BEGGAR 5
5
Adam hoqgv Noa Hotam namgub
1Soq si Adam gv hotam tulungam xeqpnam kitap pv. Hwdlo Pwnbov nyia koam pwnum, mwv mwam Pwnbo hvb nyidwb pwnum. 2Mwv bulam nyem gola nyegab pwnum, hoo mwv bulam lvqc cinum hoo hwdlo bulam pwlin kunum bulam nyia kov hvl eminum. 3Hwdlo Adam 130 vnyw go swwi yikho, mwam guss dvb, mwam kvvywqbo nyega ko ak doonum, hoo mwam Set hvl eminum. 4Mwv Setwg abwb nyixo kokw so Adam vnyw 800 go swwnum; hoo mwv hvraqb asaq nyega kov la nyem kov doonum. 5Adam gv swwnam aalv odum-apal vnyw 930 go swwpe kul, hoo mwv siknum.
6Hwdlo Set vnyw 105 go swwi yikho, mwv Inoswg abwb nyiknum. 7Set Inos abwb nyixo kokw so vnyw 807 go swwnum hoo hvraqb asaq nyega kov la nyem kov doonum. 8Setwg swwnam aalv odum-apal vnyw 912 go swwpe kul, hoo mwv siknum.
9Hwdlo Inos vnyw 90 go swwi yikho, mwv Kenanwg abwb nyiknum. 10Inos Kenanwg abwb nyixo kokw so vnyw 815 go swwnum hoo hvraqb asaq nyega kov la nyem kov doonum. 11Inoswg swwnam aalv odum-apal vnyw 905 go swwpe kul, hoo mwv siknum.
12Hwdlo Kenan vnyw 70 go swwi yikho, mwv Mahalalelwg abwb nyiknum. 13Kenan Mahalalelwg abwb nyixo kokw so vnyw 840 go swwnum hoo hvraqb asaq nyega kov la nyem kov doonum. 14Kenanwg swwnam aalv odum-apal vnyw 910 go swwpe kul, hoo mwv siknum.
15Hwdlo Mahalalel vnyw 65 go swwi yikho, mwv Jared gv abwb nyiknum. 16Mahalalel Jared gv abwb nyixo kokw so vnyw 830 go swwnum hoo hvraqb asaq nyega kov la nyem kov doonum. 17Mahalalelwg swwnam aalv odum-apal vnyw 895 go swwpe kul, hoo mwv siknum.
18Hwdlo Jared vnyw 162 go swwi yikho mwv Inok gv abwb nyiknum. 19Jared Inok gv abwb nyixo kokw so vnyw 800 go swwnum hoo hvraqb asaq nyega kov la nyem kov doonum. 20Jaredg swwnam aalv odum-apal vnyw 962 go swwpe kul, hoo mwv siknum.
21Hwdlo Inok vnyw 65 go swwi yikho, mwv Metuselag abwb nyiknum. 22Metuselag abwb nyixo kokw so Inok Pwnbo lvgab vnyw 300 go yvbanum hoo hvraqb asaq nyega kov la nyem kov doonum. 23Inok gv swwnam aalv odum-apal vnyw 365 go nyiknum. 24Inok Pwnbo lvgab yvbanum, hoo mwv jimmib niiknum, hoggab Pwnbov mwam booknum.
25Hwdlo Metusela vnyw 187 go swwi yikho, mwv Lamekwg abwb nyiknum. 26Metusela Lamekwg abwb nyixo kokw so vnyw 782 go swwnum hoo hvraqb asaq nyega kov la nyem kov doonum. 27Metuselag swwnam aalv odum-apal vnyw 969 go swwpe kul, hoo mwv siknum. 28Hwdlo Lamek vnyw 182 go swwi yikho, mwv nyega ko akwg abwb nyiknum. 29hoo mwwg eminam Noa hvl goqnum, hoo begamv, “At Swg beenam ked hoqgv soq ko ak si ngulug bon nyinam mam hoo ngulug alaq hoqg vc cil hentwr henam mam meeg hvrab dvb mvtayin.” 30Lamek Noag abwb nyixo kokw so vnyw 595 go swwnum hoo hvraqb asaq nyega kov la nyem kov doonum. 31Lamekwg swwnam aalv odum-apal vnyw 777 go swwpe kul, hoo mwv siknum. 32Noa vnyw 500 go axa dvb swwxo kokw so, Sem, Ham, hoo Japet gv abwb Noa nyiknum.
Attualmente Selezionati:
BEGGAR 5: NISS
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Nyishi, DVRWQ PVVB @ Bible society of India 2016
