Jang 8

Cau ùr bơrnàn

1Mơya Yàng Jesu guh hơđang mơnơm Ôlibe. 2Rìng àng drim, Kơnràñ rê wơl hơ hìu duh khoai. Jơh làng bol lòt tus hơ Kơnràñ, Kơnràñ nggui bơto sồr bol khai.

3Ală cau bơto bơta boh lam mơ ală cau Pharisi cèng tus hơ Kơnràñ dô nă cau ùr neh cau kup tòm tŭ tìs glài bơrnàn, ơn khai ntào di đap bol khai, 4mơ đơs mơ Kơnràñ lah: “Ơ Cau Bơto, cau ùr do neh cau kup tòm tŭ tìs glài bơrnàn. 5#Leb 20:10; Yalw 22:22-24.Tòm bơta boh lam Môise neh sồr bol he lah cơm lŭ tĕ di ală cau be do. Ai Cau Bơto, gen mbe Ồng đơs taih?” 6Bol khai đơs behơ̆ nàng lòng Kơnràñ, tồ rgơi geh yă Kơnràñ. Yàng Jesu kun, ai ràs tê cih di ù. 7Tài bơh bol khai kư̆ lùp tai, gen Kơnràñ ntào mơ đơs lah: “Cau lơi tòm bol mê la cau ò gơs glài, cơm tĕ lŭ lài di khai.” 8Lồc behơ̆ Kơnràñ kun wơl mơ cih di ù. 9Dơ̆ bol khai kơno jơnau hơ̆, gen lik lòt dô nă dô nă, lài la cau kra tus cau kơnòm. Yàng Jesu ơm is dô nă mơ cau ùr gam ntào di đap Kơnràñ. 10Yàng Jesu ntào, đơs mơ cau ùr hơ̆ lah: “Ơ cau ùr, ntềng đah bol khai taih? Ò gơs cau lơi lơh nền glài ai ơ?” 11Cau ùr ho lah: “Ơ Yàng, ò gơs dô nă cau lơi.” Yàng Jesu đơs lah: “Añ kung ò lơh nền glài ai sơl; lòt tĕ, bañ tìs glài tai yơ.”]#8:11 Gơs dô êt sră cih tê yau ò gơs sèng (7:53–8:11).

Yàng Jesu la bơta àng dunnia dê

12 # Mat 5:14; Jang 9:5. Yàng Jesu đơs tai mơ bol khai lah: “Añ la bơta àng dunnia dê; cau lơi jat Añ rơp ò lòt tòm bơta klam jơngo, mơya gơs bơta àng bơta kis dê.” 13#Jang 5:31.Ală cau Pharisi đơs lah: “Cau Bơto lơh cơng is bơh să tòm he, gen jơnau lơh cơng Cau Bơto dê la ò ngan.” 14Yàng Jesu ho lah: “Bulah Añ lơh cơng is bơh să tòm Añ, gen jơnau lơh cơng Añ jê la song ngan; bơh Añ git Añ neh tus bơh lơi mơ lòt tiah lơi, mơya bol mê ò git Añ tus bơh lơi hala lòt tiah lơi. 15Bol mê cahrña jat poac să, Añ ò cahrña dô nă cau lơi ò. 16Dilah Añ cahrña, gen bơta cahrña Añ jê la song ngan; bơh ò di mìng dô nă Añ, mơya Añ mơ Bèp la Bơtau neh sồr Añ lòt tus cahrña bal. 17#Yalw 19:15.Tòm bơta boh lam bol mê dê kung neh cih lah jơnau lơh cơng bàr nă cau dê la song ngan. 18Añ lơh cơng is bơh să tòm Añ, mơ Bèp la Bơtau neh sồr Añ lòt tus kung lơh cơng Añ in sơl.” 19Behơ̆ bol khai lùp Kơnràñ lah: “Ntềng đah Bèp Cau Bơto dê taih?” Yàng Jesu ho lah: “Bol mê ò git Añ, mơ kung ò git Bèp Añ sơl. Dilah bol mê git Añ, gen kung git Bèp Añ tai sơl.”

20Yàng Jesu đơs ală jơnau hơ̆ tòm tŭ ơm bơto sồr tòm hìu duh khoai, tiah gơs thùng ơn jền, mơya ò gơs cau lơi kup Kơnràñ bơh jơ Kơnràñ òhềt tus.

21Kơnràñ đơs tai mơ bol khai lah: “Añ lòt, bol mê rơp jòi Añ, mơ bol mê rơp chơt tòm tồi glài bol mê dê. Tiah Añ lòt, bol mê ò rgơi lòt tus.” 22Ală cau Juda đơs lah: “Khai neh đơs: ‘Tiah Añ lòt bol mê ò rgơi lòt tus, behơ̆ khai rơp tơnchơt is să khai dê ơ’?” 23Yàng Jesu ho lah: “Bol mê lik bơh hơđơm, ai Añ bơh hơđang. Bol mê lik bơh dunnia do, ai Añ ò di lik bơh dunnia do. 24Gen tàng, Añ neh đơs mơ bol mê lah bol mê rơp chơt tòm tồi glài bol mê dê; bơh dilah bol mê ò dòn Añ la Bơtau neh gơs mơ gam gơs, gen bol mê rơp chơt tòm tồi glài he dê.” 25Bol khai lùp Kơnràñ lah: “Cau Bơto la ñcau taih?” Yàng Jesu ho lah: “Be jơnau Añ neh đơs mơ bol mê bơh sơnròp. 26Añ gơs oă bơta đơs mơ cahrña bol mê; mơya Bơtau neh sồr Añ lòt tus la Bơtau song ngan, mơ Añ yal wơl dunnia in ală bơta Añ kơno bơh Kơnràñ.” 27Bol khai ò git wă lah Kơnràñ đơs bơh Bèp bol khai in. 28Behơ̆ Yàng Jesu đơs lah: “Tòm tŭ bol mê yồng Kòn Mơnus hơđang, tŭ hơ̆ bol mê rơp git Añ la Bơtau neh gơs mơ gam gơs, mơ git Añ ò lơh is bơta lơi, mơya Añ mìng yal wơl ală bơta Bèp neh bơto Añ. 29Bơtau neh sồr Añ lòt tus gam ơm sùm sùm mơ Añ, ò lòi Añ ơm is; tài bơh Añ lơh ală bơta niam nùs Kơnràñ sùm.”

30Tòm tŭ Kơnràñ đơs ală bơta hơ̆, gen gơs oă cau dòn Kơnràñ. 31Behơ̆ Yàng Jesu đơs mơ ală cau Juda neh dòn Kơnràñ lah: “Dilah bol mê ơm sùm tòm jơnau Añ, gen bol mê ngan la cau bơtê Añ jê; 32Bol mê rơp git jơnau song, mơ jơnau song rơp hồ toh bol mê.” 33#Mat 3:9; Luk 3:8.Bol khai ho lah: “Bol hi la jơi bơtiàn Abraham dê, òhềt tŭ lơi lơh dĭ cau lơi in. Behơ̆ ñchi bơh tài Cau Bơto đơs lah: ‘Bol mê rơp geh hồ toh, taih’?” 34Yàng Jesu ho lah: “Di ngan, Añ đơs ngan mơ bol mê, cau lơi tìs glài la lơh dĭ gơna tồi glài in. 35Dĭ gơna ò ơm sùm tòm hìu nhă, ai kòn gen kư̆ ơm sùm. 36Behơ̆, dilah Kòn hồ toh bol mê, gen bol mê rơp geh khat gơboh ngan. 37Añ git lah bol mê la jơi bơtiàn Abraham dê, mơya bol mê jòi nàng tơnchơt Añ, tài bơh jơnau Añ jê ò gơs tiah tòm bol mê. 38Añ đơs bơta Añ neh gŏ bơh di Bèp Añ, ai bol mê lơh bơta bol mê neh kơno bơh di bèp bol mê dê.”

39Bol khai ho lah: “Bèp bol hi dê la Abraham.” Yàng Jesu đơs lah: “Dilah bol mê la kòn sau Abraham dê, gen rơp lơh ală broă Abraham dê sơl. 40Mơya tŭ do bol mê jòi nàng tơnchơt Añ, la cau neh yal bol mê in jơnau song neh kơno bơh Yàng Tom Trồ; Abraham ò gơs tŭ lơi lơh bơta hơ̆! 41Bol mê lơh broă bèp bol mê dê.” Bol khai đơs lah: “Bol hi ò di la kòn tir; bol hi gơs mìng dô nă Bèp la Yàng Tom Trồ.” 42Yàng Jesu đơs lah: “Dilah Yàng Tom Trồ la Bèp bol mê gen bol mê rơp kòñ gơboh di Añ, tài bơh Añ lik bơh Yàng Tom Trồ mơ bơh Kơnràñ mơ tus; bơh Añ ò di tus is Añ jê ò, mơya să tòm Kơnràñ neh sồr Añ lòt tus. 43Ñchi bơh tài bol mê ò rgơi git wă bơta Añ đơs taih? Tài bơh bol mê ò rgơi dòp jơnau Añ jê. 44Bol mê lik bơh bèp bol mê dê la cà ràk, mơ kòñ lơh jat bơta hàm kòñ is bèp bol mê dê. Bơh sơnròp gơ neh la cau tơnchơt cau, ò ntào tòm jơnau song, bơh ò gơs jơnau song tòm gơ ò. Tŭ lơi gơ đơs blac, gen đơs jat nùs is gơ dê, tài bơh gơ la cau đơs blac mơ la bèp bơta đơs blac dê. 45Mơya tài bơh Añ đơs jơnau song, gen tàng bol mê ò dòn Añ. 46Gơs cau tòm bol mê rgơi kup glài Añ taih? Dilah Añ đơs jơnau song, gen ñchi bơh tài bol mê ò dòn Añ? 47Cau lơi lik bơh Yàng Tom Trồ, gen iat jơnau Yàng Tom Trồ. Bơh bol mê ò iat tài bơh bol mê ò gơrê bal mơ Yàng Tom Trồ.”

48Ală cau Juda ho lah: “Bol hi đơs lah Cau Bơto la cau Samari mơ kòl cà lơh, hơ̆ la ngan.” 49Yàng Jesu ho lah: “Añ ò kòl cà lơh, mơya Añ jòng ro Bèp Añ jê, ai bol mê gen sền òsơp di Añ. 50Añ ò jòi bơta gơklŏ să tòm Añ jê, neh gơs Bơtau jòi bơta hơ̆ mơ cahrña. 51Di ngan, Añ đơs ngan mơ bol mê, dilah cau lơi prap gàr jơnau Añ, gen rơp ò tŭ lơi gŏ bơta chơt ò.” 52Ală cau Juda đơs lah: “Bol hi git loh Cau Bơto kòl cà lơh; Abraham neh chơt, ală cau gơnoar hwơr kung behơ̆ sơl, mơ Cau Bơto đơs lah: ‘Dilah cau lơi prap gàr jơnau Añ, gen rơp ò tŭ lơi git làm bơta chơt!’ 53Ngan sơl Cau Bơto dờng rlau mơ Abraham, ồng pàng bol hi dê, la cau neh chơt ơ? Ală cau gơnoar hwơr kung neh chơt! Cau Bơto sơnđan is să he la ñcau taih?” 54Yàng Jesu ho lah: “Dilah Añ lơh gơklŏ is Añ in, gen bơta gơklŏ Añ jê la ò gơlik lơ̆; să tòm Bèp lơh gơklŏ Añ in, Kơnràñ la Bơtau bol mê sơnđan la Yàng Tom Trồ bol mê dê. 55Bol mê ò git Kơnràñ, mơya Añ git Kơnràñ. Dilah Añ đơs Añ ò git Kơnràñ, gen Añ kung la cau đơs blac be bol mê sơl; mơya Añ git Kơnràñ ngan, mơ prap gàr jơnau Kơnràñ dê. 56Bèp bol mê la Abraham hòn chò kơp kòñ geh gŏ ngai Añ jê; khai neh gŏ mơ hòn chò.” 57Ală cau Juda đơs lah: “Cau Bơto òhềt tơl pram jơt nam mơ neh gŏ Abraham ơ?” 58Yàng Jesu đơs lah: “Di ngan, Añ đơs ngan mơ bol mê, lài mơ tŭ gơs Abraham, Añ neh gơs mơ gam gơs sùm sùm.” 59Gen bol khai dòñ lŭ nàng cơm di Kơnràñ, mơya Yàng Jesu dô pleh mơ lik bơh hìu duh khoai.

Attualmente Selezionati:

Jang 8: KPM2018

Evidenziazioni

Copia