RIPHUTNA 36
36
Esauva richihei
(1 Rich.1:34-37)
1Hihei hih Esauva richihei chu an nit. Esauva hih Edoma khom an ti sa ngai. 2Esauva khan Kanan nungâkhei khah nupuiin ai nei a nit; Hit mi Elona nainu Adaii hei, Hiv mi Zibeona naipa Ana nainu Oholibami hei,#Riph.26:34. 3Ismaela nainu, Nebaiota farnu Basemathi hei kha an nit. 4Adaii khan Esauva khah Elifaza a nei pêk a; Basemathi khan Reuela a nei a; 5Oholibami khan Jeusa, Jalama, Kora hei a nei a. Khahei khah Esauva naipahei, Kanan rama suakhei chu an nit.#Riph.28:9.
6Khanungchu, Esauva khan a nupuihei, a nainuhei neh a naipahei, a ina mi om murdihei, a ranhei murdi, Kanan rama sum neh puan ai nei tâkhei murdi khah a thôt riai a, a unaipa Jakoba dîp loi rangin ram dangah arthon tâk a. 7An thil neihei khah a natinsat ok tâk sikin an mikhualna ramah khan an ranhei lêngna rang ridum khâi mak a, munkan an iom thei khâi ino a nit. 8Khanchu, Esauva khah Seir tlângah khan a om tâk a. Esauva khah Edoma iti khom a nit.
9Seir tlângrama Edomhei chibul Esauva richihei chu hingka hin an nit. 10-13Hihei hih Esauva naihei chu an nit: Esauva nupui Adaii khan naiipa khatkah Elifaza a nei pêk a. Elifaza khan naiipa ringakah a nei a: Temana, Omara, Zefoa, Gatama, Kenaza hei an nit. Timnaii khah Elifaza thâikêm a nit a, ani khan Elifaza khah Amaleka a nei pêk a. Khahei khah Esauva nupui Adaii richihei chu an nit.
Esauva nupui Basemathi khan naiipa khatkah Reuela a nei pêk a. Reuela khan naiipa ilîkah a nei a: Nahata, Zera, Sama, Miza hei an nit. Khahei khah Esauva nupui Basemathi richihei chu an nit.
14Hihei hih Zibeona naipa Anaa nainu Oholibami naiipahei chu an nit; ani khan Esauva khah Jeusa, Jalama, Kora hei khah a nei pêk a.
15Esauva richi zuang risui dân chu hingka hin a nit. Esauva nai lutîr Elifaza kha hi namhei richibul hih a nit: Temanhei, Omarhei, Zefohei, Kenazhei, 16Korahei, Gatamhei, Amalekhei hi an nit. Khahei khah Edom rama Elifaza richi, Edom rama om, Esauva nupui Adaii richihei chu an nit.
17Esauva naipa Reuela richihei chu hihei hih an nit: Nahathei, Zerahei, Sam-hei, Mizahei hih. Khahei khah Esauva nupui Basemathi richihei chu an nit.
18Esauva nupui Oholibami richihei chu hihei hih an nit: Jeusa chihei, Jalam chihei, Kora chihei hih. Khahei khah Anaa nainu Oholibami, Esauva nupui richihei chu an nit. 19Khahei murdi khah Esauva, Edoma khom an iti ngai, richi rui dang danghei chu an nit.
Seira richihei
(1 Rich.1:38-42)
20Hi rama lei iom pial Hor mi, Seira richi nam zuang risuihei chu hihei hih an nit: Lotana hei, Sobala hei, Zibeona hei, Ana hei, 21Disona hei, Ezera hei, Disana hei hih. Khahei khah Edom rama Hor nam Seira richihei chu an nit.
22Lotana naihei chu Hora neh Hemana an nit a. Lotana khan farnu Timnaii ai nei a nit.
23Sobala naihei chu hihei hih an nit: Alvana hei, Manahata hei, Ebala hei, Sefoa hei, Onama hei.
24Zibeona khan naiipa inikah a nei a: Aia neh Ana an nit. Ana hih a nit, a pa sakuartunghei ân lêng lâia ramchâra silum#36:24 ‘Tui ilum khur’ a nit. Ramchâra tui ilum khur manih tuinâr manih va mu chu isîr inrup pial a nit. imu suaktu kha a nit. 25Ana khan naiipa Disona neh nainupang Oholibami ai nei a nit. 26Disona khan naiipa Hemdana hei, Esbana hei, Ithran hei, Kherana hei a nei a.
27Ezera khan naiipa ithumkah Bilhana hei, Zavana hei, Akana hei a nei a.
28Disana khan naiipa Uza neh Arana hei ai nei a nit.
29-30Hihei hih Hor nam rui dang dang chit, Edom rama omhei chu an nit: Lotana chihei, Sobala chihei, Zibeona chihei, Ana chihei, Disona chihei, Ezera chihei, Disana chihei hih an nit.
Edom rênghei
(1 Rich.1:43-54)
31Israelhei khan rêng an la nei maah khan hihei hi Edom rama rêng ichang tâkhei chu an nit. 32Beora naipa Bela kha Edom ram rêng a chang a; a khopui riming kha Dinhaba a nit. 33Bela khah a thi a, Bozra khuaa mi Zera naipa Jobaba khan a thûl a. 34Jobaba khah a thi a, Timanhei rama mi Husama khan a thûl a. 35Husama khah a thi a, Bedada naipa Hadada khan a thûl a. Ani hih Moab rama Midianhei inêtu kha a nit; a khopui riming khah Avit a nit. 36Hadada khah a thi a, Masreka mi Samlaa khan a thûl a. 37Samlaa khah a thi a, Eufratis vadung rikama Rehobot kho mi Saula khan a thûl a. 38Saula khah a thi a, Akbora naipa Baalhanana khan a thûl a. 39Akbora naipa Baalhanana khah a thi a, Hadada khan a thûl a; a khopui riming khah Pau a nit. A nupui kha Mehetabeli a nit a, Mezahaba nai Matredi nainu a nit.
40-43Esauva khah Edom namhei richibul a nit: Timna namhei, Alva namhei, Jethet namhei, Oholibam namhei, Ela namhei, Pinon namhei, Kenaz namhei, Teman namhei, Mibzar namhei, Magdiel namhei, Iram namhei hi Esauva richihei an nit. An omna hual khan â omhei nam riming kha an înriput chit a nit.
Khahei khah Esauva richi, Edom mi, Edom rama omhei chu an nit.
Attualmente Selezionati:
RIPHUTNA 36: BIATBSI
Evidenzia
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
The Bible Society of India
© 2014, Used by permission. All rights reserved. More
