MATIU 2
2
Ira mataisao huri na visiu dena vui matainaho ram siro Jisas
1Jisas u vora beno a Betlehem lolo loloi venue ta Judia lo tarogi hi i Herot mo ratahigi. Siu ira mataisao huri na visiu dena vui matainaho ram vonai Jerusalem, 2ram hui vena, “?A maresu ngehilogo hi mo bei vora ve vin ratahigi gorora ta Judia? Huri gamai gau lehi na nona visiu lo vui matainaho, ko gam vonai ve gan huduhudu goroe.”
3Lune i Herot a ratahigi mo rongo huri na gineu ngaha, ingeie mo ladoasi, ko meire sinobu doluegi a Jerusalem. 4Ko ingeie mo ware bubugi nire muei rugurugu ko ira huhui talo Leo Hora noi Mosis vonai lobena, mo huire vena, “?I Kraes vin vora logo?”
5Ingere ram duvi lawea vena, “A Betlehem lolo loloi venue Judia; huri a tangaloi ligoligogi u reve mwerehi vena:
6Ko iniko, Betlehem, lolo loloi venue ta Juda,
go he biti tea den ira lawua goro ta Juda;
huri a tangaloi lawua goro vin vonai denigo,
vin tomuegi Israel, a noku sinobu.
7Siu i Herot mo ware hiliginire mataisao vano lobena, ko mo huire ve na ilo na taro vovohoi hi rau lehi na visiu gitomuegi. 8Ko ingeie mo horara vano a Betlehem, mo veve vena: “Nen vano, nen hike vurugegi huri na maresu, ko lune nein haqea, nein vonai taligu nein veve sere laweau, huri ve ineu vage nain vano ve nan huduhudu goroe.”
9Ngere rau rongo na ratahigi hi beno, siu ram siregi ram vano. Ko a visiu hi rau lehe lo vui matainaho mo tomue ginire mo dadari mo labe lo ului ute hi a maresu mo eno aie. 10Ko ram lehi na visiu, ram havuhevu u liu huri.
11Ngere ram ahu vano lolo vale, ram lehi na maresu mei Meri retahine. Ram taigi hivo, ram hudugoroe, ko ram waga na nora matai gineu, ram bete hogogi lawea, a kol ko a gai buhoru ko a mir. 12Nge i God mo surire lo boborea ve ran mese vano taligu lobei Herot; siu ingere ram mule taligu lo vanuara lo matahala wagineu.
I Josev mo lai na maresu vano lo vanue Ijib
13Lo tagugi hi ira mataisao ingere rau mule taligu beno, a engsel nona Huqe mo serelue lawe Josev lo boborea, mo veve vena: “Maraga, gon lai na maresu mei retahine, nen toa nen vano lo vanue Ijib, ko nen toga aie vin dadari nain veve lawego. Huri Herot vin hikesi na maresu huri ve vin ue vagamatea.”
14Siu i Josev mo maraga, mo lai na maresu mei retahine lolo bongi, ko ingere ram toa ram vano a Ijib, 15ko ram toga aie hi mo dadari Herot mo mate. Mo vai mwere ngaha huri ve vin vagahorongi na leo nona Huqe nge u vevea gina singoi tangaloi ligoligogi vena, “Nam warelue Netuku vonai den Ijib.”
I Herot mo ue vagamatera maresu wuwerigi
16Lune i Herot mo iloe ve ira mataisao huri na visiu rau sinae, a lolona mo gagasi u liu, ko mo hora na leo ve rain ue vagamatera maresu mwera doluegi a Betlehem ko dali na ute aiehi, a higaora gairue beno meire hi vage rau vora atagu, huri na tarogi hi ingeie u huire mataisao huri na visiu.
17Mwerehi mo vagahorongi na leo noi Jeremaea a tangaloi ligoligogi vena:
18“Mo rongo na dilogi a Rama,
a ngaraana ko a tangiana lawua.
I Resel mo tangihi renetune
ko he tarani tea ve ihine vin vei mesuri ginie,
a vevenagi huri renetune rau mate.”
Ngere ram mule taligu den Ijib
19Lune i Herot u mate beno, a engsel nona Huqe mo serelue lawe i Josev lolo boborea lune ingeie a Ijib, 20mo veve vena: “Maraga, gon lai na maresu mei retahine, gon mule taligu lo vanue Israel, huri ngerehi rau vei leo ve rain ue vagamate na maresu rau mate beno.”
21Ko i Josev mo maraga, mo lai na maresu mei retahine, ko ram mule taligu lo vanue Israel. 22Nge i Josev mo rongo huri ve i Akaleas mo ratahigi Judia sesei tamana i Herot, nge mo matagu ve vin toga aiehi. Nge i God mo surie lo boborea, ko nge mo vano tuturedu lo vanue Kalili, 23ko lune nge mo dadari aiehi, nge mo toga lo togagi venue u waregi Nasaret. Mo vai mwere ngaha huri ve vin vagahorongi na leo gina singora tangaloi ligoligogi vena, “Rain warea ve ingeie ta Nasaret.”
Attualmente Selezionati:
MATIU 2: HNT
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Bible Society of the South Pacific, 2013
