MARK 8
8
Mi Tul Li Vana
(Mat 15:32-39)
1Tua hun laitahin neh ding nei lo mihon tampi a kikhopkia ciengun ama in a nuazuite hlanin a kung vuah, 2“Keima kungah mipite ni thum sung tahpi ang om zo ta vua, neh ding bangma zamtawng nei lo uh ahi ziehin hepihuoi ka sa mama hi. 3A gilkielin inn ah peisah mawh leng pawlkhatte a gamlapi pana ang pei uh ahi ziehin lamkalah lamba ta va uh,” a ci hi. 4Ama’ nuazuite in, “Tami gamlahah mi tam zapi koi in bangci va zo ding ahei?” ci-in a dawng uhi. 5Ama in a kung vuah, “Anlum bangza mawngmawng na nei vuoi?” ci-in dong hi. Amate in, “Sagi” a ci uhi. 6Tua ciengin ama in mipite tuolah tosah a, anlum sagite la-in lungdam a ko zaw ciengin phalsuo a, a hawm dingun a nuazuite a pie hi; tuale amate in mipite tungah tuate a hawmpieh uhi. 7Amate in nganeu themkhat zong a nei uhi; thupha a pieh zaw ciengin tua teng zong a hawmsah hi. 8Amate in ne-in a gil uh va mama hi; tuale a khamval teng uh a khawm vua, seu sagi a dim hi. 9Tua sungah mi tul li bang pha uhi. Tuale ama in amate a peisah hi. 10A nuazuite tawh thakhatin gunkuong tungah tuong a, Dalmanutha#8:10 Adang tang laibute ah “Mageda ahi sihle”Magdala” ci-in kigiel hi. gamah a pei uhi.
Lim Khat Ngetna
(Mat 16:1-4)
11Pharisee-te pei-in ama tawh thu kiniel a kipan vua, vantung panin lim khat a ngen uhi.#Mat 12:38; Luk 11:16 12A lumgsim tawngah nahpi-in khuisa-in, “Bang dinga tam khang mite in lim a nget uh ahei? A tahtah a kang ci-in, tam khang mite tungah bangma lim a kipie poma sih ding hi,” a ci hi.#Mat 12:39; Luk 11:29 13Tuale amate nuasie-in gunkuong tungah katokia a, galkhat lamah a pei hi.
Pharisee-te le Herod’ Tol
(Mat 16:5-12)
14A nuazuite in anlum puoh ding a mangngil vua, gunkuong sungah anlum pum khat beh a nei tabo uhi. 15Tuale ama in a kung vuah, “Pilvangun, Pharisee-te le Herod’#8:15 Adang tang laibute ah “Hero’ pawlte” ci-in kigiel hi. tol kidawm un,” a ci hi.#Luk 12:1 16Amate in, “An i nei lo zieh hi ngel va,” ci-in khatlekhat a kiho uhi. 17Jesu in tua thu thei ahi ziehin amate kungah, “Bang dinga na an nei lo uh gen talawm na hi uh ahei? Na lungtang vuah lut loin theicien nai lo na hi uh amah? Na lungtang uh a khau seng amah? 18Mit nei napi a mu lo na hi uh amah? Bil nei napi a za lo na hi uh amah? Note in na phawhkha ta sih uh amah?#Jer 5:21; Ezk 12:2; Mrk 4:12 19Mi tulnga ading anlum nga ka phalsuo lai-in khamval seu dim bangza na luoh vuoi?” a ci hi. Amate in ama kungah, “Sawm le ni,” a ci uhi. 20“Tuale mi tul lite ading sagi ka phalsuo lai-in a khamval uh seu bangza na luoh vuoi?” a ci hi. Amate in ama kungah, “Sagi,” a ci uhi. 21Tua ciengin ama in a kung vuah, “Na telthei nai sih uh amah?” a ci hi.
Jesu in Bethsaida-ah Mittaw Khat Damsah
22Bethsaida ah a amate a pei uhi. Mi pawlkhat in ama kungah mittaw khat a peipi vua, ama a tham nadingin a thumpieh uhi. 23Ama in tua mittaw pa a khut tawh tu-in khuo pulamah a peipi hi; ama in tua pa’ mitah a cil a nu zo ciengin ama tungah a khut ngam a, “Na khat popo na mu thei ei mah?” ci-in a dong hi. 24Tua mipa khuodah a, “Mite ka mu thei hi, hinanle amate pen singkung lampei tawh a kibang uhi” a ci hi. 25Tua ciengin Jesu in a mit tungah a khut ngam leuleu hi; tuale ama in teltahin a et ciengin khuo mukia a, na zosie cientahin a mu thei ta hi. 26Tua ciengin a inn ah ama peisah a, “Khuo sung nangawnah lut nawn sin,”#8:26 Adang tang laibute ah “ahi sihle khuo sunga koima kungah gen sin” ci-in kibelap hi. a ci hi.
Peter in Jesu’ Thu a Genna
(Mat 16:13-20; Luk 9:18-21)
27Jesu le a nuazuite, Caesarea Philippi gam sung khuotate ah a zin dingin a pei uhi; tuale lam a pei laitahun a nuazuite kungah, “Mite in kei koi hi ei ci vuoi?” ci-in a dong hi. 28Amate in, “Baptize-pa John; adangte in, Elijah; adangte leuleu in, kamsangte lahah khat,” ang ci uhi, ci-in a dawngkia uhi. 29Ama in a kung vuah, “Tua ahile note in kei koi hi nei ci vuoi? ci-in a dong hi. Peter in ama kungah, “Nang Messiah#8:29 Ahi sihle “Khris” na hi hi,” a ci hi.#Jhn 6:68-69 30Tuale ama’ tungtang thu koima tunga a gen lo nadingun khautahin thu a pie hi.
Jesu in a Si ding le a Thawkia ding Magen
(Mat 16:21-28; Luk 9:22-27)
31Tua ciengin ama in Mihing Tapa in nahpitahin bawlsietna thuoh ding a, upate, siempu liente, le thukham hil siete in ama nielin kithat ding a, nithum zaw ciengin thokia ding hi, ci-in amate thuhil a kipan hi. 32Ama in kicien tahin tam thu a gen hi. Tuale Peter in ama tuom peipi-in phawsiet a kipan hi. 33Ahi vangin a nuazuite a etkawmin ama kihei-in Peter phawhsie a, “Satan aw, ka nua lamah kihem in! Azieh pen nang in Pasien’ thu ngaisun loin mihing’ thu na ngaisunzaw hi,” a ci hi.
34Ama in a nuazuite le mihonpite hlanin amate kungah, “Mi khatpo ka nuazui a suo nop leh, ama le ama kinielin a singlamte puo-in ei zui taheh.#Mat 10:38; Luk 14:27 35Azieh pen a hinna uh a hunkhie nuomte in a hinna uh tan ding a, keima zieh le lungdamna thu ziehin a hinna a taante in a hinna uh a hunkhie ding uhi.#Mat 10:39; Luk 17:33; Jhn 12:25 36Amate in leitung buppi a nga vangun a hinna uh suplaw uleh bang phatuom ding ahei? 37A tahtahin, amate in a hinna uh bang tawh hleh theikia ding uh ahei? 38Tami angkawm le mawna tawh a kidim khang mite lahah keima le ka thute ei maizumpi mite ahi ule, a Pa’ minthanna vang le a siengtho vantung mite tawh a minthangin Mihing Tapa ang peikia ciengin amate a zumpi ding hi,” a ci hi.
Attualmente Selezionati:
MARK 8: ZBOTF01
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Zo Bible © Bible Society of Myanmar, 2018.
