MARK 12

Losapte Thugentena

(Mat 21:33-46; Luk 20:9-18)

1Tua ciengin amate kungah thugentena zangin thugen a kipan hi. “Mi khat in lengga lo bawl a, a kimvelah dai kai-in, a sungah lengga cil nading dum to a, tausang khat daw hi; tua ciengin losapte kawmsahin gam dangah a zin hi.#Isa 5:1-2 2An lah hun a tun ciengin amate kung panin lengga lo pana a pieng ama’ nga ding teng khon dingin losapte kungah a sila khat a sawl hi. 3Ahi vangin amate in na manin na sat gawpin na guoh peisah uhi. 4Amate kungah sila dang khat sawlkia leuleu hi; tua pa zong a lu na satin na zako uhi. 5Tua ciengin adang khat sawlkia a, amate in tua pa zong na that uhi. Adang tampite zong tua bang ma-in a sawl uhi; amate in pawlkhat na satin adangte na that uhi. 6Ama in a it mama tapa khat nei lai hi. A tawpna ah, ‘Ka tapa na zatah buong sam va uh,’ ci-in amate kungah a sawl hi. 7Ahi vangin losapte in, ‘Tampa gamhluo ding pa ahi hi; hing pei un, ama that vai-in a gamh luo ding teng la vai,’ ci-in khatlekhat a kiho uhi. 8Tuaci’n ama manin a that vua, lengga lo pulamah a paimang uhi. 9Tua ahile lengga lo nei pa in bang a law diei? Ama pei-in losapte susie ding a, a lengga lo midangte a pie ding hi. 10Tami Lai Siengtho sungah:

‘Innlamte in a nilmang suong pen

innkiu suongpi#12:10 Ahi sihle “suong bulpi” a suoh zo hi;

11tami khu Topa’ bawl ahi a,

i mit mu-in lamdang hi,’ ci-a kigiel khu

na sim ngai sih uh amah?” a ci hi.#Late 118:22-23

12Tami thugentena pen amate a langgenna ahi lam a thei ciengun ama a man nuom vua, ahi vangin amate in mihonpite a giing uhi. Tuaci’n ama nuasie-in a pei uhi.

Phiengsie Pieh ding Thudawhna

(Mat 22:15-22; Luk 20:20-26)

13Tua ciengin amate in thugenna tawh ama mawmat dingin a kungah Pharisee-te pawlkhat le Herod mi pawlkhat a sawl uhi. 14Tuale amate pei-in, “Siepa aw, nang na citah a, koima zatah na nei sih hi; azieh pen nang in mi mai-et tuom na nei sih hi; ahi vangin thuman thutah tawh kituohin Pasien’ lampi na hil lam zong ka thei uhi. Kumpipa tungah sieh pieh huoi amah, pieh huoi lo ahei? 15Pie ding ka hi uh amah, pie lo ding ka hi uh ahei?” a ci uhi. Ahi vangin amau’ kineitawmna a thei ziehin ama in a kung vuah, “Note in bang dinga kei nei ze-et uh ahei? Sum denarii khat hing la unlen ei velsah un,” a ci hi. 16Tuale amate in dangka tang khat peipi uhi. Tua ciengin amate kungah, “Tami koi’ lim le koi’ min ahiei,” a ci hi. Amate in kumpipa’ lim le min ahi hi,” ci-in a dawng uhi. 17Jesu in amate kungah, “Kumpipa’ nate kumpipa tungah pie unlen, Pasien’ nate Pasien tungah pie un,” a ci hi. Tuale amate in lamdang a sa mama uhi.

Thawkiana Tungtang Thudawhna

(Mat 22:23-33; Luk 20:27-40)

18Ama kungah thawkiana om lo hi, a ci Sadducee-te pawlkhat pei-in thu khat a dong vua,#Sawl 23:8 19“Siepa aw, Moses in, ‘Mi khat’ sanggampa in ta nei loin a zi a sisan leh, tua mipa#12:19 Gk “a sanggampa” in tua meigongnu kinunpi-in a sanggam pa adingin ta hinpieh ding hi,’ ci hi.#Thkna 25:5 20Sanggam pasal sagi om a, a tapen pa in zi nei a, ta nei loin a si hi; 21tuale a nina pa in tua nu ma kinupi-in ta nei loin si leuleu hi; a thumna pa zong tua ma bang ahi hi; 22a sagina dongin tua nu a kinunpi vua, ta nei lo vive ma-in a si sieng uhi. A tawpna ah tua numei nu mama zong a si hi. 23Thawkia hun ciengin tua nu koi pen’ zi ahi diei? Azieh pen a sagipi-un tua nu a kinunpi kim uhi,” a ci hi.

24Jesu in amate kungah, “Note in Lai Siengtho thu le Pasien’ vanglietna na thei lo ziehun na khielna uh tami hi lo amah? 25Azieh pen sina panin amate a thawkia ciengin vantung mite ma bangin kipi kitenna om nawn lo ding hi. 26Misite thawkiana tawh kisai-in Moses’ laibu sunga theubawh tangthu sungah, Pasien in ama kungah, ‘Abraham’ Pasien, Isaac’ Pasien, le Jacob’ Pasien ka hi hi,’ a ci thu na sim ngai sih uh amah?’ a ci hi.#Pei 3:6 27Ama pen a site’ Pasien ahi sih a, a hingte’ Pasien ahi zaw hi; note na nahkhiel mama uhi,” a ci hi.

Thupieh Masapen

(Mat 22:34-40)

28Thukham hil siete lahah khat in a kung va nai a, amate khatlekhat a kiselna uh a za hi. Jesu in amate hoitaha a dawn thei lam a mu ciengin ama in, “Thupieh zosiete lah panin bang amasa pen ahei?” ci-in a dong hi. 29Jesu in, “Amasa pen in, ‘Israel aw, za in: Topa i Pasien in Topa khat beh ahi hi; 30Topa na Pasien, na lungtang zosie, na hinna zosie, le na lungsim zosie tawh na it ding hi,’ a ci hi.#Thkna 6:4-5 31A nina in, ‘Nangma na ki-it bangin na vengte na it ding hi,’ ci ahi hi. Tamte sanga a thupizaw thupieh dang om lo hi,” a ci hi.#Siem 19:18 32Tua ciengin thukham hil siete in ama kungah, “Siepa aw, na thugen a man hi.; nang in, ‘Ama khat beh ahi a, ama simlo koima dang om lo hi,’ ci-in a mantahin na gen zo hi.#Thkna 4:35 33Tuale, ‘Na lungtang zosie, na theina zosie le na thahatna zosie tawh ama na it ding,’ le, ‘Nang le nang na ki-it banga na vengte na it ding,’ ci pen meihal biehna buppi le biehpiehnate sangin thupizaw tham hi,” a ci hi.#Hos 6:6 34Ama in pilvang taha a dawn thei lam Jesu in a mu ciengin ama kungah, “Pasien’ manggam tawh na kigamla sih hi,” a ci hi. Tua zaw ciengin koima in ama thu a dong ngam nawn sih uhi.#Luk 10:25-28

David’ Tapa Tungtang Thudawhna

(Mat 22:41-46; Luk 20:41-44)

35Biehinnpi sungah Jesu in thu a hil laitahin ama in, “Bang dinga thukham hil siete in Messiah#12:35 Ahi sihle “Khris” pen David’ tapa a ci thei uh ahei? 36David mama in, Hlagau Siengtho sawlna tawh thugen a,

‘Topa in ka Topa tungah,

“Na keng nei-ah na galte ka koi masangsie-in

ka zietlamah na to in,’ ci hi,” a ci hi.#Late 110:1

37David mama in ama pen Topa ci hi; tua ahile bangci bangin Jesu pen a tapa hi thei ding ahei?” a ci hi. Tuale mipite in lunglut tahin a thugen a ngai uhi.

Jesu in Thukhamhil Siete Mawsah

(Mat 23:1-7; Luk 20:45-47)

38Tua banga a hil kawmin Jesu in, “Puontuolpi sila a va kawikawi ding uh nuomsa-in vanzuanate lahah zatah hopi ding a dei thukham hil siete na kidawm un, 39tuale kikhopna inn sunga om tona nuom pente tunga to ding a nuom vua, pawibawlna ah zong mun thupi pente a luo nuom uhi! 40Meigongte’ inn a pumval mang vua, a kilimlawm dingin sauveipi thu a ngen uhi. Amate in mawsahna a lienzaw a nga ding uhi,” a ci hi.

Meigongnu’ Silpieh

(Luk 21:1-4)

41Sumkholna kuong tawh kimaingatin Jesu to a, sumkholna kuong sunga sumpi khie mihonte a en hi. Mihau tampite in sum tampipi a khie uhi. 42Mizawng meigong numei khat pei-in paisa#12:42 “penny khat” khat man ahi sumsan tang ni khie hi. 43Tua ciengin ama in nuazuite hlanin amate kungah, “Ke’n a tahtah a kang ci-in, sumkholna kuong sunga sumkhie zosie teng sangin tami mizawng meigongnu in a tamkhiehzaw hi. 44Azieh pen amate zosie in a neival a lamval uh sung panin a khie vua, tam nu in a zawn a ngau kawmkalah a kiva nading nasan hen nei loin a nei sun teng zosie a khie sieng hi,” a ci hi.

Attualmente Selezionati:

MARK 12: ZBOTF01

Evidenziazioni

Copia