BEGGAR 7
7
1Ho At Sw Noannvn benum, “No la noqg imiq dvpar mwlwngv, hulu urab haato, hoggab nam ngo soq hotam so dvrwq lootw bo nyi gob kaapa paku. 2Nyega gola nyem loq, noqg lvgab dvrwqbo svdin loq piumdwb kvn go naato, hoo dvrwq maanbo svdin loq nyega gola nyem loq ak piumdwb naato, 3hoo bulug hosiqkam swcw nvg aoso swwsiq mvdwb, nyega gola nyem loq doag pvta loqkam piumdwb kvn go pvvto. 4Hoggab soq aal kvn kokwngam ngo swcw nvg aoso aal campy ai campy go nyodongam kanam tayin, hoo ngoqg pwnum luuxy cwr swwl doon boam ngo ked ao soqgv twrkub mvpaq tayin.” 5Hoo mwam At Swg gaml jiknam mam Noa hog mwlwngam nyiknum.
6Hwdlo swcw nvg aoso sa-hindungv henca yukho Noa vnyw lwwx gob axa kunum. 7Hoo sa-hindu issam keleqdvb Noa la mwwg ko tuupv la mwwg nywxwngv la mwwg ko tuup tulug nywxw tulungv mwwg lvgab hulu urab haaknum 8Dvrwqbo svdin tulungam la dvrwq maan svdin tulungam, hoo pvta tulungam, hoo ked aoso gwn-xarnbo mwlwngam, 9Noannvn Pwnbog gaml jik jaqb, vnyi gogab, nyegangam la nyem mam, Noag lvgab hulu urab haamnum. 10Hoo Aal kvn kokw so swcw nvg aoso sa-hindug issiv haaknum.
11Noa vnyw lwwx gobla pool bvrnyig aal camleq kvn gob swwi yikho, hoq aalho urag iss gwwl mwlwngv buqpor kunum, hoo doag viyap pam kuqko kunum. 12Hoo nyodongv swcw nvg aoso aal campy hoo ai campy gob hoknum. 13Hoq aal lookin ho Noa la mwwg ko tuup tulungv, Sem, Ham hoo Japet, hoo Noag nywxwngv la mwwg ko tuup tulug nywxw oumv bulv hulu urab haaknum, 14bulv la luuxy cwr gunggo-nyiiyongv, hoo luuxy cwr tuun-meengv, hoo swcw nvg aoso gwn-xarnbo luucw-luut mwlwngv, hoo luuxy cwr pvtangv, alap gvnbo luucw-luutv bulug lvgab haaknum. 15Vnyi-vnyi gogab swwl-saql doonbo mwlwngv bulv Noag lvgab hulu urab haaknum. 16Hoo Pwnbog gaml jik jaqb hulu urab haanbov swwl doonbo nyega gola nyem go haaknum. Hoo At Sw mwam uraho ciqtum kunum.
17Sa-hindu issiv swcw nvg aoso aal campy gob hindunum. Issiv aob henca yin hoo hulungam aob jaarab mvnum, hoo hulungv swcw nvg aob jaaca kunum. 18Gvda gvtwb iss rooxonum hoo swcw nvg aoso koi jaqb issiv hencanum, hoo hulungv iss aoho jaal yvknum. 19Hoo issiv koi loodab henca kunv swcw soqg mwlwngam ao yaanbo puutu tulungam hinglupnum. 20Issiv puutu tulungam camleq ang kiubit ao gob ya hencal hinglupnum. 21Hoo swcw nvg aoso biin-tabn bo, pvta tulungv, tuun-meengv, gunggo-nyiiyongv, swcw nvg aoso gwn-xarnbo tulungv, hoo nyia kov, hoo swwl doonbo mwlwngv siknum. 22Gvda aoso nyupum hoqgv saql swwnbo mwlwngv siknum. 23Swcw nvg aoso swwl doonbo mwlwngam, nyia koam hoo svdinam hoo gwn-xarn boam, hoo doag pvtangam mwv mvpaqnum. Bulam swcw soqgv twrdwb mvpaqnum. Noa aro nvla mwwg lvgab hulu uraho doonbo tulungam apaqtvl mwlwngam mvpaqnum. 24Hoo issiv swcw nvg aoso aal 150 gob hengl doonum.
Attualmente Selezionati:
BEGGAR 7: NISS
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Nyishi, DVRWQ PVVB @ Bible society of India 2016
