JON 4

Jisu la Samariya Nyem Dvn

1Parisi tulungv Jisu nyiam Jonnvn viyago baptijum jil mwwg buub mvdwk hvl tapanum. 2(Hvbjaqkam Jisu mwv atv hiyv nvkam baptijum jimanum, hvbmabde mwwg buu tulungv jinum), 3Jisu soq benam pui sam tapa tvl Judiya gvdangam apaqpel Galili gvdab lok wkurnum. 4Hoo lamtaho mwv Samariya gvdab wpeql wdwb nyinum.

5Kokw so mwv Samariya gvdag Saikar bopam wc kunum, ho hoqhv Jakub mwwg ko tuup Josapnvn ked ak pengxia jinam hoqgv aado maanum. 6Jakubg sokumv hoqho doonum. Jisu lamta wg garv henla maab mwv sokum ho doonunum. Ho doonyiv taab kunum. 7Ho Samariya nyem dvn ak hoq sokum hoqgv iss bvtab haanum, ho Jisu mwn benum, “Ngam iss loq twwdwb jitwb.” 8(Mwwg buu tulungv bopamb dvs rvtab wnum.)

9Samariya nyem akv benum, “No Juhudi go, hoo ngo Samaritanv hoggub no ngam iss kodwn?” (Juhudi nyiv Samaritanwg pwcw ujuq kam dvn-twwn maadwn.) 10Jisu birwqnum, “No Pwnbov hognvkam jidwn ham cengnyiloqkam noqg lvgab goodul doonbo, nam iss konbo akam cengloqkam, no mwwg galoqkv swwg issam kos paco, hoo nam swwg issam nywywngam xooma boam jis paco.”

11Ho nyem akv birwqnum, “Tomswrbo, no ujuq gokam bvvma, hoo sokumv ura do, hogloqkv no lokkam xooma bo issam bvvtayin?” 12No ngulug ab Jakubnvn koi yaadwn? Mwv ngulam soq sokum sam jinum hoo mwv atv kam soqkv issam twwnum, mwwg ko tulungv la mwwg sibin, svv hoo sviyangv twwnum?”

13Jisu mwnwn birwqnum, “Soq iss sam twwn bov nyiv lokta hvngwr ngwrtin tayin. 14Hvbmabde hiyvg nyiv ngoqg iss jinam mam twwnbo akv lokta hvngwr takma, hoggab ngo mwam iss jitanam hv mwwg gab xooma jaqb buqlin dooky bo iss hvb nyil mwam nwrba cwtam swwg issam jitayin.”

15Nyem akv benum, “Tomswrbo! Hoq iss ham ngam jitwb! Hoggab ho ngo lokkam hvngwr kuram, ho ngo soq sokum so iss bvvtab haadwb nyikram.”

16Kokw so Jisu nyem akam benum, “Noqg nyolam wgdvl goqta ho soqb wkur taaku.”

17Nyem akv benum, “Ngoqg nyol dooma.” Jisu birwqnum, “No nyol doomak hvl noqg benamv kvtaq pa. 18No nyolv ang-go boot kubanyi, hoo sija noqg dooba gvdwn nyi ak hvvkam noqg nyol lodar maanyi. No ngam jvqtw jaqb bekinpa.” 19Ngo kaatgvl tomswrbo no nyiqry benbo gola nyik hvl nyem akv benum. 20“Ngoqg ab apa tulungv Pwnboam puutu aoho xumnum, hvbmabde, Juhudi nyi tulungv nulug begamv Jerusalem bvvtwq ngulug Pwnboam xumkv hvl bedwn.” 21Jisu birwqnum, “Nyem no ngam mwwjwto, moodv lok haatayin, nyi tulungv Abam soq mood ao sookam ho Jerusalem bolkam xumk ram. 22Samariya nyi tulu nul, hiyvn xumdwn ham cengma; hvbmab ngulug Juhudi nyi tulungv hiyvn xumdwn ham ngulv cengdwn, hoggab ywwt ywwnamv Juhudi nyi galoqkv haadwn. 23Hvbmabde moodv haadku, sija kam haapa ku, jvqtw jaqb xumn bo tulungv Abam yal lvgab la jvqtwb xumd moodv haadku, sijakam moodv haapa ku. Soq xumn bo torab siilak Abwg mwam xumdwb mwwnum nyi tulungv. 24Pwnbov yalv hoo mwam xumn bo tulungv yal lvgab la jvqtw lvgab xumdwb nyidwn.”

25Nyem akv mwam benum, “Ngo cengdwn Ywwnbo, Kristo ngvk hvl benam akv haatayin. Mwv haaikukam ngulam hog mwlwngam bekin tayin.” 26Jisu birwqnum, “Ngo lak mwv noqg lvgab goodul doonbo ak siilak.” 27Hoq mood jaqho Jisug buu tulungv hookur kunum; bulv mwam nyem akwg lvgab goodul doonam mam kaapa tvl wna mwwnum. Hvbjaqkam bulv hiyvjaqkam nyem akam “No hognvkv meegaqdvn?” hvl bemanum; ho “No hoggab mwnwg lvgab goorwqdvn, hvl Jisu nvkam bemanum?”

28Ho nyem akv iss uppum mam tvpaqpel nampamb wkur banv nyi tulungam benum, 29“Ngoqg vcwrko hog mwlw nyiknam mam ngam bekinbo nyi akam haagdvl kaato; Mwv Ywwnbo ak hvvmas i?” 30Ho bulv nampam hoqgv Jisun kaatab lengnum, 31Oyu maadab buu tulungv Jisun benum, “Tomswr bov dvs loq meeg dvto!” 32Hvbmabde mwv bulam birwqnum, “Ngoqg dvs doognam mam nulv cengma do.” 33Ho buu tulungv bulug pengko ho bemin sunv tox minsnum, “Hiyv nyiv mwam dvs bva jipa nui yu?” 34Jisu bulam benum, “Ngam kanam bog mwwlwqkob nyinamv hoo mwwg bonam nyitwk hvl benam mam niqtuq nyilinamv ngoqg dvsv. 35Nulv hvl bema dvn i, “Pool bvrpy goda bolo amv naadwb nyitayuk. “Ngo nulam bedwn rongo rwqtaqb hindib kvvdil kaato; amv sijakam ningpaku hoo naad bvkam nyidku. 36Am naanbo akam mwwg naajongam jipa kun; hoo mwv nwrba cwtam gob mwv ham naadwn; hoo am liinbov la noocum bov bunyi vnyiv lokub hemp poba sutayin. 37Akwn liiya tvl akwn noocum yaadwn hvl benam si jvqtw go. 38Ngo nulam nyi asaqg rongo golo am naatak hvl kanam tukun. Soq si nulug bon nyipnam ma, hvbsujaqkam nyiig nyilv lo nulv naaya dvn.” 39Nyem ak hog betamnam mam tatwl hoq bopam hoqgv Samariya nyiv vigo Jisun mwwjwnum, nyem akv benum, “Mwv ngam ngoqg hog mwlw nyinam wnam mam bekinpa.” 40Ho Samariya nyi tulungv mwwg ogum hvvnwql bulv mwam bulug lvgab doot juk hvl begam gab Jisu bulug lvgab loonyi go doobanum. 41Nyiv vigo hvraqb mwwg puiyam tatwl mwwjwnum, 42Bulv nyem akam benum, “Ngulv sija noqg betam ko-gab mwwjw ma, hvbmabde ngulv atv mwwg benam mam tape kun hoo ngulv cengdkun mwv jvqtw jaqb Kristo kunyi gvda gvtam Ywwnbo.”

Jisu Saab Ko Ak Mwpnum

43Aal loonyi kokw so Jisu bulam apaqpel Galili gvdab wknum. 44Jisu mwv atam besnv benum, “Nyiqry kaanbo akam mwwg gvda lo xima-paqma dvn.” 45Jisu Galili gvdaho wc kalam nyi tulungv mwam svgagvrwqnum, hoggab bulv atv Nyedarko Durum gab Jerusalem wnum hoo bulv hog mwlw mwwg nyinam mwlwngam Durumko ho kaaknum. 46Ho Jisu Galili gvdag issam roo alab mvk Kana bopamb lokta hookurnum. 47Hwdlo Jisu Judiya hoqgv Galilib haata dvk hvnam mam tapanum, ho mwv mwwg dookub wnum hoo mwam benum soqb haag dvl ngoqg nyega ko sam mwptvb, hoggab mwv sisv twqb nyido. 48Ho Jisu mwam benum, “Nulug pengko lo hiyv lajaqkam swrdorxeqb nyinam mam kaapa maalo mwwjw maadwn.” 49Saab akv birwqnum, “Tomswrbo, ngoqg lvgab ngoqg kov sima daab haato.” 50Jisu mwam benum, “Wnku, noqg kov swwtayin. “Nyi akv Jisug benam mam mwwjw kunv wknum. 51Mwv nammwb wdu yukam lamtaho mwwg nyera tulungv puiyam bekinnum, “Noqg kov swwi ywn paku!” 52Ho mwv bulam toxnum, hwdlogv mwwg kov al kunum. Bulv birwqnum, “Moiyog doonyi hwrj daqi mood akin hoqgv mwwg dooi vcv al kunum.” 53Ho ab akv mwwpa kunum, hoqg moodjaq hobo Jisu mwam, “Noqg kov swwtayin.” hvl benum. Ho mwv la mwwg imiq nyi mwlwngv mwwjw kunum. 54Soq si Jisug lwnyi dvb swrdorxeqb Judiya hoqgv Galili gvdab haabnv swrdorxeqkam nyinum.

Attualmente Selezionati:

JON 4: NYISBSI

Evidenziazioni

Copia