Ageini 3

Dub ka Dano

1 # Gianyuta 12.9; 20.2 Twol oudo riek kalamo leini me obar dedede kame Rwot Rubanga oudo otimo. En eko penyo dako be, “Ateteni Rubanga owaco ni be kur icami anyakini me yat moro kame tie i poto?”

2Dako oko dwoko ne twol be, “Wan otwero camo anyakini dedede kame tie i poto noni; 3do Rubanga owaco be kur ocami anyakini me yat kame tie i dier poto, akadi mule da; ka otimo kamanono, obino to.”

4Do twol oko dwoko ne dako be, “Wun likame ibinunu to; 5pien Rubanga ngeo be ka wun icamunu anyakini me yat no, wangu bino yabere, di ikounu doko cal bala Rubanga, ikounu bino ngeno poko gikame ber kede gikame rac.” 6Aso, kakame dako oneno kede be anyakini me yat nono oudo ber me acama, doko oudo ecil ki wange, kede da be yat nono oudo mio dano doko riek, en eko ngwedo anyakini mere eko camo, eko mino cware da mogo di eda eko camo. 7Di do wang gin dedede oko yabere kiko ngeno be oudo kitie nono; kiko kuno pote me yat epigi kiko rwano i pier gi.

8Otieno me ceng nono di piny okwei, gin kiko winyo di Rwot Rubanga oudo tie ot ki poto, di gin kiko pwono ne Rubanga i dier yen me poto. 9Do Rwot Rubanga oko lwongo icuo di eko penye be, “In itie tuai?” 10En eko waco be, “Ango awinyo mor me tieni i poto di lworo oko maka, pien oudo atie nono, omio ako pwono.” 11Rubanga oko penye be, “Ngai owaco ni be itie nono? Mam in icamo anyakini me yat kame ango aciki be kur icami?” 12Icuo oko dwoko be, “Dako kame in imia pi bedo keda en komia anyakini me yat nono, di ako camo.” 13#2 Jokorinti 11.3; 1 Temeseo 2.14Di Rwot Rubanga oko waco ne dako be, “Nyo ine kame in itimo ni?” Dako oko dwoko be, “Twol en kongala di ako camo.”

Rubanga Ongolo Kop

14Di Rwot Rubanga oko waco ne twol be, “Pi kite kame itimo kede man, in kolami i kom leini dedede kede i kom giakuo dedede me obar; in ibino donyo liao kede kori, doko ibino camo apua i kare me kuo ni lung. 15#Gianyuta 12.17Abino mino ading bedo tie i diere nin kede dako, kede i diere me ikwae nin kede mege; gin kibino nyonyoto wii, ida ibino totongo atitinyo gi.”

16Di eko waco ne dako be, “Abino medo ni aramo i kare me nywal; ibino nywalo idwe kede twon aramo. Bed bala kamanono da, in pwodi cunyi bino mito cwari, doko en ebino pugi.”

17 # Iburanian 6.8 Eko waco ne icuo be, “Pi kite kame in iwinyo kede dwan dako nin di iko camo anyakini me yat kame oudo ango agengo ni camo, kolamo lobo pi in; ibino camo gikame wok kiye ka itimo tic kede kwok i kare me kuo ni lung. 18Okuto kede doi bino tui iye; doko ibino camo giapura me poti. 19Kwok ni en kame bino mini iudo cam paka tuno in dok i lobo, pien kokwanyi kiye; in ibedo apua doko ibino dok i apua.”

20Icuo oko cako ne dako mere nyinge be Keba, piento en ebedo toto me jo dedede. 21Rwot oko timo egoe me lau ne Adamu kede dako mere, eko ngapo negi.

Rubanga Oriamo Adamu kede Keba ki Poto

22 # Gianyuta 22.14 Di Rwot Rubanga oko waco be, “Neningo, dano otieko doko cal bala wan, engeo gikame ber kede gikame rac; nan doko eromo ngwedo anyakini me yat kame mio kuo di eko camo, di eko bino bedo kuo nakanaka.” 23Pi mano, Rwot Rubanga oko riame tenge ki poto me Eden, pi ot puro lobo, en gikame kokwanye kiye. 24En eriamo dano tenge di eko keto cerubim kede epima kame liel mac di ewire pi daro yongayo kame donyo kakame yat kame mio kuo oudo tie iye.

Attualmente Selezionati:

Ageini 3: BILK13

Evidenziazioni

Copia