Luka 24

Injjara a Hristollu

1Sëmbëtë nu llukrarë pi dupi skirëturëli a Moisiu. Dumënëkë di dimjaca, mujerrë vinërë lla mirëmint ku untulemu ku njurizmë bunë ci avja faptë etëmë. 2Eli o'fllarë shkëmba a mirëmintu zhdikisë, 3s'hjipsërë nunt, ma nu o-fllarë trupu a Hristollu. 4Eli ara çudusiti di aistë gjëji sh di-unôrë s'i funusirë dininti a llor doj burbac mvëskuc ku stranji skëpërôsi. 5Mujerrë l'i akëcë frika, sh gëxurë përdinc, ma burbacjë xësërë: “Ti ci u këftac jiu namësa di morc? Ell nu esti aô. Esti injjat. 6Aduqicvë ci v'i xësi kënd ara tu Galilei, 7kë Hjiju a Omu us'i vindja lla amartiosjë, us'i kurrfusja, sh dupi tre xëli us injja” 8Eli l'aduqirë zbôrrëli a lluj, 9sh kënd s'turrarë di lla mirëmint, ll'u spusërë a unspërxacëllu sh allëntor ti tuti ci avja vëxutë. 10Ara Maria Magdalena, Joana, Maria, mësa a Jakob, shi allanti mujer, ci stëtja ku nësi. Eli i'j l'i spusërë aisti gjëji a apostullor, 11ma ej nu l'i pistusirë kë ll'o-spëra çudii aisti zbôrri. 12Sh ku-tutë-aca Pjetru s'i skullë sh nesi ntrôrë lla mirëmint. S'i apunë sh vëxu nunt. Ell vëxu gôllë stranjli shi s'turrë akasë mullt hërësit ti aca ci ara faptë.

Kala pën ti Emaus

13Aca xuë doj di nësh ma fuxja tu unë hôrë ku numa Emaus, ci esti aprôpja unspërxaci di kilometri aprôpja di Jerusalem. 14Ej ma zburra un-ku-allant ti tuti llukërrë ci ara fapti. 15Kënd zburra un-ku-allant, Jezus s'i apurqë shi imnë dadun ku nësh, 16ma ej, kë ci i'j qëdëka tas u kunushtja. 17Ell ll'u xësi: “Ti ci ma zburrac un-ku-allant?” Ej qindurirë murzuic. 18Astumsëna un di nësh, ci s'akjëma Kleopa, i'j xësi: “Gôllë tini esht un singur tu Jerusalem, ci nu u shti ci esti faptë ako aisti xëli?” 19Ell tërbë: “Ci esti faptë?” Ej i'j spusërë: “Jezus di Nazaret, ara un profet mari ku llukëri sh ku zbôrri dininti a Dumëxë sh dininti a tuc ômënjllu, 20sh ma mërjë a prefcëllor shi a shtëlluj biloku, u dunuirë shi u kurrfusirë. 21Noj pistusjam kë Ell us skëpa Izrael, ma s'i fecërë tre xëli ci sënt fapti aisti llukëri. 22Ndau mujer di parea a nôstë n'i ar çudusitë. Eli ara azë dëmjaca lla mirëmint 23sh nu o-fllarë trupu a lluj ako. Eli vinërë sh n'i xësërë, kë ll'u sënt funusitë ëngjëj, ci ll'or xësë kë Ell esti jiu. 24Ndoj di acej ci ara ku noj, nesërë lla mirëmint shi o-fllarë ashë kum ll'o-vja xësë mujerrë, ma Ell nu u vixurë.” 25Astumsëna ell ll'u xësi: “Ômënj fërë minti sh fërë pistuseri, ci v'i ar xësë tuc profecjë! 26A nu lipsja ci Hristollu s'i sturnjupsja, s'l'i stërrxja aisti ci s'fecërë, sh dapoja s'intra tu tinjia a lluj.” 27Dapoja ell ll'u spusi ti tuti sëmtëli Skirëturi, ci xëcja ti nës, ahurhji di Moisiu pën lla tuc profecjë. 28Kënd s'apurqarë tu hôra ci ma nëxja, Hristollu tërku dininti, kanda vra tas fuxja, 29ma ej i'j fecërë rixhai sh i'j xësërë: “Stë ku noj, kë ma jini sjara, sh xua ma bitiseshti.” Astumsëna Ell nesi shi stëtu ku nësh. 30Kënd ara tu trapezë ku nësh, llo pëna, feci duvaja a ruçënjëllu, u frrëmsi sh ll'u dedi a llor. 31Tu aist qëro, allor ll'u s'i zhdikisërë oqjë, sh u kënëskurë, ma Ell s'i dëpërtë di nësh. 32Ej xësërë un-di-allant: “A nu n'i ardja inëma kënd n'i zburra kala sh kënd n'i spunia ti sëmtuli Skërëturi?” 33Di-unôrë s'i skullarë sh fuxirë tu Jerusalem, ju afllarë unspërxacëjë sh allanc, ci ma stëtja ku nësh dadun. 34Ej xëcja: “Hristollu esti injjat darihënja sh i'j esti spus a Simon.” 35Astumsëna doj dishepujë ll'u spusërë ci avja unxitë kala, shi kum ara fapt kënëskut kënd frrëmsi pëna.

Jezus vini dininti a dishepujllu

36Ej ma zburra ti aisti llukëri, kënd Jezus qinduri namësa di nësh sh ll'u xësi: “Irini s'hjibë ku voj!” 37Ej s'aspërarë sh minduirë kë ma vëdja un sufullt. 38Ma Ell ll'u xësi: “Këce avec frikë, sh këce hjic ka pi ndojla tu inëma a vôstë? 39Vëdec mënjli sh çëçôrrë a njeli. Est mini. Akëcacmë ku mëna sh us'u vëdec. Sufëlltu nu ari karrë shi ôsi kum m'i vëdec ci am mini.” 40Sh dupi aisti zbôrri ll'u spusi mënjli sh çëçôrrë. 41Ma ej ninga nu pistusja di hërau shi s'çudusja. Hristollu ll'u xësi: “Avec cëva ti mëkari?” 42Ej i'j dedërë unë bukatë di peshti kopt. 43Ell u llo, sh u mëkë dininti a llor. 44Astumsëna ll'u xësi: “Aisti zbôrri v'i am xësë kënd aram ninga ku voj. Tuti ci sënt skërati ti mini tu nomlu a Moisiu, tu Skërëturëli a profetëllu sh tu psalm, prindi s'i fakë.” 45Dapoja ll'u zhdikisi mintja tas aduqa sëmtuli Skërëturi 46sh xësi: “Tu sëmtuli Skërëturi s'i spuni: Hristollu prindi s'strragë shi s'injjaxë dupi tre xëli 47shi ti tuti kraturrë us'i spunë skëpara di amartiili a llor. Us ahurhjastë dit Jerusalem. 48Voj hjic shait ti aisti llukëri. 49Ja mini ma v'i pitrek zbôrru a Përintili a njell, tiaca stëtec aô tu kasabai pënd s'vi mvështec ku fuqia di sus.”

Jezus s'i skullë tu cerl

50Dapoja dadun ku nësh, nesi pën di Betani, skullë mënjli shi ll'u dedi ruçënjli. 51Kënd ma dëdja ruçënjli, s'dëpërtë di nësh shi s'anëllcë sus tu cerl. 52Ej ô-llëvdarë shi s'turrarë ku mari hërau tu Jerusalem, 53ju stëtja totëna tu tempull shi allëvda Dumëxë.

Attualmente Selezionati:

Luka 24: ARUM

Evidenziazioni

Copia