Matalikilo 8
8
Kumana kwa muyoba
1Lesa taakalinga kumulubiteeko Nowa abanyama mbwaakalingaabo mubwaato. Aboobo wakalengesha muuwo kupuupa amaanshi kuya ciyuma. 2Tuntupu twa maanshi apanshi ashilyaango sha miyoba mwiculu shakacalwa. Mfuula yakacileka, 3amaanshi akalinga kuya ciyuma paniininiini kwanshiku shili 150. 4Pabushiku bwalikumi anshiiku shosanwe ashobilo bwa mweenshi wasanu ayobilo, bwaato bwakekala pacilundu ca Alalati. 5Maanshi akatolelela kuya ciyuma lyalo pabushiku butaanshi bwa mweenshi walikumi nsonga sha tulundu shakaboneka.
6Ndipakeenda nshiku makumi one Nowa wakacalula mbwelyo ya bwaato, 7akutuma cikwangala. Cikwangala uyo taakwe kuboola sombi wakalinga kunoolelembabo mwiculu kushikila maanshi oonse ayuma. 8Muciindi ceenka ico Nowa wakatuma mpolobe kwaamba ayi abone na ayuma, 9sombi ceebo cakwaamba ayi maanshi akalinga kucilibo poonse poonse, mpolobe taikwe kucana pakwikala. Aboobo yakooluka kuboolela kubwaato, mpeeke Nowa wakakusha lyaansa akwiinjisha mubwaato. 10Nowa wakalindila kwanshiku shili shosanwe ashobilo, mpeeke wakatuma mpolobe alimwi. 11Ndyeyakapiluka macolesha, yakaletelela aliteu lya olifi. Aboobo Nowa wakeshiba kwaamba ayi maanshi aceyaako. 12Lyalo wakalindilaako ashimwi nshiku shosanwe ashobilo akutuma mpolobe alimwi. Ono ulu lweendo, taikwe kupiluka.
13Nowa ndyaakaba amyaaka ili 601, pabushiku butaanshi bwa mweenshi utaanshi, maanshi akayuminina. Mpomunyaawo Nowa wakacalula cisasa ca bwaato bunene ubo akubona ayi inshi itooya ciyuma. 14Bushiku bwa makumi obilo ashosanwe alimwi ashobilo bwa mweenshi wabili, inshi yakamaninina kuyuma.
15Mpeeke Lesa wakaambila Nowa ayi, 16“Swa mubwaato amukaako alimwi abana bako basankwa abalo abamakaabo. 17Kusha bayuni abanyama boonse kwaamba ayi bakashalane alimwi akumwaika koonse koonse pacishi ca panshi.” 18Aboobo Nowa wakaswa mubwaato amukaakwe alimwi abana bakwe basankwa abalo abamakaabo. 19Banyama boonse abayuni bakaswa mubwaato akuya mutukototukoto twa mishobo yabo.
Nowa mbwaakabenga mulambu kuMwaami Lesa
20Nowa wakayakila Mwaami Lesa cipaililo. Mpeeke pabanyama abayuni basalalite kweelana aMilawo, wakabwesa womwi womwi akubatenta pacipaililo bakabumbulu ayi ngumulambu kuli Lesa. 21Bweema bwa mulambu bwakakondelesha Mwaami Lesa, lyalo wakalyaamboosha ayi, “Teshi nkashinganewo cishi ca panshi alimwi ceebo ca sheesho muntu nshaacita. Ndishi kwaamba ayi kuswabo kubwanike miyeeyo ya muntu njibiibi. Teshi nkanyonyoolewo shintu shiyoya shoonse mbuli mbondacita bulya. 22Ono kulilabo cishi kaciciliiko, kunanooli ciindi ca kushanga akutebula. Kunanooli kutontola akulungula, cilimo amupewo, malumwi amashiku.”
Valið núna:
Matalikilo 8: BBBLI
Áherslumerki
Deildu
Afrita
Want to have your highlights saved across all your devices? Sign up or sign in
Lenje Bible with Deuterocanon © Bible Society of Zambia, 2003.