Gadiyeeda Giijasoodiga 2
2
Hinnooda Gurorooda Ghaydit
1Iiduw nea nihitta eaweeda Bendegosti, abeeda gwanda fugasean hijagi. 2Deagheatta ghwaanya ghuutta leabu humng'eeda nyashta jeammeeda sharareeda ng'waan, ea ghwanung' ghwannyiit ghooriidida sinda jeedean. 3Gwardu duguuga uurji ng'ushapta beasta, ak goobitpissa uhuumba gilinyoo ea siihi. 4Hean geannyiit sean uurda Gurorooda Ghaydit ak gabalool aba iit nuut aba gidagassiida Gurorooda gwarukutteayda.
5Nea abeada aba Yerusaleemu gwanda Yahuudi fuga bada Aseetta, leabu emoojiga sean bea jeeda ng'eanyiida. 6Hean nea geeyiy ghuutteaba nyeashtida ghabwat geat fuga sang'a nea ghahamng'eanyi sean muuchchi aba gideaba gaba sii iiy nuut nea gabaloola itta gheannyaawa. 7Ak geabeal nea geahamng'eanyi, ak geeyi, “Heappi fiisu seanin siyinnyi nea gabalooldunuun mii fuga ng'eeanyiida Galilaaya? 8Ak ghoawattaan anda geayiinnyi gil was sii nea gabaloola iitta ghaheanya? 9Fuga ng'eanyida Partiya, ea Meedi, ea Elaami, ea fuga abiitta Mesopotamia, Yudeeya ea Gabadokkiya, Boonto ea Asia, 10ea gealeabu Frugia ea Bamfiliya, ea Misri, ea gealeabu murdajeega Libya, ea gea leabu Kirene, ea rabasta leabu ng'eanyiida Ruumi, sea fuga Yahuudi ea gea niyamwa ghoaw fuga diineeda Yahuudi, 11fuga Grette ea fuga Araabiya, geayiinnyi nea gabaloola sean iitta ghaheanya gadiyoojiga heas bea Aseetta.” 12Hean ghahamng'enyi sean nea ghang'ut muuwda, nea gaba siisi anyaash nuut nea geeyi, “Seh ng'asheanji naaha?” 13Hean gwanda fuga juuga suurja nea geeyi, “Fiisu niboogit aba difaayeeda heesseadi.”
Gidargweachta Betro
14Ghang'eat Betro ghaminaada sea giijasoodigiga attamanaagin, ak ghwajaat ghuttannyi gorgweaksa buuneeda nea gwayeashsha, “Ea fuga Yudeeya ea buuneessean abiitta Yerusaleemu, geagasayi anala ng'asheesu, ak golleysiiniit ng'asheegeasu ak ghoanalli nea ghoayiinnyi iidigeagwa ng'asheasu 15Aba gideaba fiisu miigaboagit, aba gidoorarji, aba gideaba ghwasan ghamneawa nea aseetta gutgaba samwagu bea sakteayda; 16nii deaghayi rugu sibaneeda sugura Yoeli,
17‘Nea aba askwearjoojiga huydean gaygwasnu, gwayi Aseetta, gaydadaw buuneassean Guroroodeanyu, ak dibigeagwa was balloojiga ea haweega, gayghwaramoaran ak gheareemangeagwa gayghwadaah girgweatka, nea gweargweagwa gaygoorgweadi girgweatka;
18eara soomjoogeasu was headiga ea gweallajeega askweajoojikka gaydeadabearsa Guroroodeanyu; ak gayghwaramoaran.
19Ak gaydahiimu deamdeamanga, aba humng'eeda, ea gwadeagooda aba hiji bea ng'eanyiidean, foojeanda, ea beasta, ea aroosta haw;
20ak gayghwayamwa aseetta gamsaniit, ak ghwayamwa sheeda ea ghawaar foojeanda, damanda miighwahinna eaweedida bea Ng'uttamiidean, eaweetta biissa ahaw ak adaajiin
21Ak abeeda siida wassean nyoo gaguursa gheawunga Ng'uttamiida gajeelealu.’
22“Fuga Israeeli, olleeysiina iit ng'asheesu: Yeesuuyda Nasareetti, was siida muuwwuneegwa Aseetta aba gadiyoojiga hees ea deamdeamanga ea gwadeagwajeega ghayi sin Aseetta appadaydaannyi aba dageascheedeang'wa, gawuurji gidoanaldi agooga, 23Yeesuheeni siyaat humng'eeda aba gidabay ghwanalda Aseetta, ak goongoorji ak goonuuschi aba geattinga fuga munyas. 24Ak siisi iiduw gooduudu Aseetta, nea gageandeawa sawanadeeda miyeeda, aba gideaba niny moammu ghoang'ng'waay miyeeda. 25Aba gideaba gwayi Dawdi appadaydaannyi,
‘Aniini iissa ghaadaayi Ng'uttamiida aba madeedeanyu,
aba gideaba niny gwanda meatkweedeanyu bea geattinda dugwa ak abeeda ea meettuumduuman;
26aba sarean gang'weela guroroodeanyu, nea gahoosan ng'ushapteanyu;
nea ghwaraanya saseedeanyu gaygoobiida jeeda rarooda.
27Aba gideaba maynung'siina guroroodeanyu heeda maloonghajeega,
ghana nung' ghaghaarshan Siidaang'u Ghaydit.
28Ak ea ninung' danal naweadinga eaweega;
nea ginnyiichchaan ng'weellooda aba iisindeayi.’”
29“Fuga eaduupcheewi, geagasayi darukuneegwa nea geang'achchi idigeagwa aba ng'asheega ararji ghayi nyas sugoochcheanda siyi Daudi, niny ghayi ghami ak geebuy, ak bung'eadannyi gwanda hiji bea ng'eang'deanyean ea ghoaw ghamneawa. 30Amaduw nea ghoaw sibaneeda, ghwanal gideaba Aseetta niyaak habeawooda appadaydeaba niny gideaba gayghwayiin hoorgeadannyi siida jea gwaleabu jattannyi, 31gabean ghwadaa ak gabaloola duunnooda Gristo, ea gideaba niny miyeenung'usa Gheeda Maloonghajeega, nea saseadaannyi ea mii goomealu. 32Yeesuheeni gooduudu Aseetta, ak aba ng'asheanji geewoschi muushoodiga. 33Nea geettiing'da ea ghwahitta meatkweeda geattinda dugwa bea Aseetta, iiduw nea ninyas aba heeda Bwaabwa helleesiinda Gurorooda Ghaydit, ng'atta goodalealsa gitta oadaayi nea ghoayiinnyiin. 34Aba gideaba Dawdi niny miigwadiyeada ea gawa humng'eeda; aba gideaba gwayi niy,
‘Ng'uttamiida gwayeeshsha: Ng'uttamiideanyu, Apteadawana meatkweedeanyu bea geattinda dugwa,
35ea danung' ghoaw weajoodigaagu hoorgeeda geeshangaagu.’ 36Fuga sean bea gheennyea Israeeli, gammiissa ghwanal aba huumwa gideaba Aseetta ninung' ghoaw Yeesuheeni ghayi ongoorjiin Ng'uttamiida ea Gristo.”
37Ak ghwayiy buuneeda ng'asheesu ak gwasawana guroruunatka nyaawa, hean geennyaash Betro ea giijasoodiga suurja nea geeyeeshsha, “Fuga siduupcheewi, gajeasina naaha?” 38Ghwalamda Betro ak gwayeeshsha, “Aduukkuunana, giliwas sih geeppaattiisananeegwa gheawunga Yeesu Gristo aba samsiinda ring'eegeagwa; ak gegooneegwa Gurorooda Ghaydit. 39Aba gideaba helleesiinda deang'wa gil ea diibigeagwa ea buuneessean sheagachchi, gilinyoo ea sih gil jea gaguursa Ng'uttamiideanya was Aseetta.” 40Ng'atta gamuuwwu aba ng'asheega suuk saang'a nea ghamiin gheanyanga nea gwayeeshsha, “Alealni geat aba seaygeeni munyasiin.” 41Hean fukka mwas ng'asheandaannyiin geeppattiisan, ak ghoahaada eaweettida fii sagalamnyooji samwagu. 42Ak goodeaga geat ginealshooda giijasoodiga nea gabareannyi, aba banachta mukkatte ea mooshta Aseetta.
Gibinda fuga mwas Aseetta
43Iiduw ghwanyas giliwas sih muuwda; ng'atta geesin ng'asheega hees ea gwadeagwajeega aba geattinga giijasoodiga. 44Ak fuga sean mideawa masaweegean goobiida hijagi ak eara haleanjeennyaawa gekkuuyi; 45inyeessa gaba nishayda haleanjeedannyi mideawa ak gwalakkiisa geat ak gaba siisi siittaw gidaga. 46Nea inyeessa galagasean geronnyeesa sean jeeda gheeda sibatta Aseetta nea geabwanach mukkatte aba gealga nyaawa, ghwaak hamitta nea gahoosan guroruunatka nyaawa, 47iiduw geduumsheesa Aseetta nea ghabwariy buuneessean. Ak ghwanung' Ng'uttamiida ghoahaada monneeda fuga silealu galeagasean.
Attualmente Selezionati:
Gadiyeeda Giijasoodiga 2: DTGANT09
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Datooga New Testament © Bible Society of Tanzania, 2009.
