MARK 10
10
Kikhulna Thuhilna
(Mat 19:1-9; Luk 16:18)
1Ama in khum mun nuasie-in Judea gam le Jordan gungal tengah a pei hi. Tuale ama kimvelah mihonpi a kikhawmkia uhi; tuale, a bawl ngaisa ma bangin amate tungah thuhil a kipankia hi.
2Pharisee-te pawlkhat pei-in a ze-etna-un ama kungah, “Pasal khat in a zi a khul ding a kilawm ma amah?” ci-in a dong uhi. 3Ama in, “Moses in bang thu ang pie vuoi?” a ci hi. 4Amate in, Moses in ahile pasal in kikhenna lai pie-a khul thei dingin ei phal hi,” a ci uhi.#Thkna 24:1-4; Mat 5:31 5Hinanle Jesu in amate kungah, “Na lungtang khau seng zieh vua ama in tua bang thukham a giel ahi bo hi. 6Ahi vangin lei kisiemcil a kipanin, ‘Pasien in numei le pasal a bawl hi.#Pien 1:27; 5:2 7‘Tami thu ziehin pasal in a nu a pa nuasie-in a zi tawh kigawm ding a,#10:7 Adang tang laibute ah “a zi tawh kigawm ding a,” ci om lo hi. 8tua ni tegel sa khat a suoh ding uhi,’ na kici hi.Tuaci’n ama gel ni hi nawn loin sa khat ahi ta uhi.#Pien 2:24 9Tua ahi ziehin Pasien’ gawmsate koima in khen sih taheh,” a ci hi.
10Tua ciengin a nuazuite in inn sungah tami thu ama a dongkia uhi. 11Ama in a kung vuah, “A zi khul a, numei dang khat tawh a kinung poma a zi angkawmsan ahi hi; 12tuale numei in a pasal khulin pasal dang khat tawh a kinun leh zong angkawm ma ahi hi,” a ci hi.#Mat 5:32; 1Cor 7:10-11
Jesu in Naupangnote Thupha Pie
(Mat 19:13-15; Luk 18:15-17)
13Ama in naupangnote a tham thei nadingin mipite in ama kungah a peipi uhi; tuale nuazuite in khautahin amate a na hosie gawp uhi. 14Ahi vangin Jesu in tua thu a thei ciengin lungthah a, amate kungah, “Naupangte ka kungah hing peisah un; kham sih un; bangzieh ahei cile Pasien’ manggam pen tua bang mite ading ahi hi. 15Ke’n a tahtah a kang ci-in, naupangno khat banga Pasien’ manggam a sang lo poma, tua sungah a lut ngai sih ding hi,” a ci hi.#Mat 18:3 16Ama in a kangah amate tawi a, a tung vuah a khut ngamin thupha a pie hi.
Mihau Pa
(Mat 19:16-30; Luk 18:18-30)
17A khuolzinna zom dingin a pei laitahin ama kungah mi khat tai a, a mai-ah khupdinin, “Sie Hoipa aw, kumtawn hinna ka luo thei nadingin bang sem ding ka hei?” ci-in a dong hi. 18Jesu in ama kungah, “Bang dinga kei mihoi nei ci ahei? Pasien khat beh simlo koima a hoi om lo hi. 19Nang in: ‘Na that sih ding hi; ang na kawm sih ding hi; na gu sih ding hi; zuou teci na pang sih ding hi; mi neisa na lahpieh sih ding hi; na nu na pa na zatah ding hi,’ ci thupiehte na thei hi,” a ci hi.#Pei 20:12-16; Thkna 5:16-20 20Ama in, “Siepa aw, tam teng zosie ka neu lai-a kipan ka na zui siengsa ahi hi,” a ci hi. 21Jesu in a et ciengin ama it a, “Na khat kisam lai teh; pei-in na neisa teng zua inlen tua sum teng#10:21 Gk ah “sum” ci om lo hi. mizawngte pie in, tua hile vantungah gou na nei ding hi; tua ciengin hing pei inlen ka nua ei zui in,” a ci hi. 22Ama in neilelam tampi a nei ziehin tua thu a zah bepin maipua-in a dasa-in a peikia ta hi.
23Tua ciengin Jesu in a kim a pam en kawikawi a, a nuazuite kungah, “Mihaute dingin Pasien’ manggam lut nading bang zatahin a hamsa diei izaw!” a ci hi. 24Tami kammal ziehin a nuazuite in lamdang a sa mama uhi. Ahi vangin Jesu in amate kungah genkia a, “Tate aw, Pasien’ manggam lut nading#10:24 Adang tang laibute ah “hauna a muong mite adingin” ci-in kibelap hi. bangza tahin hamsa ahei! 25Mihau khat, Pasien’ manggam sunga a lut ding sangin kala-oh khat hieumei hawm sunga a lut ding baizaw lai hi,” a ci hi. 26Amate in lamdang a sa mama vua, “Tua ahile koi in hutdam a tang zo mawh ta diei?”ci-in khatlekhat a kiho uhi. 27Jesu in amate enin, “Tam pen mihingte adingin hi zo lo ma hi, ahi vangin Pasien adingin a himaw thu hi lo hi; azieh pen Pasien adingin na vannuoi hi thei hi,” a ci hi.
28Peter zong kipanin ama kungah, “En in, ko zong na zosie nuasie-in na nua kang zui uh,” a ci hi. 29Jesu in, “A tahtah a kang ci-in, keima zieh le lungdamna thu ziehin a innte, a sanggam pasalte, a sanggam numeite, a nu a pa, a tate, le a lote a nuasie poma in, 30tu khang hunin a za zakhat innte, sanggam pasalte, sanggam numeite, nute, tate, lote nga ding a, ang tung ding hunah kumtawn hinna nga lai ding hi. 31Ahi vangin a masate tampi ang nukhia ding a, a nukhiate ang masa ding uhi,” a ci hi.#Mat 20:16; Luk 13:30
Jesu in a Si ding le a Thawkia ding Thumvei Magen
(Mat 20:17-19; Luk 18:31-34)
32Jerusalem zuonin a pei laitahun a masang vuah Jesu na ma pei hi; amate in lamdang a sa vua, a nua a zui mite zong a zau uhi. Ama in sawm le nite a tuomin peipikia-in ama tunga pieng ding thute gen a kipan a, 33“En un, Jerusalem dongah i pei ding a, siempu liente le thukham hil siete’ khut sungah Mihing Tapa ki-ap ding a, tuale amate in sina thuoh dingin ama a mawmat ding uhi; tua ciengin amate in Gentile-te khut sungah a ap ding uhi; 34amate in ama simmaw bawlin, cilphitin a that ding uhi; tuale ni thum zaw ciengin ama a thokia ding hi,” a ci hi.
James le John’ Ngetna
(Mat 20:20-28)
35Ama mai-ah Zebedee’ tapa James le John pei-in a kungah, “Siepa aw, kang nget popo uh nei bawlpieh dingin kang thum uhi,” a ci uhi. 36Ama in ama gel kungah, “Bang hing bawlpieh leng na dei gel ei?” a ci hi. 37Ama gel in, “Na minthanna kumpi topha tungah na to ciengin khat na zietlamah, khat na veilamah ei tosah in,” a ci uhi. 38Ahi vangin Jesu in ama gel kungah, “Na sil nget uh pen na thei siem sih gel hi. Ka dawn ding hai ahi sihle ka ki-bapize nading sungah na ki-baptze zo ding gel ei mah?” a ci hi.#Luk 12:50 39Ama gel in, “Hi zo na gel vang,” a ci uhi. Tua ciengin Jesu in ama gel kungah, “No tegel in keima’ hai na dawn ding vua, keima ei ki-baptizena ma tawh na ki-baptize ding uhi. 40Ahi vangin ka zietlam le ka veilam a to ding pen kei pieh thei ahi sih a, a bawlpiehsa mite ading hizaw hi,” a ci hi.
41Sawmte in tami thu a zah bepun James le John-te tungah a lungthah uhi. 42Tuaci’n Jesu in amate hlan a, “ Gentile-te lahah gam-uh dinga kiciemte mite in amate tungah kiliensahin, a uliente un zong thuneina tawh amate a uh lam na thei uhi. 43Ahi vangin note lahah tua bang hi lo ding hi; note lahah milien a suoh nuom poma na nasem uh hizaw ding a,#Luk 22:25-26 44note lahah a masa pen ahi nuom poma mi zosie’ sila ahi zaw ding hi.#Mat 23:11; Mrk 9:35; Luk 22:26 45Mihing Tapa zong midangte ama’ na semsah dinga ang pei hi loin, midangte’ na a sem ding le mi tampi tatkhiet nading ama’ hinna a pie dinga ang pei ahi zaw hi,” a ci hi.
Mittaw Bartimaeus Kidamsahna
(Mat 20:29-34; Luk 18:35-43)
46Jericho ah amate a tung uhi. Ama in a nuazuite le mihonpite tawh Jericho a nuasie laitahin lampi gei-ah Timaeus’ tapa, Bartimaeus a kici mittaw khutdaw ngen khat na to hi. 47Nazareth khuomi Jesu ahi lam ama in a zah ciengin nahpi tahin kiko a, “David’ Tapa Jesu aw, ei hepi bo ven!” a ci hi. 48A sip khinkhian nadingun mi tampi in a kham vangun nahpi tahin ama awng semsem a, “David’ Tapa aw, ei hepi bo ven!” a ci hi. 49Jesu khawlin, “Ama tanah hing hlan ta un,” a ci hi. Tuale amate in zong mittaw pa a hlan vua, ama kungah, “Kilungnuomsah in; ding in, ama in nang ang hlan hi,” a ci uhi. 50Tuaci’n ama in zong a puon tungsil paimangin tawndienin Jesu kungah a pei hi. 51Tua ciengin Jesu in ama kungah, “Bang kang bawlpieh ding na dei ei?” a ci hi. Mittaw pa in ama kungah, “Ka siepa#10:51 Aramaic “Rabbouni” aw, khuo ei musahkia in,” a ci hi. 52Jesu in ama kungah, “Pei in; na upna in ang damsah zo hi,” a ci hi. Thakhatin ama in khuo mu theikia-in lampi-ah Jesu nua a zui pai hi.
Attualmente Selezionati:
MARK 10: ZBOTF01
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Zo Bible © Bible Society of Myanmar, 2018.
