Gadiyeeda Giijasoodiga 10
10
Betro ea Gorneliyo
1Abeeda aba Gaysariya gwanda siisi suguura Gorneliyo, was shirikkarajeanda haw ambal lugooda shirikkareeda leabu ng'eanyiida Italiya, 2siisi amiy ea fugeaba gheanyi sean, ak goowali Aseetta, iissa ghoadayda haleanjeeda sisappa geadi bea ghadoweeda ak ghaweat buuneeda, nea inyeessa ghamwash Aseetta galagasean. 3Ghayi eaweechcha nea gaba aseetta shageash bea askweari ghwadaa muuchchi aba girgweatka malaykajeanda Aseetta nea ghwahidu gah ak gwayeeshsha, “Gorneliyo.” 4Gang'ula nea nibeal ak gwayeeshsha, “Naaha gil Ng'uttamiida?” Ghwalamda ak gwayeeshsha, “Mooshtaang'u bea Aseetta ea haleanjeeda isabi geadi nidiyeada ak ghoaw giipkeatta aba madeeda Aseetta. 5Asi ajeakta ghamneawa buuneeda gaweay ng'eanyiida Yoppa, gaguursa siisi suguura Simon, nea geeguura Betro; 6niny gwanda gheappa siisi suguura Simon, was siida naba muuchchka, mida gheannyi ghuutta basooda.” 7Iiduw nea gabiikta malaykajeanda, gaguursa fii iyyeenya was soomjoogaaschi ea shirikkarajeanda aba jeedeaba fukka amuukku ninyiin, 8ng'atta nea nirukusa saawa ng'asheega sean goojeakta ng'eanyiida Yoppa.
9Iimuchchu nea gwanda naweeda nea abeeda eaniriiksa mujiini, ng'atta gwading'da Betro uhuuda gheeda ghamwaash Aseetta nea gaba aseetta lah. 10Iiduw, ghwayeachchi ak gagasa gichchea ghwaak; damandida siweay eegasa gichchea ghwaagiin ghwalas gheatta ruweanga ak goorgweadi 11ak ghwadaa nea ghwajaada humng'eeda, ak geerareang'u giduurji hang'da haw, nea geeng'waanyaan meatkwajeega sean asang'wan ea ghwahidu ng'eanyi. 12Jeedeaba hang'dida abeeda gwanda diyeanga sean ea gea badiina jeesinga ea dariidakka ng'eettiida. 13Ak ghwayiiy nyeashta nea gwayeeshsha, “Betro, ng'eada; nuusa ak giyaagi.” 14Ghwalamda Betro ak gwayeeshsha, “Manda, Ng'uttamiida; aniini miidaak eara heedaghayi haleanjeeda geallaan ghana gilinyoo gwandeawa ririnyeanda.” 15Gabiikta ghwanya ghuutta gichcha deaba iyyeenya nea gwayeeshsha, “Haleanjeeda nimmiidu Aseetta, adiguuri duguuga geallaan.” 16Ng'asheanji gabiikta nibwa samwagu, iiduw gitta geettealda humng'eeda aba geeshangiga.
17Damani duu ghahama ng'eanyi Betro aba ng'asheesu daa aba girgweatkean gidawas, ging'ulayi, fuga gwachchi ajeakta Gorneliyo, ea nihita gidaghuutta ghee Simon, hean ghamiinaada aba gidaghuut 18ak gaguurda nea ghoanyaashta Simoneeda suguura Betro mida jeedeaba gheawi. 19Damani gudugooteemsheewa Betro aba ng'asheesu gwachchi dahiin, gwayeeshsha Gurorooda niny, “Ng'ulla, gwanda fii samwagu jarooda nea gagasseey. 20Lamwaja rarang'aada ak giideayeewi nea adibeali; aba gideaba fiisu geajeagu aniini.” 21Ghwararang'aada Betro ak gwayeeshsha fukkeanji, “Siida ogaseadayi aniini, ghwasaan anda googassean?” 22Ghwalamda ak gwayeeshsha, “Goojeakneasa shirikkarajeanda haw ambaliischi suguura Gorneliyo, was siida awali Aseetta, ak gwasissa emeeda sean bea Yahuudi mureeda, ak siisi gwayeeshsha malaykajeanda ghaydit gideaba una gheedeaba siisi, ak golleeyseey iit gidajea rukuni.” 23Gaguursa ak ghwanung' ghoaw rabastaannyi. Iimuchchu ghang'eat gawa nea goodeayi fiisu, ea fiisu ng'ay siduucheewi leabu ng'eanyiida Yoppa ak goodeayi niny. 24Eaweetteaba iyyeenya geehitta ng'eanyiida Gaysaariya. Nea abeeda Gorneliyo gafurda fiisu ak gaguursa fugeaba gheanyi ea fuga duupchi. 25Iiduw nea ghwahita Betro ghoah gwaritta jarooda Gorneliyo ghwadeapta ak gwatkuy aba madeeda geeshangaaschi ak ghaghadoawan. 26Gagatgana Betro ng'eanyi nea gwayeeshsha, “Ng'eada, earaniini geawaschi siida.” 27Damani duu gabaloola sea ninyiin, gawa gah ak ghwanyasa fuga saang'a bwatgeat; 28gwayeeshsha fukkeanji, “Agooga goobay anala gideaba gilinyoo ea siida Yahuudi gil mwahida gideaba gay gaguuy sea fuga emoojiga suuk; nea aniini aniihiimnaani Aseetta gideaba adeaguuri siida wassean siida geallaan ghana gili bea ririnyaan. 29Ghoaw sareani heetta iyooguuru ghaahidu nea mwaashaang'iin, asi gaydaanyaasheagwa googuuru naaha?”
30Ghwayeeshsha Gorneliyo, “Ning'atta eawooji ang'wan, ak damanda uurji nii, ak ghamwaashchi Aseetta aba jeedeaba gheenyu; nea gaba Aseetta shageash bea askweari; ak ging'ulayi, ghamiinaada siida aba madeedeanyu nea gookkwa hang'weakka eashish, 31nea gwayi, ‘Gorneliyo, mooshtaang'u bea Aseetta siyiiy ak eara haleanjeeda isabi geadi ea niipkaat Aseetta. 32Ajeakta siida gawa ng'eanyiida Yoppa gaguursa siisi suguura Simon nea gheawunga suuk geeguura Betro; gwanda gheappa siisi suguura Simon, naba muuchka, mida ghuutta basooda.’ 33Ak geajeagu buuneeda aba geeshangiga ak eara ang'iing'i gidoabiiwi muuchchi aba gideaba guwuuni. Asi ghamneawa aseasa geendi hiji bea madeeda Aseettean, elleeysiiniit ng'asheega sean indeawi gonnyi Ng'uttamiida.”
Gidargweachchta Betro
34Ng'atta ghoang'eat Betro baloaldaannyi nea gwayi, “Aba huumwa neajeeng'u gideaba Aseetta manda shiitmeeda; 35aba jeeda giliwas eamwa siida wassean awali gheang'da Aseetta nea gwasna gea miyaas siisi gayghamwas niny. 36Ak ghoanalli ng'asheanda ghayi ajeaksa fuga Israeeli, bea rukwiideayda giijasta miy bea hoyyoo aba naweetta bea Yeesu Gristoohiin, (nea niny ea Ng'uttamiida buuneessean,) 37ng'asheanda ghayi sirukwiida aba ng'eanyiissean bea Yahuudi, ng'eada Galilaaya, iing'atta gibattiisanda rukkwiida Yohaana: 38gidamwaarda Aseetta Yeesuyda Nasareetti aba Gurorooda Ghaydit ea uurda; ea gidaneayeatta nea gwasin ng'asheega miyaas nea ghoahaap buuneessean minighis meang'nyeandeendean, aba gideaba Aseetta gwandeayi sea niny. 39Aseasa geawoschi muuwshoodigeaba ng'asheesu sin seaniin aba ng'eanyiida Yahuudi ea Yerusaleemu. Iiduw genngoorsa uhuuda geetta ak geenuus; 40ak eaweetteaba samwagu gooduudu Aseetta ak ghwanung' eadaah; 41ak ea mii heeda buuneessean gil, geaghus heedeanya ghayi loadeasa Aseetta eahuuwa muushoodiga, ghayi siyeagiischi nea geleeshi sea niny iing'atta dunnooda duunna miyeedean. 42Ak goojeaktaneasa erukkwiida giijasta Aseetta aba heeda buuneeda, nea gorukwiidi gideaba nii dea ghayi iin Aseetta geattinga uhuudaannyi gil jea ghoaw dea jea goorgweaksa fuga majeekjeew ea gea nimeewa. 43Ghayi niny gabean gamuuwwu sibanga gideaba siida wassean nyoo ghamwas siisi gayghwanyas samsiinda ring'eagaaschi sean aba gheawungeaba siisi.”
Fuga Emoojiga Ghwanyas Gurorooda Ghaydit
44Damani duu gabaloola Betro ng'asheesuun, gwashuubeesa Gurorooda Ghaydit fukkeanji alleeysiit ng'asheesuun. 45Nea fukka mideawa masaweega leabu jeeda fuga siyaat ghasmeahooda ghayi adeena Betrohiin ghahamng'eanyi, aba gideaba Gurorooda Ghaydit siittaw eara fuga Emoojiga. 46Aba gideaba geeyiiy nea gabaloola iitta emooji suuk nea geekghambiit Aseetta. Ak gwayi Betro, 47“Gwanda siida jea ghaweada beega fiisu ea meppattiisana nea ninyasta Gurorooda Ghaydit gissinyasti aseasa?” 48Ghwanung' eppattiisan aba gheawunga Yeesu Gristo. Ak gamus ghanyi gwandeayi eawoojusu ng'ay.
Attualmente Selezionati:
Gadiyeeda Giijasoodiga 10: DTGANT09
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Datooga New Testament © Bible Society of Tanzania, 2009.
