Luka 13

Fëcecvë pishmani

1Tu aist qëro vinërë ndoj ômënj lla Jezus shi i'j spusërë ti galileasjë ci sënxëli a llor Pilat o-vja mëstëkat ku sënxëli di kurbani. 2Jezus i'j tërbë: “Kum mintuic kë galileasjë ci pëcarë aistë gjëji, ara nkërkac ma mullt ku amartii di galileasjë allanc? 3Us v'i xëk ci, ma kë nu us v'i fëcec pishmani ti amartiili a vôsti, us u pëcac tuc ashë ka ej. 4Ma ti acej optuspërxacëjë ci ll'u gëxu kulla a Siloam, sh i'j vëtëmë, v'i nexi mintja ci avja steps ma mullt di allanc ômënj, ci bëniaxë tu Jerusalem? 5Nu! Us v'i xëk, ma kë nu v'i fëcec pishmani us pëcac tuc ka acej”.

Meselea a hjiku

6Dapoja Jezus spusi aistë meselei: “Un ôm avja un pom di hjik sëmënat tu agërru a lluj. Vini tas kaftë hjici pi nës, ma nu afllë. 7Astumsëna i'j xësi a baçevanu: ‘Am vënitë tre anj pja radhë tas jau hjici di aist pom, ma ninga nu am afllatë cëva. Taju! Këce s'a kacë biloku xhaba?’ 8Baçevanu ju turrë: ‘Domne, allasu sh aist an, tas i'j fak ysmeti, shi s'ja min kurpëji, 9kë vëhj faci hjici anu ci jini. Ma kë nu faci, taju’”.

Jezus vindëkë sëmbëta

10Unë sëmbëtë Jezus ma mvëca ômënjjë tu unë sinagogë. 11Ako ara shi unë mujeri, umpllutë di un sufullt ci o-vja cënutë optuspërxaci di anj kurrusitë. Ija nu putja tas stëtja ndrept. 12Jezus u vëxu, i'j gri shi i'j xësi: “Mujeri, esht skëpatë di llëngôra a ta”.

13Kënd bëgë mëna pi nësë, ija s'i ndreptë shi ahurhji tas allavdë Dumëxë. 14Ma marrë ali sinagogi s'i nërri ci Jezus vindëkë sëmbëta, tiaca ll'u xësi a ômënjllu: “Sënt shasi xëli ci omu pôti s'llukraxë. Aisti xëli ajdic tas v'i vindëkac, nu sëmbëta.”

15Astumsëna Jezus ju turrë: “Psematar! Nu u zdelëgac kathi di voj bou shi gumarru dit grazhdi sëmbëta, shi o-ducec si'j dac apë? 16Aistë mujeri ci esti hjijë di'a Abraham shi ci Satan ôri lëgate optuspërxaci di anj, nu prindi s'i zdëlagë di aisti hjarrë unë xuë ka kum esti sëmbëta?” 17Kënd xësi aisti Jezus, tuc acej ci ara kondra ku nës, s'ja rrushunarë shi tuc ômënjjë s'hërësirë ti aisti llukëri buni ci fëcja Ell.

Meselea ku sëmica di sinap shi allôtu

18Astumsëna Jezus xësi: “Ku kaj unxeshti kratu a Dumëxë? Kum pot s'vu spun? 19Ell unxeshti ku sëmica di sinap ci un om u llo shi u sëmënë tu agur. Sëmica kërsku shi s'feci pom, shi pujë a cerlu fecërë kubajur pit dexli a lluj” 20Jezus xësi napoj: “Kum pot s'vu spun kratu a Dumëxë? 21Ell unxeshti ku allôtu ci u llo unë mujeri, u mëstëkë ku tre masë di frinë, pën kënd vini tut allôtu.”

Usha strrimtë

22Kala ti Jerusalem, Jezus tërku pit hor shi kasabai, shi mvëca ômënjjë. 23Un om u tërbë: “Domne, a sënt pucënj acej ci us'i skapë?” Astumsëna Jezus i'j xësi:

24“Çukuticvë s'intrac pit usha strrimtë, kë us v'i xëk, ci mullc us'i çukutjastë s'intrë, ma nu us pôtë. 25Ma kë domësu ali kasi esti skullat, shi ari nkisë usha, sh voj stëtec nafôrë, dëdec pi ushë sh xëcec: ‘Domne, zhdikidënë usha!’, ell us v'i xëkë: ‘Nu u shtiu di këtu vinic.’ 26Astumsëna us ahurhjic s'xëcec: ‘Noj avem mëkatë sh avem bjutë ku tini, sh tini n'i aj mvëcatë tu padi’. 27Ma ell us v'i xëkë: ‘Nu u shtiu di këtu vinic. Dëpërtacvë di mini tuc voj ci fëcec llukëri anapudhi’. 28Ako us ajbë pllënxeri shi ômënj ci us strringë dincjë, kënd s'vëdec Abraham, Isak shi Jakob dadun ku profecjë allanc tu kratu a Dumëxë, sh avau us v'ja rrukë nafôrë. 29Dapoja us jinë di na ndrapta sh di na stënga, di sus, sh di hjima, shi us mëkë tu kratu a Dumëxë. 30Shi ja, apusjë us s'ja nallcë nxjanë shi acej ci sënt prota us hjibë tu fund”.

Kuja ti Jerusalem

31Ndoj farisenj vinërë shi i'j xësërë a Jezus: “Dëpërtjaxëti di aô, kë Herod vra s'ti vatëme”. 32Shi Jezus ll'u xësi: “Fuxic sh xëcecij acëje vulpi: ‘Ja, mini us aurr djavujë sh ma vinduk azë shi mëni. Dupi tre xëli us'u bitisest llukurru a njell. 33Shi ku-tutë-aca, azë, mëni sh pujmëni mini us trek tu kala a mja, kë nu esti tu ndreptjacë ci un profet s'i vatëmë nafôrë di Jerusalem’. 34Jerusalem, Jerusalem, tini ci vacinj profecje sh ku shkëmbi vacinj pëtërkucjë a Dumëxë! Kit or am vrutë tas s'ij adun evlatëjë a tëj, kum adunë klloçka pujë a je sum brace, ma voj nu vrat. 35Ja kasa a vôstë us arrëmënë shkretë. Mini us v'i xëk kë nu us m'i vëdec më pën s'xëcec: ‘S'ajbë rucënjli acell ci jini pi numa a Domnu’”.

Attualmente Selezionati:

Luka 13: ARUM

Evidenziazioni

Copia