KAHBHAO 2
2
1Hapa keiha vangshothü hatü kahdoknyü hatü halei nyupüthü lingei tem. 2Nyih nyetpabü kü Kahvangi büpai dükpü dou peü tem, hatü dousho peü kübü büpai nyiumeiyei nyih nyetpabü kü them. 3Hanangkü Kahvangi nyih nyetpabü-ü moihimanei daüeilanghü; mehenangkü ha nyih Kahvangi lingpü dousho peü kübü nyiumeiteke.
Eden Pemong
4Vangshothü hatü kahdok lingshingkü nyupü jung: Shembüpa Kahvangi kahdok hatü vangshothü lingpü nyih kü, 5pühivung meheyao neshiü hatü sheili vang meheyao nekoh-i nyu; mehenangkü Shembüpa Kahvangi vang mangshomi nyu, hatü kah linghen üpayao nenyuang; 6shejao kahmong leipü yung vamei kahdok shak kü yung shuohhen mü nyuteke.
7Hapheikü Shembüpa Kahvangi kahdok leipü ashem hanei yah-ei shennyak hük ling, hatü büpalei shongsha kü yangnyu ngü dushuoh, hatü hapa shennyakü yem leiteke.
8Hapheikü Shembüpa Kahvangi Edenei pe hük heong philei ling, hatü halei büpai lingpü shennyak tuh. 9Shembüpa Kahvangi kahmong leipü veihen meipü hatü hahhen meipü betjükpüthü kohei longhü, hatü hapa pe jiamei yangnyu pü, manghimei nyingpü püao nyuteke.
10Eden leipü yungyen hük pe kü yung shuohhen yenei sha, hatü hatouei ali anei phaakteke. 11Shongpü yungyenü Pishon; hapai hon nyupü Havilah kahdok shonei yenteke; 12hatü hapa kahdok leipü honü meishi nyüke; halei longi taoshi dangpü vong meipü meli hatü onyx douvang yaong dangnyüke. 13Nyipabü yungyenü Gihon; hapai Kush kahdok shinei yennyüke. 14Jempabü yungyenü Tigris; hapai Assyria heongphi kü yennyüke, hatü alipabü yungyenü Euphrates nyüke.
15 Shembüpa Kahvangi hapa shennyak yah-ei halei dou dükhen hatü ha kü junghen Eden pemongei tuh, 16hatü Shembüpa Kahvangi hapa shennyak kü, “Nüngi hapa pemong leipü lemphü hahhen aok, 17shejao nüngi manghimei nyingpü pü leipü tehah; mechem nüngi haleipü hahhen, nüng hingmei ha nyih-üng dihen” shei shahkung shuoh.
18Shaang Shembüpa Kahvangi, “Hapa shennyak büpa monha nyuhenü nemeiang. Ngei büpa mü jiüteipü sheühbü hük linghen khih” shei e. 19Shembüpa Kahvangi kahdok hanei yah-ei yemhimak hatü shangouthü ling. Büpai hathü kemei hapa shennyaki mehe men menkahen shei veihen müei dei, hatü yemlem ieyei kü hapa shennyaki mehe men men, hapayü yemhimakthülei men leiteke. 20Hapa shennyaki yemhimakthü hatü shangouthü peü kü men menteke, shejao shennyak shingvaishi büpa mü jiüteipü sheühbü hükao nedang. 21Hanangkü Shembüpa Kahvangi hapa shennyak mükhet meiyei shihütü büpai büpalei haampat hük yahtü maju phüngtük. 22Shembüpa Kahvangi hapa shennyak leipü yahpü haampati nyüha hük ling, hatü büpa touei pinnyü deijateke. 23Hahepak kü hapa shennyaki eteke:
“Shaang shomshiang hapa vangü ngelei vang;
hapa phaiyü ngelei phai;
pinnyü kü ‘Nyüha’ shei nyükhen;
mehenangkü pinnyü-ü baha leipü yahpeih.”
24Hanangkü baha hüki laophülei nyühipa tuhphongtü laophülei nyüha mü mongjemei nyunyeih, hatü jijinyi phai hük leinyeih.
25Hapa baha hatü chenyüha nyiphen bümkong nyu, shejao jiji neveütei.
Attualmente Selezionati:
KAHBHAO 2: PHOMBSI
Evidenziazioni
Condividi
Copia
Vuoi avere le tue evidenziazioni salvate su tutti i tuoi dispositivi?Iscriviti o accedi
Phom Naga Bible - DAÜLANGPÜ LAIHING
Copyright © 2005 by The Bible Society of India
Used by permission. All rights reserved worldwide.
