Luka 23

Yàng Jesu di đap Pilat mơ Herôt

(Mathiơ 27:1, 2, 11-14; Mak 15:1-5; Jang 18:28-38)

1Chòp bol hơ̆ ntào, cèng Kơnràñ tus di đap Pilat. 2Bol khai yă Kơnràñ lah: “Bol hi neh gŏ cau chồl bơtrut làng bol hi dê, bơkơŭ boh dia Sesa in, mơ khai sơnđan is să khai la Krist la Bơtau.” 3Pilat lùp Kơnràñ lah: “Mê ngan la Bơtau làng bol Juda dê sơl?” Yàng Jesu ho lah: “Să tòm ồng đơs behơ̆.” 4Gen Pilat đơs mơ ală cau gơnoar dờng lam bồ ơn phan duh khoai mơ mpồl làng bol lah: “Añ ò gŏ cau do gơs glài lơi ò.” 5Mơya bol khai đơs nền cê lah: “Cau do chồl bơtrut làng bol, bơto sồr làm Jude, sơntòm bơh Galile tus tềng do.” 6Pilat kơno jơnau hơ̆, gen lùp cau do la cau Galile hala ò. 7Dơ̆ neh git Kơnràñ ơm hơđơm gơnoar at bồ Herôt dê, gen Pilat sồr lam Kơnràñ tus hơ Herôt, bơh Herôt kung ơm tòm Jerusalem tòm ală ngai hơ̆.

8Dơ̆ Herôt gŏ Yàng Jesu gen chò hòp ngan, bơh neh jŏ rau khai kòñ tìp Kơnràñ tài bơh neh kơno bơh Kơnràñ, mơ kơp kòñ sền gŏ Kơnràñ lơh tềl krơi lơi. 9Khai lùp Kơnràñ oă jơnau, mơya Kơnràñ ò ho dô jơnau lơi. 10Ală cau gơnoar lam bồ ơn phan duh khoai mơ ală cau bơto bơta boh lam ntào mơ yă Kơnràñ oă ngan. 11Herôt mơ mpồl ling khai dê sền òsơp mơ dơñŏ tơnhial di Kơnràñ, tơnsoh ào bơnga gơcrà Kơnràñ in, gen sồr cèng wơl Kơnràñ hơ Pilat. 12Bơh lài Pilat mơ Herôt gơtòmsò bal, mơya tòm ngai hơ̆ bol khai gơlik gơs gơtòmsòr bal.

13Pilat hòi tơrgòm ală cau gơnoar lam bồ ơn phan duh khoai, ală kwang bàng mơ làng bol pơjum wơl, 14mơ đơs lah: “Bol mê neh cèng jào cau do añ in, yă khai chồl bơtrut làng bol do, añ neh sền sơwì khai di đap bol mê, mơya ò gŏ khai gơs glài lơi tòm ală bơta bol mê neh yă. 15Herôt kung sền gŏ behơ̆ sơl, gen neh sồr cèng khai hơ bol he. Ngan khai ò lơh bơta lơi di pal chơt ò. 16Behơ̆ gen añ rơp pù tơmàl mơ hồ khai lòt.” [ 17Bơh tus di bơta pơjum sa gen cau kwang pal hồ dô nă cau ơm jàm làng bol in.]#23:17 Gơs dô êt sră cih tê yau ò gơs sèng 17. 18Mơya bol khai hòi driau dờng lah: “Tơnchơt tĕ cau do, mơ hồ Baraba bol hi in.” 19Baraba do kòl jàm tài bơh phà kơñau tòm ƀòn dờng mơ tơnchơt cau. 20Pilat kòñ hồ Yàng Jesu gen đơs tai mơ làng bol. 21Mơya bol khai hòi driau dờng lah: “Pơng tĕ khai di chi pơng! Pơng tĕ khai di chi pơng!” 22Pilat đơs tai tòm dơ̆ pe lah: “Ñchi bơta iơh cau do neh lơh taih? Añ ò gŏ kai lơi cau do pal chơt. Añ rơp pù tơmàl mơ hồ khai lòt.” 23Mơya bol khai sơlo hòi driau dờng dan pơng Kơnràñ di chi pơng, mơ jơnau driau dờng bol khai geh pha. 24Behơ̆ Pilat lơh nền jat be bol khai dan. 25Khai hồ cau ơm jàm bơh neh lơh nggồr nggàc mơ tơnchơt cau, la cau mơ bol khai neh dan, gen jào Yàng Jesu bol khai in jat nùs bol khai kòñ.

Yàng Jesu kong pơng di chi pơng

(Mathiơ 27:32-44; Mak 15:21-32; Jang 19:17-27)

26Tòm tŭ bol khai cèng Yàng Jesu lòt, gen kup dô nă cau Siren sơnđan la Simôn, rê mut tòm ƀòn dờng, tơntui chi pơng hơđang khai, sồr lòt jat tơnơ̆ Kơnràñ.

27Gơs mpồl làng bol oă lòt jat Kơnràñ; tòm hơ̆ gơs ală cau ùr tur ntơh#23:27 Cil: tưr dàng gơtoh. ñìm rac bơh Kơnràñ. 28Mơya Yàng Jesu wơlke mơ đơs mơ bol khai lah: “Ơ ală kòn ùr Jerusalem dê, bañ ñìm bơh Añ, mơya ñìm tĕ bơh să tòm bol ai mơ bơh ală kòn sau bol ai dê. 29Bơh ală ngai rơp tus tòm tŭ cau đơs lah: ‘Lơngai ală cau ùr kơnền in, hìu kòn ò deh mơ toh ò tơmpô!’ 30#Ôse 10:8.Tŭ hơ̆ cau rơp đơs mơ mơnơm lah: ‘Rlơm tĕ hơđang bol hi,’ đơs mơ dòr#23:30 Cil: còr. lah: ‘Bồr tĕ bol hi!’ 31Bơh dilah cau neh lơh bơta hơ̆ di chi ris,#23:31 Cil: jềng. gen di chi ro mbe gơlơh taih?”

32Kung gơs bàr nă cau ndai la cau glài, kòl cèng bal mơ Kơnràñ nàng kong tơnchơt.

33Dơ̆ neh tus hơ dô bă tiah sơnđan la Dòr Ntìng Bồ, gen bol khai pơng Kơnràñ di chi pơng, bal mơ bàr nă cau glài hơ̆, dô nă đah ma, dô nă đah kiau. 34#Đơs Crih 22:18.Yàng Jesu đơs lah: “Ơ Bèp, dan toh glài bol khai in, bơh bol khai ò git bơta bol khai lơh.” Chòp bol khai tă khà nàng tòmpà ồi ào Kơnràñ dê. 35#Đơs Crih 22:7.Làng bol ntào sền, ai ală cau kwang dơñŏ tơnhial di Kơnràñ lah: “Khai neh dong klàs cau ndai; dilah khai la Bơtau Krist Yàng Tom Trồ neh sac rwah, gen dong klàs tĕ să he!” 36#Đơs Crih 69:21.Mpồl ling kung dơñŏ tơnhial lòt tus ai dà sràt Kơnràñ in hùc, 37Mơ đơs lah: “Dilah mê la Bơtau làng bol Juda, gen dong is tĕ să mê.” 38Hơđang Kơnràñ gơs jơnau cih lah: DO LA BƠTAU LÀNG BOL JUDA.

39Tòm bàr nă cau glài kong yồng, dô nă dơñŏ tơnhial di Kơnràñ lah: “Mê ò di la Bơtau Krist ơ? Dong klàs tĕ să tòm mê mơ bol hi sơl.” 40Mơya cau ne lah pơrhơng khai lah: “Mê kung kong bal dô bơta lơh glài mơ mê ò rngòt di Yàng Tom Trồ ơ? 41Bol he kong be do la song ngan, bơh he kong sal wơl tòm toh be broă he lơh, mơya cau do ò lơh dô bơta lơi tìs ò.” 42Gen khai đơs lah: “Ơ Yàng Jesu, tŭ Kơnràñ tus tòm lơgar Kơnràñ, dan kah tĕ añ.” 43Kơnràñ đơs mơ khai lah: “Di ngan Añ đơs mơ mê, ngai do mê rơp ơm bal mơ Añ tòm lơgar Paradis.”#23:43 Paradis: Lơgar lơngap lơngai Yàng Tom Trồ dê.

44Tŭ hơ̆ pơgap di jơt bàr jơ ngai, làm lơgar gơs klam jơngo cik jơl tus di pe jơ mho,#23:44 Js: Hơ̆ la jơ dơ̆ prau tus di gơ dơ̆ sin. 45#Lik 26:31-33.Mattơngai klam jơngo, bài kơrnìng tòm hìu duh khoai gơcrè digùl. 46#Đơs Crih 31:5.Gen Yàng Jesu hòi driau dờng mơ lah: “Ơ Bèp, Añ jào hwềng tòm tê Bèp.” Kơnràñ đơs sir rau gen tac nhơm.

47Cau at dô rhiang ling gŏ bơta neh gơlik gơs, gen jòng ro Yàng Tom Trồ mơ đơs lah: “Do ngan la cau song ring.” 48Jơh mpồl làng bol pơjum nàng sền bơta hơ̆, gŏ bơta neh gơlik gơs rau, gen tur ntơh he mơ rê hìu. 49#Luk 8:2-3.Jơh ală cau mòng git Yàng Jesu mơ ală cau ùr jat Kơnràñ bơh Galile, ơm ngài ngài mơ sền gŏ ală bơta hơ̆.

Bơta tơp Yàng Jesu

(Mathiơ 27:57-61; Mak 15:42-47; Jang 19:38-42)

50Gơs dô nă cau sơnđan la Jôsep, la cau tòm mpồl kwang tơrña, la cau lơbơn niam mơ song ring, 51khai ơm tòm Arimathe, ƀòn dờng gơrê bal mơ làng bol Juda. Khai kơp gơn lơgar Yàng Tom Trồ, ò dô nùs bal tòm bơta lơh nền mơ broă lơh bol hơ̆ dê. 52Khai lòt tus hơ Pilat mơ dan ƀồc Yàng Jesu dê. 53Khai tă tơmù ƀồc, ai bài che dơmài lơbơn nàng pò, gen ơn Kơnràñ tòm bơtô neh phàt tòm lŭ, la bơtô òhềt tơp cau lơi. 54Tŭ hơ̆ la ngai Rcang Lài, mơ mòr tus di ngai Saƀat. 55Ală cau ùr neh tus bal mơ Kơnràñ bơh Galile lòt jat bơh tơnơ̆, nàng sền bơtô mơ ƀồc Kơnràñ dê ơn mbe lơi, 56#Lik 20:10; Yalw 5:14.Gen rê wơl, rcang ală sơnơm ƀô#23:56 Cil: ƀô bơkah. mơ mơñà ƀô bơlhu. Di di ngai Saƀat bol khai ơm rlô jat be bơta sồr lam.

Attualmente Selezionati:

Luka 23: KPM2018

Evidenziazioni

Copia