Génesis 29
29
Ten Jacob tuj Harán
1Kub'tzun b'e tu'n Jacob ex pon tuj kytx'otx' xjal tuj tjawitz q'ij.
2O til Jacob jun xoch tuj kojb'il, in che ojlantoq ox k'loj ẍne'l niqayin ttzi' tu'nju atzun in che k'an qe alumaj a'. Tkub'sa'ntoq jun ab'j matij te maqsib'l ttzi xoch. 3Ok tok kyjunin kyib' kykyaqil qe ẍne'l ttzi xoch, in jawtzun kyi'n pastor aju ab'j tkub' te maqsib'l ttzi' tu'ntzun kyk'an ẍne'l a'. Oktzun kyb'aj k'an ẍne'l, in kub'tl kyq'o'n ab'j te maqsib'l ttzi xoch. 4Xitzun tqanin Jacob kye pastor:
—¿Jatum tzajni qeye, nxjalil?
Xi kytzaq'we'n pastor:
—Aj Harán qo'ye.
5Xi tqanintl Jacob:
—¿Ojtzqi'npe Labán kyu'ne, aju tiyjil Nacor?
Xi kytzaq'we'n pastor:
—Ojtzqi'n.
6Xi tqanintl Jacob:
—¿B'a'npe ta' Labán?
Ex kymatzun pastor:
—B'a'n ta'. Ke'yinxa, lu Raquel aju tme'jel tzul kyuk'ix t-ẍne'l.
7Xitzun tma'n Jacob kye pastor:
—Atx q'ij ex junya'x. Na'nx tpon or tu'n kyok chmet alumaj. Kyq'onxe kyk'a ẍne'l a' ex kyxi'tle pastoril kye.
8Xi kytzaq'we'n pastor:
—Mlay b'ant ikju, maxitzun kjawil q'it ab'j tkub' ttzi xoch okxi kyul b'aj kykyaqil ẍne'l tu'ntzun kyk'an a'.
9Kukxtoq tyolin Jacob kyuk'il pastor tej tul Raquel kyuk'il t-ẍne'l tman, tu'nju atoq Raquel tok te pastor kye ẍne'l. 10Tej t-xi tke'yin Jacob lu Raquel aju tme'jel Labán aju t-xib'an ttxu', kyuk'ix t-ẍne'l Labán, xi'tzun naj Jacob ex jaw ti'n aju ab'j tkub'toq ttzi xoch ex e k'an qe t-ẍne'l Labán tu'n, aju t-xib'an ttxu'. 11El ttz'ub'an Jacob twitz Raquel ex ok ten oq'el. 12Xi tma'n Jacob te Raquel kyja': Aqine Jacob, tal Rebeca aju tanb' tmana, chi Jacob. Xi'tzun qelan Raquel q'malte te tman.
13Tej tb'inte Labán tqanil ti'j Jacob aju tal tanb', etz qelan k'molte te, b'aj tchle'n, el ttz'ub'an twitz ex xi ti'n tja. Oktzun ten Jacob q'malte tkyaqilju otoq b'aj ti'j. 14Xitzun tma'n Labán te kyja': Ax tok, at nxilene tuk'ila, chi Labán.
Kyaj ten Jacob tuk'il Labán jun xjaw.
Aq'nan Jacob ti'j Raquel ex Lea
15Xitzun tma'n Labán te Jacob:
—Mlay tz'aq'nana wuk'ile noq kukx. Baqa tu'nju at nxilene tuk'ila k'aq'nala wuk'ile noq kukx. Q'mantza weye jte' twi tk'u'ja.
16Attoq kab'e tme'jel Labán: Aju tzikb'aj Lea tb'i; atzunte tz'inb'aj Raquel tb'i. 17Ate Lea myaxix b'a'n che ke'yin qe tb'aq' twitz, atzunte Raquel tb'anilxix ke'yin twitz tuk'ix tkyaqil t-ximlal. 18Tu'nju otoq t-xo' tgan Jacob ti'j Raquel, tma:
—Chin aq'nale wuq ab'q'i tuk'ila ti'j Raquel aju tme'jela tz'inb'aj, chi Jacob.
19Xi ttzaq'we'n Labán kyja':
—Maslo b'a'n tu'n t-xi nq'o'ne teya twitzju tu'n t-xi nq'o'ne te junxitl xjal. Tencja wuk'ile, chi Labán.
20Kyja'tzun aq'nan Jacob wuq ab'q'i ti'j Raquel, ex aju wuq ab'q'i mer ik tza'n noq jte' q'ij e'la tuj twitz Jacob, tu'nju at nimxix tgan ti'j. 21Xitzun tma'n Jacob te Labán kyja':
—Q'ontza nxu'jile tu'n nmoje'ye tuk'il, tu'nju ma japun b'aj tyemp wu'ne, aju xi nma'ne teya.
22E tzajtzun ttxko'n Labán kykyaqil qe tvesin, ex ok jun nintz wa'n kyu'n tej tb'ant mejeb'le'n. 23Te qonik'an tzaj ti'n Labán tme'jel aju Lea tb'i, xi tq'o'n te Jacob, ex kub' tan Jacob tuk'il. 24Xi tq'o'n Labán jun tmajen xu'j te Lea te ajb'el te, Zilpa tb'i.
25Tejtzun t-sqix te juntl q'ij, el tnik' Jacob ti'j atoq Lea. Xitzun tma'n te Labán:
—¿Ti ma tb'inchaya wi'je? ¿Baqa mya ti'j Raquel o chin aq'nane tuk'ila? ¿Tiqu'ntzun ma chin kub' t-sb'u'na?
26Xi ttzaq'we'n Labán:
—Minti' in b'ant qu'ne ikju, tu'n tmoje' jun qme'jele tz'inb'aj nej twitz tzikb'aj. 27E tjapun b'aj wuq q'ij ninq'ij tu'na te mejeb'le'n ti'j Lea, ex b'a'ntzun t-xi nq'o'ne Raquel teya, qa ma kub' tuj twitza tu'n taq'nana wuqtl ab'q'i wuk'ile.
28Kub'tzun tuj twitz Jacob ikju, ex japun b'aj wuq q'ij ninq'ij tu'n ti'j mejeb'le'n. Xitzun tq'o'n Labán tme'jel aju Raquel tb'i, tu'n tok te t-xu'jil Jacob. 29Ax ikx xi tq'o'n Labán jun tmajen xu'j te Raquel tu'n tajb'en te, Bilha tb'i. 30Moje'tzun Jacob tuk'il Raquel, ex o tk'ujla nimxix wen, mas o tk'ujla twitz Lea, ex aq'nan tuk'il Labán wuqtl ab'q'i.
Qe tk'wa'l Jacob
31O til Qman myaxix k'ujla'ntoq Lea tu'n Jacob, ex o onin ti'j tu'n ttzaj tal; atzunte Raquel mib'antoq alin. 32Oktzun ten tal Lea. Tej tul itz'j tal, Rubén tb'i ok tq'o'n, ex tma kyja': Ma tzaj tke'yin Qman atine tuj b'is. Tu'ntzun jlu chin k'ujlanjtzele ja'lo tu'n nchmile, chi Lea.
33Ok ten juntl tal Lea. Tej tul itz'j tmatl kyja': Tu'nju ma tb'i Qman myaxix k'ujla'n qine, ma tzaj tq'o'n juntl wale, chi Lea. Tu'ntzun jlu, Simeón tb'i ok tq'o'n.
34Ok ten juntl tal Lea. Tej tul itz'j tmatl kyja': Atzun ja'lo ktel mas tmojb'ab'l tib' nchmile wuk'ile, tu'nju ma che tzaj ox tky'ajal wi'je, chi Lea. Tu'ntzun jlu, Leví tb'i ok tq'o'n.
35Ok ten juntl tal Lea. Tej tul itz'j tmatl kyja': Atzun ja'lo kjawil nnimsa'ne tb'i Qman, chi Lea. Tu'ntzun jlu, Judá tb'i ok tq'o'n. We'tzun tu'n ttzaj tal.
Attualmente Selezionati:
Génesis 29: MAMNO
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
