Yoni 1

Mago vekamo agiʼamo Goti Geʼamae, huno huʼniya gemae

1 # Yo 17:5; 1 Yo 1:1-2; Le 19:13 Akeyaʼvilagamo Gotiʼa ma mopamo alo osuʼneno aepa faiʼniya afinatetiʼmo mago vekamo agiʼamo Goti Geʼamo maiʼniye. Ani vekamo Gotiʼeʼmo magokepi lokaeʼana maiʼneʼanaeʼmo Gotikeʼmo maiʼniye. 2Agaemo aepa faiʼniya afinatetiʼmo Gotiʼeʼmo magokepi lokaeʼana maiʼnaʼae. 3#1 Ko 8:6; Kl 1:16-17; Hi 1:2Gotiʼa agaetetikeʼmo muki asole yaʼamo alo huʼniye. Magoke yaʼmo mago alu katetiʼmo alagi afole oʼaiʼniye. 4#Yo 5:26Agaemo alagepa huʼa neʼmaiya kavaʼmo aepa vekamo maiʼnigeno agaepatikeʼmo alagepa huʼa neʼmaiya kavaʼmo afole aiteno vayaʼaitegamo aeno ha leʼnigeʼa ageʼnae. 5#Yo 3:19Ani aeno ha neleya yaʼmoʼa hanipiʼmo aeno ha nelegenoʼaeʼmo hani huʼniya yaʼmoʼa magoʼe huno aeno oʼagaseʼniye.

Ani vekamo Goti Geʼamo ma mopafiʼmo afole aiʼniya gemae

6 # Mt 3:1; Lu 1:13-17,76 Gotiʼa mago vekamo agiʼamo Yoniʼa alino ateʼnigeno eʼniye. 7Agaemo aeno ha neleya yafeʼmo ava gemo huno hapa paisigeʼa muki vayaʼmogi geʼamo afiteʼapaeʼmo apakesamo afiʼa fatago hisayafeʼmo eʼniye. 8#Yo 1:20Agaiʼamo aeno ha neleya vekamo oʼmaiʼnifa aeno ha neleya vekaeʼmo ava gemo aeno hakalo huno hapa paisiyafeʼmo eʼniye. 9#Yo 8:12; 1 Yo 2:8Ani vekamo alagi lama ge alagepa ha le vekamoʼmo muki vayaʼmo ma mopafiʼmo afole neʼaiya vayaʼmo ha le yaʼmo alino neʼapamiye. 10#Yo 1:3; 17:25Gotiʼa agaetetikeʼmo alo huʼniya mopafiʼmo afole aiʼniyaʼmonanafa ageʼa aeto osuʼnae. 11Agaemo koʼalegamo emineʼnigeʼapaeʼmo vayaʼamogimo aliʼa falu fala huʼa oʼateʼnae. 12#Ga 3:26Muki vayaʼmogi aliʼa falu fala huʼa oʼateʼnayaʼmonanafa agaiʼa agiʼalefeʼmo apakesamo afiʼa fatago huteʼa aliʼa falu fala huʼa ateʼnaya vayaʼmo Goti mafaʼneʼamo ha malesayafeʼmo himamuʼamo apamiʼniye. 13#Yo 3:3-6; Ye 1:18; 1 Pi 1:23Apakaemo itaʼapi afoʼapimogi kolatetiʼmo aliʼa oʼapatege apakaiʼapi hapauʼnigeʼa aliʼa oʼapatege alu vayaʼmogi hapauʼnigeʼa aliʼa oʼapatege huʼnayaʼmonanafa Gotiʼa agaiʼamo hauʼnigeno alino apateʼnigeʼa mafaʼneʼamo ha maleʼnae.

14 # Aiy 60:1-2; Ga 4:4; Fl 2:7; Hi 2:14; Lu 9:32; Yo 2:11 Ani vekamo agiʼamo Goti Geʼamoʼmo emineno agufamo aliteno nata neno emineno lagaeʼeʼmo magokepi lokaeno maiʼniye. Lagaeʼeʼmo lokaeno maiʼnigeta ageʼnonana ha le konali yaʼamo Afoʼamoʼmo aiya magoke mafaʼneʼamo aeto agufa kumani mafaʼneʼamo ha le konali yaʼamoʼa aeno ha leʼnigeta ageʼnone. Fiku laha maeno lamisiya kavaʼaʼe lama geʼaʼeʼmo aipafiʼmo havai teʼnigeno aeno ha leʼnigeta ageʼnone. 15#Yo 1:27,30; Mt 3:11Yoniʼa hunoʼaeʼmo, ani vekaeʼmo hogoteʼna ava gemo huʼna lapa paiʼnaeʼmo, nagae nakameʼmo huno esiya vekamo hogote vekamo maiʼniyaʼmofeʼmo aeno nagaseʼniya vekamo maiʼniye, huʼna lapa paiʼnove, huno hapa paiʼniye. 16#Kl 2:10Muki alagepa yaʼamo fiku laha maeno lamisiya yaʼamo agae aipafiʼmo havai teʼniya yaʼmo ani kava huno fiku laha maeno lamiteno halate magoʼe huno laha maeno lamiʼnigeta ago aliʼnone. 17#Hat 34:28; Lo 6:14; 10:4Ani kavatefeʼmo Gotiʼa Mosesetetiʼmo keʼaepa geʼamo lamiʼniyaʼmonanafa Yesu Kalaisitetiʼmo fiku laha maeno lamiteno lama geʼamo alino afole aino ateʼniye. 18#Hat 33:20; Yo 6:46; 1 Ti 6:16; 1 Yo 4:12; Mt 11:27Muki vayapatiʼmo magoke vekamoʼmo alagi Gotiʼmo oʼageʼniyaʼmonanafa Gotiʼa aiya magoke mafaʼneʼamoʼmo muki yaʼmo Afoʼamo haopaleʼmo maiʼniya mafaʼneʼamokeʼmo alino lave liʼnigeta ageʼnone.

Aniʼmo faleno neʼapateya vekamo Yonifeʼmo huʼniya gemae

(Mt 3:1-12; Mk 1:7-8; Lu 3:15-17)

19Yu vayaʼmogi Yulusalemu taonifatiʼmo mono huʼa neʼapataya vayaʼe Livai nofi vayaʼeʼmo aliʼa apateʼnageʼa Yonitegamo eʼapaeʼmo, ina lagamae, huʼa ge huʼa afi geʼnae. 20#Yo 3:28Afi geʼnagenoʼaeʼmo Yoniʼa mago gemo aeno ati okaeʼnifa muki geʼamo aeno hakalo huno hapa painoʼaeʼmo, Kalaisi vekamo oʼmaiʼnove, huno hapa paiʼnigeʼapaeʼmo, 21#Loa 18:15,18; Mt 11:14; Yo 6:14; 7:40Kalaisi vekamo oʼmaiʼnisanana kagikamo ina lagamo maiʼnane. Ilaiyagamo maiʼnapiye, huʼa afi geʼnagenoʼaeʼmo, Ilaiyaʼnamo oʼmaiʼnove, huno hapa paiʼnigeʼapaeʼmo, Goti Mukufi gemoʼa hunoʼaeʼmo, magoke vekamo Gotitegati gemo alinineno aeno hakalo huno hapa paisiya vekamo afole aigiye, huno huʼnigeta agava maiʼnone. Ani vekamo maiʼnapiye, huʼa ge huʼa afigeʼnagenoʼaeʼmo, haʼao, ani vekamo oʼmaiʼnove, huno hapa paiʼnigeʼapaeʼmo, 22ina lagamo maiʼnapigi laha paigeta aliʼa lateʼnageta eʼnona vayaʼaifeʼmo uta hapa paino. Kagaikaeʼmo ina laʼnamae huka nehane, huʼa afi geʼnae. 23#Aiy 40:3Yoniʼa hunoʼaeʼmo, Aiyeyaʼa Gotitegati gemo alinineno aeno hakalo huno hapa nepaiya vekamoʼmo mago vekaeʼmo ava gemo huno avoʼmo kae maleʼniye. Avoʼmo kaenoʼaeʼmo,

kaʼme kotegamo maiʼneno alopa gefatiʼmo hunoʼaeʼmo, Ala kava neʼmo esiya kaʼmo alagepa hutapa valita ateyo,

huno nehiye, huno avoʼmo kae maleʼniye. Nagaemo ani vekamo maiʼnove, huno hapa paiʼniye. 24Aliʼa apateʼnageʼa eʼnaya vayaʼmo Falasi mono vayapati vayaʼmo maiʼnae. 25#Mt 21:25; Yo 1:33Apakaemo huʼapaeʼmo, Kalaisi vekamo oʼmaige Ilaiyaʼnamo oʼmaige ani vekamo Gotitegati gemo alinineno aeno hakalo huno hapa nepaiya vekamo oʼmaige huʼnove huka nehanagi na kava higekaeʼmo aniʼmo faleka neʼapatane, huʼa ge huʼa afi geʼnagenoʼaeʼmo, 26nagaemo aniʼaletikeʼmo faleʼna neʼapatovaʼmonanafa lapakae folagapiʼmo mago vekamo maiʼniyana oʼageʼnae. 27#Yo 1:15; Ap 13:25Nagae nakameʼmo huno neʼeya vekamoʼmo aeno nagaseʼnigeʼna ina agufa vekamo maiʼnovaʼmofeʼmo suʼmo nofiʼamo afaʼa hakalu hesuva agufa kava huʼna oʼmaiʼnove, huno hapa paiʼniye. 28#Mt 3:6; Yo 10:40Yoniʼa Metamala taonimo mugagayaga faligamo Yoneni anipiʼmo aniʼmo faleno apateʼniya haopalegamo ani gemo afole aiʼniye.

Yesuʼa Goti aikeli sipisipi vekaʼamo maiʼniya gemae

29 # Aiy 53:6-7; Yo 1:40; 1 Pi 1:18-19 Egaʼamo Yoniʼa ageyana Yesuʼmo agaetegamo eʼnigeno agetenoʼaeʼmo, Ageyo, huno, ani vekamo Goti aikeli sipisipi vekaʼamae. Muki ma mopafi vayaʼai hosu kavaʼapimo alininuno atalegaiye. 30#Yo 1:15Nagaemo ani vekaeʼmo, nagae nakameʼmo huno esiya vekamo hogote vekamo maiʼniyaʼmofeʼmo aeno nagaseʼniya vekamo maiʼniye, huʼna ago aeʼna hakalo huʼna lapa paiʼnove. 31Agaemo oʼageʼnovaʼmonanafa Isaleli vayaʼmo aliʼna apave lisuvafeʼmo eʼna aniʼmo faleʼna neʼapatove, huno hapa paiʼniye. 32#Mt 3:16Yoniʼa agaefeʼmo faigoko geʼamo huno hapa painoʼaeʼmo, agovana Goti Aunemeʼamo kokuʼnapatiʼmo kaugoʼyavegana huno halelino emineno agaeteʼmo alagi hakaleno maiʼnigeʼna ageʼnove. 33#Lu 3:2-3Ageʼnovana ina lapi huʼna oʼageʼnovaʼmonanafa aniʼmo faleʼna apatesuvafeʼmo alino nateʼnigeʼna eʼnova vekamoʼmo, Nauneʼnameʼmo emineno mago vekaleʼmo maige maige huno maisigeka agegane. Ani vekamoʼmo naote Nauneʼnametetiʼmo aniʼmo faleno apatesiya vekamo maiʼniye, huno naha paiʼnigeʼnaeʼmo 34#Mt 3:17; 17:5; Mt 27:54ani kavaʼmo huʼna ageʼnovaʼmofeʼmo ani vekamo Goti mafaʼneʼamae, huʼna aeʼna hakalo nehuve, huno hapa paiʼniye.

Hogoteʼa Yesu geʼamo afiʼnaya vayaʼaifeʼmo huʼniya gemae

35Halate egaʼamo Yoniʼe geʼamo neʼafiʼa vekalaʼeʼmo he tiʼa maiʼnae. 36#Yo 1:29Yoniʼa ageyana Yesuʼa uʼnigeno agetenoʼaeʼmo, ageʼao, huno, ani vekamo Goti aikeli sipisipi vekaʼamo maiʼniye, huno hana paiʼnigeʼanaeʼmo 37lole vekalaʼmo geʼamo neʼafiʼa vekalaʼmoganimo afiteʼana Yesuʼmo akame huʼana uʼnaʼae. 38Akame huʼana uʼnaʼageno Yesuʼa aino afe leno anaketenoʼaeʼmo, na agufa yafeʼmo kahauya nehaʼae, huno anafi geʼnigeʼanaeʼmo, Lamai, ina ge huʼana Tisao, nehavana noʼmo haiyate haneʼniye, huʼana afi geʼnaʼagenoʼaeʼmo, 39etana ageʼao, huno hana paiʼnigeʼanaeʼmo eʼana magokepi lokaeʼa uʼnae. Netepiʼmo uʼa avaʼyi huteʼa anakaemo nehavaeya noʼmo ageteʼana agaeʼeʼmo ani afinaʼmo lokaeʼana mailiʼuʼa une tiʼnigeno yegemo uno lamino faleʼniye. 40#Mt 4:18-20Yoniʼa huʼniya gemo afiteʼana Yesuʼmo akame huʼana uʼnaʼa vekalapatiʼmo mago vekamo agiʼamo Eʼnaluʼa Saimoni Pita aganaʼamoʼmae. 41#1 Sam 2:10; Sam 2:2; Yo 4:25Eʼnaluʼa uno hogoteno nepuʼamo Saimonifeʼmo kahauya huno agetenoʼaeʼmo, Mesaiya vekamo ago ageʼnove, huno ha paiʼniye. Mesaiya vekae agimo aepaʼamo Kalaisi vekamo Gotiʼa aliʼyaʼaleʼmo lekana paino ateʼniya vekamae. 42#Mt 16:18; Mk 3:16Eʼnaluʼa Saimoniʼmo avalelino Yesutegamo uʼniye. Yesuʼa Saimoniʼmo agetenoʼaeʼmo, Saimoniyo, huno, Yoni mafaʼneʼamo maiʼnane. Kagikamo Sifasigae huʼna katove, huno ha paiʼniye. Sifasiʼa ina kava huno Pitaʼae agimo aepaʼamo yafane.

Yesuʼa Filipiʼe Natanieloʼefeʼmo ge huʼniya gemae

43 # Mt 8:22; Mk 2:14 Egaʼamo Yesuʼa Galeliya kotegamo visiyafeʼmo neʼunoʼaeʼmo Filipiʼmo uno agetenoʼaeʼmo, eka nakame huvo, huno ha paiʼniye. 44Filipiʼa Metasaita taonifiʼmo Eʼnaluʼe Pitaʼeʼmo maiʼnaʼa taonifiʼmo maiʼniye. 45#Loa 18:18; Aiy 7:14; 9:6; Yel 23:5; Iyi 34:23Filipiʼa uno kahauya huno Natanieloʼmo agetenoʼaeʼmo, Moseseʼa keʼaepa gemo avoʼmo kae maleʼniya Mukufiʼmo mago vekaeʼmo ava gemo huno avoʼmo kae maleʼnigeʼapaeʼmo Gotitegati gemo alini eʼa aeʼa hakalo huʼa hapa nepaiya vayaʼmogiʼeʼmo ani kava huʼa ava gemo huʼa avoʼmo kae maleʼnaya vekamo ago ageʼnove. Agiʼamo Yesuʼa Yosefe mafaʼnemo Nasalasa taonifi vekamo maiʼnigeʼna ageʼnove, huno ha paiʼnigeno 46#Yo 7:41,52Natanieloʼa Filipifeʼmo hunoʼaeʼmo, Nasalasa taonifatiʼmo magoke alagepa yaʼmo afaʼa afole aigifiye, huno afi geʼnigenoʼaeʼmo Filipiʼa hunoʼaeʼmo, afaʼa uka ago, huno ha paiʼniye. 47Yesuʼa ageyana Natanieloʼmo agaetegamo eʼnigeno agetenoʼaeʼmo, lama ge Isaleli vekamo maiʼniye. Magoke aigofe geʼamo ohaneʼniya vekamae, huno huʼnigeno 48#Sam 32:2Natanieloʼa hunoʼaeʼmo, haiya kava huka nageʼnane, huno afi geʼnigeno Yesuʼa hunoʼaeʼmo, nagaemo kageʼnovana Filipiʼa kagaefeʼmo keya aeno ge osuʼniya afinaʼmo fiki yosa aepafiʼmo maiʼnanageʼna kageʼnove, huno ha paiʼnigenoʼaeʼmo, 49#Mt 14:33; 16:16; Mt 27:42; Mk 3:11Tisao, huno, Goti mafaʼneʼamo maiʼneka Isaleli vayaʼaiteʼmo yagaika neʼapatana kini vekaʼapimo maiʼnane, huno ha paiʼniye. 50Yesuʼa hunoʼaeʼmo, fiki yosa aepafiʼmo maiʼnanageʼna kageʼnove, huʼna kaha paiʼnovaʼmofeʼmo kagesamo afika fatago nehapiye. Henagaʼamo mani kavaʼmo aeno agaseʼniya kavaʼmo afole aisigeka agegane, huno ha paitenoʼaeʼmo, 51#Aep 28:12alagi lama gemo kaha nepauve, huno, kagaemo ageganana kokuʼnaʼmo halo aisigeʼapaeʼmo Goti enisole vayaʼamogi Vemo mafaʼneletiʼmo uʼa haiteʼa emiʼeteʼa hisageka apakegane, huno ha paiʼniye.

Attualmente Selezionati:

Yoni 1: kyg2013

Evidenziazioni

Copia