Lk 21

Vidvechem Dan

(Mk 12:41-44)

1Dhormpettent aplem dan-dennem ghaltalim team astik mon’xank Jezun chotraien pollelim; 2ani konn-eklê gorib-dolldirê vidvek-ui don lepton#21:2 Lepton: ekdom’ unnea molacho, sumar 3 gramancho, êk supurlo tambeacho nanno. ghaltana Tannem dekhli 3ani mhonn’lem: “Hanv tumkam khorench sangtam, hê gorib vidven soglleam poros odik ghalem; 4tôr hãnnim somestamnim apnnank ogllem aslem tantlem kaddun Devak somorpil’leam danam modem ghalem, punn hinnem apnnak unnem aslem tantlem, aplea jevnna-khannak nibel zai aslem tem-i ghalem.”

Jezu Devmondirachea Nisonttona vixim Uloita

(Mt 24:1-2; Mk 13:1-2)

5Devmondirachi gozal korun, tem kai-boream fatramnim ani Devak bhettoileam danamnim nettoilam, oxem mhonnteleank Jezun sanglem: 6“Tumi jem polletat, tacho fatrar fatôr ubo urcho na tosle dis ietele, tem samkem moddun uddoitele.”

Koxtt ani Dhumalle

(Mt 24:3-14; Mk 13:3-13)

7Tãnnim Tachê lagim vicharlem: “Guruji, hem kedna ghòddtelem ani heam ghòddnneancho vêll lagim pavla mhonn ollkhunk kosli khunna zateli?”

8Tannem mhonn’lem: “Tumkam konnem fottoina zaunk chotraien ravat; tôr zaite zann Mhojea nanvan ieun ‘Hanvuch to’ ani ‘kall lagim pavlo’, oxem mhonntele; tumi tanchê pattlean vochonakat. 9Tumi zhuzanchi ani bonddanchi khobor aikoxeat tedna, akantonakat; hem poilem ghoddonkuch zai khorem, punn xevôtt rokddoch ieuncho na.” 10Magir Tannem tankam sanglem: “Raxttracher raxttr ani rajeacher raj uprastelem; 11hanga-thõi vhoddleô bhikampi zateleô, hanga-thõi dukôll poddtolo, ani voxeachi pidda posorteli; ontrallar bhirankull ghòddnneô ani vhoddleô khunna dixtti poddteleô. 12Punn hem sogllem zaunchê adim, Mhojea nanva khatir tumchea angar hat ghaltelim, tumkam devsthananchê adhin korun, bondkhonnint ghalun, razam ani razpalanchea fuddeant oddun vhorun, tumkam dhumallo ditelim. 13Mhojê vixim govai diunk ho tumkam soêg melltolo. 14Mhonntôch tumchi rakhônn koxi korchi ti adim-fuddench tumi chintchem nhoi mhonn ghott monan dhôrat. 15Tôr Hanv tumkam oxi jib ani zannvai ditolom, ki ti addaunk ani ticher portem ulounk tumcheam soglleam dusmanam kodde ghòddchem na. 16Tumcho avoibapui, bhavbhoinn, soirim-dhairim, ixtt-mitr tumkam dhorun ditelim ani tumchê bhitorleam kãi zannank jivexim martelim; 17ani Mhojea nanva pasot sogllim tumcho dvês kortelim; 18punn tumchea matheachea eka kensacho legun nas zauncho na. 19Thir ravat, ani Dev tumkam vattaitolo.

Jezu Jeruzaleachea Nisonttona vixim Uloita

(Mt 24:15-21; Mk 13:14-19)

20Jeruzaleak foujen veddho ghal’lo tumi polletelet tedna tachem ghorttann pavlem mhonn somzat. 21Tedna Judeiant asat tãnnim dongrancher pollun vechem ani Xarant asat tãnnim bhair sorun vechem, ani kheddeam-ganvamnim asat tãnnim Xara bhitôr vechem nhoi; 22tôr sudd ghevpache dis he ani boroil’lem asa tem sogllem atam pallon ietelem. 23Te dis ietôch gorbest bailanchem ani ballkank dud diteleanchem kotta! Desacher bhoinkor attevitte ietele ani hê pinddkecher krodhachi xirôntt poddteli 24ani, videxeancho kall bhoro-sôr, tim torvarin moron poddtelim ani tankam koidi korun soglleam raxttram modem tanchi duspôtt zateli ani videxi Jeruzaleak pãiam tolla mostitele.

Mon’xachea Putachem Iennem

(Mt 24:29-31; Mk 13:24-27)

25Suriacher, chondrimacher ani noketrancher khunna zateleô. Somdir gorozta to aikun ani lharam uchamboll zaleant tim polleun, sonvsarar raxttram sarkinch ghabortelim ani tollmolltelim. 26Prithumecher ieunchem asa tachea huskean kampun mon’xancho jiv vetolo virghun, tôr ontrallacheô xokti kolkolteleô. 27Tedna Mon’xacho Put podven ani vhoddlê mhoimen eka kupa modem ietana tim dekhtelim. 28Hem ghoddonk suru zata tedna ghott ravat ani tumcheô tokleô uklun dhôrat, kiteak tumchi soddvonn lagim pavlea.”

Anjirachea Zhaddachi Xikovnn

(Mt 24:32-35; Mk 13:28-31)

29Ani Tannem êk vopar sangli: “Anjirachea zhaddak ani heram soglleam zhaddank polleiat. 30Tankam kombreo futt’tat tedna gim’ lagim pavla mhonn tumkam kollon ieta; 31toxench heô soglleô vostu ghòddleleô tumi polletôch, Devachem Raj lagim pavlam mhonn zanno zaiat. 32Hanv tumkam khorench sangtam: hem sogllem ghòddlea bogor hi pinddka ontorchi na. 33Ontrall ani prithum’ sortelim, punn Mhojim utram sorchim nant.

Zagrut Ravchi Goroz

34Tumi tumchi chotrai dhôrat; na tôr, kamcharak lobhdon, bebdikai korun, ani hea jivitache huske kaddun, tumchim kallzam zodd zatit ani to Dis tumcher okosmat pavot. 35Akhê prithumer asleleam soglleam mon’xancher fas koso to ietolo. 36Ieuncheô asat team ghòddnneam modlean surokxitponnim fuddem vochunk ani Mon’xachea Puta mukhar bhiranti vinnem ubim ravunk tumkam ghottai mellchê khatir, sogllea vellar magnnem korun zagrut ravat.”

37Heam disamnim Jezu dis-bhôr Devmondirant xikovnn diit aslo, punn rati kaddtalo xara bhair, Olivet mhonnlelea Dongrar. 38Tachem utor aikunchê axen fantearuch utthun sogllo lôk Tachê-xim Devmondirant ietalo.

Attualmente Selezionati:

Lk 21: KONKABSI

Evidenziazioni

Copia