Luka 11

Dumёxё a nost

1Jezus ma fëcja duvai tu un bilok. Kёnd bitisi, un di dishepujё i'j xësi: “Jezus, mvjacёni tas fëcem duvai, ashё kum i'j mvëcё Joan dishepujё a lluj.” 2Ell ll'u xёsi: “Kënd s'fëcec duvai xëcec:

Dumёxё, s'i llunjinësjastё numa a ta,

S'jinё kratu a tёll!

3Dëni pënia ti kathi xuё

4S'ni hёrxesht amartiili a nôsti

Ka kum sh noj hёrxim amartiili

A cëllor ci fak ti noj.

Nu ni pinxi tu zilii.”

5Dapoja ll'u xёsi: “O-kёcëm kё un di voj ari un ôspi. Nesi lla nёs namësa di nôpti shi i'j xësi: ‘Ôspe, dënj tre pёnj, 6kё nj'ari vinitё un ôspili a njell sh nu am cëva si'j bag dininti.’ 7Ell i'j tôrrё xhuvapi di nunt: ‘Nu nj'a sparxi rehatja! Tora am nkisё usha sh avem gëxutё ti durnjeri, sh mini sh çilëmanjjë. Nu pot s'mi skoll tas s'ic dau cëva.’ 8Mini us v'i xëk ci, sh ma s'nu vra s'i skôllё tas i'j da cёva kё ôri ôspi, us'i skôllё tas i'j da ahtёnt kit i'j lёpseshti di sebepja ci ell nu s'dëpërtjaxë, ma kaftë fërë-di-alltë napoj. 9Sh mini us v'i xёk: ‘Kёftac shi us v'i da, kёftac shi us afllac, dëdec pi ushё shi us u zhdikidё. 10Kё acell ci kaftё us ja, kaj kaftё us afllё, shi acell ci da pi ushё us i'j s'i zhdikidё. 11Ari namёsa di voj vërr përinti ci us i'j dëdja a çilëmanu ci kaftë peshk, unë nëpërtёkё tu biloku a peshtili? 12Iti, ma kë çilëmanu kaftё ou, us i'j dëdja un akrep? 13Ma kë voj ci hjic urruc, shtic tas i'j dёdec a cilёmanu a vost gjëji buni, ahtënt ma mullt Dumёxё us ll'u da di sus Sëmtul Duh a cёllor ci us j'u kaftё’”.

Jezus shi Beelzebul

14Jezus ma aurra un djavoll ci ara djavollu a cëllor ci nu gra. Kёnd o-urrarё djavollu, memecu gri shi ômënjjё s'hërёsirё. 15Ma ndoj di nёsh xёsërё: “Ell j'aurrё djavujё ku fuqia a Beelzebul, ma marrё di tuc djavujë.” 16Ndoj allc ti bёgari tu provё i'j kёftarё unё alltë çudii dit cerl. 17Ma Jezus ci kunushtja mintja a llor llu xёsi: “Kathi krat përcat s'asparxi, sh kasёli a lluj s'rrёstônё unё dupi allantё. 18Ma kё shi Satan esti përcat, kum pôti s'qindurastё kratu a lluj, pedhis ci voj xëcec kё mini j'aurr djavujё ku fuqia a Beelzebul? 19Ma kë mini j'aurr djavujё ku fuqia a Beelzebul, fumeja a vôstё ku ci fuqii j'aurrë? Ti aistё sebepi e'j us hjibё dhiqigor ti voj. 20Ma kë mini j'aurr djavujё ku fuqia a Dumёxё, astumsëna kratu a Dumёxё ari vinitё lla voj. 21Kёnd un om vërtos, ci ari shi armё, u vjagjё kasa a lluj, malla, avera shi gjёja a lluj nu pôti s'i kërtjastё di vёrr. 22Ma kë vёrr allt esti ma vërrtos di nёs, u rrёstônё shi ju ja arma. Plaçka a lluj u ja shi u parcё ku allc ômёnj. 23Kaj nu esti ku mini, esti kondra ku mini, sh kaj nu adunё ku mini rrёspёndeshti”.

S'turrё sufulltu urrut

24“Kёnd esi di omu, sufulltu urrut jini afigёrra pit bilokёri fёrё apё, kaftё rehatja sh kёnd nu u afllё xëci: ‘Us mi torr lla kasa a mja di ju ishaj’. 25Kёnd jini u afllё omu pëstrit sh ndrept. 26Dapoja nexi, afllё shi aduci dupi nёs shapti sufёllti urruti allti ma sllagj di nёs, intrё sh bёniaxё ako. Ashё, acell om s'faci ma sllab di ma ninti”.

Hëraua ma mari

27Kënd xëcja aisti zbôrri, unё mujeri ci ara namёsa di ômënj skullё bôcja shi xësi: “Hara di pёndёku ci t'i ari cënutё shi sinu ci t'i ari hërritё ku llapti”. 28Ma Jezus i'j xësi “Ma gjini esti, hara di acej ci u avd zbôrru a Dumёxё shi u vjagjё”.

A Jezus i'j kaftё un semn bun

29Kёnd ômёnjjё ma s'aduna, Jezus ahurhji tas xёkё: “Aistё farё di ômёnj esti anapudhё. Ej kaftë un semn bun, ma allor nu us i'j s'i da içvërr semn ma mullt di semnu a profetu Jona. 30Ashё kum s'feci Jona semn ti ômёnjjё ali Ninivi, ashё us hjibё shi Hjiju a Omu semn ti aistё farё di ômёnj. 31Mujera vёsёjë di Sheba us injjaxё xua di ndreptjacё, dadun ku ômёnjjё a shtëlluj qёrollu, shi us l'i dunuastё, kё ija vini di marxëna a lloku tas askulltё zbôrrёli mintimeni a Solomon. Sh ja aô esti un ma mari di Solomon. 32Ômёnjjё di Ninivë us injjaxё xua ali ndreptjaci dadun ku aistё farё shi us u dunuastё, kё ej s'fecërё pishmani kёnd feci predikimja Jonai. Sh ja, aôci esti un ma mari di Jonai.

Llunjina a prosupu

33Içvërr nu o-prindi këndilla tas u bagё tu bilok askumt sum kёpёsteri. Aca s'bagё tu biloku a je, tas u vjadё llunjina acej ci intrё nunt. 34Llunjina a prosupu esti oqu. Ma kë oqu a tëll esti vërtos, tut prosupu a tell us hjibё llunjinёsit, ma kё oqu a tëll esti llёnxut, tut prosupu a tell us hjibё ka tu skutidhi. 35Tiaca s'aj mintja ci llunjina a ta s'nu hjibё skutidhi. 36Ma kё tut prosupu a tell esti plin di llunjinё shi fërё skutidhi tu tuti përcli, ell us hjibё ntreg ku llunjinё, ashё kum esti llunjinёsitё llombadha aprasё”.

Kavaj di voj farisenj shi dhaskalënj a nomlu

37Ako ju zburra Jezus, un farise o-kjëmë tas mëkë lla kasa a lluj. Jezus nesi shi stëtu tu trapeze. 38Fariseu s'çudusi kënd vëxu ci Ell nu l'i llë mënjli dininti ali mëkari. 39Sh Jezus i'j xësi a lluj: “Tora, voj farisenjjë pëstric partja di nafôrë ali kupi sh ali pjati, ma di nunt hjic tut rrutjacë sh babëzii. 40Zurr sh tëvëqej! Acell ci feci partja di nafarë a nu adërë shi partja di nunt? 41Tiaca dac prota di aceli ci avec nunt, shi us l'avec pëstriti tuti. 42Ma, kavaj di voj farisenj! Voj i'j dëdec a Dumëxë unë di xaci përc di mëndra ci avec, unë di xaci përc di njej sh di jarbë, ma allësac di-unë-parti ndreptjaca shi vrera a Dumëxë. Aisti lipseshti s'fëcec, sh nu allësac di-unë-parti allanti. 43Kavaj di voj farisenj ci v'arëseshti tas akëcac bilokërrë ma buni pit sinagogi shi vrec s'vi fakë tinjii tu padi!

44Kavaj di voj ci hjic ka miriminc fërë shënjë, ci ômënjjë l'i kallkë n'i shtjutë”.

45Un di dhaskalënjjë a nomlu i'j xësi: “Mvëcëtor, tini ma n'i apunj mullt ci ma n'i xëc aisti zbôrri.” 46Ma Jezus i'j xësi: “Kavaj sh voj dhaskalënj a nomlu a Moisiu, kë i'j ngërkac ômënjjë ku unë sarcënë grau, ma ishish voj nu zbëtac niki xedëtu tas i'j cënec!

47Kavaj di voj ci skullac miriminc ti profecjë ci i'j vëtëmarë përincjë a voç. 48Ashё spunec kё hjic tu unё minti ku llukërrë ci fëcërë përincjë a voç, kë ej i'j vëtëmarë profecje shi voj llu skullac miriminc. 49Tiaca shi Dumëxë tu ndreptjaca a lluj ari xësë: ‘Mini us v'i pëtrek profec shi apostuj, ma ej us i'j vatëmë shi ndoj allc us j'ashtjarrë, 50ci ômënjjë a shtëlluj qërollu s'arrëmënë tu steps ti sënxili ci esti vërsat di tuc profecjë, di kënd s'feci dunea, 51di sënxëli a Abel, pën tu sënxëli a Zakaria, ci u vëtëmarë namësa di altar shi di ajodhimë. Ashë, ashë us v'i xëk, kë ti aistë gjëji us arrëmënë ku steps aistë farë di ômënj. 52Kavaj di voj dhaskalënj di nomlu a Moisiu, kë avec llôtë ti sinia a vôstë keja ali mvëcari! Ashë, niki ishish voj nu intrat, sh allanc i'j qëdëkat tas intrë nunt.” 53Kënd Jezus ishë, skribënjjë shi farisenjjë ahurhjirë s'i nërrastë shi s'aminë soj di soj di zbôrri, 54tas i'j kaftë mintja, shi si'j skulla kurthi ti cëvë ci us xëcja.

Attualmente Selezionati:

Luka 11: ARUM

Evidenziazioni

Copia