Gen. 3

Kushaisha kwoMunhu

1Zvino nyoka yaiya nourimbwi kupinda zvikara zvimweni zvomushango zvaakaita Mambo Mwari. Nayo yakati kunomukadzi, “Ngegwinyiso Mwari wakaronza here kuti musazodya kumuti nokuti ngouri womumunda?” 2Nomukadzi wakati kunenyoka, “Tingadya kumichero yemiti yomumunda. 3Asi Mwari wakati ‘Muchero womuti uwo uri pakati pomunda amuzoudyi, zve, amuzoubati, kuti musazofa.’ ” 4Asi nyoka yakati kunomukadzi, “Ngegwinyiso amuzofi. 5Ngokuti Mwari unozia kuti apo pomunozoudya, madziso enyu anozopembenudzwa, nemwi munozodai ndiMwari, mwechizia zvakanaka nezvakashata.” 6Ndizvo apo mukadzi aona kuti muti wakanaka kudyiwa nokuti waidakadza madziso, nokuti muti waiya wechidikanwa kuti munhu angwadzwe, wakatora muchero wawo wakaudya; akapawo umweni kumwamuna wake, waiya naye, nayewo wakadya. 7Naapo madziso avo veshe akapembenudzwa, vakazia kuti vaiya mititinini; vakasonera mashakani omuonde pamwepo, vakadziitira zvokusimira.

8Navo vakazwa Mambo Mwari echihamba mumunda ngomukuwo wokupipirira kwezuva. Munhu nomukadzi wake vakahwara pakati pemiti yomumunda, kubva mukuapo kwaMambo Mwari. 9Asi Mambo Mwari wakadaidza munhu, akati kwaari, “Uri pari?” 10Naye wakati, “Ndazwa izwi rako ndiri mumunda, neni ndatya, ngokuti ndaiya ndiri mutitinini; neni ndahwara.” 11Naye wakati, “Ndiani wakuronzera kuti waiya uri mutitinini? Wadya here muti wendakakupanga ndiwo kuti, usazodya?” 12Nomunhu wakati, “Mukadzi wowakandipa kuti agare neni ndiye wandipa muchero womuti, neni ndaudya.” 13Naapo Mambo Mwari wakati kunomukadzi, “Chiinyi ichi chowaita?” Mukadzi wakati, “Nyoka yandichengedzera, neni ndaudya.”

Kuorora kwaMwari

14Mambo Mwari wakati kunenyoka,

“Ngokuti waita ichi,

unotukwa kupinda zvifuyo zveshe

nokupinda zvikara zveshe zvomushango;

unozogwezva ngendani yako,

newe unozodya bukuta mazuva eshe okupona kwako.

15Ndinozoisa ugaa pakati pako nomukadzi,

nepakati pemibarirwana yako nemibarirwana yake;

mibarirwana yake inozoremadza soro rako,

newe unozoremadza chisisinho chake.”

16Kumukadzi wakati,

“Ndinozowanza kakurutu kurwadziwa kwako

mukutora kwako mimba noukosha;

mukurwadziwa kukurutu unozobara vana;

nokudisisa kwako kunozoa kumwamuna wako,

naye unozotonga padera pako.”

17NokunaAdhamu wakati,

“Ngokuti wapurutana izwi romukadzi wako,

ukadya kumuti wendakakupanga ndechiti,

‘Usazoudya,’ ivhu ratukwa ngendaa yako;

unozodya zvinobva kweriri

ngokushanda mazuva eshe okupona kwako;

18zve, rinozokumerera minzwa nemakato;

newe unozodya miriwo yomushango.

19Ngeziya rehope yako unozodya kudya,

metsa uhwirire kumavhu;

ngokuti wakabviswa kwaari;

ngokuti uri bukuta,

newe unozohwirira kuita bukuta.”

20Munhu wakadudza zina romukadzi wake kuti Evha; ngokuti iye waiya mai waavo veshe vanopona. 21Mambo Mwari wakaitira Adhamu nomukadzi wake mabhachi ematoo, akavafukidza.

Adhamu naEvha Vanodzingwa kubva muMunda

22Naapo Mambo Mwari wakati, “Wona, munhu wadai ngoumwe wedu, mukuzia zvakanaka nezvakashata; zvino kuti asazotambanudza nyara yake, atorezve michero yomuti wokupona, adye apone mhera nariini.” 23Ndizvo Mambo Mwari wakamubudisa kubva mumunda weEdheni, kuti arime mavhu aakabviswa mwaari. 24Ndizvo wakamudzinga munhu, akaisa ngokumabvazuva kwomunda weEdheni makerubhi, neshoti inovaima nokutenderera kumarupande eshe, kungwarira njira yomuti wokupona.

Attualmente Selezionati:

Gen. 3: Ndau

Evidenziazioni

Copia