkọ mum, tẹ ịn mẹnjị Sọọ ḅẹ ịkpa mẹ ḅio sọ-mum ịn tẹra aḍin mẹnjị ịkpa mẹ ḅio sọ-mum tẹ minji gbọrụmgbọ-sọ ḍọkị-ẹrịa. 23Ịn ḅo Mara nwẹn-sịn anga la sakị, Mara ḅẹ minji mẹ ini inetẹ anị ḅuu-a, anị akụarị ẹrẹsị anịẹrẹsị ini ẹrẹ kẹ anị kurom, Mara#15.23 Mara fiearị ye, Akụ. 24Tomi ma nwẹnị mbụrụmbụrụ Mozizi pịrị, tẹ ḅẹẹm, “Wa tiye ḅuu ḅẹ?” 25Tẹ Mozizi owu KỊNỊNYANAḄỌ ḅe pịrịm tẹ KỊNỊNYANAḄỌ ḅe nwẹnị gbọrụ sịn-pakịrị kẹ ò ḍie. Ọ̀ nwẹnị anị kẹ minji mẹ ḅio gbin suu, tẹ minji mẹ nwẹnị ḅo ḅẹlẹ.
Anịjụ mie KỊNỊNYANAḄỌ ḅe ịn sime-ḅara ḍọkị-nimi tẹ kẹẹ wararị oloko na, kụrọ ḅara-ḅio sime ḅọ oloko na pakama ịn pịrị ye. 26Ọ̀ ḅẹẹm, “Ọmịnị ma nwẹnị yẹrị ọmịna Tamụnọ ḅe pọkọ poki tẹ bala ḅara kẹ iḅiọkụ aniemẹ tẹ ị̀ tọrụ ḅụ kuraye mịẹ, tẹ à tọnm mịẹ ḅẹ aị ḍiki mịẹ, pịkị kẹẹ wararị oloko mamgba kokom ḅẹḅẹ, obi ma tẹ à kẹ Ijiputi-ḅẹ-apụ ma ọgọnọ gbana aị ma ḅẹ gberie-sọ à kẹ ọmịna ọgọnọ gbana ḅịa, gbala yẹrị anie KỊNỊNYANAḄỌ ḅee, ọ́ gwọarị ḅọ ḅe ẹrẹsị.”
27Anịtẹso ịn ḅo Ẹlimu lam, oyi maa ngụngụḅa finji na, eneme kụrọ atesi oyi finji na sime-sime anga mẹ; tẹ ini anịjụ minji ma akaka akpụrụ-warị pike tẹ simem.
Attualmente Selezionati:
Paka-so 15: KBTP
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
(C) The Bible Society of Nigeria
