MARK 8
8
Jisu in Mii Akpul Manlita Amsaak
(Met 15:32–39)
1 #
Met 15:32–39; Mak 6:32–44; Met 14:13–21; Luk 9:11–17; Jon 6:5–13 Nikkhat nia, miitam in veikhat anboom laia, anmah in ansaaktu jakhatkho amnohsa, amah in aroita akuunga onga asonei, 2“Keiin miitamta kirilvol hangsei, alamva anmah in keisoh inruuia an amna ipek nithum aphahpei, che jakhatkho ansaaktu amnohsa; 3che keiin anmahta traamma an inna mathlah sangeile, lamma dem asaaktuei; anmah in ram klahnata thlengsei.” 4Che aroi in amisang, “Khatloh a mii vachah tam ita tunang in mah chaarram in tol amsaakchek tueime?” 5Che amah in ankuunga aruiei, “Tol jikcha injaochoume?” Anmah in amisang, “Sirih.” 6Che amah in miitamta meiphul chunga maboknatu jathang amlanpei; che tol sirihta alohche ampaak, mahchuhta khoia semnatu aroita amlanei, che anseempei. 7Che anmah in nga indih ste injaoei; che doi amlanpei, mahchukho ansemnatu jathang amlanei. 8Anmah in ansaakche invahsei, che anlei invuivi amichun in, luktoong sirih sip a inleisa. 9Mahchu mii akpul manlivak ei. 10Cheva anmahta amthlahpei ei; che kak hanga amah in muli achuungche aroieiso inruuia Dalmanutha ramsiinna sehsei.
Salungkhouna Thlou Rella Pharisi in Anrui
(Met 12:38–42; 16:1–4)
11 #
Met 16:1–4; 12:38–39; Luk 11:29 Pharisi in thlenga amahsoh trong inkher amithronpei, amahta chaang anna veia, ringramna daangkhat amahkuunga anjon. 12#Met 12:39; Luk 11:29Che amah in aril lah a ason, “Jarelna mah ringnatluun in daang anjonme? Atak a nankuunga keiin kisonchou, mah ringnatluunta daang malannohtung.” 13#Met 16:4–12Cheva anmahta amahpeiei, mahche veikhat mulia akalche aktleitonga sehsa.
Pharisi Leh Herot Anchol
(Met 16:5–12)
14Ipekva anmah in tol theihlou a maruuinohsei; mulisuunga tol khalekta ansih ningsa. 15#Luk 12:1; Mak 6:14; 12:13Chunna ansoi amnohnatu ankuunga, asonei. “Pharisi leh Herot vaa anchol kharelna cheksilve.” 16Mahchurella anmah in khatleh khat intella insonsei, “Inih in tol amnohsa.” 17#Mak 6:52; Met 13:10–15Che mahchuta arompeia, Jisu in ankuunga asonei, “Tol amnohsata akchimrel jarella intelchoume? Pekphah romnoh mangchoume nohle lou theihnoh mangchoume? Nanrilkha trangsme? 18Nanmit amrerea muhnoh sachou che namikuur amrerea rungainoh sachoume? 19#Mak 6:41–44Keiin tol rangata khoia mii akpul rangata kamsaakchou, luktoong jikcha sip a anvuivi namitlonme?” Anmah in anson, “Somleinih.” 20#Mak 8:1–10Che tol sirih in mii akpul manlia, nannih in luktoong jikcha sip a anvuivi nanchunme? Anmah in akuunga anson, “Sirih.” 21Che asonei, “Nannih in lou theihnoh mangchoume?”
Bethsaida a Jisu in Mitchokhat Amthrat
22 #
Mak 10:46–52; Jon 9:1–7 #
Mak 6:45; Luk 9:10 Mahche anmah in Bethsaida a thlengsei, che amahkuunga mitchokhat mii ste in anthlen, chunna amahta apalnatu akuunga anngen. 23#Mak 7:33; 5:23Amah in mitchota akut a kaia, khuu apaalla anthruhpi, che amah in amit a amchilche achunga akut sih a amahkuunga arui, “Nangin jangta nimuhme?” 24Che amah in intoua anche ason, “Keiin mii kimuh; chuta anmahva thing inloinangei.” 25Che veikhatla amitchunga akut asihche amah in incheknoh a a an invah thrakhemsa, che anaamte seenga amuhpei. 26Che amahta a inna amthlahpei, akuunga ason, “Nangin khuusuunga luutnohro.”
Pitar in Jisu Relna Amdangna
(Met 16:13–20; Luk 9:18–21)
27 #
Met 16:13–20; Luk 9:18–21; Jon 6:66–69 Che Jisu in aroisoh inruuia Keisaria Philippi khuua sehsei; che lamma amah in aroita aruiei, “Mii in keita tume kantih angme?” 28#Mak 6:14,15; Luk 9:7,8Che anmah in akuunga anson, “Aklup John; che aktlei in Elaijah; mahche aktleila in ringraan ankaarna inkhatcheta nansonei.” 29#Jon 6:68,69Che amah in ankuunga aruiei, “Chuta nannih inva keita tume nantih angme?” Pitar in amsang, “Nangva Khrista che.” 30#Mak 9:9; 1:34Cheva amahrella tukhat kuungakho son janoh tuta tranga asonei.
Jisu in Klah knang Aphahsam Khatkho Athihnasam Relna Trong
(Met 16:21–28; Luk 9:22–27)
31 #
Met 16:21–28; Luk 9:22–27 Che miivaa Asa kupa in khalmo klah kanang aphahtuta ankuunga matheih amthronpei, mahche anparuul ei in, akthloi thiimpu ei in, che ringjih lulok ei in, amahta janohtuei chuche amahta anthattu, che nithum aknua veikhat ringlatu. 32Mah i seenga ason, chunna Pitar in amahta athleia phurh a saal amthron. 33#Met 4:10Chuta aroita inheia a aneiche, amah in Pitar ta saalla ason, “Kei kiknunga inmahro, Seitan! Alamva nangva Ringpu tongnanohche, chuta mii tongnache.”
34 #
Met 10:38; Luk 14:27 Che mii tamsoh inruuia aroieita amahkuunga aongei, che asonei, “Tunangkhat in kei kiknu keijuihtang tihleva, atak akroua indahsoh che atak thingkharhta louso che keijuihso. 35#Met 10:39; Luk 17:33; Jon 12:25Alamva tukhat in amah chaanta ankaljale maangtu; che tukhat in amah chaanta kei turella che akthra trong rella maangle inkaltu. 36Alamva mii khat in tukleiram anaamte changslakho amah chaanta maangleva achuungnatu jangamme? 37Alamva mii khat in amah achaan ngut a inlenga jangpootta apekchek ume? 38#Met 10:33; Luk 12:9Alamva tukhat in kei mahche kei kitrong rella miimei miisa laal khatkho alehsip ringnatluun inna injakleva amah in Apaso inruuia akseeng ringroi eisoh paarthra aveilaia, amah in miivaa Asa kupa kuungakho injak aphahtu.”
Attualmente Selezionati:
MARK 8: TARAOBSI
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Tarao New Testament - Akthar Trongirhna
Copyright © 2017 by The Bible Society of India
Used by permission. All rights reserved worldwide.
