Luka 9

Pëtërku dojspërxacëjë

1Jezus ll'u gri a dojspёrxacëllu shi ll'u dedi forcё shi fuqii pisti tuc djavujë, shi forcё ti vindëkari llёngôrrё. 2Dapoja i'j pëtёrku tas spunё ti kratu a Dumёxё, shi s'vindëkё llëndëcjё. 3Astumsëna ll'u xësi: “Nu lloc cёva ku voj ti kali, niki pulan, niki trast, niki pёni, niki prax sh nu cënec doj palltax. 4Tu aca kasё ci us intrac, ako stёtec pën kёnd s'fuxic. 5Ma kë vёrr nu v'i aprôqё, kёnd s'ishac di acell billok skuturac pullbёra di çëçôrrё a vôsti, tas ll'u spunec ci hjic kondra ku nёsh.” 6Dishepujё nqësirё shi nesёrё pit hor, ju spunia ti evanghelu shi jucёdo vindёka.

Herod s'i stinahorsi

7Herod tetrarku avxё ti tuti aisti ci avja unxitё shi s'i stinahorsi, kё ndoj xëcja ci Joan esti injjat di mort, 8ndoj allc xëcja ci ara funusit Elia, shi ndoj allc xëcja ci ara injjat un di profecje veq. 9Herod xësi: “All Joan j'am tëjatё kapu, ma kaj esti aist ci ma avd di ahtari llukëri?” Shi këfta tas u vёdja.

Jezus hërri cinci njijё di ômёnj

10Kёnd s'turrarё, apostujё i'j spusërё a Jezus ti tuti llukërrë ci avja faptё. Ell i'j llo apostujё shi s'dёpёrtё singur ku nёsh tu unë kasabai ci s'akjёma Betsaid. 11Kёnd ômënjjё u llarё di hёbari aistё gjëji, nesёrё dupi nёs. Jezus j'ashtëptё gjini, shi ll'u spusi ti kratu a Dumёxё shi vindёka acej ci ara llёndëc. 12Xua ahurhji s'tunerëkë shi dojspërxacëjё i'j s'i apurqarë a Jezus, shi i'j xësërё: “Nqёsja ômënjjё s'nagё pit hor shi pit bilokërrё afigërra, tas s'i ndragё shi s'mëkё, kё aist bilok esti shkret.” 13Ma Jezus ll'u xësi: “Dëdecëllu voj cëva ti mëkari!” Ej j'u turrarё: “Noj avem gôllё cinci pёnj shi doj peshq. S'nëxem tas kupurёm pёni ti tuc aiç ômënj?” 14Ako ara aprôpja cincinjijё di burbac. Jezus ll'u xësi a dishepujllu: “Apunacij ômënjjё kiti cinxëc di ish!” 15Ej ashё fecërё sh j'apunarё tuc. 16Jezus llo cinci pënj shi doj peshq, anëllcё oqjё sus kiti cerl, këftё rucënjli a Lluj, l'i frrёmsi pënjli sh l'i dedi a dishepujllu tas ll'u dëdja a ômënjllu. 17Tuc mëkarё shi s'fënëtirё. Ci arrëmasi l'i adunarё shi s'i umpllurё dauspërxaci di shporti ku bukëc di pёni.

Xhuvapja a Pjetru

18Unôrё kёnd Jezus ma i'j fëcja duvai a Dumёxё tu un bilok singur, shi dishepujё ara ku nës, ell i'j tërbё: “Kum xёk ômënjjё, kaj est mini?” 19Ej i'j xësërё: “Ndoj xëk kё esht Joan Pëtëxёtoru, allanc kё esht Elia, ndoj allc xëk kё esti injjat vërr di profecjë veq.” 20Dapoja ll'u xësi: “Ma voj kum xëcec, kaj est mini?” Pjetru i'j turrё xhuvapi: “Tini esht Hristollu a Dumёxё”.

Jezus paraxësi murera shi injjara a lluj

21Jezus i'j ursi ej tas nu i'j spunia a içvërruj ti aistё 22shi ll'u xësi kё Hjiju a Omu lipseshti s'i sturnjupsjastё mullt, kё nu us aprôqë aushje, prefcjë shi skribёnjjё. Dapoja us u vatёmë, ma dupi tre xëli us injjaxё. 23Dapoja ll'u xësi a tutёllor: “Kaj vra s'jinё dupi mini, as fakё asha sinia a lluj, s'ja kёrucja a lluj kathi xuё shi s'mja shtjarrё. 24Kajcёdo ci vra tas skapё bana a lluj, us'u qarё aca, shi kajcёdo ci u qeri bana a lluj ti sebepja a mja us'u skapё aca. 25Ci buniacё us avja omu ma s'llô tutё dunea shi s'qёra iti s'rrustuna sinia a lluj? 26Ma Hjiju a Omu, kёnd s'jinё ku tinjia a lluj shi ku tinjia a Dumёxё shi a ëngjёllu, us'i'j jinё arrushëni ti acej ci s'arrushuniaxë di sebepja a mja, iti di zbôrrёli a njeli. 27Shi ku tutё mintja us v'i xёk kё, ndoj di acej ci sënt aô, nu us u vjadё môrtja n'i vёxutё kratu a Dumёxё”.

Funusera a Jezus

28Dupi optu xëli ci xësi aisti zbôrri, Jezus llo ku nёs Pjetru, Gjon shi Jakob, shi s'ja lënё tu munti tas allavdë Dumёxё. 29Kёnd ma zburra, prosupu a lluj s'ja llёksi shi stranjli s'fecërё albi skёpërôsi. 30Dapoja vëxurё doj burbac ci ma zburra ku Jezus. Ara Moisiu shi Elia, 31ci s'funusirё ku llunjinё shi ma gra ti aca ci us patë Hristollu ku kurrfusera a lluj tu Jerusalem. 32Pjetru shi acej ci ara ku nës, j'avja kёcatё somu, ma kёnd s'i zhdëpёtarё, vëxurё skëpërara a lluj shi a doj burbacëllu ci ara ku nёs. 33Kёnd ma s'përca Pjetru i'j xësi a Jezus: “Mvëcëtor, kit gjini ci hjim aô. S'skullëm tre tendi, unё ti tini, unё ti Moisiu shi unё ti Elia.” Pjetru nu shtja ci xëcja. 34Kёnd ma zburra, vini un vimt shi j'adunё. Kёnd intrarё tu nor dishepujё s'aspërarё. 35Dapoja dit nor s'avxё unё bôci: “Aist esti Hjiju a njell ma aleptu. Avxacu!” 36Kit s'avxё bôcja, Hristollu arrёmasi singur. Ej nu grirё, shi aca xuё nu i'j spusërё a içvёrruj ti tuti aceli ci avja vёxutё.

Hristollu vindëkё un fiçor umpllut di djavollu

37Allantё xuё, kёnd dupunarё dit munti, ll'u isharё dininti mullc ômёnj. 38Astumsëna un burbat i'j gri: “Mvëcëtor, c'fak rixhai, vex nihjamё ficorru a njell, kё ôm singur! 39Ell s'i umpllё ku sufulltu urrut ci u faci tas aurrё, u skutërё shi u pёskёneshti pënd s'i'j skôtё spllumё di n'gurё. U kurmё mullt shi s'dëpërtjaxё ku mulltё zori di nёs. 40Ll'u feç rixhai a dishepujllu a tëj tas u vindëka, ma nu pёturё.” 41Jezus ll'u xësi: “Ômёnj ci nu pistusic shi anapudh. Sh kit qёro us est ku voj? Pën kёnd us v'i arravd? Adu aô hjijёtu”. 42Kёnd ma o-ducja, djavollu u pёskёni mpadi fiçorru shi u përpёli. Ma Jezus u vërji sufulltu urrut, u vindëkë fiçorru, shi j'u turrë a tatësu. 43Tuc s'hërёsirё ku buniaca ci feci Dumёxё.

Jezus paraxёsi shi unôrё murera a lluj

Kёnd tuc ma s'çudusja ku tuti aisti ci avja faptё, Jezus ll'u xësi a dishepujllu: 44“Bëgacij ureqja gjini a zbôrrёllu ci us v'i xëc: Hjiju a Omu us s'i parada tu mënjli a ômёnjllu.” 45Ma ej nu l'aduqirё aisti zbôrri. Ci vra s'xëkё aisti zbôrri, nu u llôrё di hёbari, shi avja frikё tas u tёrba.

Kaj esti ma mari

46Namёsa di dishepuj s'i zdifeci unё muhabeti, kё kaj di nёsh ara ma mari. 47Ma Jezus, ci u kunushtja mintja, sh inёma a llor, llo un cilëman shi u cёnu aprôpja. 48Dapoja ll'u xësi a dishepujllu: “Kaj o-prôqё aist cilёman tu numa a mja, m'jari apurqatё anjia, shi kaj m'i aprôqё anjia, aprôqё acell ci m'i ari petërkutё. Ma njiku di tuc voj, acell esti ma marrё”.

Kaj nu esti kondra ku voj, esti ku voj

49Astumsëna Gjon i'j xësi: “Mvëcëtor, vëxum un om ci aurra djavullu pi numa a ta, shi noj nu o-llësёm, kё nu t'ja shtjarrё dinёpoj dadun ku noj.” 50Ma Jezus ll'u xësi: “Nu u dëpёrtac, kё kaj nu esti kondra ku voj, esti ku voj”.

Samaritanjjë nu o-proqё Jezus

51Kёnd ma s'apurqa xëlili ci us s'anëllca tu cerl, Jezus feci apofasi ti nëxeri tu Jerusalem, 52shi pëtёrku ma ninti acej ci us aducja hëbara. Kala, ej qindurirё tu unё hôrё di samaritanj tas i'j fëcja etёm ti Jezus 53ma ej nu j'apurqarё, kё Ell ara nqësit ti Jerusalem. 54Kёnd dishepujë a lluj, Jakob shi Gjon u vëxurё aistё gjёji, i'j xësërë: “Jezus, vre tas s'dëdem komandë s'dëpunё di cerl foku shi s'i'j sterqastё?” 55Ma Jezus s'turrё sh i'j vërji. “Nu shtic di ci duh hjic umplluc. Hjiju a Omu nu vini tas l'i qarё sufullcjë a ômёnjllu, ma tas l'i skapë” 56Dapoja nesërё tu unё hôrё alltё.

S'nex dupi Jezus

57Kёnd ma imna kala, un di nёsh xësi: “Us t'ja shtjerr jucëdo ci us nex.” 58Ma Jezus llu xёsi: “Vulpja ari guvё shi pujё tu cerl ar kubajur, ma Hjiju a Omu nu ari bilok ju s'ndôpёrrё kapu”. 59A unuj allt i'j xёsi: “Hajdi dupi mini!” Ma ell ju turrё: “Jezus, allasёmi tas neg s'ngrop ma ninti tati a njell.” 60Jezus i'j xёsi: “Allasij morcjё s'ngrôpё morcjё a llor, sh'tini fux tas spunj ti kratu a Dumёxё”. 61Un allt i'j xёsi: “Mini us jin dupi tini, Jezus, ma allasёmi tas s'mi adun ma nunti ku ômënjjё ali kasi.” 62Jezus i'j xësi: “Kajcëdo ci bagё mёna pi parmёndё shi u tôrrё kapu dinipoj, nu pôti s'fakё llukёrru a Dumёxё”.

Attualmente Selezionati:

Luka 9: ARUM

Evidenziazioni

Copia