MATHAIIN 1
1
Puma Isua Krista Akhuk
(Lk 3.23-38)
1Isua Krista akhuk Ama hi David a sapa, Abraham a sapa. 2Abraham a sapa Isak, Isak a sapa Jakob, Jakob a sapa Juda le a parual ngai. 3Juda a sapa Peres le Zera Tamor a vona; Peres a sapa Hezron, Hezron a sapa Ram. 4Ram a sapa Aminadab, Aminadab a sapa Nashon, Nashon a sapa Salmon. 5Salmon a sapa Boaz Rahabi a vona, Boaz a sapa Obed Ruth a vona. Obed a sapa Jesai. 6Jisai a sapa David, Reng David a sapa Solomon arong, Uria nungak vona; 7Solomon a sapa Rehobom Rehobom a sapa Abija, Abija a sapa Asa. 8Asa a sapa Jehosaphet, Jehosaphet a sapa Joram, Joram a sapa Ujia. 9Ujia a sapa Jotham, Jotham a sapa Ahaj, Ahaj a sapa Hejekia. 10Hejekia a sapa Manase, Manase a sapa Ammon, Ammon a sapa Josia, 11Josia a sapa Jekonia le a parual ngai.Babulon rama selkeia a om u laia nai. #2 Rng 24.14-15; 2 Kr 36.10; Jer 27.20
12Babulon selkei ata a honga kir sua u le Jekonia a sapa Shealtiel, Shealtiel a sapa Zerubabel. 13Zerubabel a sapa Abihu, Abihu a sapa Eliakim, Eliakim a sapa Azor. 14Azor a sapa Zadok, Zadok a sapa Akhim. Akhim a sapa Elihud. 15Elihud a sapa Eliazar, Eliazar a sapa Matthan, Matthan a sapa Jakob. 16Jakob a sapa Joseph, ama hi Mari ruathar Mari vona Isua anzir Krista ha.
17Hantin han Abraham ata David tena khuk somleimanli David ata Babulon rama selkeia anruai tena khuk somleimanli hatuka Babulon selkei ata Krista tena khuk somleimanli.
Puma Isuan Zirna
(Lk 2.1-7)
18Hintin hin Isua Krista ei anzir, a nu Mari Joseph le anom rang chongtin anei le anlop u man Ratha Anthiang ata anrai ei ni ti ariata. #Lk 1.27 19A ruathar Joseph ei anzik sika ama ha mi ngai kom maimoka ei sin zot nok sika maruka amak rang ansin. 20Aman hava ngai a mandon lai tak enro Puma vanpalai khat ama a ramanga a hong rila, “Joseph David anai, na nungak Mari a lak ranga achi no ro a vona anpiang so Ratha Anthiang ata keng hatuka naipasal mazir inti. 21Nangin ama raming ISUA phuan na ti asik chu aman a mi ngai a pap u ata mazok inti.” #Lk 1.31
22Hiva ngai hi Deari ngaiin ei ril Puma chong ei kipna rang. 23“Enro, ha nungak anthiang anraiin Naipasal mazir inti hatuka a raming Immanuel anphua inti” na malet ten hava omzia “Koini bila Pathian.” #Isa 7.14
24Hatuka Joseph ei in ata insang alaka Puma vanpalaiin ei ril anga atho. 25A nungak ha a laka naipasal a mazir man kar pei chu Josephin zal pui mak hatuka aman naipasal raming ha ISUA a phua. #Lk 2.21
Attualmente Selezionati:
MATHAIIN 1: RANGBSI
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Ranglong NT with PSA - Dankit Athar Le SAM
Copyright © 2017 by The Bible Society of India
Used by permission. All rights reserved worldwide.
