LUCAS 4

Si Jesus Ginasulay

(Mat. 4:1-11; Mar. 1:12-13)

1Kag si Jesus, nga puno sang Espiritu Santo, nagbalik gikan sa Jordan, kag gintuytuyan sang Espiritu sa kamingawan, 2sa sulud sang kap-atan ka adlaw, nga ginasulay sang yawa. Kag wala sia magkaon sing bisan ano sa sadtong mga adlaw; kag sang natapus sila, gingutum sia. 3Ang yawa nagsiling sa iya, “Kon ikaw Anak sang Dios, sogo-a ining bato nga mangintinapay.” 4Kag si Jesus nagsabat sa iya, “Nasulat na, ‘Indi lamang sa tinapay mabuhi ang tawo.’#Deut. 8:3.” 5Kag gindala sia niya, kag ginpakitaan sia sang tanan nga ginharian sang kalibutan sa isa ka pamisok, 6kag ang yawa nagsiling sa iya, “Sa imo ihatag ko ini tanan nga pagbulut-an kag ang himaya nila; kay natugyan ini sa akon, kag sa bisan kay sin-o nga buut ko ihatag ini. 7Busa kon ikaw magyaub sa atubangan ko, mangin-imo ini tanan.” 8Kag si Jesus nagsabat sa iya, “Nasulat na,

‘Magsimba ka sa Ginoo nga imo Dios,

kag sa iya lamang mag-alagad ka.’#Deut. 6:13.”

9Kag gindala niya sia sa Jerusalem, kag ginpahamtang sia sa alibungan sang templo, kag nagsiling sa iya, “Kon ikaw Anak sang Dios, lukso ka pa idalum; 10kay nasulat na,

‘Magasogo sia sang iya mga manugtunda nahanungud sa imo, sa pagbantay sa imo.’#Sal. 91:11.

11kag

‘Bayawon ka nila sa ila mga kamut,

basi nga makasandad ang imo tiil sa bato.’#Sal. 91:12.”

12Kag si Jesus nagsabat sa iya, “Nasiling na, ‘Dili mo pagsulayon ang Ginoo nga imo Dios.’#Deut. 6:16.” 13Kag sang natapus sang yawa ang tagsa ka pagsulay, naghalin sia sa iya tubtub sa nagakaigo nga tion.

Si Jesus Nagasugud sang Iya Pagpangabudlay

(Mat. 4:12-17; Mar. 1:14-15)

14Kag si Jesus nagbalik sa Galilea sa gahum sang Espiritu, kag ang kabantugan nahanungud sa iya naglapnag sa tanan nga ginsakpan sa palibut. 15Kag nagpanudlo sia sa mga sinagoga nila, nga ginahimaya sang tanan.

Si Jesus Ginasikway sa Nazaret

(Mat. 13:53-58; Mar. 6:1-6)

16Kag nag-abut sia sa Nazaret, diin gin-alila sia; kag nagsulud sia, sono sa iya kinabatasan, sa sinagoga sa adlaw nga inugpahuway. Kag nagtindug sia sa pagbasa; 17kag ginhatag sa iya ang tolon-an ni Isaias nga manalagna. Ginbukad niya ang tolon-an kag nakita niya ang bahin diin nasulat,

18“Ang Espiritu sang Ginoo yari sa akon,

bangud nga ginhaplas niya ako sa pagwali sang maayong balita sa mga imol.

Ginpadala niya ako sa pagbantala sing pagbuhi sa mga bihag

kag pagpasag-uli sang itololok sa mga bulag,

sa paghilway sang mga ginpigus,

19sa pagbantala sang tuig nga nahamut-an sang Ginoo.”#Isa. 61:1-2.

20Kag ginlukot niya ang tolon-an, kag gin-uli ini sa manugbulig, kag naglingkod; kag ang mga mata sang tanan sa sinagoga nag-ungut sa iya. 21Kag nagsugud sia sa pagsiling sa ila, “Karon natuman ining kasulatan sa inyo mga idulungug.” 22Kag ang tanan nagpamatuud sa iya, kag natingala sang mga polong sang bugay nga naggowa sa iya baba; kag nagsiling sila, “Indi bala ini ang anak ni Jose?” 23Kag nagsabat sia sa ila, “Sa walay duhaduha magasiling kamo sa akon sining hulubaton, ‘Manugbulong, ayoha ang imo kaugalingon; ang bisan ano nga amon nabatian nga nahimo sa Capernaum, buhata man diri sa imo kaugalingon nga duta.’” 24Kag nagsiling sia, “Sa pagkamatuud, nagasiling ako sa inyo, walay manalagna nga mahamut-an sa iya kaugalingon nga duta.#Juan 4:44. 25Apang matuud gid nagasiling ako sa inyo, may madamung babaying balo sa Israel sa mga adlaw ni Elias, sang gintakpan ang langit sa tatlo ka tuig kag anum ka bulan, sang nag-abut ang dakung tiggulutum sa bug-os nga duta;#1 Hari 17:1. 26kag si Elias wala pag-ipadala sa bisan kay sin-o sa ila kondi sa babaying balo sa Sarepta, sa duta sang Sidon.#1 Hari 17:8-16. 27Kag may mga aroon sa Israel sa tion ni Eliseo nga manalagna; kag wala gid sa ila sing gin-ayo, kondi lamang si Naaman nga Sirianhon.#2 Hari 5:1-14.” 28Sila tanan sa sinagoga puno sing kasingkal, sang pagkabati nila sining mga butang. 29Kag nagtindug sila kag ginsobol nila si Jesus gikan sa banwa, kag gindala sia sa bibi sang matindugon nga bakolod diin natukud ang ila banwa, sa pagbulhog sa iya. 30Apang nag-agi sia sa tunga nila kag naglakat.

Ang Tawo nga May Espiritung Dimatinlo

(Mar. 1:21-28)

31Kag nag-abut sia sa Capernaum, nga banwa sang Galilea. Kag nagpanudlo sia sa ila sa adlaw nga inugpahuway; 32kag naorongan sila sa iya pagtolon-an, kay ang iya polong may pagbulut-an.#Mat. 7:28-29. 33Kag sa sinagoga may tawo nga may espiritu sang yawa nga dimatinlo; kag nagsinggit sia sa mabaskug nga tingug, 34“Ah! ano bala ang labut mo sa amon, Jesus nga Nazaretnon? Nagkari ka bala sa paglaglag sa amon? Nakahibalo ako kon sin-o ikaw, ang Balaan sang Dios.” 35Apang si Jesus nagsabdong sa iya, nga nagasiling, “Hipus ka, kag gowa sa iya!” Kag sang gindusmo sia sang yawa sa tunga nila, naggowa sia sa iya, nga wala sing samad nga nahimo sa iya. 36Kag ang pagka-orong nag-abut sa tanan kag naghinambalanay sila, “Ano bala ining polong? Kay sa may pagbulut-an kag gahum nagasogo sia sa mga espiritu nga dimatinlo, kag nagagowa sila.” 37Kag ang mga sugid nahanungud kay Jesus naglapnag sa tagsa ka duug sang ginsakpan sa palibut.

Si Jesus Nagaayo sang Babaying Ugangan ni Pedro

(Mat. 8:14-15; Mar. 1:29-31)

38Karon nagtindug sia gikan sa sinagoga, kag nagsulud sa balay ni Simon. Kag ang babayi nga ugangan ni Simon nag-antus sing mabaskug nga hilanat, kag nagpakilooy sila kay Jesus nahanungud sa iya. 39Kag nagtindug sia sa tupad sang babayi kag nagsabdong sang hilanat, kag nagbiya ini sa iya; kag sa gilayon nagbangon sia kag nag-alagad sa ila.

Madamu ang Ginaayo sa Kahaponon

(Mat. 8:16-17; Mar. 1:32-34)

40Karon sang nagahinunud ang adlaw, ang tanan nga may mga masakiton sa sarisari nga balatian nagdala sini sa iya; kag nagtakdung sia sang iya mga kamut sa tagsatagsa sa ila kag gin-ayo sila. 41Kag ang mga yawa man naggowa sa madamu, nga nagasinggit, “Ikaw ang Anak sang Dios!” Apang ginsabdong niya sila, kag wala niya sila pagtuguti sa paghambal, bangud nga nakakilala sila nga sia ang Cristo.

Si Jesus Nagataliwan sa Panlakatan sa Pagwali

(Mar. 1:35-39)

42Kag sang adlaw na naggowa sia kag nagkadto sa duug nga baw-ing. Kag ang mga kadam-an nagpangita sa iya kag nag-abut sa iya, kag gintinguhaan nila sia sa paghawid agud nga indi sia maghalin sa ila; 43apang nagsiling sia sa ila, “Kinahanglan ako magwali sang maayong balita sang ginharian sang Dios sa iban nga mga banwa man; kay sa sining katuyoan ginpadala ako.” 44Kag nagpangwali sia sa mga sinagoga sang Galilea.

Attualmente Selezionati:

LUCAS 4: ABHIL82

Evidenziazioni

Copia