TAUNET 10
10
Piigap Ooreetap Noah
1Chu isubi ko piigap ooreetap weeriigap Noah: Shem, Ham ak Japhet. Ak ki sich icheek weeriik ye kingo pata maraneet.
2Weeriigap Japhet ko; Gomer, Magog, Madai, Javan, Tubal, Meshek ak Tiras. 3Weeriigap Gomer ko; Ashkenas, Riphath ak Togarmah. 4Weeriigap Javan ko; Elisha, Tarsis, Kitim ak Dodanik. 5Ki kipchechi icheek emotinwek che neegitee nyanjosyek che po pororyosyek eng' emotinwekwak; chii age tugul eng' kutinnyi, ko uu ortinwekwak ak eng' pororyosyekwak.
6Weeriigap Ham ko chu: Kush, Misiri, Put ak Kanaan. 7Weeriigap Kush ko: Seba, Havilah, Sabtah, Raamah ak Sabteka. Weeriigap Raamah ko: Sheba ak Dedan. 8Ki sich `Kush Nimrod, ne ineendet ko ki ek chiito ne nyigan eng' ng'wony. 9Ki kiplogotyot ne nyigan eng' taitap Kamuktaindet ne Toroor. Ko uu nooto anyun kemwae keele, “Ko uu Nimrod, kiplogotyot ne nyigan eng' taitap Kamuktaindet ne Toroor.” 10Taunetap laitornatennyi ko ki Babel, Erek, Akat, ak Kalne eng' emetap Shinar. 11Ki manda eng' emonooto kwo Assyria, si koteech Nineveh, ak nganaseetap Rehoboth-ir, Kala, 12ak Resen ne mi kwenutap Nineveh ak Kala ne nooto ko nganaseet ne oo. 13Ki sich `Misiri Ludik, Anamik, Lehabik, Naptuik, 14Patrusik, Kasluhik ak Kaptorik che icheeget kwanisyegap Philistiik.
15Ki sich `Kanaan Sidon weeriinnyi ne po tai, ak Het, 16ak Jebusik, Amorik, Girgasiik, 17Hibiik, Arkiik, Siniik, 18Aribadiik, Semariik ak Hamatiik. Kingo pata ko ki uot ooreetap kap Kanaan koyom emet. 19Kiwotetap Kanaanik ko ki taunegei Sidon, ak kotokyigei Gerar agoi Gaza, ak kotokyigei Sodom ak Gomorah, Atma ak Seboim, agoi Lasa. 20Chuuto ko weeriigap Ham, ko uu ortinwekwak ak kutusweekwak eng' emotinwekwak, ak eng' pororyosyekwak.
21Ki sich Shem agine lagok, ineendet ko ki kwandap lagok tugul che po Eber, ng'eetap kamet ne oo eng' Japhet. 22Weeriigap Shem chu: Elam, Ashur, Arbaksat, Luk ak Aram. 23Weeriigap Aram ko: Us, Hul, Gether ak Mas. 24Ak ki sich `Arbaksat Shelah, ak kosich `Shelah Eber. 25Ki sich `Eber weeriik aeng', ne kainetap age ko ki Peleg amu ki kipchei ng'wony eng' peetuusyekyik, ak kainetap ng'eetap kamet ko ki Joktan. 26Ki sich `Joktan Almodad, Shaleph, Hatsarmaveth, Jerah, 27Hadoram, Usal, Diklah, 28Obal, Abimael, Sheba, 29Opir, Havilah ak Jobab. Chuuto tugul ko ki weeriigap Joktan. 30Ak ki iboch meng'ootennywa Mesha, kotokyingei Sepharah, tulweetap kong'asiis. 31Chuuto anyun weeriigap Shem, ko uu ortinwekwak, kutusweekwak eng' emotinwekwak ak ko uu pororyosyekwak.
32Chuuto ko ortinwegap weeriigap Noah, ko uu ibinwekwak ak ko uu pororyosyekwak. Ak eng' chuuto ko kipcheunegei pororyosyek tugul eng' ng'wony ye kingo kagobata maraneet.
Attualmente Selezionati:
TAUNET 10: KAPR
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
©Bible Society of Kenya, 2019
