Génesis 26
26
Pon Isaac tuj Gerar
1Te tib'ajxi tzaj we'yaj tuj tx'otx' lu, ikx tza'n ju tzaj tuj tq'ijlalil Abraham. Tu'ntzun jlu, pon Isaac tuj Gerar jatum najltoq Abimelec, aju kyrey aj Filisteo. 2Kub'tzun tyek'un tib' Qman twitz Isaac ex tzaj tma'n te kyja': Mi'n txi'ya tuj Egipto. Ax tenkja jatum kxel nma'ne teya, 3ax tena ik tza'n b'etin xjal tuj tx'otx' lu. Chin tele tuk'ila ex kb'el nky'iwla'na, tu'nju kxel nq'o'ne tx'otx' lu teya ex kye tiyjila. Kyja'tzun kjapunel nyole xi ntziyane te tmana Abraham. 4Che chmetel qe tiyjila wu'ne, ik k'okel kyajlal ik tza'n qe che'w twitz kya'j, ex kxel nq'o'ne tkyaqil tx'otx' lu kye. Ax ikx che b'el ky'iwla'n kykyaqil qe nasyon twitz tx'otx' noq kyu'n tiyjila, 5tu'nju xi tniman Abraham qine, ex o japun tu'n tkyaqilju xi nma'ne te, qe nmandamyente, qe nxnaq'tzb'ile ex qe nleye, chi Dios.
6Najantzun Isaac tuj Gerar. 7Xitzun kyqanin qe xinaq tuj tx'otx' lu ti'j t-xu'jil. Atzun te xi ttzaq'we'n: Wanb'e jlu chi Isaac, tu'nju tzaj t-xob'il tu'n t-xi tma'n: Nxu'jile jlu. In ximantoq, b'alo jaku kub' b'yo'n kyu'n qe xjal tuj tx'otx' lu tu'n tlaj Rebeca, tu'nju tb'anilxix ke'yin.
8Otoq tz'el nim q'ij tponlen najal ma chixin, ate Abimelec aju kyrey aj Filisteo at jun q'ij ex tke'yin ttzi ventan ex o til, lu Isaac in masontoq ti'j Rebeca aju t-xu'jil. 9O txokl Isaac tu'n Abimelec, ex xi tma'n Abimelec te kyja':
—Ax tok t-xu'jila jlu. ¿Tiqu'ntzun o tmaya kyja': Wanb'e jlu, chiya?
Xi ttzaq'we'n Isaac:
—Kub' nximane kyja': B'alo jaku chin kub' b'yo'ne tu'n tlaj.
10Atzunte Abimelec xi tma'n te:
—¿Tiqu'n o tb'inchaya qi'je ikju? Jaku b'ant tkub' tan noq alkyex jun xinaq tuk'il t-xu'jila, ex owtlo tzaj ti'na il qib'aje, chi Abimelec.
11Xitzun tq'o'n Abimelec jun tqanil kye kykyaqil xjal tuj tnam lu, chi kyja':
—Qa at jun xjal ma tz'ok lab't ti'j xinaq lu ex qa ti'j t-xu'jil, ax tok kymel.
12Ku'xtzun tawa'n Isaac tawal tuj tx'otx' lu, ex ok nimxix twitz tawal tuj ab'q'i lu, tu'nju kub' ky'iwla'n tu'n Qman. 13Chmet mastl tq'inumab'l Isaac ex ok te jun nintz q'inun. 14Ate'toq nimxix t-ẍne'l, nimxix twakẍ ex nimxix tmajen. Atzun qe aj Filisteo tzaj tlo'ch kyk'u'j ti'j Isaac tu'n tlaj tkyaqil jlu. 15Kykyaqil qe xoch otoq che kyaj kylaku'n qe tmajen Abraham aju tman Isaac, e ku'x kynojsa'n qe aj Filisteo tu'n tx'otx'. 16Xitzun tma'n Abimelec te Isaac:
—Tik'a tzalu, tu'nju mas ma tzik' tq'inumab'la ik tza'n qeye.
17Ik'tzun Isaac tuj tx'otx' lu, kub' ten tuj chq'ajlaj Gerar, ex axtzun o kyaj ten najal. 18Jatz ti'n Isaac tx'otx' kyuj qe xoch otoq che kyaj b'ant tuj tq'ijlalil Abraham aju qtzan tman, aqeju otoq che ku'x kynojsa'n qe aj Filisteo tkyimlenxi Abraham; ex ax kyb'i xoch ok tq'o'n aju toksa'ntoq tu'n qtzan tman. 19Tej tku'x kylaku'n qe tmajen Isaac tuj chq'ajlaj, atzun e ok noj ti'j jun twi a'. 20Qe aj Gerar, aqeju in che pastorintoq kyẍne'l, e jaw q'ojl kyi'j qe pastoril t-ẍne'l Isaac, ex kyma kyja': Aju a' lu qeye, che chi. Tu'ntzun jlu, Esek#26.20 Esek. Tuj yol ebrey atzun in tma'n q'oj. tb'i xoch ok tq'o'n Isaac, tu'nju atzun e jaw q'ojl xjal ti'j. 21Ku'x kylaku'ntl qe tmajen Isaac juntl xoch. Ax ikx tzaj kyq'oj xjal ti'j juntl maj, ex ok tq'o'n Isaac tb'i xoch lu, Sitna.#26.21 Sitna. Tuj yol ebrey atzun in tma'n ik'b'il.
22Ik'tzun laq'e' Isaac ex ku'x tlaku'ntl juntl xoch, ex minti'tl tzaj kyq'oj xjal ti'j. Tu'ntzun jlu ok tq'o'n Isaac tb'i xoch lu Rehobot#26.22 Rehobot. Tuj yol ebrey atzun in tma'n: Lugar ma'xix ex tb'anilxix. ex tma: Ja'lo ma tzaj tq'o'n Qman nim tx'otx' qe, ex kchmetel nimxix qq'inumab'l tuj tx'otx' lu, chi Isaac.
23Ik' Isaac tuj lugar lu ex japun tuj Beerseba. 24Axtzun qonik'an kub' tyek'un tib' Qman twitz ex tzaj tma'n te kyja':
Aqine Tdios Abraham aju tmana. Mi'n xob'a porke atine tuk'ila. Kb'el nky'iwla'na ex kchmetel nimxix tiyjila wu'ne, noq tu'n nk'ujlalile ti'j Abraham aju nmajene.
25Jawtzun tb'incha'n Isaac jun altar tuj lugar lu ex atzun o na'n Dios. Kub' tq'o'n tja, xb'alun ja, tuj tx'otx' lu, ex e ok ten qe tmajen lakul juntl xoch.
Kyaj b'ant ti'j jun yol tu'n Isaac ex Abimelec
26At jun q'ij tzaj Abimelec max tuj Gerar tu'n tyolin tuk'il Isaac, tuk'ix tamiw tzaj tuk'il, aju Ahuzat tb'i, ex tuk'ix Ficol aju nejenel kye t-soldad. 27Xitzun tma'n Isaac kye kyja':
—¿Tiqu'n ma che ule wuk'ile? ¿Myapetzun minti' kyaje wi'je ex o chin etz kylajo'ne kyxole?
28Atzun kye xi kytzaq'we'n:
—O qile at Qman tuk'ila, ex o kub' qximane tu'n tkyaj b'ant ti'j jun yol qu'ne tuk'ila. Aju yol tu'n tkyaj b'ant ti'j qu'n, atzun jlu: 29Tu'n mi'n tb'inchanteya mya b'a'n qi'je, ik tza'n qeye minti' o qb'inchaye jun mya b'a'n ti'ja. Noqpe o qb'inchaye b'a'n teya, tuj txub'txaj etza qxole, ex ja'lo o kub' ky'iwla'na tu'n Qman, che chi.
30Tb'inchatzun Isaac jun nintz wa'n te kye. E wa'n, ex e k'an. 31E jaw we' prim tuj juntl q'ij ex xi kyma'n jun yol axix tok jun te juntl. B'ajtzun tq'olb'en tib' Isaac kyuk'il, ax ikx kye b'aj kyq'olb'en kyib' tuk'il Isaac ex e aj meltz'aj tuj txub'txaj.
32Ax q'ij lu e ul qe tmajen Isaac q'malte tqanil ti'j xoch aju in che lakuntoq ti'j, ex kyma kyja': Ma knet a' qu'ne, che chi. 33Seba tb'i xoch lu ok tq'o'n Isaac. Tu'ntzun jlu ax tb'i tnam tok ja'lo: Beerseba.
34Tej tjapun Esaú twi' 40 ab'q'i moje' tuk'il Judit aju tme'jel Beeri, aju aj Heteo. Ax ikx moje'tl tuk'il Basemat aju tme'jel Elón, ax aj Heteo. 35Kyu'n qe kab'e xu'j lu tzaj ta'w tuj tanmi Isaac ex Rebeca, ex minti' e ten tuj txub'txaj.
Attualmente Selezionati:
Génesis 26: MAMNO
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.
