BEGGAR 6
6
Swcw nvg Ao so Nyimurv Vi yaiyanam
1Hwdlo nyia kov gvda aoso dumtwq-miilyw yukun hoo nyem kov bul gab dooknum, 2Pwnbog ko tuup tulungv nyia koog nyem ko tulungam kaabynum. Hoo bulug kaabynam mam bulv bulug nywxwb naanum. 3Ho At Sw benum, “Ngoqg Yalv nyia lvgab nwrba gob dooba kuram, hoggab mwv gv aiyaqkv: mwwg swwnam aalv 120 vnyw gob nyitayin.” 4Hoq moodho Nepilimv swcw nvg aoso doonum, hoo kokw sookam doonum, hwdlo Pwnbog ko tuup tulungv nyia koog nyem dookub haanum hoo bul gab bulv ko bwwjnum. Hoq tuluhv koi bvla axa yuunam nyi gob nyinum.
5At Sw swcw nvg uraho nyia koog koi loodab nyic-nyia nyinam mam kaapanum, hoo mwwg hang hoqg tuugabnamv almanbo arongam lwxiam mwwl doonum. 6Hoo At Sw nyia koam swcw nvg aoso doom dvb pwknam mam mwv mwwkurv lwwyw kunum, hoo hoqhv mwwg hangam vrr gol pwtkun go mwwmnum. 7Ho At Sw benum, “Ngoqg pwnum nyia koam ngo swcw nvg ao soqgv mvpaq tayin, nyia koam la svdin tulungam hoo gwn-xarnbo tulungam hoo doag pvta tulungam twrm tayin, hoggab ngo bulam pwgam gab ngo mwwkurv lwwyw kunum.” 8Hvbmabde Noa At Swg vnyiq kaagaho mwwsw dvb nyinum.
Noa la Sa-hindu
9Soq tulu si Noag hotam tulungv. Noa mwwg hotam ho lootw bvla timb dvb nyimabo nyiib swwnum. Noa Pwnbo lvgab yvbanum. 10Hoo ko tuup oum go doonum, Sem, Ham, hoo Japet.
11Pwnbog kaagaho swcwngv kac looda kunum, hoo swcw so yolu-swcinv bwwr tvl doonum. 12Hoo Pwnbov swcwngam kaanum, hoo kaato, swcwngv kac loodanum, hoggab swcw aoho swwnbo mwlwngv almab nyil kac loodanum. 13Hoo Pwnbov Noannvn benum, “Ngo swwl doonbo mwlwngam twryum dukub mwwr pakun, hoggab bulv swcwngam yolu-swcin lvgab bwwr mvpa ku. Kaato, ngo swcwngam la bulam twryum tayin. 14Goper svvda hoqgv no atgab hulu loq ak mvto. Hulu ho wrw loq mvto, hoo ham ura aob takin lvgab hiqtum to. 15Soq sib hoqham no mvdwb nyito: Hulug aasongam 300 kiubit go, hoqg taqtam 50 kiubit go, hoo hoqg aongam 30 kiubit go mvto. 16Hulu ho mwwlo ak mvto, hoo hoqham kiubit ak ao dvb mvto, hoo hulu hoqg viyap pam hoq bviywrho mvto. Hoqham akob tamg, vnyi dvb tamg hoo oum dvb tamg mvto. 17Hoggab kaato, ngo swcw nvg aoso swwl doonbo mwlwngam hoo nyodo nvg niikum so saqnbo mwlwngam twrdwb sa-hindungam haam tayin. Swcw nvg aoso doonbo hog mwlwngv sitayin. 18Hvbmabde ngo ngoqg pvvb bwwl birnam mam noqg lvgab mvtayin, hoo no hulu urab haatayin, no, noqg ko tuup tulungv, noqg nywxwngv, hoo noqg ko tuup tulug nywxw tulungv noqg lvgab haatayin. 19Hoo swwl doonbo svdin luuxy cwr hoqgv no vnyi gogab bulam hulu urab boolwq tvl hoo ngoqg lvgab swwl doomto. Bulam nyem gola nyega loq boolwqto. 20Pvta luuxy cwr loq, hoo svdin luuxy cwr loq, ked aohog gwn-xarnbo luuxy cwr loq, vnyi gogab boolwqto hoo bulam noqg lvgab swwl doomto. 21Noqg lvgab dvs luuxy cwramkam naal vlwqto, hoo ham hingkib pvvl apto. Hoqhv noqg gabla bulam gab dvs gob jitayin.” 22Noa soq sam nyiknum; mwam Pwnbo gaml jinam mwlwngam mwv nyinum.
Attualmente Selezionati:
BEGGAR 6: NYISBSI
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Nyishi Bible - DVRWQ PVVB
Copyright © 2015 by The Bible Society of India
Used by permission. All rights reserved worldwide.
