Estè 9
9
Viktwa Jwif yo
1Trèzyèm jou Ada a, ki se douzyèm mwa nan ane a, se dat pou lòd wa a te egzekite. Se te jou sa a tou lènmi Jwif yo te espere yo t ap gen pouvwa sou yo pou touye yo. Men bagay yo vire devan dèyè paske se Jwif yo ki pote laviktwa sou lènmi l yo. 2Nan tout pwovens wayòm Asyeris la, Jwif yo te rasanble nan vil yo kote yo t ap viv. Yo atake tout moun ki te fè plan pou detwi yo a. Pèsonn pa t kapab leve kont yo paske yo tout te nan gwo lapèrèz devan Jwif yo. 3Chèf pwovens yo, chèf rejyonal yo, gouvènè yo ak tout ofisye wa te ede Jwif yo paske yo te pè Madoche. 4Madoche vin gen anpil pouvwa nan palè wa a. Bri ki t ap kouri sou enpòtans Madoche te gaye nan tout pwovens, paske l te vin yon nonm enpòtan nan palè a. Li vin gen plis pouvwa chak jou.
5Jwif yo te kraze tout lènmi l yo jan k te fè yo plezi. Yo te atake yo ak nepe epi touye yo. Yo te fè sa lide yo di yo ak moun ki te rayi yo. 6Nan palè Souz la, yo touye 500 gason. 7Yo te touye 10 pitit Aman, pitit gason Amedata a, pi gwo lènmi Jwif yo tou. Non mesye sa yo se te Pachandata, Dalfon, Aspata, 8Porota, Adalia, Aridata, 9Pamachta, Arizayi, Aridayi ak Vayezata. 10Men, yo pa t pran anyen nan sa moun yo te touye yo te posede.
11Nan jou sa a, yo rapòte wa a kantite moun ki mouri nan zòn kote palè lavil Souz la ye a. 12Wa a di rèn Estè: “Nan zòn kote palè lavil Souz la ye a, Jwif yo touye 500 gason, menm 10 pitit Aman yo mouri tou. Mwen ka sèlman devine sa yo fè nan lòt pwovens yo tou! Èske gen lòt bagay ou vle toujou? Sèlman di m li epi ou deja jwenn li. Ou mèt mande m sèlman epi m ap fè tout sa ou vle.”
13Estè di konsa: “Si sa fè wa a plezi, se pou l kite Jwif ki nan Souz yo goumen ak lènmi l yo demen ankò, jan l pèmèt yo fè sa jodi a. Se pou l pase lòd pou yo pann 10 pitit gason Aman yo sou poto tou.”
14Alò, wa a pase lòd pou yo fè tout sa rèn Estè mande a. Yo pibliye lòd la nan Souz epi yo pann dis pitit gason Aman yo. 15Jwif yo te rasanble ankò nan katòzyèm jou mwa Ada a epi yo touye 300 lòt gason. Yon lòt fwa ankò, yo pa t pran anyen ki te pou moun yo te touye yo.
16-17Jwif ki t ap viv nan pwovens yo te rasanble nan trèzyèm jou mwa Ada a pou defann tèt yo. Jou sa a, yo touye 75,000 pami moun ki te rayi yo. Men, yo pa t pran anyen nan sa moun sa yo te posede.
Jwif yo selebre viktwa yo
Nan demen, sa vle di katòzyèm jou mwa Ada a, Jwif nan pwovens yo te sispann goumen an. Yo te nan lajwa epi yo te fè gwo fèt jou sa a. 18Jwif ki te lavil Souz menm, yo goumen nan trèzyèm ak katòzyèm jou mwa Ada a. Yo te repoze nan kenzyèm jou a. Yo te kontan anpil epi yo fè gwo fèt jou sa a.
19Se poutèt sa jodi a sèlman Jwif ki rete nan peyi a, nan ti vilaj yo ki konsidere katòzyèm jou mwa Ada kòm yon jou fèt. Se yon gran jou fèt ak kè kontan li ye pou yo, epi yon jou kote youn fè manje voye pou lòt.
20Madoche drese rapò tout sa ki pase yo. Apre sa li voye lèt bay tout jwif ki t ap viv nan tout pwovens ki nan wayòm Asyeris la, kit yo rete lwen kit yo rete pre. 21Li mande yo pou yo selebre chak ane katòzyèm ak kenzyèm jou mwa Ada a, 22paske jou sa yo Jwif yo te gen kanpo ak tout lènmi l yo. Mwa sa se moman tristès yo te chanje an jwa epi malè yo te tounen bonè. Madoche te mande yo pou yo selebre jou sa yo nan lajwa ak gwo festen, youn voye manje bay lòt epi voye manje bay sa ki pòv yo.
23Alò, Jwif yo fè tout sa Madoche mande yo fè epi dakò pou yo fete jou sa yo chak ane.
Rezon fèt Pirim nan
24Se Aman, pitit Amedata ras moun Agag la, li menm ki te lènmi tout Jwif yo epi ki te fè konplo pou touye tout Jwif yo yon sèl jou. Li te fè tiraj osò pou konnen ki jou pou plan malè sa te egzekite. 25Men, Estè te al pale ak wa a. Wa te bay lòd ki te fè konnen sa ki te lakoz Aman te sibi menm sò li te planifye pou Jwif yo. Yo te pann li menm ak tout pitit gason li yo sou poto li te fè prepare.
26Nan epòk sa a, pou yo di mo “sò”, yo konn di “pirim” tou. Se poutèt sa Jwif yo te rele jou sa yo fèt pirim. Yo fè l yon koutim pou fete tou 2 jou sa yo chak ane akoz lèt Madoche te voye ba yo, poutèt sa yo te wè ak eksperyans yo te fè. 27Yo tonbe dakò pou yo menm, pou tout desandan yo ak tout lòt moun ki va vin viv pami Jwif yo kontinye koutim sa nan menm 2 jou sa yo. Yo te pwomèt yo t ap swiv enstriksyon Madoche te bay pou menm dat sa a chak ane. 28Yo dakò pou chak fanmi k ap viv nan chak vil ak nan chak pwovens pou yo sonje fete jou sa yo epi pou anseye pitit yo pou fè menm jan an. Yo kwè Jwif yo pa dwe janm sispann fete jou pirim yo epi pitit pitit yo dwe toujou sonje fèt sa a.
29Rèn Estè, pitit fi Abikayil, ansanm ak Madoche, Jwif la, te ekri yon lèt pou bay enstriksyon pou fete fèt pirim nan plis fòs. 30Yo voye lèt yo bay tout Jwif k ap viv nan 127 pwovens yo ki nan wayòm wa Asyeris la. Yo ajoute nan lèt la yon priyè pou mande lapè ak sekirite pou pèp Jwif la. 31Lèt sa yo bay lòd tou pou Jwif yo fete jou Pirim yo chak ane nan dat rèn Estè ak Madoche fikse a. Yo deklare fèt sa a gen menm enpòtans ak tout lòt fèt Jwif yo konn fete, tankou lè y ap fè jèn ak lè y ap plenyen sò yo, se fèt sa yo Jwif te gentan pran desizyon pou yo sonje fete. 32Lèt rèn Estè a te etabli kijan pou yo fete fèt Pirim lan. Yo ekri règ sa yo nan gwo liv istwa wa a.
Attualmente Selezionati:
Estè 9: VKF
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Nouvo Testaman: Vèsyon Kreyòl Fasil (VKF)
@ 2017 Bible League International
