Chɛ̄nɛ̍se̍ē 6
6
Dɛ̍nɛ̍ wɔ̍ɔ̍ŋndo̍ kūi̍i̍ ŋ̄wāŋndā chīe̍e̍ tɛ̍ɛ̄ŋ
1O̍ ko̍ŋ kɔ̍ɔ̍lī, mi̍ wāŋndā chīe̍e̍ya̍ ā kūīī o̍ chi̍e̍ēŋndo̍ chōo̍ ta̍u̍ ta̍u̍, ndu̍yɛ̍, ma̍ vīālū wāŋ lāāndūa̍a̍ cha̍po̍. 2A̍ bōōndi̍i̍ ke̍ŋ, mi̍ nyāā yōōmāa̍ cho̍ o̍ īnyi̍nāya̍ chōo̍ cho̍o̍ wa̍ ā pūm ā chā mɛ̄ɛ̍ wāŋ lāāndūa̍a̍ ve̍lu᷄ŋ o̍ chi̍e̍ēŋndo̍ chōo̍ wa̍ ā na᷄ŋ yɛ̍. O̍ ko̍ŋ, ma̍ chɔ̄ɔ̄vīāā ā nda̍ yēēma̍ wa̍ nda̍ tɛ̄ɛ̄ŋ, ma̍ sīīŋgūū nda̍ lāāndāā ndā. 3Mi̍ Mɛ̄lɛ̄ka̍ Ya̍a̍wɛ̄ɛ̄ lo᷅ o̍ ko̍ŋ mbo̍ dīmī āā, “I̍ cho̍ chɛ̍lɔ̄ɔ̄ mī wāna̍ chi̍o̍o̍ hīōū lāchī a̍ Nyi̍nā ni̍ cho̍ ndu̍ kɔ̄ɔ̄lī wo̍ lābɛ̄ɛ̄ tɛ̄ɛ̄mbūū le̍ fɛ̍ɛ̍ŋ fɛ̍ɛ̍ŋ te̍. Kāni̍ fu̍u̍le̍, wāna̍ nɔ̍ mbō vī wo̍ o̍ cho̍ ni̍. Ō chō ni᷅ŋ wā wɔ̄sīla̍ŋ kɛ̄mɛ̄ a̍ bi̍di̍i̍ŋ (120) ko̍ni̍.” 4Chɔ̍ŋ a̍ te̍le̍ŋnda̍ la̍ŋ mbo̍ kūā a̍ lāchī bɛ̍ɛ̍, nyāā yōōmāa̍ wa̍ ka̍ŋ o̍ īnyi̍nāya̍ ma̍ tūāl o̍ chi̍e̍ēŋndo̍ chōo̍ ma̍ bɔ̄ŋā nɔ̄la̍ŋ a̍ wāŋ lāāndūa̍a̍ wa̍, ma̍ vīālū chūāūwa̍ a̍ nda̍. Chūāūwāā kāŋ nda̍ wa̍ sīndɛ̄ ku̍u̍ba̍a̍ dīāllūŋ kālāā bɛ̄ndūa̍a̍ ni̍. Nda̍ wa̍ wānāā lātɔ̍ɔ̍va̍a̍ bɛ̍ndūa̍a̍ ni̍.
5O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ sa̍a̍lu᷄ŋ mɛ̄ɛ̍ dɛ̍nɛ̍ wɔ̍ɔ̍ŋ wāŋndā chīe̍e̍ya̍ tīu̍ kpo̍u̍ o̍ chi̍e̍ēŋndo̍ chōo̍ yɛ̍. Ndu̍yɛ̍, mbo̍ sāālu᷄ŋ māā yīya᷄ŋ dɛ̍nɛ̍ wɔ̍ɔ̍ŋndo̍ ko̍ni̍ hūŋ wa᷅na̍ chi̍o̍o̍ o̍ kɔ̄l te̍le̍ŋ o̍ te̍le̍ŋ ni̍. 6Mi̍ mɔ̍nɛ̍i̍ bīī Mɛ̄lɛ̄ka̍ le̍ mɛ̄ɛ̍ o̍ to̍o̍si̍a̍a̍ ŋ̄wāŋndā chīe̍e̍ o̍ chi̍e̍ēŋndo̍ chōo̍ yɛ̍. Mi̍ ī tɛ̄ɛ̄mbūū ndu̍ kɔ̄l ta̍u̍ bɛ̍ndū. 7O̍ ko̍ŋ kɔ̍ɔ̍lī, mi̍ Mɛ̄lɛ̄ka̍ Ya̍a̍wɛ̄ɛ̄ o̍ di̍mī āā, “I̍ cho̍ wāŋndā chīe̍e̍ya̍a̍ ya̍ I̍ to̍o̍si̍a̍a̍ wa̍ bāsɔ̄ɔ̄ o̍ chi̍e̍ēŋndo̍ chōo̍ tɛ̍ɛ̍. Nda̍ ni̍, a̍ vīsīa̍a̍, a̍ yōūwa̍, a̍ nyɛ̄ o̍ nyɛ̄ yōōmāā, nda̍ kpo̍u̍ I̍ cho̍ nda̍ tɛ̄ɛ̄mbūū pa̍ku̍. Kāni̍ fu̍u̍le̍, mɔ̍nɛ̍i̍ chō o̍ kɔ̄l nūu̍ ni᷄ŋ le̍ mɛ̄ɛ̍ ya̍ i̍ to̍o̍si̍a̍a̍ nda̍ yɛ̍.” 8Kɛ̍, Nu̍u̍wā ndu̍ ndu̍, mbo̍ tōsā nyɛ̍ nɛ̍ŋī Mɛ̍lɛ̄ka̍ Ya̍a̍wɛ̄ɛ̄ kɔ̄l lo̍.
Mɛ̄lɛ̄ka̍ dīmu̍l Nu̍u̍wā le̍ dɛ̄ndɔ̄ɔ̍ tōōsi̍a̍a̍
9Ko̍na̍ po̍o̍nyi̍a̍a̍ŋ a̍ Nu̍u̍wā o̍kɔ̄ɔ̄ wo̍ cho̍ ho̍ō ni̍. Nu̍u̍wā wa̍ wānā sa̍kpō Mɛ̄lɛ̄ka̍ o̍ hɔ̄l. Wānāa̍ wa̍ pɛ̄ŋgu̍ ko̍ŋ nda̍ ki̍nɛ̍i̍, Nu̍u̍wā wa̍ wāna̍ to̍sa̍ nyɛ̄ Mɛ̄lɛ̄ka̍ hɛ̄na̍ŋ ndo̍ sa̍kpō ni̍. Ndu̍yɛ̍ ō wa̍ o̍ dīōm pīlɔ̍ɔ̍ ni᷄ŋ nda̍ Mɛ̄lɛ̄ka̍. 10Nu̍u̍wā ndu̍ o̍o̍ nɔ̍ pūa̍a̍ ā yāa̍, Si̍ɛ̄m a̍ Ha̍ām, a̍ Cha̍fɛ̍tī. 11A̍ bōōndi̍i̍ ke̍ŋ, mi̍ dɛ̍nɛ̍ wɔ̍ɔ̍ŋndo̍ pīā o̍ chi̍e̍ēŋndo̍ chōo̍. Mi̍ ka̍ālā wāŋndā chīe̍e̍ya̍ lā kūīsi᷄ŋ Mɛ̍lɛ̄ka̍ o̍ kɔ̄l kpu̍. 12Mɛ̄ɛ̍ Mɛ̄lɛ̄ka̍ mɛ̄ɛ̄nda̍ŋ chi̍e̍ēŋndo̍, mbo̍ chā māā chi̍e̍ēŋndo̍ tāmbu̍, kāni̍, wāŋndā chīe̍e̍ya̍ kpo̍u̍ ma̍ sīmnu᷄ŋ wa̍nāā dɛ̍nɛ̍ wɔ̍ɔ̍ŋ bɛ̄ndū.
13O̍ ko̍ŋ, mi̍ Mɛ̄lɛ̄ka̍ dīmūl Nu̍u̍wā āā, “I̍ kɛ̍ɛ̍si̍a̍a̍ le̍ mī tɛ̍ɛ̍mbu̍u̍ ŋ̄wāŋndā chīe̍e̍ kpo̍u̍ o̍ chi̍e̍ēŋndo̍ chōo̍. Kāni̍ fu̍u̍le̍, wāna̍ chi̍o̍o̍ tōsa̍ mi̍ dɛ̍nɛ̍ wɔ̍ɔ̍ŋndo̍ pīā o̍ chi̍e̍ēŋndo̍ chōo̍ cha̍. Le̍la̍ŋ, I̍ cho̍ nda̍ tɛ̄ɛ̄mbūū a̍ chi̍e̍ēŋ kālāa̍ lātūlu̍ fa̍ū. 14Le̍ he̍ī, ki̍o̍ŋ yɔ̄m kɛ̄ndɛ̄ kɛ̍ndɔ̄ɔ̍ mā tɛ̍nda̍ pɛ̄ŋgɔ̍ŋ, mā to̍o̍si̍a̍a̍ dɛ̄ndɛ̄ bɛ̍ndōo̍ le̍ nūm pi̍la̍. A̍ ba̍ŋ pɛ̍, a̍ ki̍li̍ ndu̍ a̍ lu̍mūi̍la̍ŋ kpɛ̍ kpɛ̍, a̍ yi̍kpa̍ ndu̍ a̍ Ko̍tɛ̍i̍yo̍#6:14 Ko̍tɛ̍i̍yo̍: Ka̍mīī kāmīī māā ma̍ŋga̍ o̍ cho̍ ni̍. Le̍ yɔ̄ŋi̍ mɛ̄ŋnda̍ŋ mā lūɛ̍i̍ Nu̍u̍wā su̍u̍ ndu̍ o̍ dɛ̄ndɔ̄ɔ̍ ni̍. lēni᷄ŋ a̍ o̍ kɔ̄ɔ̍, yɔ̄ŋi̍ mɛ̄ŋnda̍ŋ mā lūɛ̍i̍. 15Mɛ̄ɛ̍ ŋ̄ nɔ̄ mā tu̍u̍ ndu̍ yɛ̍ cho̍ ho̍ō ni̍, bānde̍i̍ nɛ̄īyo̍ kɛ̄mɔ̄ɔ̍ lē hīɔ̍ɔ̍lu̍ a̍ be̍le̍-ŋu̍ɛ̍ɛ̍nu̍ (450), bu̍o̍o̍ nɛ̄īyo̍ be̍le̍-ŋɔ̍mmɛ̍ū a̍ le̍ ŋūɛ̍ɛ̍nu̍, hēlɔ̄ɔ̍ nɛ̄īyo̍ be̍le̍-hi̍ɔ̍ɔ̍lu̍ a̍ lē ŋūɛ̍ɛ̍nu̍. 16Mā chu̍a̍ ndu̍ yīndɔ̄ɔ̍ mā wu̍u̍, kɛ̍ mā mɛ̍i̍ fo̍ndāa̍ yīndɔ̄ɔ̍ tɛ̄ɛ̄ŋ a̍ dɛ̄ndɔ̄ɔ̍ pi̍la̍ le̍ nɛ̄īyo̍ lē pīlɛ̍ a̍ tɛ̄ɛ̄ŋ. A̍ wa̍ ndu̍ tāŋgūllo̍ pɛ̍, a̍ mɛ̍i̍ dīo̍o̍ o̍ kpēŋgēi̍. Dɛ̍ndɔ̄ɔ̍ ho̍ō nɔ̄ mbō wa̍ hēlɔ̄ɔ̍ lēyāa̍, lēbɛ̄ŋgu̍ tɛ̄ɛ̄ŋ a̍ lēchōo̍. 17I̍ cho̍ tōsā mī mɛ̄ŋnda̍ŋ mā chu̍a̍ chi̍e̍ēŋndo̍ kpo̍u̍, mī mā dīu̍ nyɛ̄ o̍ nyɛ̄ yōōmāā. Nyɛ̄ o̍ nyɛ̄ yōōmāa̍ cho̍ o̍ chi̍e̍ēŋndo̍ chōo̍ ā chō wu̍ fa̍ū. 18Kɛ̍ nūm nūm, I̍ cho̍ kpe̍ma̍a̍ yīī na̍a̍ nūm tɛ̍ɛ̄ŋ. Nūm ni̍, a̍ pūa̍a̍ nu̍mnda̍, a̍ la̍a̍ nu̍m, a̍ lāāndāā pūa̍a̍ nu̍mnda̍, mī lā lūɛ̄ī o̍ dɛ̄ndɔ̄ɔ̍ ni᷄ŋ. 19Ndu̍yɛ̍ o̍ ko̍ŋ kɔ̍ɔ̍lī, nyɛ̄ o̍ nyɛ̍ cho̍ nyɛ̄ yōōmāā, mā chu̍a̍ nda̍ ā ŋīɔ̍ɔ̍ŋ ŋi̍ɔ̍ɔ̍ŋ tu᷅, ō pīāāndōo̍ a̍ ō lāāndōo̍, mā lu̍e̍i̍ nda̍ o̍ dɛ̄ndɔ̄ɔ̍ ni᷄ŋ le̍ mī nda̍ lo̍ yōōmū nya̍ nda̍. 20Mā chu̍a̍ yōūwa̍ su̍u̍ o̍ su̍u̍, vīsīa̍a̍ su̍u̍ o̍ su̍u̍, a̍ nyɛ̄ o̍ nyɛ̍ cho̍ nyɛ̄ yōōmāā, nda̍ kpo̍u̍ ō pīāāndōo̍ a̍ ō lāāndōo̍. Nda̍ kpo̍u̍ ā chō fūlā mā hīŋ nāa̍ nūm chu̍a̍, mā ma̍nda̍ nda̍ mā lo̍ yōōmū. 21O̍ ko̍ŋ kɔ̍ɔ̍lī, mā chu̍a̍ nyɛ̄ o̍ nyɛ̍ cho̍ nyɛ̄ dīāā mā do̍vi̍ ndu̍ kpɛ̍ kpɛ̍ o̍ dɛ̄ndɔ̄ɔ̍ ni᷄ŋ le̍ dīo̍ nyāa̍, a̍ vīsīa̍a̍ a̍ nyɛ̄ o̍ nyɛ̄ yōōmāa̍ cho̍ wā lēni᷄ŋ.” 22Mi̍ Nu̍u̍wā to̍sā mɛ̄ɛ̍ o̍ mɛ̄ɛ̍ Mɛ̄lɛ̄ka̍ dīmu̍l ndu̍.
Attualmente Selezionati:
Chɛ̄nɛ̍se̍ē 6: YM
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Kisi Bible © Bible Society in Liberia, 2015.