LUCAS 12

Paandam batok sa Pagkasalimpapaw

1Sa amo nga tion, sang nagtipon ang linibo sang kadam-an sa bagay nga nagatinapakay sila, nagsugud sia sa pagsiling sing una sa iya mga gintoton-an, “Andam kamo sang tapay sang mga Fariseo,#Mat. 16:6; Mar. 8:15. nga amo ang pagkasalimpapaw. 2Walay bisan ano nga natabunan nga indi magdayag, ukon natago nga indi mahibaloan.#Mar. 4:22; Luc. 8:17. 3Ang bisan ano nga nasiling ninyo sa kadudulman mabatian sa kapawa, kag ang nahambal ninyo sing hutik sa natakpan nga mga hulut ibantala sa mga atop sang balay.

Sin-o ang Kahadlukan

(Mat. 10:26-33)

4“Nagasiling ako sa inyo, mga abyan ko, dili kamo mahadluk sa mga nagapatay sang lawas, kag sa tapus sina wala na sila sing sarang mahimo. 5Apang nagapa-andam ako sa inyo kon sin-o ang kahadlukan ninyo: kahadluki sia nga, sa tapus makapatay, may gahum sa pagpilak sa infierno; hoo, nagasiling ako sa inyo, kahadluki ninyo sia! 6Wala bala ginabaligya ang lima ka magamay nga pispis sing duha ka diotay? Kag walay isa sa ila nga malipatan sa atubangan sang Dios. 7Apang, bisan pa ang mga bohok sa inyo olo naisipan tanan. Dili kamo mahadluk; mahal pa kamo sa madamung magamay nga pispis.

Ang Pagtu-ad kay Cristo sa atubangan sang mga Tawo

8“Kag nagasiling ako sa inyo, ang tagsatagsa nga magtu-ad sa akon sa atubangan sang mga tawo, itu-ad man sia sang Anak sang tawo sa atubangan sang mga manugtunda sang Dios; 9apang ang nagapanghiwala sa akon sa atubangan sang mga tawo ipanghiwala sa atubangan sang mga manugtunda sang Dios. 10Kag ang tagsatagsa nga magahambal sing isa ka polong batok sa Anak sang tawo patawaron ini sa iya; apang ang nagapasipala batok sa Espiritu Santo indi ini pagpatawaron.#Mat. 12:32; Mar. 3:29. 11Kag kon dalhon kamo nila sa atubangan sang mga sinagoga kag sang mga punoan kag sang mga pagbulut-an, dili kamo maghimud-os kon paano ukon ano ang inyo isabat ukon ano ang inyo isiling; 12kay ang Espiritu Santo magatudlo sa inyo sa sina gid nga takna kon ano ang dapat ninyo isiling.#Mat. 10:19-20; Mar. 13:11; Luc. 21:14-15.”

Ang Paanggid nahanungud sa Manggaranon nga Buangbuang

13Ang isa sang kadam-an nagsiling sa iya, “Manunudlo, sogoa ang akon utud nga lalaki nga bahinon namon ang palanublion.” 14Apang nagsiling sia sa iya, “Tawo, sin-o bala ang naghimo sa akon nga hukom ukon manugbahin sa inyo?” 15Kag nagsiling sia sa ila, “Andam kamo, kag maglikaw sa tanan nga pagkamahamkonon; kay ang kabuhi sang tawo indi sa kabuganaan sang mga butang nga naangkon niya.” 16Kag nagpamolong sia sing paanggid sa ila, nga nagasiling, “Ang palangumhan sang tawo nga manggaranon nagpatubas sing madamu gid; 17kag nagpainoino sia sa iya kaugalingon, ‘Ano bala ang himoon ko, kay wala ako sing tiponan sang akon patubas?’ 18Kag nagsiling sia, ‘Amo ini ang buhaton ko: gub-on ko ang akon mga tambobo, kag magpatindug sing dalagku pa; kag dira tiponon ko ang bug-os ko nga patubas kag ang akon pagkabutang. 19Kag magasiling ako sa akon kalag, Kalag, may madamu ka nga pagkabutang nga natigana sa madamung tuig; magpatawhay ka, magkaon, mag-inum, magkasadya.’ 20Apang ang Dios nagsiling sa iya, ‘Buangbuang! Karon nga gab-i ginakinahanglan sa imo ang imo kalag; kag ang mga butang nga imo naaman, sin-o bala ang magatag-iya sa ila?’ 21Amo man sia nga nagatigana sing bahandi sa iya kaugalingon, kag indi manggaranon sa Dios.”

Ang Paghimud-os

(Mat. 6:25-34)

22Kag nagsiling sia sa iya mga gintoton-an, “Busa nagasiling ako sa inyo, dili kamo maghimud-os nahanungud sa inyo kabuhi, kon ano ang inyo kaonon, ukon nahanungud sa inyo lawas pa, kon ano ang inyo ipanaput. 23Kay ang kabuhi labi sa kalan-on, kag ang lawas sa panapton. 24Talupangda ang mga uwak: wala sila nagasab-ug ukon nagaani, sila walay damisag ukon tambobo, apang ang Dios nagapakaon sa ila. Daw ano kamo kamahal pa sa mga pispis! 25Kag sin-o bala sa inyo nga tungud sang paghimud-os makadugang sing isa ka maniko sa iya kataason?#12:25 Ukon kalawigon sang kabuhi. 26Niyan kon indi kamo makasarang maghimo bisan sang labing diotay, ngaa bala nagahimud-os kamo nahanungud sa iban? 27Talupangda ang mga lirio, kon daw ano ang pagtubo nila; wala sila nagapangabudlay ukon nagapamorong; apang nagasiling ako sa inyo, bisan si Salomon sa bug-os niyang himaya#1 Hari 10:4-7; 2 Cron. 9:3-6. wala makapanaput subong sang isa sini sa ila. 28Apang kon ang hilamon sa latagon nga karon ara kag buwas idap-ung sa dapog ginapanaptan sang Dios sing subong, daw ano pa bala nga panaptan niya kamo, O kamo nga diotay sing pagtoo? 29Kag dili kamo magtinguha kon ano ang inyo kaonon kag kon ano ang inyo imnon, ukon magmahimud-oson sing hunahuna. 30Kay ang tanan nga kapungsuran sang kalibutan nagatinguha sini tanan nga butang; apang ang inyo Amay nakahibalo nga kamo may kinahanglan sining mga butang. 31Sa baylo, tinguhaa ninyo ang iya ginharian, kag ining mga butang idugang sa inyo.

Bahandi sa Langit

(Mat. 6:19-21)

32“Dili mahadluk, diotay nga panong, kay nahamut-an sang inyo Amay ang paghatag sa inyo sang ginharian. 33Magbaligya sang inyo pagkabutang, kag magpanglimos; maghimo nga sa inyo sing mga puyo nga wala pagdaan, nga may mga bahandi sa mga langit nga indi mahubsan, diin walay makawat nga nagapalapit ukon sipit nga nagalaglag. 34Kay kon diin ang inyo bahandi, didto man ang inyo tagiposoon.

Mabinantayon kag Matutum nga mga Sologoon

35“Wagkusi ang inyo mga hawak kag padabdaba ang inyo mga suga,#Mat. 25:1-13. 36kag magpakaangay kamo sa mga tawo nga nagahulat sa ila agalon#Mar. 13:34-36. kon magbalik sia gikan sa sinalosalo sang kasal, agud nga kon mag-abut sia kag magpanoktok makabukas sila sa iya sa gilayon. 37Bulahan yadtong mga ulipon nga kon mag-abut ang agalon makita sila nga nagapulaw; sa pagkamatuud, nagasiling ako sa inyo, nga magailis sia kag magapalingkod sa ila sa pagkaon, kag magapalapit kag maga-alagad sa ila. 38Kon mag-abut sia sa ikaduha nga bahin sang pulaw, ukon sa ikatlo, kag makita sila sing subong, bulahan yadtong mga ulipon! 39Apang kilalaha ninyo ini, nga kon ang agalon sang panimalay nakasayud sa ano nga takna magaabut ang makawat, magapulaw sia kuntani kag indi sia magtugut nga guhaban ang iya balay. 40Maghanda man kamo; kay sa takna nga wala ninyo ginahunahuna magakari ang Anak sang tawo.#Mat. 24:43-44.”

Ang Sologoon nga Wala Makaaman

(Mat. 24:45-51)

41Si Pedro nagsiling, “Ginoo, ginapamolong mo bala ining paanggid sa amon ukon sa tanan?” 42Kag ang Ginoo nagsiling, “Sin-o bala niyan ang tulugyanan nga matutum kag mainandamon, nga padumalahon sang iya agalon sa iya panimalay, sa paghatag sa ila sing pagkaon sa nagakaigo nga tion? 43Bulahan yadtong ulipon nga kon mag-abut ang iya agalon makita nga nagahimo sing subong. 44Matuud gid nagasiling ako sa inyo, nga padumalahon niya sia sa bug-os niyang pagkabutang. 45Apang kon yadtong ulipon magsiling sa iya tagiposoon, ‘Ang akon agalon nagapalantang sang iya pag-abut,’ kag magsugud sa pagpamakul sa mga ulipon nga lalaki kag babayi, kag sa pagkaon kag pag-inum kag sa paghoboghobog, 46ang agalon sadtong ulipon magaabut sa adlaw nga wala niya ginapaabuta kag sa takna nga wala niya mahibaloi, kag utdon sia, kag hatagan sang iya bahin upud sang mga dimatutum. 47Kag yadtong ulipon nga nakahibalo sang kabubut-on sang iya agalon, apang wala maghanda ukon maghimo sono sa iya kabubut-on, bunalon sing madamu. 48Apang ang wala makahibalo, kag naghimo sing mga butang nga takus sa mga lapdus, bunalon sing pila lamang. Ang bisan sin-o nga ginhatagan sing madamu, madamu ang kinahanglanon sa iya; kag ang gintugyanan nila sing madamu labi pa ang pangayoon nila sa iya.

Si Jesus Kabangdanan sang Pagpihak

(Mat. 10:34-36)

49“Nagkari ako sa pagpilak sing kalayo sa duta; kag buut ko kuntani nga magdabdab na ini! 50Apang may bautismo ako nga ibautiso sa akon;#Mar. 10:38. kag daw ano ang akon kasakit tubtub nga matuman ini! 51Nagahunahuna bala kamo nga nagkari ako sa paghatag sing paghidait sa duta? Nagasiling ako sa inyo, indi, kondi hinonoo pagbinahinbahin; 52kay kutub karon may pagbinahinbahin ang lima sa isa ka balay, ang tatlo batok sa duha kag ang duha batok sa tatlo; 53bahinbahinon sila, ang amay batok sa anak nga lalaki kag ang anak nga lalaki batok sa amay, ang iloy batok sa anak nga babayi kag ang anak nga babayi batok sa iya iloy, ang ugangan nga babayi batok sa umagad nga babayi kag ang umagad nga babayi batok sa ugangan nga babayi.#Miq. 7:6.”

Ang Pagpanimad-on sang mga Tion

(Mat. 16:1-4; Mar. 8:11-13)

54Nagsiling sia sa mga kadam-an man, “Kon makita ninyo ang gal-um nga nagatub-ok sa katundan, sa gilayon nagasiling kamo, ‘Magaulan’; kag amo ini ang nagakahanabu. 55Kag kon makita ninyo nga nagahuyup ang habagat, nagasiling kamo, ‘May masingkal nga init’; kag nagakahanabu ini. 56Mga salimpapaw! Mahibalo kamo magpanimad-on sang dagway sang duta kag langit; apang paano bala nga indi kamo makahibalo magpanimad-on sining tion?

Maghusayay upud sa Imo Manunumbong

(Mat. 5:25-26)

57“Kag ngaa bala wala kamo sa inyo kaugalingon nagahukom kon ano ang matarung? 58Kay sang nagakadto kaupud sang imo kasumpung sa atubangan sang hukom, sa dalanon himulati nga mahilway ka sa iya, basi kon sagnoyon ka niya sa hukom, kag ang hukom magatugyan sa imo sa manugdumala, kag isulud ka sang manugdumala sa bilanggoan. 59Nagasiling ako sa imo, indi ka makagowa didto tubtub nga imo mabayaran ang katapusan nga lepta.#12:59 Isa ka lepta, kubus sa isa ka ikap-at sang isa ka centimos.”

Attualmente Selezionati:

LUCAS 12: ABHIL82

Evidenziazioni

Copia