JON 7

Jisu la Mwwg Bor Tulungv

1Soq kokw so Juhudi tulungv mwam mengdwb meekar yukam Jisu Judiya gvdaho gaql yinwmab Galili gvdab gaqtab wnum. 2Ho Juhudi tulug Tombu Durum moodv haaknum. 3Ho Jisug bor tulungv mwam benum, “Noqg buu tulungam noqg nyis tulungam nyigdvn ham kaam dvb no soq ked sam apaqpel Judiya gvdab wn. 4Atam yuuk dvb mwwnbov hiyvkam kvs-kapeql nyisil nyima dvn. No soq nyis tulungam sam nyid nyiloqkam gvda gvtam cimpw mvmto.” 5Mwwg bor tulungv kam mwam mwwjw maanum.

6Jisu bulam benum, “Aal moodv ngoqgab sija godab haama da. Hvbmabde nulug moodv looxiam doos dvn. 7Gvda gvtv nulam oyum ram, hvbmabde hoqhv ngam oyum dvn, hoggab hoqham ngoqg almak hvl begam gab hoqhv alman nyis tulungam nyidwn. 8Nulv durum kob caaiyan. Ngo durum kob wram hoggab ngoqg moodv sija godab hvvc maada.” 9Bulam hvl bvvtwl mwv Galili gvdaho doonum.

Jisu Tombu Durum ho Haanum

10Soq kokw so Jisug bor tulungv durum rumkub wnum. 11Mwv kaapa dvb wmab kvsil wnum. Juhudi tulungv mwam durumko ho meekar banv yvnum. Bulv toxnum, “Hogloq ho mwv yvdo?” 12Nyi tulungv mwwg pagoqkam budum-bvram bidu nyanam, nyi tuugin benum, “Mwv nyi albov,” nyi tuugin benum, “Ma,” mwv nyiam sup gvdo.” 13Hvbsujaqkam, Juhudi tulungam bos banv hiyvkam hampeql mwwg pagoqkam bemanum. 14Durumv ra paqb nyidul doodwkho Jisu xumk nammwb wnv tomswr banv berabnum. 15Ho Juhudi nyi tulungv lomnv benum. “Soq nyi si mwv tomswrko gokam wma hoggub nyil hwdgo cengdwn?” 16Ho Jisu birwqnum, “Ngoqg tomswr gvdwn si ngoqg galoqkv ma, hvbmabde, ngam kanambo Pwnbo galoqkv.” 17Hiyv akgon Pwnbog benam mam tatwl mwwg bonam nyidwb mwwnbo akv ngoqg tomswrnamsi Pwnbog hoqgv bwdwq hvbmab ngoqg atwg galoqkv bes dvn ham cengtayin. 18Hiyv at galoqkv bes dvn mwv atam yuuk dvb mwwdwn. Hvbmabde hiyv mwam kanam boam yuum dvb mwwdwn mwv jvqtwngv, mwv xaalyo maadwn. 19Mojes nulam pvvbam jimanam i? Nulug pengko ho akgonkam pvvbam tama dvn. Ho nulv ngam hoggub mwwjw dvn?” 20Nyi tulungv birwqnum, “Nam sonyiv cepa! Hiyv nam mengdwb meekar dvn.” 21Jisu birwqnum, “Ngo nyiig nyimanam ak nyit gvl hoo nulv mwlwngv lomdo. 22Mojes nulam pepaql-mux mvnam mam jinum (soq sam Mojes mvkin maasu, hvbmabde nulug ab tulungv nyirabnum), hoo Doonu dvk aalam nyiam nulv mux mvdo. 23Mojesg pvvbam Doonu dvk aalam nyiam pepaql-muxnam si daapo juqbo maadnyi, vcboam mwp yukam nulv ngam hoggub nyitwl haaxaqdvn? 24Ao aob pw-hwwtwq maabv, hvbmabde jvqtw lvgab pw-hwwto.”

Mwv Ywwnbo Hvvi Yv?

25Jerusalem hoq nyi tuugin benum, “Soq nyi sima i bulug mengdwb meekarnam hv? 26Hoo mwv si nyi mwlwg agahv agam goodu yvdo, hoo bulv mwam hog akkam gooma! Nyi sam jvqtw jaqb Ywwnbo hvl ngulug nyig wgbo koibo tulungv cengjaqdvn go? 27Hvbmabde ngulv soq nyi aksi hogloqkv haadwn, ham ngulv cengdwn, hvbmabde Ywwn bov haaikukam mwv hogloqkv haatayin ham hiyvkam cengram, hvbmabde mwv hogloqkv ham ngulv cengdwn.”

28Ho Jisu xumk nam uraho vc alwb bel tomswr banv benum, “Ngo hogloqkv haaiyin ham jvqtw jaqb ngam cengjaq dvn? Hvbmabde ngo atwg mwwkwb haama, ngam kanambo akv jvqtwngv hoo nulv mwam cengma. 29Hvbmabde ngo mwam cengdwn, hoggab, ngo mwwg toloqgv haaiyin, mwv sulak ngam kanam pan.” 30Ho bulv mwam nootu dvb mwwnum. Hvbsujaqkam hiyvkam mwwg gv alaq idaqmanum, hoggab mwwg moodv sija hvvc maadanam 31Hvbsujaqkam nyiv vigo mwam mwwjw banv benum, “Kristo haaikukam soq nyi nyinam sam nyibin yab mwv swrdorxeqb nyitayin i?”

Jisun Nootu Mvdwb Nyi Kanamnam

32Nyi tulungv Jisug bvrwqngam budum-bvram bemin sunam mam Parisi tulungv tapa tvl nyub buda ngvla Parisi tulungv mwam nootu mvdwb sipai tulungam kanamnum. 33Ho Jisu benum, “Ngo meegta oyu-yooma goda nulug lvgab yvtayin, hoqgv ngam kanam bog dookub wta yukun. 34Nulv ngam meegaq sutayin hvbmabde nulv ngam meeparam; hoggab ngo hogloqho dootayin hoqho nulv haanyiram.” 35Juhudi tulungv bulv bemin sunum, “Ngulv meejaqkam mwam meeparam mwk hvl, mwv hogloqb wtayin? Juhudi tulug dook Gwrik nampam wl Gwrik tulungam tomswr taab wta dvn yu? 36Mwv hvlakam bedo, “Nulv ngam meejaqkam meeparam hoo ngoqg wl dookub nulv wnyiram, hvgdvn hv hoggv yu?”

Xooma bo Swwg Iss

37Kokw so durum dvd moodv wnya yuk, hoqg vtwr aalhv xinam jaq aalwb nyinum. Hoq aalho Jisu daqrab banv vc alwb sogoql benum, “Hiyv hvngwr dvn ngoqg dookub haagdvl twwto. 38Dvrwq potalo xeqpwl apnam hvbkalam, ngam mwwjwbo akv mwwg hoqgv swwg issiv pobu hvb tomin dootayin.” 39Mwv Dvrwqbo yalwg pagoqkam benum, mwam mwwjwbo tulungv hiyam kaapa yindwn, hoggab sija namgub Yalam jima tanum, hoggab Jisun swsw yuupw maadanum.

Nyi Tulungv Jvqnyi gob Nyinam

40Nyi tuugin mwwg benam mam tatwl benum, “Soq nyi aksi jvqtw jaqb nyiqry benbo hv kunyi.” 41Tuugin begamv “Mwv Ywwnbo akhv!” Tuugin begamv, “Ywwnbo akv Galili hoqgv lengram! 42Dvrwq potangv begamv Ywwnbo akv Debid ko hosiq hoqgv lengtayin, hoo mwam Debidg dook Betleham nampamho ko bwwtayin.” 43Hoqgab nyi tulug pengko ho mwwg pagoqkam luusaq-luusaqb bemin sunum. 44Nyi tuugin mwam nootul leedwb mwwnum hvbmabde hiyvkam mwwg gv aoho alaq idaq maanum.

Juhudi Xilo Tulungv Mwwjw Maanam

45Ho sipai saab tulungv nyub buda lvgab Parisi tulug dookub hookur yukam bulv toxnum, “Hoggub nyitwl mwam nulv boa ma?” 46Sipai tulungv birwqnum, “Hiyv ak jaqkam soq nyi soq benum sib beka ma.” 47Ho Parisi tulungv bulam benum, “Nulam ruqb mwam sup kopan i” 48Parisi tulungv la gora ab tulungv mwam mwwjw namyv? 49Soq nyi tulu si Mojesg pvvbam cengma gab bulv Pwnbog beenam uraho doonam!” 50Bulug pengko hoqgv Nikodimasek hvnam hv Jisug dookub otuqho wnum. Mwv bulam benum. 51“Ngulug Pvvb lo xeqpnamv nyi akwg nyinam wnam mam kvvdy tvdy maalo mwam yolu bed nyid nvi yv?” 52Ho bulv mwam birwqnum, “No kam Galili hoq nyiv yv? Dvrwq potalo miidy kaato, Galili nampam hoqgv nyiqry kaanbo lengnyi ram.” 53Bulv vxiv at atwg nammwb wknum,

Attualmente Selezionati:

JON 7: NYISBSI

Evidenziazioni

Copia